ජවිපෙට තදින්ම පහර දෙන්න මට හේතු තියෙනවා
තිස්ස කුට්ටිආරච්චි (පාර්ලිමේන්තු මන්ත්‍රී - ශ්‍රී ලංකා පොදුජන පෙරමුණ)
- මහින්ද මහත්තයාට පස්සෙ ඉන්න ප්‍රබලම රාජපක්ෂවරයා නාමල්
- අනුරලා එදා රැල්ලක් ගැන කිව්වේ අපි රැස්වීම් නොතියපු නිසයි
- අපේ වේදිකාවේ මම මේ පුරවන්නේ විමල් මන්ත්‍රීතුමා නැති හිස් තැනයි
- තෙල් මිල වැඩි කිරීම ජනතාවට විශාල ප්‍රශ්නයක්
Qඔබතුමා අලුත් දේශපාලන ගේම් එකක් පටන් අරන් නේද? පක්ෂය තීන්දු කරන්නත් කලින් ඊළඟ ජනාධිපති පොඩි සිංහයා කිය කියා වේදිකාවක් ගානේ යන එක?
නෑ. මම කිව්ව එක වැරදියට තේරුම් අරන් ඉන්නේ කට්ටිය. තවම ජනාධිපතිවරණයක් ගැන කතාවෙන්නේ නෑ. රනිල් වික්‍රමසිංහ මහත්තයා ජනාධිපති පුටුවට ගෙනාවේ එජාපයේ බිමේ ඡන්දවලින් නෙමේ. පොදුජන පෙරමුණේ මන්ත්‍රීවරුන්ගේ බහුතරයෙන් එතුමා ගෙනාවේ. එහෙම පත්වුණ එතුමා තවම මැතිවරණයක් ගැන කියලා නෑ. ඉතිං ඒ නිසා අපි අපේ අපේක්ෂකයා ගැනත් කියලා නෑ. මෙතන තියෙන ලොකුම අවුල තමයි මේ රාජපක්ෂවරු කරපු දේවල් භුක්‍ති විඳ විඳ තමයි රාජපක්ෂලට බනින්නේ. ගොඩක් අය හිතන්නේ රාජපක්ෂලාගේ දේශපාලන අනාගතය ඉවරයි කියලා.
Qමම අහන්නේ නාමල් රාජපක්ෂගේ නම කියන්නේ ඇයි?
මහින්ද රාජපක්ෂ මහත්තයා නැවත ජනාධිපතිවරණයකට ඉදිරිපත් වෙන්නේ නෑ. ඒ වෙනුවට ඊළඟට ඉන්න ප්‍රබලම දේශපාලන රාජපක්ෂවරයා තමයි නාමල් රාජපක්ෂ කියන්නේ. මම අදටත් විශ්වාස කරනවා එතුමාව හෙට තරගයට දැම්මොත් දිනනවා. මොකද එතුමා අපේ තරුණ නායකයෙක්. මම ඒකයි කියන්නේ. එහෙම නැතුව මම කියන්නේ නෑ කොයි ජනාධිපතිවරණයටද ඉදිරිපත් වෙන්නේ කියලා. මේ අවුරුද්දේ වෙන්නත් පුළුවන් ලබන වසරෙත් පුළුවන්. ඒ වගේම අපේ අපේක්ෂකයා පක්ෂයෙන් තීරණය කරන්නේ. ගොඩක් අයට නාමල් බබා වුණාට මම සමීපව වැඩකරන නිසා දන්නවා ඔහුට රට ගැන තියෙන අවබෝධය. අන්න ඒ නිසයි මම ඒ නම කියන්නේ.
Qපක්ෂයේ ජ්‍යෙෂ්ඨයෝ නම් කියන්නේ තිස්සට අනවශ්‍ය දෙයක් මේ කියන්නේ කියලා. කවුරුත් අවවාද කළේ නැද්ද?
නෑ. මට කිසිම කෙනෙක් එහෙම අවවාද කරලා නෑ. මම කිව්ව දේ ගැන මාධ්‍යයේ අය ජ්‍යෙෂ්ඨයන්ගෙන් ප්‍රශ්නයක් අහපුවම ඒ අයට මම කිව්ව දේ ගැන අවබෝධයක් නැතුව උත්තර දෙන්න බෑ. මම ඒ අය කියන දේවල් ගැන වැරුදි කියන්නේ නෑ. මොකද ඒ අය අපට වඩා ජ්‍යෙෂ්ඨයි. හැබැයි අපි කණ්ඩායම් රැස්වීම්වලදී කියලා තියෙනවා නායකයන් විසින් අපේ ඊළඟ අපේක්ෂකයා තෝරලා දෙන්න කියලා. මොකද ඒක තෝරන්නේ එයාලනේ.
Qපක්ෂයේ ලොක්කෝ දම්මලා කියවන ඒවා නෙමෙයිද මේවා?
සමහර අය හිතනවා බැසිල් රාජපක්ෂ මහත්තයා හරි, නාමල් රාජපක්ෂ මහත්‍තය හරි කියලා කියවන්නේ කියලා. හැබැයි මම දේශපාලන ළදරුවෙක් නෙමෙයිනේ. මම පළාත් සභාවේ අවුරුදු දහයක් ඉඳලා පාර්ලිමේන්තු ආවේ. මමත් කතා කරන්නේ හොඳ අවබෝධයෙන්. සමහරු මගේ කතාවල කෑල්ලක් දාලයි ප්‍රශ්න ඇති කරන්නේ.
Qඔබ ඔය හිතන කෙනා ජනාධිපති අපේක්ෂකයා නොවුණොත්?
පක්ෂයෙන් නම් කරන කෙනා අපි කරේ තියන් අරන් යනවා. මම පක්ෂයට විරුද්ධව යන්නේ නෑ. හැබැයි රාජපක්ෂවරුන්ට ගහලා තියෙන මඩ ලේබල් මම ගලවනවා. මගේ ඇඟේ මඩ ගෑවුණත් කමක් නෑ. මම හදවතින්ම රාජපක්ෂවරුන්ට ආදරෙයි.
Qඔබ පහුගිය කාලයේ සද්දයක්වත් නෑ. හැබැයි පහුගිය ටිකේ තිස්ස නැති රුස්වීමක් නෑ. කොහේ බැලුවත් තිස්ස ඉන්නවා. කවුද මේ කතා කරන්න අවසර දුන්නේ?
නෑ. ඒක වුණේ, අපේ වේදිකාවේ කතා කරපු ප්‍රධාන කථිකයා තමා විමල් වීරවංශ. එතුමා ඉවත් වුණායින් පස්සේ උච්ච ස්වරයෙන් කතාකරන කෙනෙක්ගේ හිස්තැනක් ඇතිවුණා කියලා මම පෞද්ගලිකව හිතනවා. පහුගිය අරගලයත් එක්ක සමස්ථ පොහොට්ටුවම නිහඬවුණා. රැස්වීම් තිබ්බේ නෑ. ඒකනේ අනුරලා කියන්නේ ඒ කාලේ රැල්ලක් එයාලට තිබ්බ කියලා. ඒ රැල්ලක් නෙමේ. අපි රැස්වීම් තිබ්බ නැති නිසා. ඒත් දැන් රැස්වීම් පටන් අරන් තියෙනවා. ඉතිං ඒ රැස්වීම්වල මම උච්ච ස්වරයෙන් කතා කළාම ආසන සංවිධායකවරු, නායකයන් ඉල්ලීමක් කරලා තිබ්බා මාව ගෙන්නන්න කියලා. ඒ නිසයි මට ඒ ඉඩ හැදුණේ. මොකද මම ඒ උච්ඡ ස්වරය සහ ඇත්ත කතා කරන කෙනෙක් නිසා.
Qඇයි ජවිපෙ එක්ක තරහා?
ඇත්තටම මම පෞද්ගලිකවම අකමැති දේශපාලන ප්‍රතිපත්තියක් තියෙන පක්ෂයක්. මොකද මගේ සීයා මැරුවා. පුංචි කාලේ මට පයින් ගැහුවා. මගේ අම්මා මරන්න අරන් ගියා. මගේ තාත්තව මරන්න හෙව්වා. මෙන්න මේ නිසයි මම පෞද්ගලිකව පිළිකුල් කරන්නේ ඔය පක්ෂය. අනික් කාරණය ජවිපේ නායකයෝ කට ඇරියොත් කියන්නේ බොරු. උදේ කියන එක හවස මතක නෑ. අනික මතක තියාගන්න අරගලයේදී ඔය පක්ෂය මූලික වෙලා තමයි අපිට ගැහුවේ, ගෙවල් ගිනි තිබ්බේ, අපේ එකෙක් මැරුවේ. ඒ නිසයි මම ප්‍රබලව ජවිපෙට පහර දෙන්නෙ. හැබැයි මට අනුර කුමාර එක්ක පෞද්ගලික තරහක් නැහැ. එහෙම එකක් තිබ්බා නම් ඒක එයා එක්ක මම පෞද්ගලිකව විසඳගන්නවා පාර්ලිමේන්තුවේ කෑම කන තැන හරි. මට තියෙන්නේ ඒ පක්ෂයේ ප්‍රතිපත්තිය සම්බන්ධයෙන් අවුලක්.
Qඔබ බැන බැන ගියාට අලුත් ජනාධිපති දුන්න පොරොන්දු ටික තවම පක්ෂයට ඉෂ්ට වුණේ නෑ නේද?
ගොඩක් අය දැනගන්න ඕන රටේ උඩින් පේන දේ නෙමෙයි යටින් තියෙන්නේ. ලොකු ආර්ථික කඩා වැටීමකට පස්සේ අපි ආපු වේගය ස්ලෝ වුණාට ආයේ ඒ රේස් එක එහෙමම ගත්තා. හැබැයි ඒක ලේසි නෑ. ඒක රනිල් වික්‍රමසිංහ මහත්තයා කළමනාකරණය කරමින් යන්නේ. ඒ නිසයි අපි අඩියක් පස්සට අරන් ඉන්නේ. හෙට කවුරු ගත්තත් ආදායම හොයන්න ඕන. ඒක කියන තරම් ලේසි නෑ. ඒ නිසයි ජ්‍යෙෂ්ඨයොත් කටවහන් ඉවසන් අඩියක් පස්සට අරන් ඉන්නේ. මේ රටේ තත්ත්වය අමාරු නිසා. දේශපාලන පීඩනයක් එතුමාට දෙන එක අසාධාරණයි කියලා තමයි අපි මේ වෙලාවේ හිතන්නේ.
Qදැන් තෙල් මිලත් වැඩිකළා කිසිම හේතුවක් නැතුව. ඡන්ද කරන්න පුළුවන්ද?
අපි දන්නවා ජනතාවට මේක විශාල ප්‍රශ්නයක්. ඒත් කරන්නම දෙයක් නැති නිසා වෙන්න ඇති මේක කරන්න ඇත්තේ. ඒ පීඩනයත් ඒ අයටනේ එන්නේ. හැබැයි ජනාධිපතිතුමා ජනාධිපතිවරණයකට එනවා නම්, අපේ සහායත් බලාපොරොත්තු වෙනවා නම් පොහොට්ටුවත් බැලන්ස් කරලා, රටේ ජනාතාවගෙනුත් ධනාත්මක කැමැත්තක් ගන්න කටයුතු කරන්න ඕන. එක වෙලාවකට හිතෙනවා එතුමාට පැටලෙනවද කියලා. සඳුදා ග_ප් එක තියෙනවා එතැනදී එවා කෙළින් කතා කරන්න ඉන්නේ.
I ගයාන් ගාල්ලගේ
