පාර්ලිමේන්තුවේදී දෙගොල්ලො එකතු වුණු කතාව බොරුවක්
හෙක්ටර් අප්පුහාමි - සමගි ජන බලවේගය පාර්ලිමේන්තු මන්ත්‍රී
- අපි කතා කරන එකත් ආණ්ඩුවට ප්‍රශ්නයක් වෙලා
- මේ සමාජය එකපාරට පොළොවේ ගහලා කනපිට හරවන්න බෑ
- ජවිපෙ වේදිකාවේ කියන්නේ ජනප්‍රිය බොරු
Q ශ්‍රී ලංකා ක්‍රිකට් බෝඩ් එක සම්බන්ධයෙන් පැවති විවාදය අවසානයේ ඡන්දයකට යන්න හිටියා. ඒත් අවසානයේ ඡන්දයකට නොගිහින් ඒකමතිකව සම්මත කළා. ඊට පහුවදා විපක්ෂ නායකතුමා කිව්වා ඡන්දය තියන්න දුන්නේ නෑ කියලා. මොකක්ද ඇත්තටම වුණේ?
අපි හැමෝම දන්න කාරණයක් තමයි ඇමැතිතුමා ඉදිරිපත් කළ කරුණුවලට ආණ්ඩුවේ ලොකු බෙදීමක් තිබුණා. ඒත් විපක්ෂ නායකතුමා යෝජනා කරපු යෝජනාවලියෙන් අපේක්ෂ කළේ ක්‍රිකට් සම්පූර්ණයෙන් සුද්ද කරලා තිබුණු තැනට ගේන්න. මොකද හැමතැනම මේ ගැන කතාවනේ. මේක සුද්ද කරන්න ඕනෑ කියන මතයේ පාර්ලිමේන්තුවේ ආණ්ඩු පක්ෂයේ මන්ත්‍රීවරු කණ්ඩායමක් හිටියා. ඒත් සමහර අය ඉන්නවා, ක්‍රිකට් බෝඩ් එකට යටවුණු කණ්ඩායමක් ඉන්නවා. ඒ අය ක්‍රිකට් බෝඩ් එක රුකගන්න ලොකූ සටනක් දෙනවා. මෙන්න මේ අය හඳුනාගෙන එළියට දාන්න තමයි අපි ඡන්දයක් ඉල්ලුවේ. හැබැයි ඒක වහලා මග ඇරියා.
Q කතානායකතුමාට ඡන්දයක් ගන්න පුළුවන්නේ?
කතානායකතුමාට පුළුවන් කවුරුන් හෝ බෙදීමකදී ඡන්දයකට යන්න. ඒත් කතානායකතුමා කිව්වා සියලු දෙනා ඒකමතිකව කැමැතියි කියලා. ඒ නිසා අවසානයේ බෝඩ් එක රුකගන්න වැඩේ වුණා. මොකද ආණ්ඩුවේ අය ඔක්කොම කෑගහලා ඒකමතිකව වැඩේ සම්මත කළා. ඒ වුණේ බෝඩ් එකට බය නිසා.
Q ඒ කියන්නේ අරමුණ සාර්ථක කරගන්න බැරිවුණා නේද?
මේකෙන් ඉදිරි කාලයේ පරීක්ෂණවලට ලොකු සහයෝගයක් වෙනවා. මොකද මේ ගැන විමර්ශනයක් කරන්න ඕනෑ.
Q ඇතැම් අය චෝදනා කරන්නේ රටේ මෙච්චර ප්‍රශ්න තියෙද්දී මේ ප්‍රශ්නය විසඳගන්න කට්ටිය එකතු වුණා කියලා?
ඒක බොරු. දෙගොල්ලෝ එකතු වුණා කියන්නේ බොරු. අනික එහෙම එකතු වුණේ නෑනේ. පේනවනේ එකඟතාවයක් තිබුණේ නෑනේ. ඒකෙන්ම පේනවනේ ඒගොල්ලන්ගේ වාසියෙදී අපි එක්ක එකතු වෙනවා. අවාසියෙදී වැඩේ කඩාකප්පල් කරනවා. ඒක හොඳටම දැක්කනේ පාර්ලිමේන්තුවෙදී. අනික අනෙක් ප්‍රශ්න විසඳගන්න ආණ්ඩුව අපිව එකතු කර ගන්න උත්සාහ ගන්නේ නෑ. කොහොම වුණත් ආණ්ඩුව එක්ක එකට වාඩිවෙන්න, ආණ්ඩුව හරිහමන් වැඩක් ගෙනාවේ නෑ. එහෙම වැඩක් ආවොත් අපි පක්ෂ විපක්ෂ නැතුව හිටගන්නවා.
Q විපක්ෂයට ලොකු චෝදනාවක් තියෙනවා මේ උදේ කාලය නිකම් කා දමනවා කියලා විපක්ෂ නායකවරයා විසින්?
පට්ටපල් බොරුනේ කියන්නේ ඔය. ඔය පාර්ලිමේන්තුවේ ඕනෑ දේවල් කතා කරන්නේ කී දෙනාද? ආණ්ඩුවෙන් එහෙම කතා කරනවද නිකම්වත්. ආණ්ඩු පක්ෂයේ අය ඕපදූපයි මඩයි හැම එකම ගහනවා. බොරු කතාන්දර කිය කියා කාලය කනවා. ජනතාව වෙනුවෙන් කතා කරන්නේ විපක්ෂය. අනික මේ ආණ්ඩුවේ කාලය නෙමේ අපේ කාලය. ජනතාව පිළිගන්න ඕනෑ දෙයක් තියෙනවා. ඒ තමයි පාර්ලිමේන්තුව ඇතුළේ එහෙම කතා කරන්න 1/27 යටතේ හැකියාව තියෙන්නේ විපක්ෂ නායකතුමාට විතරයි. එතුමා කතා කරන්නේ ජනතාවගේ ප්‍රශ්න. ඒ කාලය ජවිපෙට, ද්‍රවිඩ පක්ෂවලට බෙදලා දීලා තියෙනවා. එක එක ජනතාව විසින් ඉදිරිපත් කරන යෝජනා සහ ප්‍රශ්න තමයි එතුමා අහන්නේ. ඒක ආණ්ඩුවට ප්‍රශ්නයක් වෙන්නේ අපි කතා කරන නිසා.
Q ඊළඟ බලය ලබාගැනීමේ සටනෙදී ඔබලා එක්ක ඉන්න විපක්ෂයේ බලවේගය තමයි ජාතික ජන බලවේගය. ඒ අය කියන්නේ ප්‍රධාන පක්ෂ දෙකට මේ රට හදන්න බෑ කියලා?
මම හිතන්නේ නෑ ජනතාව එහෙම මෝඩයි කියලා ජවිපෙ කියන ඒවා පිළිගන්න. ඒ අයට පුළුවන් ඉතාම ජනප්‍රිය විදිහට වේදිකාවේ බොරු කියන්න. ඕනෑ කෙනෙක්ට සුරංගනා ලෝක මවන්න පුළුවන්. ඒවා ක්‍රියාත්මක කරන එකයි අමාරු. ජවිපෙ එදා ඉඳලා හිටියෙම එක එක ආණ්ඩු එක්ක. රට හදන්නේ කොහෙද? විශ්වවිද්‍යාලයට යන ළමයට නිසි වයසේ අධ්‍යාපනය ඉවර කරලා එන්න විදිහක් නෑනේ. කල් යනවා. සමහර ළමයි නවක වදය නිසා අධ්‍යාපනය අත් ඇරියා. අනික මේ වෘත්තීය සමිති කොයි තරම් ආයතන කඩා වැට්ටුවද? ඔය වෘත්තීය සමිති එක්ක වැඩ කරන්න පුළුවන් වෙයිද එයාලට. බෑ. ඒ නිසා ඕවා වචන විතරයි. අනික එයාලා දිව්වට අනෙක් පක්ෂ තවම ඡන්ද සටන පටන් ගත්තේ නෑනේ.
Q අපි දන්නවා බලය ලබාගන්න දැන් විවිධ අය එනවා තරගයට. මම අහන්නේ ඒ අය එක්ක සජිත් ප්‍රේමදාසට තියෙන අභියෝහය මොකක්ද?
මම හිතන්නේ නෑ අභියෝග නෑ කියලා. අභියෝග තියෙනවා. ඒ අභියෝග නිසාම තමයි අපිට ජයගන්න පුළුවන්. මොකද අපි මහ පොළවේ ජීවත්වෙන මිනිස්සු. කවුරු හරි කියනවා නම් මේ රට 100෴ක් පිරිසිදු කරනවා කියලා, ඒක පට්ටපල් බොරුවක්. මේක සම්පූර්ණයෙන් සුද්ද කරන්න බෑ. මොකද අපි ජීවත් වෙන්නේ මේ සමාජය එක්ක. ඒ අයව එකපාර පොළොවේ ගහලා කණපිට හරවන්න බෑ. ඒක ක්‍රමිකව සිද්ධ කරන්න ඕනෑ. අන්න ඒ වැඩපිළිවෙළ තියෙන්නේ සජිත් ප්‍රේමදාස මහත්තයට. අන්න ඒ නිසයි ඔහු බලයට ආ යුත්තේ.
I ගයාන් ගාල්ලගේ
