ඊළඟ නායකයා හදන්නෙත් පොහොට්ටුවයි

මිලාන් ජයතිලක (පාර්ලිමේන්තු මන්ත්‍රී - ශ්‍රී ලංකා පොදුජන පෙරමුණ)

♦ අනුර කුමාරලා වර්ජන කරල රට වට්ටන්නයි හදන්නෙ
♦ ජනාධිපතිවරණය ආවම අපේ අපේක්ෂකය තීන්දු කරනව
♦ පොහොට්ටුව බෙදිල කියන කතාව බොරුවක්

Qඅපි දැක්කා පසුගිය කාලයේ පොහොට්ටුව ගමක් ගමක් ගානේ ගිහිල්ලා විශාල වශයෙන් ප්‍රචාරණය පටන් ගත්තා. කොහොමද මේ වෙද්දී පක්ෂයට ප්‍රතිචාර?

කිසිම වෙනසක් නැහැ. පසුගිය කාලයේ තිබුණ යම් යම් ප්‍රශ්න නිසා අපේ පාක්ෂිකයන් කලකිරීමකට පත්වෙලා හිටියත් මේ වෙද්දී කිසිම ප්‍රශ්නයක් නැහැ. මොකද හේතුව කොරෝනා ඇතිවෙලා, ලයිට් බිල් වැඩිවෙලා, වතුර බිල් වැඩිවෙලා යම් යම් ප්‍රශ්න එනකොට ඒ කලකිරීම සාමාන්‍යයෙන් ඇතිවෙනවා. හැබැයි අපි ඒකට මුහුණ දුන්නා. අපි දැන් නැවත පක්ෂය ගොඩනගමින් යන්නේ. අපි හැමදාමත් වැඩකරපු කණ්ඩායමක් සහිත පක්ෂයක්. මේ රටේ සංවර්ධනයෙන් සියයට අනූවක්ම කළේ අපේ කණ්ඩායම. අන්න ඒ නිසයි ජනතාව අපි ගැන තවම විශ්වාසය තියාගෙන ඉන්නේ. 

Qආර්ථිකය කඩා වැටීම සම්බන්ධයෙන් හැමෝම චෝදනා කරන්නේ පොහොට්ටුවට. ඉතින් එවැනි චෝදනාවක් තියෙන කොට පොහොට්ටුවට ජනතාවගේ කැමැත්ත ලැබේවිද?

නෑ. අපි කොයි වෙලාවකවත් හිතන්නේ නැහැ ජනතාවගේ ප්‍රතිචාරය යහපත් කියලා. හැබැයි මතක තියාගන්න පොහොට්ටුව නිසා ආර්ථිකය අවුල් ගියා නෙමෙයි. ලෝකයේම තිබුණ ආර්ථික තත්ත්වයත්, විශේෂයෙන් කොරෝනා තත්ත්වය නිසයි මේ ප්‍රශ්නය ඇතිවුණේ. ඒ වගේම මෑත කාලයේදී රුසියා - යුක්රේන යුද්ධයත් දැඩි ලෙස බලපෑම් එල්ල කරලා තිබෙනවා. තෙල්, ගල් අඟුරු වගේ දේවල්වලට ලොකුවට ඒක බලපාලා තියෙනවා. අනෙක මෙය අපේ රටට විතරක් වුණ දෙයක් නෙමෙයි. 

Qදැන් කාලයක් ඔබලා විවේචනය කළා එක්සත් ජාතික පක්ෂය එක්ක වැඩ කරන්න බැහැයි කියලා. හැබැයි දැන් වැඩකරනවා විතරක් නෙමෙයි ඊළඟ බලය ලබාගන්නත් එකතු වෙන්න හදනවා. කොහොමද මේක පෑහුනේ?

මේ වෙලාවේ දේශපාලන රාමුව ගැන නෙමෙයි අපි හිතන්නේ. මේ වෙලාවේ රටට අවශ්‍ය රටේ ජනතාව ගැන හිතලා පොදු යහපත සඳහා නිවැරදි තීන්දු තීරණ ගැනීම. මේ මොහොතේ දේශපාලන පක්ෂවල ප්‍රතිපත්ති පැත්තකින් තියන්න ඕන. මේ වෙලාවේ රට ගොඩනගන වැඩපිළිවෙළට පක්ෂ භේදයෙන් තොරව සහයෝගය දෙන්න ඕන. ඔය ලොකු කතා කියන අනුර කුමාරත් දැන ගන්න ඕන එකතුවෙලා අදහස් ලබාදීලා මේ රට ගොඩනගන්න. එයාලා මොකද කරන්නේ, සේවකයෝ අල්ලාගෙන වැඩවර්ජන ක්‍රියාත්මක කරනවා. ඉතින් ඒ අය හිතනවා මේ රට වට්ටන්න. එහෙම බැහැ. එකතුවෙලා වැඩකරන්න ඕන. පස්සේ වෙන වෙනම ඡන්දෙ කරමු.

Qඅනුර කුමාර ගැන කිව්ව නිසා අහන්නේ. ඒ අය නම් කියන්නේ ඔය දෙගොල්ලොම ආණ්ඩු කරලා රට විනාශ කරලා නිසා, ඔබලාට ආර්ථික දැක්මක් නැහැ කියලයි. ඔවුන්ට ඒ නිසා බලය දෙන්නයි කියන්නේ?

ඔය කතා ඒ ගොල්ලෝ කියන්නේ අද ඊයෙක නෙමෙයි. හැබැයි ඔය කියන කිසිම දෙයක් ජනතාව පිළිගන්නේ නැහැ. ජනතාව දන්නවා ඒ අයට කටින් විතරයි, රට පාලනය කරන්න හැකියාවක් නැහැ කියලා. 

Qඔබ කියන්නේ කවුරුවත් ඔහුව පිළිගන්නේ නැහැ කියලද?

නැහැ. සමහර පිළිගන්න අය ඇති. දැන් අවශ්‍ය ජාතික නායකයෝ නෙමෙයි රටට. ජාත්‍යන්තර වශයෙන් පිළිගත්ත නායකයෙක්. අනුර කුමාරට ඕන පාරේ උද්ඝෝෂණය කර කර රට බංකොලොත් කරන්න. ඔය කවුරුත් වැඩ කරන්න පුළුවන් අය නෙමෙයි. වැඩ අනන්න පුළුවන් අය. මතක තියාගන්න, මේ රටේ සම්පූර්ණ විනාශයට වග කියන්න ඕන ජ.වි.පෙ. කිසිම රාජ්‍ය ආයතනයක් තියා පෞද්ගලික ආයතනයක්වත් දියුණු කරන්න දෙන්නේ නැහැනේ. මොනවා හරි කරලා වෘත්තීය සමිති පිහිටුවලා සියල්ල අවුල් කරනවා. ආදායම් නැති වුණත් පඩි නම් වැඩිකර ගන්නවා. 

Qඔබ ඔහොම කිව්වාට ඔබලාගේ කණ්ඩායමේ පිරිස් පවා කඩාගෙන වෙනම ස්වාධීන වෙලා තිබෙනවා. ඉතින් එහෙම වෙද්දී කොහොමද ඔබ අනෙක් අයට වඩා හොඳයි කියන්නේ?

කවුරු හරි හිතනවා ඇති පොහොට්ටුව බෙදිලා කියලා. ඒක නම් කවදාවත් වෙලා නැහැ. අපි පොහොට්ටුවට ආවේ පක්ෂ ගණනාවක් එකතුවෙලා. ඒ එකතුවුණ කණ්ඩායම සමඟ තමයි ඒ කාලයේ බලය බෙදාගත්තේ. විවිධ සිදුවීම් මත කට්ටිය ස්වාධීන වෙලා තිබෙනවා. හැබැයි කවුරුත් පක්ෂයෙන් ඉවත්වෙලා ගියා කියලා ලියුම් දීලා නැහැ. 

Qපසුගිය දවස් ටිකේම වේදිකාවල ඊළඟ ජනාධිපති අපේක්ෂකයා හැටියට ඇහුනේ නාමල් රාජපක්ෂ මන්ත්‍රීවරයා. දැන් ඔහුද ජනාධිපති අපේක්ෂකයා?

ජනාධිපති අපේක්ෂක හැටියට නාමල් මන්ත්‍රීතුමාව අපි පත් කරලා නැහැ. එතුමත් ඒක කොහොවත් කියලත් නැහැ. තරුණ නායකයෙක් අවශ්‍ය නම් ඒ සඳහා හොඳම තීන්දුව නාමල් රාජපක්ෂ කියලයි අපි කියන්නේ. ජනාධිපතිවරණයක් ආවොත් ඒක අපි ඔක්කොම එකතුවෙලා තීන්දු කරලා ගන්නවා. 

Qඔබලාට ඉදිරියේදී ඔබලාගේම ආණ්ඩුවක් හදාගන්න පුළුවන් වේවිද?

මොන ප්‍රශ්නය තිබුණත් තවම වැඩියෙන්ම ඉන්නේ අපේ පාක්ෂිකයෝ. ඊළඟට රටේ නායකයා හදන වගකීමේ ලොකුම වගකීම පැවරිලා තියෙන්නේ අපට. ඒ අනුව අපි නිවැරදි තීන්දුවක් ඉදිරියේදී ගන්නවා. පසුගිය කාලයේ අපෙන් වෙච්ච වැරදි සියල්ල හදාගෙන අපි ඉදිරි දේශපාලන කටයුතු සිදු කරනවා.

I ගයාන් ගාල්ලගේ