යූඑන්පියත් එක්ක එකතුවෙන්න කිසිම වුවමනාවක් නැහැ
තුෂාර ඉඳුනිල් (පාර්ලිමේන්තු මන්ත්‍රී - සමගි ජන බලවේගය)
♦ ජනතා ප්‍රශ්න ගැන කතා කිරීම ආණ්ඩුවට කන්දොස්කිරියාවක් තමයි
♦ තිස්සමහාරාම ප්‍රාදේශීය සභාව කරගන්න බැරිවුණ ජවිපෙ රට කරන්න ඉල්ලනව
♦ අපේ නායකයට මොළයක් වගේම හදවතකුත් තිබෙනව
Qඑක්සත් ජාතික පක්ෂය සහ ඔබලාගේ එකතුවක් ඔබලාගේ පක්ෂයේ අය පවා බලාපොරොත්තු වෙනවා. ඔබට මොකද හිතෙන්නේ ඒ ගැන?
එක්සත් ජාතික පක්ෂයයි අපියි එකතු වෙන කතාවයි, අපේ කට්ටියක් ආණ්ඩුවට යනවා කියපු කතාවයි දැන් අවුරුද්දක ඉඳන් කතාවෙනවා. ඕක වැඩිපුරම ප්‍රචාරය යවන්නේ එක්සත් ජාතික පක්ෂ කණ්ඩායමයි.
Qසමගි ජන බලවේගයට උවමනාවක් නැද්ද එක්සත් ජාතික පක්ෂයත් එක්ක එකතු වෙන්න?
ඇත්තටම අපිට කිසිම වුවමනාවක් නැහැ එක්සත් ජාතික පක්ෂය සමඟ එකතු වෙන්න. මෙතන ප්‍රධානම පරස්පරය තමයි රනිල් වික්‍රමසිංහ මහත්මයා ජනාධිපති ධුරය දරන්නේ ශ්‍රී ලංකා පොදුජන පෙරමුණ ඇතුළු ඔවුන්ගේ කණ්ඩායමත් එක්ක. අපි රාජපක්ෂ කඳවුර ප්‍රතික්ෂේප කරන කණ්ඩායමක් හැටියට ඒ වගේම ඔවුන්ගේ දූෂණ වංචා ගැන කතා කරන පිරිසක් හැටියට අපිට කිසිම විදිහකින් ඒ අය එක්ක එකට හිටගන්න බැහැ.
Qඒ කියන්නේ පොහොට්ටුව අතහැරලා ආවොත් එකතු වෙන්න කැමතියි?
අපි හිතන්නේ නැහැ කිසිම වෙලාවක රනිල් වික්‍රමසිංහ මහත්මයා පොහොට්ටුව අතහැරලා එයි කියලා. ඔහුගේ බලය රුඳිලා තියෙන්නේ පොහොට්ටුවේ ඉන්න බහුතරය මත.
Qඇත්තට ඔබලාගේ කණ්ඩායමක් ඊළඟ ජනාධිපතිවරණයේදී වර්තමාන ජනාධිපතිවරයාට සහාය ලබාදීමේ සූදානමක් තිබෙනවාද?
ඒ කතාවෙන් ඔවුන් කාරණා දෙකක් බලාපොරොත්තු වෙනවා. ඒ තමයි සමගි ජන බලවේගයට ආණ්ඩුවෙන් ඉවත්වෙලා ඉන්න කණ්ඩායම් එකතුවීමට ඇති ඉඩකඩ අවහිර කිරීම. ඒ වගේම ජනතා බලයකින් තොරව බලයේ ඉන්න ජනාධිපතිවරයා සහ ආණ්ඩුව එකපැත්තකින් රුකගන්න එකක් තමයි මේ කතාවල මතය.
Qඔබලා මොන දේ කිව්වත් ඔබලාගේ පක්ෂය ඇතුළෙත් දැන් ගැටුම්. සරත් ෆොන්සේකා මහත්තයා වෙනම යනවා. සමහර අය කලකිරීමෙන් ඉන්නේ කියලා තිබෙනවා. ඇත්තටම මොකක්ද මේ ප්‍රශ්නේ?
අපේ පක්ෂය කියන්නේ ප්‍රජාතන්ත්‍රවාදී විදිහට ක්‍රියාකරන දේශපාලන පක්ෂයක්. අපේ පක්ෂයේ ඉන්න අයට විවිධ පෞද්ගලික දේශපාලන අදහස් යෝජනා ඇති. ඒ වගේම සමහර අය එකතු වුණෙත් විවිධ දේශපාලන පක්ෂවල ඉඳලා. ඉතින් ඒ අය දරන දේශපාලන අදහස් හැමඑකම අපේ පක්ෂයට විරුද්ධයි කියලා අපිට හිතන්න බැහැ.
Qවිපක්ෂනායකතුමා පාර්ලිමේන්තුව ඇතුළේදී හැමදාම උදෑසනට එක එක දේවල් කියලා කාලය කනවා කියලා ආණ්ඩුවෙන් චෝදනා තිබෙනවා. මොකද මේ වෙලා තියෙන්නේ?
විපක්ෂනායකවරයෙක් මෙහෙමයි වැඩකළ යුත්තේ කියලා කොහෙවත් නීතියක් නැහැ. දැන් වර්තමාන අගමැතිවරයා ගත්තහම කිසිම ශබ්දයක් නැතිව මීයට පිම්බා වගේ ඉන්නවා. නමුත් සජිත් ප්‍රේමදාස මහත්තයා රටේ තිබෙන ප්‍රශ්න හැමවෙලාවකදීම පාර්ලිමේන්තුවේ සාකච්ඡා කරනවා. මොකද හේතුව රටේ ජනතාවගේ ප්‍රශ්න ඉදිරිපත් කරනවා එතුමාට පාර්ලිමේන්තුවේදී ප්‍රකාශ කරන්න කියලා. ඉතින් විපක්ෂනායකතුමාගේ කාර්යභාරය එතුමා හරියට ඉටු කරනවා. ජනතාවගේ ප්‍රශ්න ඉදිරිපත් කරන එක ආණ්ඩුවට කන්දොස්කිරියාවක් කියලා අපි දන්නවා. හැබැයි ජනතාවට ඒක කන්දොස්කිරියාවක් නෙමෙයි කියලා අපි දන්නවා.
Qඔබලාටවත් පොහොට්ටුවටවත් එජාපයටවත් මේ රටේ ආණ්ඩු කරන්න අයිතියක් නැහැයි කියලා ජාතික ජන බලවේගය චෝදනා කරනවා. ඒ නිසා ඔවුන් ඔවුන්ට බලය ඉල්ලනවා. ඒකේ ඇත්තක් තිබෙනවා නේද?
ගෝඨාභය රාජපක්ෂ එලවපු ජනතා අරගලයේ අයිතිය ඒ අය තමන්ට ලියාගන්න හදනවා. මතක තියාගන්න ඒක ඒ අයගේ අරගලයක් නෙමෙයි. ඒක ජනතාවගේ අරගලයක්. හැබැයි වැඩියෙන්ම ජනතාව සහභාගි වුණේ අපේ කණ්ඩායමෙන්. එතකොට ඒ අයට තිස්සමහාරාම ප්‍රාදේශීය සභාවවත් හරියට කරගන්න බැරිවුණා. ඒකනේ පරාද වුණේ. ඒ වගේම චන්ද්‍රිකා බණ්ඩාරනායක ආණ්ඩුවෙත් ඇමැති ධූර අරගෙන කරගන්න බැරිව ගියා. ඒ සියල්ල අසාර්ථක වුණා. මේ වෙද්දී සමුපකාර ආයතනවල බලය අල්ලාගෙන තිබෙනවා. නමුත් ඒ අයත් එක්ක වැඩ කරන්න බැහැය කියලා ඒ සභාපතිවරු ඉවත්වෙලා ගිහිල්ලා තිබෙනවා. ඒකෙන් පැහැදිලිව පෙනෙනවා ඒ ගොල්ලන්ට වැඩකරන්න බැහැයි කියලා. ඒ නිසා ආණ්ඩු බලයත් ලබාදුන්නොත් හොඳට තියෙයි.
Qසමගි ජන බලවේගය ආණ්ඩුවක් ගත්තොත් මේ ජනතාව පිට පැවරිලා තිබෙන බදු බර අඩු කරලා ජනතාවට දැනෙන සහනයක් දෙන්න පුළුවන් වෙයිද?
අපි ධනවාදය විශ්වාස කරන කණ්ඩායමක්. හැබැයි අපි විශ්වාස කරන්නේ මානුෂීය ධනවාදය. එතැනදී මේ කබලෙන් ලිපට වැටිලා ඉන්න ජනතාවට කිසිම විදිහකින් බර පටවන්න සූදානමක් නැහැ. රනිල් වික්‍රමසිංහ මහත්තයාට මොළයක් තියෙනවා හැබැයි හදවතක් නැහැ. හැබැයි සමගි ජනබලවේගයේ නායකයාට මොළයත් තිබෙනවා. හදවතත් තිබෙනවා.
I ගයාන් ගාල්ලගේ