පවුල් බලයට යටවුණු පක්ෂ ක්‍රම දැන් වලංගු නෑ
අනුර ප්‍රියදර්ශන යාපා (පාර්ලිමේන්තු මන්ත්‍රී)
- ශ්‍රීලනිපය යළි ගොඩනගන එක අමාරු වැඩක් නොවේ
- තෙල්, පාන්, ලයිට් බිල් අඩුකරන පොරොන්දු දැන් දෙන්න බෑ
- ජනාධිපතිතුමාට මම වරදක් කියන්නෙ නෑ ඔහු අමාරුම කාලෙක ඇවිත් රට සන්සුන් කළා
- අපේ සංවාදය පුද්ගලයකුට විරුද්ධ සටනක් නොවේ
Q ඔබලා පොහොට්ටුව හැදුවේ ඒ තරම් පක්ෂයක් නෑ කියලා. හැබැයි මහා බලයක් අරන් අද නැත්තට නැතිවෙන තැනට පක්ෂය තල්ලු වෙමින් යන්නේ. කට්ටිය කඩාගෙන සන්ධාන හදනවා. මොකක්ද දැන් පොහොට්ටුවට වෙන්නේ?
ඕනෑම දේශපාලන පක්ෂයකටම ප්‍රතිපත්තියක් වගේ හොඳ වැඩපිළිවෙළක් තියෙන්න ඕන. ඒ වගේම පරණ සන්දර්භවල පක්ෂ තියලත් බෑ. පවුල් බලයට යටවුණු, පවුලේ අය විතරක් ඉන්න පක්ෂ ක්‍රම දැන් වලංගු නෑ. ඒ වගේම අන්ධභාවය දැන් නෑ. ඒ නිසා මම හිතන්නේ නෑ පොහොට්ටුවට ලොකුවට වලංගුභාවයක් තවත් ඉතුරුයි කියලා.
Q අපි දැක්කා එදා ශ්‍රී ලංකා නිදහස් පක්ෂය හැරලා ගිය අය ටික ටික එනවා. ඒ කියන්නේ පක්ෂය එකතුවෙන්නද යන්නේ?
ශ්‍රීලනිපය මේ රටේ හැදිලා තියෙන්නේ යම්කිසි ප්‍රතිපත්ති සමුදායක් තුළ. පක්ෂය පසුගිය කාලේ වෙනස් විදිහට වෙනස් වුණත් මේක ඉතාම පුළුල් විදිහට මහජනතාවගේ ආදරය දිනාගත්ත පක්ෂයක්. ඒ පක්ෂය ගොඩනගන එක අසීරු දෙයක් නෙමෙයි. ඒ වෙනස්කම් මොනවද කියලා තෝරා ගත්තොත් පක්ෂය නැවත ගොඩනගන එක මහ දෙයක් නෙමේ.
Q පක්ෂයක් වෙනස් වෙන්න ඕනද? නැද්ද?
ඕනම පක්ෂයක් කාලීනව වෙනස් විය යුතුයි. ඒ වෙනස සිදුවිය යුත්තේ කොහොමද කියලා ශ්‍රීලනිපය හිතනවා නම්, වෙනස්කම් මොනවද කියලා පක්ෂය හිතනවා නම් ඉක්මනින් පක්ෂය නැවත හදාගන්න පුළුවන්. පක්ෂය ඉදිරියට යා යුත්තේ කොහොමද කියලා තේරුම් ගන්න ඕන. මොකද මේ පක්ෂය වැළඳගත්ත පරම්පරා ගණනාවක් ඉන්නවා. ඒ නිසයි මම කිව්වේ මේක ගොඩනගන එක අමාරු දෙයක් නෙමේ. ඒක හරියට කරන්න ඕන.
Qඔබ ශ්‍රීලනිපයේ හිටිය අයෙක්. ඔබට ආරාධනාවක් තියෙනවද?
මට කාලයක ඉඳලා ආරාධනා කරනවා. ඒ තීරණය ගැන හිතන්න වෙන්නේ පක්ෂයේ සිදුවන වෙනස්කම් එක්ක. මොකද පෞද්ගලිකව මම ගියා කියලා ශ්‍රීලනිපයට මගෙන් වෙන දේකුත් නෑ. පක්ෂයෙන් මට වෙන දේකුත් නෑ. නමුත් මේක පුළුල් පරාසයක සිදුවිය යුතු දෙයක්. මොකද වර්තමාන දේශපාලනය එක්ක ගතයුතු දෙයක්. පවතින ආර්ථිකය එක්ක පක්ෂයේ හැඩය හදාගන්න ඕන. මොකද මේ සියල්ල සිදුවෙන්නේ රටේ ආර්ථිකය අනුව. රටේ ආර්ථිකය කඩාවැටුණම අපිට තියෙන්නේ වහසි බස් කියන එක නෙමේ. මේ රට ගොඩනගන්නේ කොහොමද කියලා හිතන එක. ඒ සම්බන්ධයෙන් පුළුල් සංවාදයක් හදන්න පුළුවන්. ශ්‍රීලනිපයට ඒක කරන්න පුළුවන්.
Q නිමල් ලන්සා කියන්නේ රාජපක්ෂලාගේ සමීප අයෙක්. දැන් ඔහුත් වෙනම දේශපාලන ගමනක් ආරම්භ කරලා. සන්ධානයක් හදලා. ඔබට ආරාධනා කළාද ඒ වැඩේට?
ඒ සාකච්ඡාවේ අපිත් එක් කොටසක්. අපි මෙතන සිද්ධ කරන්නේ අලුත් දේශපාලන සන්ධානයක් හදන එක නෙමෙයි. රටේ පවතින තත්‍ත්වයට විරුද්ධව පාර්ලිමේන්තුව තුළ ඉන්නවා විශාල පිරිසක්. අන්න ඒ අය එක්ක තමයි මේ සංවාදය ඇති කරන්නේ. ඒක මේ කාටවත් හෝ පුද්ගලයකුට හෝ විරුද්ධව නෙමේ. මේක පවතින ක්‍රමය සම්බන්ධයෙන් සංවාදයක්. මේක ආරම්භයක් විතරයි.
Q අවසානය කොහොමද වෙන්නේ?
අවසානය මම දන්නේ නෑ කොහොමද සිද්ධ වෙන්නේ කියලා. හැබැයි දැනට සංවාදය කරගෙන යනවා.
Q ඔබ කොහොම කිව්වත් පවතින ක්‍රමය කියන්නේ පුද්ගලයන් විසින් ඇතිකරපු දෙයක්. ඉතිං ඒක පුද්ගල විරෝධයක් නේද?
වැරදි අර්ථකථන දෙන්න එපා. මේක මතවාදී ගැටුමක්. අන්න ඒ මතවාදීව කරන ගැටුමේදී අපි ඒක අභියෝගයක්, අරගලයක් හැටියට අරගෙන ඒක නිවැරදි මාර්ගයට යොමුකරන්නේ කොහොමද කියල තමයි බලන්නේ. ඒක වරදක් නෙමෙයිනේ.
Q ලන්සා මන්ත්‍රීවරයා අද ඉන්නේ වර්තමාන ජනාධිපතිවරයා එක්ක. මෙහිදී මේ හදාගෙන යන්නෙ වර්තමාන ජනාධිපතිවරයා මීළඟ මැතිවරණයේදී බලයට ගේන්න කියලා කිව්වොත්?
නෑ වැරදියි. ඒකේ ඉන්නවා පොහොට්ටුවේ අය, අමාත්‍ය මණ්ඩලයේ අය, සජබයේ අය ඉන්නවා. වෙනත් කණ්ඩායම්වල අයත් එක්කත් කතා කරනවා. මේක දේශපාලන සංවාදයක් මිසක් කොහේටවත් හේත්තු කරන්න යන දෙයක් නෙමෙයි.
Q ඔබ ජ්‍යෙෂ්ඨයෙක් හැටියට අද විපක්ෂයේ කාර්යභාරය මොන වගේද තියෙන්නේ?
ඕනෑම විපක්ෂයට මේක අභියෝගාත්මක කාලයක්. රටේ තියෙන ප්‍රශ්නත් එක්ක විපක්ෂය හිතෙන විදිහට හැසිරෙන්න බෑ. ඉස්සර නම් බලය ගත්තම අපි මෙහෙම කරනවා කියලා පොරොන්දු දේශපාලනය කරන්න ලේසියි. අද ඒත් එහෙම පොරොන්දු දෙන්න බෑ. හේතුව අද ඒ සඳහා වියදම් කරන්න මුදල් නෑ. ඉස්සර වගේ තෙල් අඩු කරනවා, පාන් අඩු කරනවා, ලයිට් බිල් අඩුකරනවා කියන්නද? එහෙම බෑ. ඒවා අතීත කතා. ඒ නිසා විපක්ෂයේ කාර්යය අද වෙනස්. එකිනෙකට විවිධ මත දරන්නේ. අපිත් ඉන්නේ වෙනම මතයක්. ඒ මත සියල්ල එක තැනකට එන තැනක් හදන්න ඕන. ඒත් මට තවම එහෙම දෙයක් පේන්නේ නෑ.
Q මේ සියල්ල මොනවා වුණත් අවසානයේ ඊළඟ ජනාධිපතිවරයා වෙනුවෙන් දේශපාලන බලවේගයක් වෙනවා නේද?
නෑ... නෑ... අපි එහෙම කතාවක් නෑ. අපි මේ තත්ත්වය නිරීක්ෂණය කරනවා. ඒ නිරීක්ෂණයෙන් පස්සේ තමයි තීන්දු කරන්නේ. මොකද මේ ආණ්ඩුවේ ආදායම් වැඩි කිරීම ගැන ප්‍රශ්න තියෙනවා. අපි මේ දේවල් අධ්‍යනය කරමින් යන්නේ.
Q වර්තමාන ජනාධිපතිවරයා සම්බන්ධයෙන් බොහෝදෙනා දැන් විවේචනය කරනවා ගන්න ප්‍රතිපත්ති ගැන. ඔබට මොන වගේ අදහසක්ද තියෙන්නේ ඔහු ගැන?
නෑ. මට ඔහු ගැන එහෙම වරදක් කියන්න නෑ. මොකද එතුමා රට ඉතාම අමාරු වෙලාවක අරගෙන රට යම් දුරකට පාලනයකට ගෙනාවා. ඇත්තටම ඔහු රට සන්සුන් කරනවා. දැන් එතුමා විශාල ප්‍රතිපත්ති මාලාවකට යන්න ඕන. ඒවා ලේසි නෑ. අවුරුද්දක් ඇතුළත කරන්න ඕන. ඒක අසීරුයි. අනික් අය වගේ නෙමෙයි. අනික් අයට තියෙන්නේ බලය ලබා ගැනීමේ සටනක්. ඒත් ඔහුට තියෙන්නේ අසීරු ගමනක්. මොකද ඔහු තනි පුද්ගලයෙක්. එකට ඉන්න පිරිසක් නිර්මාණය කරගන්නාතුරු ලේසි නෑ ඔහුට. ඔහු ජාත්‍යන්තර වශයෙන් වුණත් ප්‍රශ්න විසඳපු හැටි ඉතාම හොඳයි. ඒ නිසා අපි ඒක මොන දේ වුණත් අගය කරන්න ඕන.
I ගයාන් ගාල්ලගේ