හොරාකාපු අය එකතුවෙලා රට ගොඩගන්න ප්ලෑන් ගහනවා
දිලිප් වෙදආරච්චි (පාර්ලිමේන්තු මන්ත්‍රී - සමගි ජන බලවේගය)
- අපේ නායකයා හොඳ දැනුමක් බුද්ධියක් තිබෙන නායකයෙක්
- සෞඛ්‍ය ඇමැතිතුමා මෙලෝ දෙයක් දන්නෙ නෑ
- ජාතික ලැයිස්තුවෙන් ආපු රනිල් මහත්තයා අපට අභියෝගයක් වෙන්නෙ කොහොමද
- ජ.වි.පෙ. රැල්ල මුහුදු රැල්ල වගේ එනව යනව
Qඔබ පහුගිය කාලයේ වැඩිය දේශපාලන කරළියේ පේන්න හිටියේ නෑ. මොකක් හරි කලකිරීමක් නිසාද?
කලකිරීමකුත් නෑ. හැබැයි, ඒත් රටේ තියෙන දේශපාලන තත්ත්වය දකිද්දී කලකිරීමක් තියෙනවා. පක්ෂ නායකයෝ එකතුවෙලා කරන කුමන්ත්‍රණ, කට්ටකම් මොනවද නොකරන්නේ. එහෙන් පක්ෂ කැඩිලා යනවා. මේවා දැකලා මිනිස්සු දේශපාලනයට බනිනවා. අපි ජීවිතයට හොරකමක් කරලා නෑ. එහෙව් අපි මිනිස්සුන්ගෙන් බැනුම් අහන්න ලෑස්ති නෑ. හොඳම දේ හොරාකාපු අය එකතුවෙලා රට ගොඩගන්න ප්ලෑන් කරනවා. හරියට පුංචි අය වගේ. රට දාලා ගිය අය දැන් රට ගොඩගන්න කතා කරනවා. හරිම කලකිරීමක් තියෙන්නේ.
Qරටට මෙහෙම වෙන්න හේතුව මොකක්ද?
මේ වගේ දේවල් ඇතිවෙන්න හේතුව බල තණ්හාව. ජාති බේද හදලා, කුල බේද හදලා, ප්‍රශ්න ඇති කරලා තමයි මේ බල තණ්හාව ක්‍රියාත්මක වෙන්නේ. බලන්නකෝ දැන් පාස්කු ප්‍රහාරය වෙලා කිසිම සාධාරණයක් නෑනේ මිනිස්සුන්ට. ඒ හරහා බලයට ආපු මිනිස්සුන්ට රට දාලා යන්න වුණා. ඒ නිසා මතක තියාගන්න බොරු කරලා ඉන්න බෑ.
Qදැන් රට පාලනය කරන්නේ ඔබේ පරණ නායකයා. ඒ ගැන යම් අදහසක් හෝ බලාපොරොත්තුවක් තියෙනවද?
එතුමා මේ වෙලාවේ රට බාරගෙන රට කරගෙන යනවා. ඒක ගැන අපි අගය කරන්න ඕන. ඒ වගේම අපේ පක්ෂ ප්‍රතිපත්තියත් එක්ක අපි වෙනම සන්ධානයක් හදලා බලය ලබාගන්න කටයුතු කරමින් යන්නේ. ඒ සන්ධානයෙන් අපි නියත වශයෙන් ආණ්ඩු බලය ලබාගන්නවා.
Qඔය මොන සන්ධාන හැදුවත් නිකන් හරි රනිල් වික්‍රමසිංහ මහත්තයා පොහොට්ටු එජාප හවුලේ අපේක්ෂකයා වුණොත් අවාසියක් වෙයිද?
අනේ ඒක අපිට අභියෝගයක් වෙන්නෙ නෑ. එතුමා ජනාධිපති වුණේ රටේ ඡන්දවලින් නෙමෙයි. ජාතික ලැයිස්තු මන්ත්‍රී ධුරයෙන්, පාර්ලිමේන්තුවේ ඡන්ද වලින්. එහෙව් එතුමා කොහොමද අපිට අභියෝගයක් වෙන්නේ. අද පොහොට්ටුව සම්පූර්ණයෙන් ජනතාව ප්‍රතික්ෂේප කරලා තිබෙන පක්ෂයක්.
Qඑජාපය එක්ක එකතුවෙන්න ඕන කියලා ඔබේ පක්ෂයේ පිරිසක් යෝජනා කරනවා. ඔබ එකඟද එයට?
මෙහෙමයි, දෙපාර්ශ්වයම සාකච්ඡා කරලා තීන්දුවකට එනවා නම් හොඳයි. හැබැයි හොරු අයින් කරලා පිරිසිදු පක්ෂයක් හදාගන්න ඕන. අපිට හොරු එක්ක නම් වැඩ කරන්න බෑ.
Qඊළඟ අභියෝගය තියෙන්නේ, ගොඩක් අයට නම් ජාතික ජනබලවේගය. ඔබලටත් ඒක අභියෝගයක් නේද?
මෙහෙමයි ඒක එයාලා කියන්නේ. එයාලා හැමදාම ලොකු කතා පුම්බලා කියනවා. හැබැයි ඡන්දයක් ආපුවම තියෙන ටිකත් අඩුවෙලා. මතක තියාගන්න ජවිපෙ එල්.ටී.ටී.ඊ.යට වඩා දේපළ සහ මිනිස් ඝාතන කළා පොඩි කාලයක් තුළ. ඒවා රටේ මිනිස්සු දන්නවා. තරුණ දරුවොත් දන්නවා. මන්ත්‍රී ආසන තුනක් තියන් බලය ගන්නේ කොහොමද කියන්න?
Qඔවුන් කියන්නේ රැල්ලක් හැදිලා තියෙන්නේ කියලා?
රැල්ල හැමදාම තියෙනවා. ඒක මුහුදු රැල්ල වගේ ආවා ගොඩට ගියා. ඒක තමයි රැල්ල.
Qඔබ කාලයක් ධීවරයෝ වෙනුවෙන් කතා කළා. මාළු අමුවෙනුත් කෑවා. දැන් සද්ද නැත්තේ ප්‍රශ්න නැද්ද?
අම්මෝ දැන් තමයි වැඩියෙන්ම ප්‍රශ්න ඇතිවෙලා තියෙන්නේ. තෙල් වැඩිවුණා. මේකෙන් ලොකුම බලපෑම මේ ධීවර කර්මාන්තයට බලපානවා. මම මේවා අදාළ තැන් දැනුවත් කළා මුල ඉඳල. ඒත් තේරුම් ගන්නේ නෑ තවම. බහුදින යාත්‍රාවලට කොහොමද ඒ වියදම දරන්නේ. මම කිව්වා ඒ යාත්‍රාවලට තෙල් දෙද්දී ලීටරයකින් සීයක සහනයක් දෙන්න කියලා. ඒක කළේ නෑ. ඒ නිසා අද වෙද්දී මේ කර්මාන්තය විශාල අභියෝගයක තියෙන්නේ.
Qමෙතනින් එහා ධීවර කර්මාන්තය කරන් යන්න බැරිවෙයිද?
අනිවාර්යයෙන්ම බෑ. කොහොමද කරන්නේ?
Q දැන් මාළු මිල පහුගිය කාලයේ වැඩිවුණා. දැන් අඩුවෙලා ඒ මොකද?
ඉතිං ධීවර සංස්ථාවෙන් මාළු ගෙන්නනවා. එහෙම ගෙන්නද්දි මාළු මිල අඩුවෙනවා. එතකොට වියදමට සරිලන ආදායමක් නෑ. කොහොමද කරන්නේ.
Qඔබට ආණ්ඩුවෙන් ආරාධනා ලැබුණේ නැද්ද රට හදන්න එකතුවෙන්න කියලා?
නෑ නෑ මට නෑ. අපි බලන් ඉන්නවා මොකද වෙන්නේ කියලා. අපේ නායකතුමා ජනතාව වෙනුවෙන් හොඳ තීරණයක් ගනීවි. දැන් බලන්න සෞඛ්‍ය ක්ෂේත්‍රයම කඩා වැටිලා. දකුණු පළාතේ ලොකුම රෝහල කරාපිටිය. ඒකේ ළමාරෝග විශේෂඥ වෛද්‍යවරයා මාසයක් තිස්සේ නෑ. ඒක විශාල අවදානමක්. ඒ නිසා මිනිස්සු කොළඹ එන්න ඕන. හම්බන්තොට රෝහලේ විශේෂඥ වෛද්‍යවරු 10ක් ගිහිල්ලා තියෙනවා පසුගිය මාස හයේ. දැන් බලන්න ඖෂධ බාර සහාපති පිළිගන්නවා බාල ඖෂධ කියලා. මොකක්ද මේ කරන්නේ. සෞඛ්‍ය ඇමැති මෙලෝ දෙයක් දන්නේ නෑ. පළපුරුදු කෙනෙක් පත්කරන්න එපැයි.
Qඔබට මේ තත්ත්වය මත දේශපාලඥයෙක් හැටියට ජනතාව ඉදිරියට ගිහින් ඡන්දයක් ඉල්ලන්න පුළුවන්ද?
ගමට යන්න බැරිවෙලා තියෙන්නේ සිංහයොන්ටයි, සිංහ පැටවුන්ටයි. ඒ පක්ෂයටයි. ඒත් අපිට අපේ පක්ෂයට මේ රටේ ජනතාව ආදරෙයි. අපේ නායකයා හොඳ අවබෝධයක්, දැනුමක් බුද්ධියක් තියෙන නායකයෙක්. එතුමා මා එක්ක දේශපාලනය අවුරුදු 25 හම්බන්තොට කරලා, දැන් පක්ෂයක් හදන්, විපක්ෂනායක වෙලා ඉන්නේ. ජනතාවට ඒ දේවල් පේනවා. ජනතාව දන්නවා. ඉතිං ජනතාවගේ එකම විශ්වාසය අපේ පක්ෂය.
I ගයාන් ගාල්ලගේ