රට වෙනුවෙන් අපේ දේශපාලන ප්‍රතිපත්තිත් වෙනස් කළා
ප්‍රේමනාත් සී දොලවත්ත - පාර්ලිමේන්තු මන්ත්‍රී (ශ්‍රී ලංකා පොදුජන පෙරමුණ)
- තරුණයන් රට දාලා යාම අධ්‍යාපනයේ ප්‍රශ්නයක්
- කවුද හිතුවේ මෙච්චර හොඳ අයවැයක් ඉදිරිපත් කරයි කියලා
- නායකයෙක් බිහිවෙන්න නම් අර්බුදයක් ඇතිවෙන්න ඕනෑ
Q අපි දැක්කා ශ්‍රේෂ්ඨාධිකරණ තීන්දුවකින් 2019-2022 අතර ආර්ථික කඩාවැටීමට රාජපක්ෂවරු සහ නිලධාරීන් වගකිව යුතුයි කියලා කිව්වා. මොකද ඒ ගැන කියන්නේ?
ගරු ශ්‍රේෂ්ඨාධිකරණ තීන්දුව අපි පිළිගන්නවා. අධිකරණ තීන්දුවක් ගැන කතා කරන්න මම ලෑස්ති නෑ. හැබැයි විපක්ෂය මේ තීන්දුව අල්ලන් විවේචනය කරනවා. මේ තීන්දුවෙන් දේශපාලනය කරන අයට හොඳ පාඩමක් කියා දෙනවා තීන්දු ගන්නකොට ගන්න තීන්දු අදේශපාලනිකව රටට අවශ්‍ය තීන්දු ගන්න කියලා. ඒක නිසා තමයි 8%කට අඩු කරපු වැට් එක අද 18% දක්වා වැඩි කරන්න තීන්දු කරලා තියෙන්නේ. මේ තීන්දුවෙන් කියලා තියෙන්නේ වැට් එක 8%ට අඩුකරපු නිසා තමයි ආර්ථිකය පරිහානියට පත්වුණේ කියලා. එහෙම නැතුව දූෂණය වංචාව නිසා නෙමෙයි. ඒ නිසා අපි ඒ තීන්දුවට ගරු කරනවා.
Q හැබැයි, ඒ තීන්දු නිසා රට අද ලොකු අවුලක පැටළුණා නේද?
ඔව් අපි පිළිගන්නවා. ඒ වෙලාවේ ගත්ත සමහර තීන්දු තීරණ වැරදියි. අපි ආණ්ඩුවක් හැටියට ඒවට වගකියන්න ඕන. ඒවා අපි විවේචනත් කළා. හැබැයි අපි ඒ වගකීමෙන් මිදුණේ නෑ. අපේ දේශපාලන අනාගතය පැත්තකින් තියලා දක්ෂිණාංශික නායකයකුට උදව් කරනවා මේ වෙද්දී. මම පිළිගන්න දෙයක් තමයි අර්බුදයක් ඇතිවෙන්න ඕන නායකයෙක් බිහිවෙන්න. රනිල් වික්‍රමසිංහ මහත්තයව 2020-2021 කවුරුත් ගණන් ගත්තේ නෑනේ. අන්තිමේ අර්බුදය හමුවේ එතුමා රටේ නායකයා වුණා. ඒ වගකීම බාරගත්තා.
Q ඔබලා දුන්න සහායේ වැඩක් තියෙනවද?
අපිට නෙමෙයි පහුගිය කාලය එක්ක බලද්දී, අපි විශාල වර්ධනයක් රටක් වශයෙන් අරගෙන තියෙනවා. සමහර තීන්දු තීරණවලට වෙනස් වෙන්න අමාරුයි. ඒක මිනිස් ස්වභාවය. ඒත් අපි මේ වෙලාවේ රටේ ආර්ථිකය වෙනුවෙන් අපේ දේශපාලන ප්‍රතිපත්ති පවා වෙනස් කරගෙන තියෙනවා. සමහරු පැනලා යනකොට මේ අර්බුදය වෙනුවෙන් නායකත්වය දුන්නේ රනිල් වික්‍රමසිංහ මහත්තයා. ඒ ගෞරවය තියෙනවා.
Q දැන් ජනාධිපතිවරයා ඉදිරිපත් කළ අයවැය නිකන්ම නිකම් අයවැයක් කියලා විපක්ෂය කියනවා?
ඔව් එහෙම ඒ අය කියන්නේ මේක ඇතුළේ තියෙන දේවල් හොඳ බව දන්න නිසා. කවුද හිතුවේ රජයේ සේවකයන්ගේ වැටුප 10,000කින් වැඩි කරන්න පුළුවන් වෙයි කියලා. අස්වැසුම තුන්ගුණයක් වෙලා. වකුගඩු රෝගීන්ගේ මුදල වැඩි කරලා. මම කොළඹින් ආපු මන්ත්‍රී කෙනෙක්. මේ මහල් නිවාසවල මිනිස්සුන්ට ඒ ගෙවල්වලට දුන්න පූර්ණ අයිතිය පොඩි දෙයක් නෙමේ. මෙතැනින් එහා තව මොනවද? බිම්සවිය අයිතිය, කඳුකර ජනතාවගේ අයිතිය රුකලා තිබෙනවා. ඉතිං තව මොනවද? මේ අර්බුද හමුවේ මෙහෙම අයවැයක් අපි බලාපොරොත්තු වුණේ නෑ. ඉතිං විපක්ෂය කොහෙත්ම බලාපොරොත්තු වෙන්නේ නෑ.
Q ඒ කියන්නේ අද පාලනය හොඳයි?
මම හිතන්නේ අද දේශපාලන තීන්දුවලට වඩා රටට අවශ්‍ය තීන්දු අරගෙන තියෙන්නේ. මේ අයවැය අවශ්‍ය අයට සහන ලබාදීලා තිබෙනවා. විශේෂයෙන් මේ අයවැයෙන් අධ්‍යාපනය පුළුල් කරලා තිබෙනවා. සාම්ප්‍රදායික පරණ අධ්‍යාපනයට වඩා ඉතාම පුළුල් අධ්‍යාපනයක් හදන්න, විදේශ විනිමයක් ගෙන්න ගන්න ක්‍රමයක් හදලා තියෙන්නේ. ඒ නිසා විවේචනය කර කර බෙදිලා වෙන්වෙලා කවද්ද අපේ බලය ගන්නේ කියන මතයට වඩා මේ නායකත්වය වෙනුවෙන් අපි සහාය දෙන්නේ රටේ ආර්ථිකය වෙනුවෙන්.
Q ඔබ ගෙනාපු තරුණ පනතට මොකද වුණේ?
1989 තරුණ අසහන කමිටුවෙන් තමයි තරුණ නියෝජනය පළාත් පාලන ආයතනවලට ආවේ. ඒක හොඳටම තිබ්බා 2017 වෙනකල්. ඒත් 2017දී අවාසනාවන්ත විදිහට මේ තරුණ අනිවාර්ය නියෝජනය 2017 නව පනත යටතේ වෙනස් වෙනවා. ඒ කියන්නේ කාන්තා නියෝජනයත් එක්ක. ඒ නිසා 2018දී ඒ අවස්ථාව ලැබුණේ නෑ. මම කොළඹ තරුණ මන්ත්‍රීවරයෙක් හැටියට පහුගිය අප්‍රේල් මාසයේදී මේක පාර්ලිමේන්තුවට ඉදිරිපත් කරනවා.
Q විපක්ෂය කිව්වේ ඔබ මේ පනත ගෙනාවේ පළාත් පාලන ඡන්දය කල්දාන්න කියලා?
ඔව්. ඒ අය එහෙම කියනවා. මාව විවේචනය කරනවා. ඒත් මේක ඒක ඡන්දයට අදාළ නෑ. මම උත්සාහ කළේ තෝරා පත්වෙන එකෙන් 25%ක නියෝජනයක් ගන්න. ඒත් කාරක සභාවලදී ඒක සංශෝධනය වෙනවා.
Q දැන් කීයද තරුණ නියෝජනයට අවසර?
දැන් ලැයිස්තු දෙකෙන්ම 25%ක නියෝජනයක් හැටියට සංශෝධනය වෙලා තියෙන්නේ. දැන් ලැයිස්තු දෙකෙන්ම 25%ක් ඉදිරිපත් කරන්න ඕන. ගිය සිකුරාදා (10) ඒක නීතියක් හැටියට පත්වුණා.
Q දේශපාලනය නෙමේ තරුණයන්ට දැන් ජීවත් වෙන්න බැරි එකයි ප්‍රශ්නය? විශාල තරුණ අසහනයක්?
රටම දැන් විශාල අසහනයක ඉන්නේ. ඒත් අපි ඇත්ත යථාර්තයට මුහුණ දෙන්න ඕන. මේ අවධානයෙන් අපි ඉස්සරහට යන්න ඕන. අද වෙද්දී අපේ රටේ හැමෝටම ලොකු වගකීමක් තියෙනවා පුංචි හරි දායකත්වයක් රට වෙනුවෙන් ලබාදෙන්න.
Q කොහොම වුණත් දැන් තරුණයෝ රට දාලා යන්නේ, ආයේ නොඑන්න?
ඒක අධ්‍යාපනයේ ප්‍රශ්නයක්. ඉන්දියාව අයි.එම්.එෆ්. එකට යන්නේ අන්තිමට 1989 දී. හැබැයි ඊටපස්සෙ ඔවුන් අධ්‍යාපනය පුළුල් කරලා, තාක්ෂණ ක්ෂේත්‍රය හදලා ඔවුන් ලෝක ආර්ථිකයට ශ්‍රමිකයෝ දෙන තැනකට යනවා. අද ඒ අය විදේශ විනිමයෙන් ශක්තිමත්. ඒ නිසා අපි මේක බලන්න ඕන බුද්ධි ගලනයක් හැටියට නෙමේ. අපි ලෝකයට ගැලපෙන ශ්‍රමිකයෝ පුහුණු කරන්න ඕන. එහෙම නැතිව ගෘහ සේවිකාවන් යවලා හරියන්නේ නෑ. අද ඉන්දියාව කරන්නේ ඒක. රටෙන් පිට ඉන්න අය අන්තිමේ රටට එන දේශප්‍රේමයක් අපි ඇති කරන්න ඕන.
Q ඒත් දේශප්‍රේමය නැතිවෙලා තියෙන්නේ වර්තමාන දේශපාලනය ගැන ඇති අවිශ්වාසය නිසා?
ඔව් මම පිළිගන්නවා. ඒත් මේ රට හදන්න පුළුවන්. අපි ඔක්කොම එකතු වෙන්න ඕන. අද අපි වෙනස් වෙලානේ රට හරි තැනට ගන්න. අපි අන්ත දක්ෂිණාංශික නායකයෙක්ට උදව් කරන්නේ. ප්‍රශ්න තියෙනවා. ඒත් මේ වෙලාවේ අපි එකතු වෙන්න ඕන.
I ගයාන් ගාල්ලගේ