ණය බරෙන් රට බේරගන්න හොඳම කට්ටිය ඉන්නෙ අපටයි
හර්ෂණ රාජකරුණා (පාර්ලිමේන්තු මන්ත්‍රී - සමගි ජනබලවේගය)
- ජා.ජ.බ. ප්‍රතිපත්ති ලෝකය පිළිගන්නෙ නෑ
- ජනතා හිතවාදී අයවැයක් ගේන්න මේ ආණ්ඩුවට බෑ
- හීන දකින අයට පොළොවට බහින්න වෙනවා
Qමේ වෙද්දී විවිධ මුහුණුවරේ විවිධ ක්ෂේත්‍ර නියෝජනය කරමින් ජනාධිපති අපේක්ෂකයෝ කරළියට එමින් ඉන්නවා. ඔබලා ප්‍රධාන පක්ෂයක් හැටියට වගේම කාලයක් දේශපාලනය කරපු පක්ෂයක් හැටියට, ඔබලාගේ ජනාධිපති හීනයට මේක අභියෝගයක් නේද?
අපි මේ රටේ ප්‍රධාන විපක්ෂය. අපේ අපේක්ෂකයා සජිත් ප්‍රේමදාස මහත්තයා. අපි මේ වෙද්දී අපේ පක්ෂය බිම් මට්ටමේ ඉඳලා ශක්තිමත් කරලා තියෙන්නේ. ඒ නිසා ඔය කිසිම අපේක්ෂකයෙක් අපිට නම් අභියෝගයක් නෙමෙයි. අපි දන්නවා මේ වෙද්දී ධනවත් පුද්ගලයෝ මේ සටනට ඇවිල්ලා තිබෙනවා. ඉතිං ඒ අයගේ පෞද්ගලික මුදල් ජනතාවට වියදම් කිරීම හොඳ දෙයක්. ඒත් ජනතාව වැළඳගෙන ඉන්නේ අපේ නායකයව. ඒක තර්ජනයක්වත් අභියෝගයක්වත් නෙමේ.
Qඅපි දන්නවා මේ වෙද්දී ආණ්ඩුවෙන් මැතිවරණ සිතියම වෙනස් කරන්න, බලය පාර්ලිමේන්තුවට පවරන්න වගේ වැඩ ගොඩක් සිද්ධ කරමින් යනවා. මේවා ඡන්දය කල්දාන්න හදන වැඩද කියලා සමහර අයට සැක සිතෙනවා. විපක්ෂයේ මන්ත්‍රීවරයෙක් හැටියට කියන්න ආණ්ඩුවට මැතිවරණය කල්දැමීමේ හැකියාවක් තියෙනවද?
අපිට නරක අත්දැකීම් තියෙනවා මේ ආණ්ඩුව එක්ක. පළාත් පාලන මැතිවරණය කල්දැම්මා හිතාමතාම. ඉතිං මේ වෙනදේවල් එක්ක අපිට සැකයක් එනවා මොකක්ද මේ කරන්න හදන්නේ කියලා. අපි මේ මැතිවරණ ප්‍රතිසංස්කරණවලට විරුද්ධ නෑ. හැබැයි මේ හරහා කරන්න යන දේ ගැන සැකයක් අවිශ්වාසයක් තියෙනවා. ඒකට අපි විරුද්ධයි. අපි ඒ නිසයි කියන්නේ මැතිවරණය තියලා ලැබෙන ජනවරමෙන් මේ වගේ ප්‍රතිසංස්කරණ කරමු කියලා.
Qපාර්ලිමේන්තු මන්ත්‍රීවරුන්ගේ විනය සම්බන්ධයෙන් විශාල ප්‍රශ්න ආවා පාර්ලිමේන්තුව ඇතුළේ. ඔබලත් ඒවට විරුද්ධ වුණා. ඒත් අජිත් මාන්නප්පෙරුම මන්ත්‍රීවරයාගේ හැසිරීම හේතුවෙන් ඔහුට පාර්ලිමේන්තුව සති කිහිපයකට තහනම් වුණා. බලය ගන්න ඉන්න ඔබලා මෙහෙම හැසිරුණාම හරිද?
ඇත්තටම මාන්නප්පෙරුම මන්ත්‍රීතුමාට ලොකූ අසාධාරණයක් වුණා. එතුමාගේ ප්‍රශ්නය වෙනුවට විෂය භාර අමාත්‍යවරයා පිළිතුරු ලබා නොදී නැගිටලා යන්න ගියා කතානායකවරයා ඉල්ලීම් කරද්දී. එතැනදී ආවේගශීලි තත්ත්වයක් සිද්ධවුණේ. ඒත් මම කියනවා අපි හැමෝටම ආදර්ශමත් වෙන්න ඕන. මොකද මේ පාර්ලිමේන්තුවේ 225ටම චෝදනාවක් තියෙනවා විනය ගැන. ඒ නිසා අපේ ගෞරවය රුකගන්න කටයුතු කරන්න ඕන.
Qමේ වෙද්දී ආණ්ඩුව සමාජ මාධ්‍ය වාරණයට සහ ප්‍රතිත්‍රස්ත පනතක් ගේන්න යනවා. මොකක්ද ඔබලා ඒ වෙනුවෙන් ගන්න ක්‍රියාමාර්ගය?
ඉතාම පැහැදිලිවම මේ පනත් දෙකටම විරුද්ධව නෛතික ක්‍රියාමාර්ග වගේම පාර්ලිමේන්තුව තුළදීත් පිටතදීත් අවශ්‍ය දැඩි පියවර ගන්නවා. සමහර දේවල් අපි කරලා තියෙනවා. ඒ වගේම ජනතාව එකතු කරගෙන මේ පනත් වෙනුවෙන් අපි පාරට එනවා.
Qමීළඟට තීරණාත්මක අවස්ථාවක් එන්නේ අය-වැය හරහා. ඒ අය-වැය වෙනුවෙන් විපක්ෂයේ වැඩපිළිවෙළ මොකක්ද?
මේ ආණ්ඩුව පහුගිය කාලේ ක්‍රියාත්මක වුණ ආකාරයට අපි විශ්වාස කරන්නේ නෑ. මේක ජනතාවාදී අයවැයක් වෙයි කියලා. අපි ඒ ඉදිරිපත් කිරීමත් එක්ක තමයි අවශ්‍ය පියවර ගන්නේ. ඒත් අපි විශ්වාස කරන්නේ නෑ මේක ජනතාහිතවාදී අයවැයක් කියලා. වෙන්නේ ජනතාවට තවත් පීඩනයක් විතරයි. දැනටම ලයිට් බිල්, අත්‍යවශ්‍ය භාණ්ඩ, තෙල් වගේ දේවල් වල මිල අධිකයි. ඉතිං ඉදිරිය සුබවාදී වෙන්නේ නෑ. ඒ නිසා අපි අදූරදර්ශී ආණ්ඩුවට කිසිම විදිහකින් සහාය දක්වන්නේ නෑ.
Qජාතික ජනබලවේගයේ අය කියන්නේ මේ රට හදන්න බෑ කියලා කාටවත්. ඒ චෝදනාව ඔබලාටත් එල්ල කරනවා. ඇත්තටම යහපාලනය කරගන්න බැරිවුණ ඔබලට ආණ්ඩුවක් අරන් කරගන්න පුළුවන්ද?
මම නම් ප්‍රාර්ථනා කරනවා කිසිම විදිහකින් ජනතාව වැරදි තීරණයක් ගන්න එපා කියලා. ඒ පක්ෂයට තියෙන්නේ තනිකරම සමාජවාදී ප්‍රතිපත්ති. එහෙම රටකට බලය දෙන්න නරකයි. මොකද ජාත්‍යන්තර වශයෙන් සහායක් ලබාදෙන්නේ නෑ. ලෝකයෙන් කොන් වෙන්න වෙන්නේ. ඒක වුණොත් වෙන්නේ කබලෙන් ලිපට වැටෙන එක. ඒ නිසා කිසිම විදිහකින් බලයක් දෙන්න එපා එයාලට.
Qඇයි? මොකක්ද ඔවුන්ට තියෙන නුසුදුසුකම?
පැහැදිලිවම එයාලට අත් දැකීම් නෑ. ඒ වගේම ඒ ප්‍රතිපත්ති ලෝකය පිළිගන්නේ නෑ.
අනිවාර් යෙන්ම මිනිස්සුන්ට සියදිවි නසාගන්න වෙන්නේ. මොකද කබලෙන් ලිපට වැටෙනවා. මේ වෙලාවේ ජාත්‍යන්තර සහාය රටට අවශ්‍ය මොහොතක්.
Qඔබලාත් එක්ක පාර්ලිමේන්තු ආපු පාර්ලිමේන්තු සගයෝ දැන් ජනපති හීන දකින තැනක ඉන්නේ. මොකක්ද මේ වෙන්නේ?
එක එක අයට හීන තියෙනවා. හැබැයි ඒ හැමෝටම දවසක පොළොවෙ පය ගහන්න වෙනවා. ඒ නිසා ඒ අයත් එකතු කරගෙන යන එක තමයි අපේ අරමුණ. අනාගතයේ දැවැන්ත බලවේගය හදනවා.
Qදැන් බලය ආවොත් ඔබලාට මේ රට ණයෙන් බේරගන්න පුළුවන්ද?
ආවොත් නෙමේ. අනිවාර්යයෙන් එනවා. අපේ ඉන්නවා හොඳම දක්ෂ කණ්ඩායමක්. හොඳ පිරිසිදු පිරිසක්. අපිට හොඳ දැක්මක් තියෙනවා. ඒ නිසා හැමෝටම වඩා හයිය තියෙන්නේ අපිට.
I ගයාන් ගාල්ලගේ