වෙසක් කාලෙටනෙ බකට් එල්ලන්නේ: වෙසක් එනකම් බලමු
සනත් නිශාන්ත - ජල සම්පාදන රාජ්‍ය අමාත්‍ය
- ආණ්ඩුව අපේ ජ්‍යෙෂ්ඨ නායකයන් අත්හැරලා යනවා නම් දෙපාරක් හිතන්න වෙයි
- රැලි එන්න පුළුවන් යන්න පුළුවන් හැබැයි ජනවරම තවම තියෙන්නෙ පොහොට්ටුවට
- අනේ නිමල් ලන්සා මොන අභියෝගයක්ද?
Q ඔබලා තමා වර්තමාන ජනාධිපතිවරයා පත් කළේ. ඒත් පහුගියදා අමාත්‍ය මණ්ඩල සංශෝධනයෙන් ඉතාම දරුණු හිත් බිඳීමක් වුණා පොහොට්ටුවේ. මොකක්ද මේ අවුල?
අපි තමයි රනිල් වික්‍රමසිංහ මහත්තයා ජනාධිපති කරන්න තීරණය කළේ. ඒත් රනිල් වික්‍රමසිංහ මහත්තයා නෙමේ වෙන කිහිප දෙනෙක් හිතාගෙන ඉන්නවා ජන වරමකින් තමයි පත්වුණේ කියලා. ඒත් ඇත්තටම තවම ජනවරම තියෙන්නේ පොහොට්ටුවට. මේකේ රැලි එන්න පුළුවන්, රැලි යන්න පුළුවන්, රැලි වගේ ඒවා පෙන්නන්න පුළුවන් අය ඉඳියි. කෝටි ගණන් සල්ලි තියෙන මිනිහෙක්ට ෆේස්බුක් එක සල්ලිවලට ගන්න පුළුවන් වුණාට ජනවරමක් ගන්න බෑනේ. ඒක ගන්න පුළුවන් ඡන්දයකින්. කෝටි ගණන් සල්ලි පෙන්නන අයට පුළුවන් රැලි පෙන්නන්න.
Q ඔබලට ජනවරමක් තියෙනවා කියන්නේ කොහොමද?
තවම ජන හා සංඛ්‍යාලේඛන අනුව කාටද ජනවරම තියෙන්නේ? අපිට. අපි ඡන්දය දින්නේ. ඒක පොහොට්ටුවට නැහැයි කියලා හිතන අය ඉන්නවා. පෙන්නන්න යන අයත් ඉන්නවා. අපි කැමැති ඡන්දයක් එනවා නම් ඒකට උත්තරයක් දෙන්න. ඒ නිසා අද ජනාධිපතිතුමාගේ ඔළුව වෙනස් කරලා, තනියම ගමනක් යන්න පුළුවන් වගේ කතා කියන අය කරන්න යන්නේ මේ ආණ්ඩුවයි ජනාධිපතිතුමයි විනාශ කරන්න යන එක. ජනාධිපතිතුමාටයි, රටටයි හෙට දවසක් ඕනෑ නම් එකතුවෙලා යන්න ඕනෑ.
Q ඒත් ඒ අය කියන්නේ රට මේ තැනට පත් කළේ පොහොට්ටුව, රට ගොඩනැගුවේ ජනාධිපතිවරයා කියලා? ඒ නිසා ජන ප්‍රසාදය තියෙන්නේ එයාලට කියලා?
ජන ප්‍රසාදය තියෙනවා කියලා මොකෙන්ද කියන්නේ. කොහෙද ඔප්පු කරලා තියෙන්නේ. ඡන්දයක් තිබුණේ නෑනේ. අපි දන්න කාලේ ඉඳලා රෝහණ විජේවීර මහත්තයගේ රැස්වීම්වලට දහස් ගණන් මිනිස්සු ගියා. ඒත් බලය ගන්න ඡන්දයක් නෑනේ ඒ අයට. අපි බිමේ බලේ දන්නවා, ඡන්දවලට බය නෑ. ඡන්දවලට ගියාම අපි බලමු.
Q ජනාධිපතිවරණය සඳහා පොහොට්ටුවට වෙනම අපේක්ෂකයෙක් ඉන්නවද දැන්?
තවම එහෙම තීන්දු කරලා නෑනේ. එහෙම තීන්දුවක් අරන් නෑ.
Q ඒත් එක එක නම් සමහර අය කියනවා විතරක් නෙවෙයි. වෙනම දානවා කියලත් කියනවා?
තවම එහෙම තීරණයක් අරන් නෑ.
Q පරම හතුරා වෙලා ඉන්නේ දැන් එකම පක්ෂයේ හිටිය නිමල් ලංසා නේද? එතුමා අභියෝග කරනවා පුළුවන් නම් අයවැය පරාද කරන්න කියලා පොහොට්ටුවට?
අනේ නිමල් ලන්සගේ මොන අභියෝගද? එයා එක්ක කවුද සංවාද කරන්න යන්නේ? ඕවා මේ ජනාධිපතිතුමාගේ හිත දිනාගන්න කියන කාරණානේ.
Q පොහොට්ටුවේ අය නොකියා කියනවා අයවැය පරාජය කරනවා වගේ කතා. එහෙම කරයිද?
අයවැය පරාජය වුණාම මැතිවරණයකට යන්න වෙනවා. ඒක තමයි ක්‍රමය. මම හිතන්නේ නෑ පොහොට්ටුවටත් වෙන කාටවත් මැතිවරණයකට යන්න හදිසියක් තියෙනවා කියලා. හැබැයි ආණ්ඩුවක් හැටියට එකට ඉස්සරහට යන්න බැරි නම් මිනිස්සුන්ගෙන් බලෙන් අත් උස්සවන්න බෑනේ. උදාහරණයක් හැටියට මේ ඡන්දයේදි ජෝන්ස්ටන් ඇමැතිතුමාට, රෝහිත ඇමැතිතුමාට, චන්ද්‍රසේන ඇමැතිතුමාට මට නම් අත් උස්සන්න කියන්න බෑ.
Q ඒ ඇයි ඒ?
ඒ මිනිස්සු හිටිය කැබිනට් ඇමැතිවරු, දිස්ත්‍රික් නායකවරු. එයාලා හදපු ආණ්ඩුව එයාලා අත ඇරලා යනකොට දෙවරක් හිතන්න වෙයි. එහෙම ප්‍රශ්නයක් තියෙනවා. මම දන්නේ නෑ මොන තත්ත්වයක් උදා වෙයිද කියලා. හැබැයි තවම 134ක් ඉන්නේ පොහොට්ටුවේ. අපේ බහුතරයේ අය තමා ජනාධිපතිතුමාව පත් කළේ. ඒ නිසා හිතන්න වෙයි.
Q ඒ කියන්නේ කලකිරීමෙන් ඉන්නේ?
නෑ නෑ මට නම් කිසිම කලකිරීමක් නෑ. මම මගේ වැඩ ටික කරගෙන යනවා. දේශපාලනය නැතත් මගේ ව්‍යාපාර ටිකක් තියෙනවනේ. ඒ ටික කරගෙන ඉන්නවා. මට නොසැලකුවා කියලත් මට ගැටලුවක් නෑ. හැබැයි ආණ්ඩුව හදන්න එකතු වුණු අය එළියේ තියලා යන එක ගැන නම් හිතන්න වෙයි.
Q දැන් අයේ ඡන්දයක් ඉල්ලන්න මිනිස්සු ළඟට යන්න පුළුවන්ද? මේ ජීවන බර මිනිස්සුන්ට දරන්න බෑනේ?
මේක ලංකාවේ තියෙන දෙයක් නෙවෙයි. මුළු ලෝකෙම එහෙමයි. ළිං මැඩියන්ට මේක ලොකු ඇති. ඒත් ලෝකේ ගැන දන්න අයට මේක ලොකු දෙයක් නෙවෙයි.
Q ඔබෙන් ඇවිල්ලා දාහක් දෙදහක් ඉල්ලගෙන යන මිනිස්සු නැද්ද?
එහෙම ඉන්නවා. ඒ අයට පුළුවන් දේ අපි කරනවා. හැමෝගෙම ප්‍රශ්න විසඳන්න අපිට බැරි වෙයි. ව්‍යාපාරිකයෙක් හැටියට මට කරන්න පුළුවන් දේ හැම මන්ත්‍රීවරයටම කරන්න බෑ.
Q නාමල් රාජපක්ෂ මන්ත්‍රීතුමාගේ බිල ගෙව්වේ යාළුකමට නායකතුමාගෙ පුත්‍රයා නිසාද?
නායකතුමා නිසා.
Q දැන් ලයිට් බිල වැඩි නිසා වතුර බිල වැඩි කරනවද?
තවම එහෙම අදහසක් නෑ. ජනතාව අපහසුතාවයට පත්වෙයි කියලා දැනට නෑ.
Q දැනට නෑ කියන්නේ ඉස්සරහට කරනවද?
ඉදිරියේදි වෙන්න පුළුවන්. විදුලි බිල වැඩි කරනවා. අපි හොඳයි කියන තැනක අපි ඉන්න ලෑස්ති නෑ. වැඩි කරන්න වුණොත් කරනවා.
Q ඊළඟ ජනාධිපතිවරණයට අපේක්ෂකයෝ ගොඩයි. පොහොට්ටුවට ලේසි නෑනේ?
වෙසක් කාලයටනේ සහෝදරයා බකට් එල්ලන්නේ. වෙසක් නැති කාලෙට බකට් එල්ලන්නේ නෑනේ. වෙසක් එනකල් බලමු.
I ගයාන් ගාල්ලගේ