අපට දැන් ඉන්නේ සැලැස්මක් ඇතුව වැඩකරන නායකයෙක්
පාලිත රංගේ බණ්ඩාර - එක්සත් ජාතික පක්ෂ මහලේකම්
- අයවැයක් පරද්දලා ආර්ථිකය ජයග්‍රහණය කරන්න පුළුවන්ද?
- සිල්ලර ප්‍රශ්න අල්ලගෙන කරන සමගිය කඩන කතා අපි අනුමත කරන්නෙ නෑ
- ජනතාවට යම් අසීරුතාවලට මුහුණ දෙන්න වෙනවා
Q ඔබේ පක්ෂ සම්මේලනයේදී ඡන්ද දායකයෝ බලාපොරොත්තු වුණා පක්ෂයේ තනතුරුවල වෙනසක් වෙයි කියලා. මොකද එහෙම කසුකුසුවක් තිබ්බ නිසා. ඇත්තටම ඇයි එහෙම නොවුණේ. වැඩේ කල් ගියාද?
ව්‍යවස්ථාව ජනතාව සම්මත කරලා තියෙනවා. ඒ අනුව ජනවාරි මාසයේ ඉඳලා වැඩ කරනවා. ඔව්, තනතුරුවලට වෙන වෙන අය බලාපොරොත්තුවෙන් ඉන්නවා. නමුත් තනතුරු සම්බන්ධයෙන් වෙනස් වීමක් අවශ්‍ය නම් ඉදිරිකාලයේ කටයුතු කරන්න පුළුවන්. ඒ ජනවාරි මාසයේ සිට. ඇත්තටම අතන මෙතන තනතුරු මාරු කරන එකට වඩා කොහොමත් ප්‍රතිපත්ති සහ අනාගතය සම්බන්ධයෙන් අපිට වැඩකරන්න තියෙන්නේ. ඒකට පහසු වෙන විදිහටයි ව්‍යවස්ථාව සංශෝධනය කළේ. ඒ වගේම ඔන්ලයින් හරහා වැඩ කරන්නත් අපි පටන් අරන් තියෙනවා. මේ වෙද්දී අපේ පාක්ෂිකයෝ, සංවිධාන, තරුණයෝ ගොඩක් එක්ක අපි කටයුතු කරන් යනවා.
Q මේ වෙද්දී ඊළඟට ජනාධිපතිවරණයක් සඳහා සූදානම් වෙන්න කියලා ජනාධිපතිවරයා කියලා තියෙනවා. ඒ වෙනුවෙන් ජනාධිපතිවරයත් ඉදිරිපත් වෙන බව කියලා තියෙනවා. ඒ වගේම තවත් අපේක්ෂකයෝ රුසක් ඉදිරිපත් වෙනවා. මම අහන්නේ ජනාධිපතිවරයාට ඒ අපේක්ෂයෝ අභියෝගයක් නේද?
මේ අවස්ථාව රටේ අත්හදා බැලීම් සිදුකරන අවස්ථාවක් නෙමේ. පසුගිය පාර අත්හදා බැලීම් සිද්ධ කළා. ඒකෙන් වුණේ රට බංකලොත්භාවයට වැටිච්ච එක. ඒකෙන් ජනතාවට යන එනමං නැතිවුණා. දැන් ජනතාව බලන්න ඕන මේ රට පාලනය කරන්න පුළුවන් ආර්ථික වශයෙන් රට ඉස්සරහට ගන්න පුළුවන් කෙනා කවුද කියලා. ඔය කතන්දර පවත්වන අය කියයි රටට ආදරෙයි කියලා. හැබැයි ඒ අයගේ පිටිපස්සේ තියෙන්නේ ජාවාරම්. අවශ්‍ය වුණොත් අපිට ඒවා ජනතාවට පෙන්නන්න පුළුවන්. දේශපාලන නායකයෝ ගත්තම කතන්දර විතරයි. වගකීම් බාරගන්න කෙනෙක් නෑ. ඒ නිසා මේ වෙලාවේ අවශ්‍ය කතා විතරක් නෙමෙයි. සැලැස්මක් එක්ක වැඩකරන මිනිහෙක්. එහෙම නායකයෙක් ජනතාව පිළිගන්න ඕන. එහෙම නායකයෙක්ට ඉන්නේ රනිල් වික්‍රමංසිහ. 1994 වෙනකල් මේ රට වැටිලා තිබ්බේ නෑ. ඊට පස්සෙයි මේ රට වැටෙන්න ගත්තේ. මොකද 2022ක වෙනකල් රට එජාප නායකයෙක් පාලනය කළේ නෑ.
Q ඔබලගේ නායකයා තෝරගත්තේ පොහොට්ටුව. හැබැයි මේ වෙද්දී ඒ අය කියනවා ඒ අය ජනාධිපති අපේක්ෂකයෙක් ඉදිරිපත් කරනවා කියලා. ඒ අයගේ සහාය නැතුව රනිල් වික්‍රමසිංහ මහත්තයට දිනන්න පුළුවන්ද?
හැම දේශපාලන පක්ෂයක්ම බලන්නේ තමන්ගේ අනන්‍යතාවය රුකගනිමින් ඕනෑම මැතිවරණයකට අපේක්ෂකයෙක් ඉදිරිපත් කරන්න. ඔබ කියන පක්ෂයත් එහෙමයි. මෙතන තියෙන්නේ අපේක්ෂකයෙක් ඉදිරිපත් කරන එක නෙමෙයි. ඉදිරිපත් කරන අපේක්ෂකයට දිනන්න පුළුවන්ද සහ ඔහුට රට පාලනය කරන්න පුළුවන්ද? කියන ප්‍රශ්නය තියෙන්නේ. ඔය කියන දේශපාලන පක්ෂවලට මේ රට බාර අරගෙන යන්න පුළුවන් අපේක්ෂකයෝ ඉන්නවද කියලා ප්‍රශ්නයක් තියෙනවා.
Q සෞඛ්‍ය ඇමැති කෙහෙළිය රඹුක්වැල්ල මහත්තයා අයින් කරලා ඒ අයගෙම පක්ෂයේ කෙනෙක්ට දුන්නා. ඒත් පොහොට්ටුව ඒකට විරුද්ධයි. හේතුව ඔවුන්ව මේ පිළිබඳව දැනුවත් කළේ නෑ කියලයි කියන්නේ. දැන් සීතල යුද්ධයක් ඇතිවෙලා. මොකක්ද මේ ප්‍රශ්නය?
සෞඛ්‍ය අමාත්‍යවරයටත්, අමාත්‍යංශයටත් හොඳ ප්‍රතිචාරයක් නෙමේ පසුගිය කාලයේ ලැබුණේ. ඒ අතර පාර්ලිමේන්තුවට විශ්වාසභංගයකුත් ඉදිරිපත් වුණා. ජනාධිපතිවරයා ඒ හැම මොහොතක ඉවසීමෙන් වැඩකරන් යන්න ඉඩ දුන්නා. එතුමා ඇහුම්කන් දෙන කෙනෙක්. ඉතින් ජනතාවගේ සහ විපක්ෂයේ හඬ ගැන අවබෝධ කරගෙන ඇමැතිධුරය සංශෝධනය කළා. ඒක හරහා ඇමැති මණ්ඩලය දශමයක් වැඩිකරලා. අනික පක්ෂයේ සහෝදරයකුටයි අමාත්‍ය ධුරය දුන්නේ. ඇමැතිකම් වැඩි කළේ නෑ. පිටින් අය පත් කළෙත් නෑ.
Q එන අය වැය පොහොට්ටුවට පරාජය කරන්න පුළුවන් කියලා ඒ අයම නොකියා කියනවා. එහෙම අවදානමක් තියෙනවද?
පරාජය කරනවා කියලා කියන්න පුළුවන් අන්තවාදී ලෙස වැඩකරනවා නම් ඕනෑම කෙනෙකුට. ඒත් මම අහන්නේ ආර්ථිකය ජයග්‍රහණය කරන්න පුළුවන්ද? ඒකයි මෙතන ප්‍රශ්නය. ඒක බැරි නිසානේ රනිල් වික්‍රමසිංහ මහත්තයට රට බාර දුන්නේ. ඒ නිසා ඒ වගේ සිල්ලර ප්‍රශ්න අල්ලන් සමගිය බිඳෙන කතා කියන එක අනුමත කරන්නේ නෑ. අපිටත් පුළුවන් ඒවට සැර උත්තරයක් දෙන්න.
Q ජනතාව එන්න එන්න හිරවෙනවා ජීවන බරෙන්. මම අහන්නේ මේකෙන් ආයේ දේශපාලනය කරන්න හැකියාවක් තියෙනවද?
කොහොමත් මේ රටේ මිනිස්සු 50% කින් විතර දේශපාලන පක්ෂවලින් ඈත්වෙලා තියෙන්නේ. 50%කට අඩු සංඛ්‍යාවක් තමයි පක්ෂ එක්ක ඉන්නේ. 94 ඉඳලා 2022 දක්වා ඇතිවුණ ආර්ථික කඩාවැටීම තමා මේකට හේතුව. ඒක රනිල් වික්‍රමසිංහ මහත්තයා හරි එජාපය හරි බාරගත යුතු නෑ. ඒ නිසා මේ රට ගොඩනගන අභියෝගය දැන් රනිල් වික්‍රමසිංහ මහත්තයා අරන් තියෙන්නේ. යම් අසීරුතාවයකට ජනතාවට මුහුණ පාන්න වෙනවා. එහෙම කඩාවැටුණු රටවල් එහෙම තමයි ගොඩ ආවේ. ඒ නිසා මේක සුළු කාලයක් ඉවසන්න වෙනවා. විශ්වකර්මයටවත් බෑ එකපාර ගොඩදාන්න. එහෙනම් කලින්ම කට්ටිය අරන් කරනවනේ.
Q මෙවර අයවැයෙන් ජනතාවට සහන ලැබෙයිද?
ඔව්. ජනාධිපතිතුමාගේ අරමුණ සෑම අංශයකටම ජනතාවට සහන ලබාදීම. ඒ සඳහා එතුමා උපරිම උත්සාහ ගන්නවා.
I ගයාන් ගාල්ලගේ