තීන්දු දෙකක වෙනස

පාර්ලිමේන්තුවේ මතභේදාත්මක මන්ත්‍රීවරියක වූ ඩයනා ගමගේ කාලයක සිට මන්ත්‍රීවරුන් කිහිප දෙනකු සමඟම ආරවුල්වලට පැටළුණාය. පාර්ලිමේන්තු සැසිවාර ඇතුළත මන්ත්‍රීවරුන් සමඟ ඍජුව ගැටෙන ඩයනා ගමගේ කංසා නීතිගත කිරීම, සංචාරක ව්‍යාපාරය ප්‍රවර්ධනයට මත්පැන් සීමා ඉවත් කිරීම වැනි විෂයයන් සම්බන්ධව පළ කළ අදහස් රට ඇතුළේත් කතිකාවලට හේතු විය.

මේ අතරවාරයේ පාර්ලිමේන්තු සබාගැබෙන් පිටත සජබ මන්ත්‍රීවරුන් දෙදෙනකු සමඟ ඇතිකරගත් ගැටුම ගුටිබැට හුවමාරුවක් තරමට වර්ධනය වීමත් බෙල්ලෙන් අල්ලා ගැනීමත් ඒ සිදුවීම් වීඩියෝ ක්ලිප් හරහා සමාජගත වීමත් හේතුවෙන් ඩයනා ගමගේ පසුගිය සති කිහිපයේ සිටියේ දැඩි කනස්සල්ලකිනි. මේ බොහොමයක් අවස්ථාවලදී ඇය දැඩි ලෙස ආවේගශීලීව අදහස් දැක්වීමද කැපී පෙනුණි.

මෙහෙම ගැටලු ගණනාවක් හේතුවෙන් අසීරුවට පත්ව සිටි රාජ්‍ය ඇමැතිනි ඩයනාට සතුටු විය හැකි දිනයක් උදා වුණේ පසුගිය 31 වැනිදා ලැබුණු අභියාචනාධිකරණ තීන්දුවක් හේතුවෙනි. ඇයගේ පාර්ලිමේන්තු මන්ත්‍රී ධූරය දැරීම බල රහිත කරන රිට් ආඥාවක් නිකුත් කරන ලෙස ඉල්ලා සමාජ ක්‍රියාකාරිකයකු වූ ඕෂල හේරත් ගොනුකර තිබූ රිට් පෙත්සම ගාස්තු සහිතව නිෂ්ප්‍රභ කිරීමට අභියාචනාධිකරණය තීන්දු කර තිබිණි. ත්‍රිපුද්ගල අභියාචනාධිකරණ විනිසුරු මඬුල්ලේ බෙදුණු තීන්දුවක් වශයෙන් ප්‍රකාශයට පත්වූ මෙය බහුතරයේ තීන්දුව වශයෙන් ප්‍රකාශ විය.

එහි එක් සාමාජිකයකු වූ අභියාචනාධිකරණ විනිසුරු එම්.ඒ.ආර්. මරික්කාර් මහතාගේ තීන්දුව වී තිබුණේ රාජ්‍ය අමාත්‍ය ඩයනා ගමගේ මහත්මියගේ පාර්ලිමේන්තු මන්ත්‍රී ධූරය බල රහිත කරන රිට් ආඥාවක් නිකුත් කරන බවය. අභියාචනාධිකරණ සභාපති විනිසුරු නිශ්ශංක බන්දුල කරුණාරත්න සහ විනිසුරු ඛේමා ස්වර්ණාධිපති මහත්ම මහත්මීන්ගේ තීන්දුවේ දැක්වුණේ රාජ්‍ය අමාත්‍යවරියට එරෙහි ඉදිරිපත් කරන ඇති ප්‍රධාන සාක්ෂිය වන ඇයට එරෙහි මහේස්ත්‍රාත් අධිකරණයේ ඇති අපරාධ නඩුව ක්වෝ වොරොන්ටෝ රිට් ආඥාවක් නිකුත් කිරීමට ප්‍රමාණවත් නොවන බවය. පෙත්සම්කරු මෙම රිට් පෙත්සම ඉදිරිපත් කර ඇත්තේ රාජ්‍ය ඇමැතිවරියගේ හොඳ නමට හානි කිරීම සහ ඇය අපකීර්තියට පත්කිරීමේ යටි අරමුණු සහිතව පැහැදිලි බවත් ශ්‍රේෂ්ඨාධිකරණ රීති අනුව රිට් ආඥාවක් නිකුත් කිරීම සඳහා සාධාරණ සැකයෙන් ඔබ්බට ඔප්පු කිරීමට ප්‍රමාණවත් සාක්ෂි ඉදිරිපත් කළ යුතු බවත් සඳහන් විය. අධිකරණයේ මතය වන්නේ මෙම පෙත්සම සද්භාවයෙන් තොරව ද්වේශ සහගතව ඉදිරිපත් කර ඇති බව යැයිද ඒ අනුව පෙත්සමෙන් ඉල්ලා ඇති සහන ප්‍රතික්ෂේප කර පෙත්සම නිෂ්ප්‍රභ කරන බවද තීන්දුවේ සඳහන්ය.

මේ නඩුව රටේ මෑත කාලයේ දැඩි ලෙස මහජන අවධානය දිනාගත් නඩුකරයක් බවට පත්ව තිබුණි. එයට හේතුව මෙය ඍජුවම රටේ වත්මන් දේශපාලනය සමඟ බැඳී තිබීමය. පෙත්සමට අදාළ තීන්දුව ලබා දීම අවස්ථා කිහිපයකදී කල් දමනු ලැබීය. ඩයනා ගමගේ රාජ්‍ය ඇමැතිනියගේ පුරවැසිභාවය මේ නඩුවේ නිමිත්ත වශයෙන් සැලකෙන බැවින් එය පාර්ලිමේන්තුවේ ජ්‍යෙෂ්ඨ මැති ඇමැතින්ගේ අවධානයටද ලක්විය. විශේෂයෙන්ම පාර්ලිමේන්තුවේ ප්‍රධාන විපක්ෂය වන සජබ මේ නඩු තීන්දුව දෙස ඉතා සැලකිල්ලෙන් බලා සිටි බව පැහැදිලිය.

එයට හේතුව සජබ ඩයනාගේ නමින් තිබෙන දේශපාලන පක්ෂයට තිබෙන සම්බන්ධතාවයයි. පසුගිය මහ මැතිවරණයේදී ඇයගේ පක්ෂය හරහා තරග කර සජබ පාර්ලිමේන්තුවේ ප්‍රධාන විපක්ෂය බවට පත්වුවත් ඩයනා මැතිවරණයෙන් පසුව ආණ්ඩුව සමඟ එක්වී පොහොට්ටු ආණ්ඩුවට තුනෙන් දෙකක බලයක් ලබාගැනීම සඳහා සහාය දුන්නාය. එය සජබ බලාපොරොත්තු නොවූ තත්ත්වයක් විය. ඒ දේශපාලන පිම්මත් සමඟ ඩයනාට රාජ්‍ය අමාත්‍ය ධූරයක්ද හිමි විය. ඉන්පසුව පාර්ලිමේන්තුවේ ඇතැම් විවාද සම්පන්න අවස්ථාවලදී සජබට ඍජුවම ඇඟිල්ල දිගු කරමින් ඩයනා කතා කිරීමද සජබ නොසතුටට හේතු වී තිබිණි.

මේ රටේම අවධානයට ලක්වූ නඩු තීන්දුවේදී අභියාචනාධිකරණ විනිසුරු එම්.ඒ.ආර්. මරික්කාර් මහතා විසින් ලබාදුන් තීන්දුවේ සඳහන් කරුණු කිහිපයක්ද මෙහිදී සඳහන් කළ යුතුය.

''රාජ්‍ය අමාත්‍ය ඩයනා ගමගේ මහත්මිය පාර්ලිමේන්තු මන්ත්‍රීවරියක ලෙස ආදර්ශමත් විය යුතුය. විනිවිදභාවයකින් වගකීමකින් යුතු අයකු විය යුතුය. ඇය විසින් කළ යුතු වන්නේ පෙත්සම්කරුට අභියෝග කිරීම නොව ඇයගේ පුරවැසිභාවය පිළිබඳ කරුණු සනාථ කිරීමයි. පෙත්සම්කරු බැලූ බැල්මට රාජ්‍ය අමාත්‍යවරියට එරෙහිව නඩුකරයක් ඉදිරිපත් කර ඇති බවද පෙනී යයි. ඒ අනුව පෙත්සම්කරු ඉදිරිපත් කර ඇති කරුණු ප්‍රමාණවත් බවද රාජ්‍ය අමාත්‍ය ඩයනා ගමගේ මහත්මියගේ පාර්ලිමේන්තු මන්ත්‍රී ධූරය බල රහිත කරමින් ක්වෝ වොරොන්ටෝ රිට් ආඥාවක් නිකුත් කරන බවත් ඇයට පෙත්සම්කරුගේ නඩු ගාස්තු ගෙවීමට නියෝග කරන බවත් තීන්දුවේ සඳහන්ය.''

පෙත්සම්කරු වන ඕෂල හේරත් තීන්දුවෙන් පසුව මාධ්‍යයට ප්‍රකාශ කර තිබුණේ බෙදුණු නඩු තීන්දුවක් ලැබී තිබීම හේතුවෙන් තමන් ශ්‍රේෂ්ඨාධිකරණය හමුවේ මේ තීන්දුව අභියෝගයට ලක් කරන බවය. එයින් පැහැදිලි වන්නේ මේ නඩුව තවම අවසානයක් වී නැති බවකි. කොහොම වුණත් පාර්ලිමේන්තුවේ ආසන සංයුතියට පවා බලපෑමක් විය හැකි මන්ත්‍රී ධූර අහෝසි වීමකට මේ නඩුවේ තීන්දුව බලපෑමක් විය හැකි වීම හේතුවෙන් රටේ ජනතාවගේත් අවධානය මේ නඩුව කෙරේ යොමු වී තිබිණි. මුස්ලිම් කොංග්‍රසයේ නසීර් අහමඩ් මන්ත්‍රීවරයාට එරෙහිව ලැබුණු නඩු තීන්දුව හේතුවෙන් ආණ්ඩුවට සහාය ලබා දෙන වෙනත් පක්ෂවල මන්ත්‍රීවරුන් දැඩි කැළඹීමකට පත්ව සිටින බවද පෙනෙන්නට තිබිණි. ඒ තීන්දුවෙන් ආණ්ඩුවට එක් මන්ත්‍රීවරයකුගේ සහාය ද අහිමි විය. මේ නිසා ඩයනාගේ නඩු තීන්දුවට ආණ්ඩුවේද ඉහළම අවධානය යොමුවී තිබීම ගැන පුදුම විය යුතු නැත.

මේ ආකාරයේම නඩුවකට ගාලු දිස්ත්‍රික් මන්ත්‍රිනියක වූ ගීතා කුමාරසිංහ ද 2017 වසරේදී මුහුණ දුන්නාය. එවකට එජනිස මන්ත්‍රීවරියක වූ ගීතාට එරෙහිව ද්විත්ව පුරවැසිභාවය දැරීම නිමිති කර ගනිමින් මේ නඩුව පවරා තිබිණි. 2017 මැයි මස 03 වැනිදා අභියාචනාධිකරණය තීන්දු කර තිබුණේ 19 වැනි ආණ්ඩුක්‍රම ව්‍යවස්ථා සංශෝධනයේ අර්ථ නිරෑපණය කර ඇති පරිදි ශ්‍රී ලංකාවේ පුරවැසියකු වෙනත් රටක පුරවැසිභාවය ලබා සිටී නම් ඔහු හෝ ඇය පාර්ලිමේන්තුවේ මන්ත්‍රී ධූරයක් දැරීමට නුසුදුස්සකු වන බවය. ඒ හේතුවෙන් ගීතාගේ පාර්ලිමේන්තු ධූරය අහෝසි කෙරිණි. එම තීන්දුවට එරෙහිව ගීතා ශ්‍රේෂ්ඨාධිකරණයට ගියාය. 2017 නොවැම්බර් 02 වැනිදා ශ්‍රේෂ්ඨාධිකරණය මගින් ලබාදුන් නඩු තීන්දුව මගින් අභියාචනාධිකරණයේ තීන්දුව ඒකමතිකව තහවුරු කර තිබිණි. ඒ අනුව ගීතාට පාර්ලිමේන්තු මන්ත්‍රී ධූරය අහෝසි විය. එවකට සිටි අග්‍රවිනිශ්චයකාර ප්‍රියසාද් ඩෙප් මහතා ප්‍රමුඛ ශ්‍රේෂ්ඨාධිකරණ විනිසුරුවරුන් 05 දෙනකුගෙන් සමන්විත විනිසුරු මඬුල්ලක් මගින් මේ තීන්දුව ලබා දෙනු ලැබ තිබිණි.
ගීතාට එරෙහිව ලබාදුන් නඩු තීන්දුව එවකට සිටි ඇතැම් නීති ක්ෂේත්‍රයේ ප්‍රවීණයන් හඳුන්වා දී තිබුණේ රටේ ඉතා වැදගත් නඩු තීන්දුවක් වශයෙනි. මන්ත්‍රී ධූරය දරන්නකුගේ සුදුසුකම් මෙරට අධිකරණය ඉදිරියේ අභියෝගයට ලක් කළ ප්‍රථම අවස්ථාව එය වූ බවද සඳහන් විය. ගාලු දිස්ත්‍රික්කයේ ඡන්ද දායකයන් පස්දෙනකු විසින් ගීතාට එරෙහිව මේ රිට් පෙත්සම ගොනුකර තිබිණි.

ගීතා කුමාරසිංහ 2014 මාර්තු 16 වැනිදා පුවත්පතකට ලබා දී තිබූ සම්මුඛ සාකච්ඡාවකදී තමන් ස්විට්සර්ලන්ත පුරවැසියකු බවට කළ ප්‍රකාශය ඇයට එරෙහිව ගොනු කෙරුණු රිට් පෙත්සමට නිමිත්ත වී තිබිණි. 2015 අගෝස්තු මහ මැතිවරණය සඳහා නාමයෝජනා ලබා දීමට පෙර එම තත්ත්වය නිවැරදි කර ගැනීමට ඇයට අවස්ථාව තිබුණත් එය සිදුකිරීමට ඇය අසමත් වී ඇතැයි අභියාචනාධිකරණය ලබාදුන් නඩු තීන්දුවේ සඳහන් වී තිබිණි. ශ්‍රේෂ්ඨාධිකරණය එම කාරණය සැලකිල්ලට ගත් බවද සඳහන් විය.

කෙසේ වුවද ඉන්පසුව 19 වැනි ව්‍යවස්ථා සංශෝධනයට පසුව 20 වැනි සංශෝධනයද ඉන්පසුව 21 වැනි සංශෝධනයද සිදුවිය. 2020 පැවැති මහ මැතිවරණය වන විට ස්වට්සර්ලන්ත පුරවැසිභාවය ඉවත් කරගෙන සිටි ගීතා එම මැතිවරණයේ ජය ලබා පාර්ලිමේන්තුවට පැමිණ වර්තමානයේ රාජ්‍ය අමාත්‍යවරියක වශයෙන් කටයුතු කරයි.

තිබෙන මේ ප්‍රශ්න ද සමඟ රට ඉදිරියට ඇදෙන්නේ ජනාධිපතිවරණයක් පැවැත්වෙන වසරකටය. සමහරවිට මහ මැතිවරණයක් පැවැත්වීමටද ඉඩක් පවතින බවද කියන්නේ ආණ්ඩුව කරගෙන යාමට පොහොට්ටුව සහාය දැක්වීම අවසන් කළ දවසට පාර්ලිමේන්තුව විසුරුවා හැරීම හැර වෙනත් කළ හැකි දෙයක් නැති බැවිනි. මේ පසුබිමේ ඩයනාගේ නඩු තීන්දුවේ ඉදිරිය සියලුම දෙනාට ඉතාම වැදගත් බව යථාර්ථයයි.

I ශශීන්ද්‍ර