ඇමැතිවරයෙක් කරණමකට සූදානම්?
පසුගිය දිනක රජයේ ජ්‍යෙෂ්ඨ අමාත්‍යවරයෙක් කටුනායක හරහා විදෙස් සංචාරයකට ගියේය. ගුවන් තොටේ බලා සිටි පිරිසට එහි අමුත්තක් නොදැනිණි. එහෙත් ඔවුන්ගේ ඇස් ලොකු වී වචන දොට්ට පැන්නේ එම අමාත්‍යවරයා ගුවන්තොටුපළට කැඳවාගෙන පැමිණි පුද්ගලයා දුටු අවස්ථාවේය. එය දේශපාලන බලවතුන්ගේ කනට යාමට වැඩි වෙලාවක් ගියේ නැත.
අමාත්‍යවරයා කැටුව ගිය මේ පුද්ගලයා ප්‍රධාන විපක්ෂයට සම්බන්ධ ඉහළ පෙළේ ක්‍රියාකාරී චරිතයකි. ඔහු ප්‍රසිද්ධියේ පෙනී සිටීම මගහරින පුද්ගලයකු වුවද තිරය පිටුපස සිට බලය වෙන්දේසි කරන ප්‍රධාන චරිතයක් බවද සඳහන් ය. කෙසේ වුවද අදාළ අමාත්‍යවරයා ගුවන්තොටුපළට පැමිණෙන අවස්ථාවේදී අහම්බෙන් එහි රැඳී සිටි තවත් රජයේ අමාත්‍යවරයකුගේ උකුසු ඇසින් බේරීමට ඔහුට නොහැකි විය. අදාළ අමාත්‍යවරයා සමඟ රැඳී සිටි ''බලය මෙහෙයවන තැරුව්කරු* දුටු සැණින්ම ඔහු හඳුනා ගත්තේය. එයට හේතුවූයේ මේ අමාත්‍යවරයාත් තැරුව්කරුත් කලකට පෙර එකම පක්ෂයක කටයුතු කළ බැවිනි. ඔහු වහාම රජයේ ඉහළම මට්ටමට තමන් දුටු දේ පිළිබඳව අනතුරු ඇඟවීමක් කිරීමට පියවර ගත්තේය.
ආණ්ඩුවේ ඉහළම බලධාරීහු දැන් රට ගිය අමාත්‍යවරයා සම්බන්ධයෙන් උකුසු ඇස යොමාගෙන සිටිති. ඔහු දේශපාලන කරණමකට සූදානම් වෙමින් සිටින්නේය යන අදහස එයට හේතුවයි.
දූෂණ චෝදනා පිරි අමාත්‍යංශයක ලේකම් ධුරය: ජනපති මැදිහත් වෙයි
මේ අතර ඉතා වැදගත් අමාත්‍යංශයක ලේකම් ධුරය ලබාගැනීම සඳහා ඇතිව තිබූ තරගය දැන් වෙනස් අතකට හැරෙමින් තිබේ. අතිරේක ලේකම්වරුන් බර ගණනක් මේ ලේකම් ධුරය ලබාගැනීම සඳහා තරග බිමට බැස විවිධ අමාත්‍යවරුන් සහ මන්ත්‍රීවරුන් හරහා ලොකු කැම්පේන් එකක් දියත් කර තිබිණි. විෂය භාර අමාත්‍යවරයා මේ දිනවල පසුවන්නේ තරමක අසීරු අඩියක වුවද ඔහුද තමන්ට අවශ්‍ය කරන ලේකම්වරයාගේ නම නිර්දේශ කර තිබේ.
ඊළඟ මාසයේදී විශ්‍රාම යාමට නියමිතව සිටින වත්මන් ලේකම්වරයාද තමන්ට සේවා දිගුවක් ලබාදෙන්නැයි ඉල්ලීමක් කර ඇති බවද වාර්තා විය. ජනාධිපතිවරයාට සමීප මන්ත්‍රීවරයකු හමුවී තමන්ට සේවා දිගුවක් ලබාගැනීමට තිබෙන අවශ්‍යතාව ප්‍රකාශ කර ඇතැයිද ඒ බව ජනාධිපතිවරයාට දැනුම් දෙන බවට එම මන්ත්‍රීවරයා සඳහන් කර ඇතැයිද දැනගන්නට තිබේ.
කෙසේ වුවද මේ පවතින තත්ත්වය පිළිබඳව දැනගෙන සිටින ජනාධිපති රනිල් වික්‍රමසිංහ මහතා අදාළ අමාත්‍යංශයේ කිසිදු නිලධාරියකු ලේකම් ධුරයට පත් නොකරන බව අවධාරණය කර තිබේ. අදාළ අමාත්‍යංශය සම්බන්ධව වර්තමානයේ පවතින අධික දූෂණ චෝදනා ඇතුළු ගැටලු රැසක් හේතුවෙන් එම ලේකම් ධුරයට අමාත්‍යංශයට පිටතින් නිලධාරියකු පත් කිරීමට අදහස් කර ඇති බවද එම ධුරයට සුදුසු නිලධාරියා කව්දැයි ජනාධිපතිවරයා දැනටම හඳුනාගෙන සිටින බවද සඳහන්ය. එම නිලධාරියා ජනාධිපතිවරයාට ඍජුවම වාර්තා කරනු ඇති බවද කියයි.
මිලියන ගණනක් මකර කටට යැවූ මොරොක්කෝ ගමන
''ශ්‍රී ලංකා ආර්ථිකයේ ගැලවුම්කාරයෝ'' වශයෙන් තමන්ම හඳුන්වා ගන්නා පිරිසක් යළිත් වරක් ලෝක සවාරිවල යෙදීම ආරම්භ කර තිබේ.
එක් රාජ්‍ය අමාත්‍යවරයෙක් පසුගියදා නිලධාරීන් හතර දෙනකුද කැටුව මොරොක්කෝව බලා පියාසර කළේ සමුළුවකට සහභාගි වීම සඳහාය. මේ දූත පිරිස ගමන් කළේ ව්‍යාපාරික පන්තියේ ය. එසේම නැවතී සිටියේ අධි වියදම් හෝටල්වලය. මේ සඳහා මිලියන ගාණක් වියදම් කරනු ලැබුවේ මෙහි සිට රැගෙන යන ලද ශ්‍රී ලංකාවේ ජනතාවගේ බදු මුදල්ය.
මුලදී මේ දූත පිරිස මීට වඩා වැඩිවීමට නියමිතව තිබිණි. ඒ අනුව රාජ්‍ය අමාත්‍යවරයා සමඟ නිලධාරීන් හත් දෙනෙක් මොරොක්කෝව බලා යාමට සූදානමින් සිටියහ. කෙසේ වුවද ජනාධිපති ලේකම් කාර්යාලය එයින් තිදෙනකුට අනුමැතිය ලබාදී නැත. මේ දූත පිරිස පිළිබඳ තොරතුරු දැනගැනීමෙන් පසුව භාණ්ඩාගාරයේ හිටපු ලේකම්වරයකු ප්‍රකාශ කළේ තම ධුර කාලය තුළදී මේ රැස්වීමට යවනු ලැබුවේ ඒ හා සමාන මට්ටමේ එක් නිලධාරියකු පමණක් බවය. පිළිගත් ක්‍රමවේදය වන්නේ අයවැය සම්පාදනය කෙරෙන කාල සීමාව තුළදී භාණ්ඩාගාරයේ නිලධාරීන් රට තුළ රැඳී සිටීමය. ලබන 13 වැනිදා 2024 අයවැය පාර්ලිමේන්තුවට ඉදිරිපත් කිරීමට නියමිතය.
I සන්ඩේ ටයිම්ස්