ජාතික ජන බලවේගයට වඩා අපි ඉන්නේ ගොඩක් ඉදිරියෙන්
- සමගි ජන බලවේගයේ පාර්ලිමේන්තු මන්ත්‍රී තිස්ස අත්තනායක
- අයි.එම්.එෆ්. එකත් එක්ක ගැටෙන්න අපි ලෑස්ති නෑ
- ජනතා මර්දනකාරී අණ පනත් අපේ ආණ්ඩුවකදී වෙනස් කරනවා
- පක්ෂය ඇතුළේ මොන සංවාද තිබුණත් අපි ඉන්නේ එකට
Qමේ වෙද්දී බොහෝ දෙනෙක් කතාවෙන්නේ ලබන අවුරුද්දේ ජනාධිපතිවරණය සම්බන්ධයෙන්, කොහොමද සමගි ජන බලවේගයේ සූදානම?
2024 නොවැම්බර් මාසයට ප්‍රථමව ජනාධිපතිවරණය පැවත්විය යුතුවෙනවා. ඊට පෙර ඕනෑම වෙලාවක මහ මැතිවරණයක් කැඳවීමේ බලය ජනාධිපතිට තියෙනවා. ඒ අතරතුර තවත් මැතිවරණ දෙකක් කල්දාලා තියෙනවා. එකක් පළාත් පාලන, අනික පළාත් සභා. ඒත් ලබන අවුරුද්දේ ඉස්සෙල්ලම එන්නේ ජනාධිපතිවරණයක් කියන එක අපි විශ්වාස කරනවා. ඒ සඳහා මූලික වැඩකටයුතු අපි ආරම්භ කරලා තියෙනවා. එකක් අපේ සාමාජිකයන් බඳවා ගැනීම පුළුල් කරලා තියෙනවා. අනික පුළුල් සන්ධානයක් හදන්න කටයුතු කරලා තියෙනවා. ඒ වගේම ජයග්‍රහණයට අවශ්‍ය ප්‍රතිපත්ති සහ ප්‍රචාරණ යාන්ත්‍රණය පුළුල් කරන්න අපි කටයුතු කරලා තියෙනවා.
Qදැන් ජනාධිපති අපේක්ෂකයා සජිත් ප්‍රේමදාසද? සරත් ෆොන්සේකාද?
සමගි ජන බලවේගය සහ අපේ පාර්ලිමේන්තු කණ්ඩායම ඒකමතිකව තීන්දු කරලා තියෙනවා අපේ පක්ෂයේ ජනාධිපති අපේක්ෂකයා සජිත් ප්‍රේමදාස මහත්තයා කියලා. වෙනත් යෝජනා මොනවත් කතා කරලා නෑ. විවිධ මාධ්‍යවල විවිධ අදහස් තියෙන්න පුළුවන්. ඒත් පක්ෂය ඒකමතිකව තීන්දු කරලා තියෙන්නේ සජිත් ප්‍රේමදාසව.
Qඒත් සරත් ෆොන්සේකා මහත්තයා තැන් තැන්වල රුස්වීම් තියනවනේ ස්වාධීනව. ඒ රුස්වීම්වල කතාවෙන්නේ ඉඟිදෙන්නේ ඊළඟ ජනාධිපති අපේක්ෂකත්වය ගැන. ඇත්ත මොකක්ද?
ඇත්තටම සරත් ෆොන්සේකා මහත්තයා කොහෙවත් කියලා නෑ එතුමා ජනාධිපතිවරණයට එනවා කියලා. එතුමාගෙන් කවුරු හරි මාධ්‍යවේදියෙක් ඇහුවම ජනාධිපතිවරණයට එනවද කියලා අකමැත්තක් නෑ කියනවා. ඕක මගෙන් ඇහුවත් මම කියන දෙයක්. ඒකේ වරදක් නෑ. අනික විවිධ දේශපාලන රුස්වීම් ව්‍යාපාර අපිත් කරනවා. ඒක සාමාන්‍යයි .මම හිතන්නේ නෑ එතුමා එවැනි මතයක ඉන්නවා කියලා. කොහොම වුණත් අපි මේ වෙලාවේ එකතුවෙන් වැඩ කරන්න ඕන. අපි මේ වෙලාවේ පරාජය කරන්න ඕන රනිල් වික්‍රමසිංහ මහත්තයයි, පොහොට්ටුවයි. ඒ වෙනුවෙන් අපි වගකීමෙන් වැඩ කරන්න ඕන.
Qපහුගිය කාලයේ පක්ෂයේ අය ඉතාම ප්‍රසිද්ධියේ ගහ බැණ ගන්නට ගියා. දැන් ඒ ප්‍රශ්න ඉවරද?
ඕනෑම දේශපාලන පක්ෂයක මතවාද මතබේද තියන්න පුළුවන්. ඒවා පක්ෂ අභ්‍යන්තරයේ සාකච්ඡා මට්ටමින් සිදුකරන්න ඕන දේවල්. ඒක පිටට ගිහින් කතා කළොත් තමයි බෙදීමක් පේන්නේ. එහෙම බැලුවම නොපෙනෙන සංවාද වැඩියි. ඒවා බෙදීම් නෙමේ. මේ වෙලාවේ මොන සංවාද සිදුකළත් අපි ඉන්නේ එකට.
Qඔබලා අයි.එම්.එෆ්. එකේ සාමාජිකයෝ එක්ක පහුගියදා සාකච්ඡාවක් තිබ්බා. ඒකෙන් දවස් කීපයකට පස්සේ කිව්වා දෙවැනි වාරිකය දෙන්න කල් දානවා කියලා. ඔබලා මොකක් හරි බලපෑමක් කළාද?
ජාත්‍යන්තර මූල්‍ය අරමුදලට කිසි විදිහකින් අපි බලපෑමක් කරලා නෑ අපේ රටට මූල්‍ය සහාය දෙන්න එපා කියලා කියන්න. අපි කියන්නේ මහජනතාවට අයහපතක් වෙන කිසිම බලපෑමක් කරන්න එපා කියලා. ආණ්ඩුව ප්‍රජාතන්ත්‍ර විරෝධී දේ කරනවා නම් ඊටත් විරුද්ධ වෙන්න කියලා. අනික කවුරුත් මේ කාරණා කියන්න ඕන නෑ. ආණ්ඩුව විසින් මූලික කාරණා ඉටු නොකිරීම නිසා ඇතිවුණු ප්‍රශ්නය නිසයි මේක කල් ගියේ. ආණ්ඩුව මේවා ඉක්මනින් නිවැරදි කරගන්න ඕන. මොකද වෙනත් කාරණා බලපානවා. විශේෂයෙන් වෙනත් මූල්‍යාධාර ලැබෙන දේවල් පවා නොලැබෙන්න පුළුවන්.
Qඔබලා කියලා තිබුණා ජාත්‍යන්තර මූල්‍ය අරමුදලේ සමහර එකඟතා ඔබලාට බලය ආපු කාලෙක සංශෝධනය කරනවා කියලා. ඒවා කොහොමද කරන්නේ?
අපිට අයි.එම්.එෆ්. එකේ සහාය අවශ්‍යයි. අපි වෙනස් කරනවා කියන්නේ ජනතා විරෝධී අණපනත් සහ බදු බර සම්බන්ධයෙන් අපි සංශෝධනය කරනවා කියලා. අපි ජනතාවගේ පැත්තෙන් හිතලයි කටයුතු කරන්නේ. අපි එකෙන් අයි.එම්.එෆ්. එකත් එක්ක ගැටෙන්න ලෑස්ති නෑ. හැබැයි අපි ජනතාවට පීඩාවකින් තොර සහායක් ගන්නයි බලාපොරොත්තුව. ඒ වෙනුවෙන් අපි එකඟතාවයන් මත සංශෝධන සහිතව කටයුතු කරනවා.
Qසමාජ මාධ්‍ය වාරණයට සහ ප්‍රතිත්‍රස්ත පනත සම්බන්ධයෙන් බොහෝ දෙනා විවේචනය කරනවා. ඔබලා මොනවගේ අදහසකද ඉන්නේ?
මේ පනත් දෙක මේ වෙලාවේ ගෙන ආ යුතු පනත් දෙකක් නෙමේ. මේ වෙලාවේ සමාජ මාධ්‍ය නියාමන පනතක් මොකටද? මේ වෙලාවේ අවශ්‍ය රට ගොඩනගන, ආර්ථිකය කෙළින් කරන වැඩ පිළිවෙළක්. ඒත් ආණ්ඩුව කරන්නේ ජනතාවගේ අදහස් ප්‍රකාශ කිරීමේ අයිතිය සීමා කරන්න යන්නේ. මේක ඒකාධිපති තත්ත්වයක්. ප්‍රතිත්‍රස්ත පනත වුණත් සංශෝධනය කරලා ගේන්න අපි කිව්වා. මේ අය සැකකරුවන් රඳවා ගන්න පොලීසියේ ඉහළ නිලධාරීන්ට බලය දෙන්න හදනවා. ඒක දේශපාලන මැදිහත් වීමක්. පොලීසිය කිව්වම අපිට ප්‍රශ්නයක් තියෙනවා මේ රටේ.
Qඒ කියන්නේ පනතට ඡන්දය දෙන්නේ නෑ?
ඔව්. ආණ්ඩුව මේ විදිහටම පනත් දෙක සම්මත කරගන්න යනවා නම් අපි කිසිම විදිහකින් මීට ඡන්දය ලබාදෙන්නේ නෑ. අපි ප්‍රතික්ෂේප කරනවා. ඒත් ආණ්ඩුව කෙසේ හෝ සම්මත කරන්න පුළුවන්. ඒත් අපි එකක් කියනවා ජනතා මර්දනකාරී පනත් අපි අපේ ආණ්ඩුවකදී අහෝසි කරනවා.
Qදැන් දේශපාලන භූමියේ ලොකුම තර්ජනය ජාතික ජනබලවේගය නේද?
ජාතික ජනබලවේගය කිසිම විදිහකින් අපිට තර්ජනයක් නෙමේ. රටේ දේශපාලන නායකත්වය ගැනීමේදී අවබෝධය සහ වැඩපිළිවෙළ ගැන ජනතාව ඉතාම ඕනෑකමින් බලනවා. ඒත් ජාතික ජන බලවේගය එවැනි තැනක නෑ. ඔවුන්ට බිම් මට්ටමේ ජනතා කැමැත්ත ගොඩනැගිලා නෑ. ඒක තියෙන්නේ සමගි ජනබලවේගයට. ඒක මේ තවත් දේශපාලන ව්‍යාපාරයක් පහත් කරන්න කරන වචනයක් නෙමේ. ඒත් ඇත්ත ඒක. අපි ඒ අයට වඩා ගොඩක් ඉස්සරහෙන් මේ ගමනේ ඉන්නේ.
I ගයාන් ගාල්ලගේ