අස්වැසුමෙන් ලක්ෂපතියො කෝටිපතියොත් ආධාර ගන්නවා
ජගත් කුමාර - ශ්‍රී ලංකා පොදුජන පෙරමුණ පාර්ලිමේන්තු මන්ත්‍රී
- ඡන්දෙකට කලින් ආණ්ඩු පෙරළන්න මගේ සූදානමක් නෑ
- විපක්ෂය ක්‍රිකට් වගේ මොකක් හරි අල්ලාගෙන ඒක පස්සෙ දුවනවා
- පක්ෂය ගත් යම් තීන්දු නිසා මම ඉන්නේ කලකිරීමෙන්
Q ඔබ පොහොට්ටුව සමඟ ඉතාම සමීපව කටයුතු කළ කෙනෙක්. අද වෙද්දි ඔබේ දේශපාලන මතය සහ දේශපාලන ගනුදෙනුව මොන වගේ තැනකද තියෙන්නේ?
මම ඉතින් ජනතාව වෙනුවෙන් ඉතාම සුහදව සමීපව වැඩ කටයුතු කරනවා. අපේ ආණ්ඩුව ඇතුළේ යම් යම් වැරදි තීන්දු ගත්තා. ඒ වෙනුවෙන් අපි ආණ්ඩුවේ ඇතුළේ කතා කළා. ජනාධිපති එක්ක කතා කළා. වර්තමාන ජනධිපතිතුමාටත් අපි මේ වෙද්දි කියමින් ඉන්නවා ජනතාවට වෙන විවිධ හිරිහැර සම්බන්ධයෙන්. විශේෂයෙන් අණ පනත්, විදුලිය, ගෑස් වැඩි වෙද්දී පවා අපි එතුමාට කතා කරලා කියනවා. ඇත්තටම පහුගිය කාලයේ ගත්ත තීන්දු නිසා අපි රටක් හැටියට බංකළොත් වුණා.
Q ඔබ ඔය කියන්නේ පක්ෂය එක්ක දැන් නෑ කියලද?
ඔව්. පක්ෂය විසින් ගන්න යම් යම් තීන්දු තීරණ නිසා ඉතාම කලකිරීමෙන් මම ඉන්නේ. මම දැන් පක්ෂයේ රැස්වීම්වලට හෝ වැඩ කටයුතුවලට සම්බන්ධ වෙන්නේ නෑ. ඒ අය ගන්න තීන්දු තීරණ වෙනස් කරන්නේ නෑ. ඒවා අඩුපාඩු සහිත තීන්දු. ඒ නිසා මම දේශපාලනඥයෙක් හැටියට විශාල ප්‍රශ්නවලට මුහුණ දෙන්න වුණා. හැබැයි මම ජනතාව එක්ක සමීපව තවම කටයුතු කරනවා.
Q ඒ කියන්නේ ආණ්ඩුව එක්කත් නැද්ද?
නෑ නෑ. අපි ආණ්ඩුව එක්ක ගනුදෙනු කරනවා. මැතිවරණයට කලින් ආණ්ඩු පෙරළන්න හරි, පක්ෂ මාරු කරන්න හරි මගේ සූදානමක් නෑ. මම ජනතාවගේ සුබසාධන කටයුතුවලට මැදිහත්වෙලා කටයුතු කරනවා. හැබැයි ආණ්ඩුවේ ඉන්නවා කියලා දෙන දෙයක් කාලා වෙන දෙයක් නම් බලන් ඉන්නේ නෑ. අසාධාරණයට විරුද්ධව හැම වෙලාවෙම හඬ අවදි කරලා තියෙනවා. ඉස්සරහටත් එහෙමයි. ඒ වගේම ආණ්ඩුවේ හොඳක් තිබුණොත් ඒකටත් සහාය දෙනවා,
Q ඔබ සමෘද්ධි ආධාරකරුවන් වෙනුවෙන් පෙනී හිටිය කෙනෙක්. හැබැයි වර්තමාන ආණ්ඩුවේ අස්වැසුම වැඩසටහන නිසා සමෘද්ධිලාභීන්ට අසාධාරණයක් වුණා. ඉතින් ඔබ ආණ්ඩුව එක්ක සමීපව කටයුතු කරනවා නම් ඒක විසඳගන්න බැරි ඇයි?
එතුමා පත් කරන්න උදව් කළා. ආණ්ඩුවේ සමහර හරි දේවල්වලට උදව් කළා,. ඒ හැරෙන්න දැන් සමීපව අපි කටයුතු කරන්නේ නෑ. ඔව් ඔබ කිව්වා වගේ අස්වැසුම වැඩසටහන හේතුවෙන් සමෘද්ධිලාභීන්ට ලොකු අසාධාරණයක් වුණා. මොන අඩුපාඩු තිබුණත් සමෘද්ධි ව්‍යාපාරය විශාල සේවාවක් රටට කළා. නමුත් ඒ දේ නොසලකා හරිමින් අද වෙද්දී අස්වැසුම කියලා එකක් ගෙනත් ලක්ෂපතියෝ කෝටිපතියෝ ආධාර ලබන තැනට පත්වෙලා. දුප්පත් ආබාධ සහිත අය හැලිලා. ඒවා නිවැරදි කරන්න කිව්වා. ඒත් ඒවා වුණේ නෑ. මම මන්ත්‍රීවරු 63ක් එක්ක අත්සන් කරලා ලිපියක් දුන්නා. ඒ කිසි දෙයක් වුණෙත් නෑ. ඒත් තවම සාර්ථක විසඳුමක් නෑ. අද දිළිඳුකම වැඩිවෙලා. මේ වෙද්දි ලක්ෂ 10ක් අභියාචනා කරලා තියෙනවා. ඒත් තවම කිසිම කෙනෙක් ඒ ගැන හොයන්න කටයුතු කරලා නෑ. ඒත් මම තවම සටන අත් අරින්නේ නෑ. නුසුදුස්සෝ ලක්ෂ ගාණක් සුදුස්සෝ වෙලා.
Q ඔබ ඊළඟ ජනාධිපතිවරණයට හරි මහ මැතිවරණයට හරි මොන වේදිකාවද තෝරගන්නෙ?
දැනට එහෙම කියන්න බෑ. ඇත්තටම ජනතාවට සුදුසු ප්‍රතිපත්ති සහිත පිරිසක් එක්ක මම සිටගන්නවා. ඒක කවුද, කින්ද මන්ද කියලා මට කියන්න බෑ. හැබැයි මම ජනතාව වෙනුවෙන් ඉන්න මන්ත්‍රීවරයෙක් හැටියට මම ජනතා සුබසාධනය වෙනුවෙන් පෙනී ඉන්න කණ්ඩායමක් එක්ක ඉන්නවා. ඒක දැන්ම කියන්න බෑ.
Q ඔබ නියෝජනය කරන කණ්ඩායමට අමතරව එක පැත්තකින් ඉන්නවා සජබය. තව පැත්තකින් ඉන්නවා මාලිමාව. ඒ දෙගොල්ලන්ගෙන් ජනතාවට හිතකාමී වේදිකාව මොකක්ද?
මට නම් පේන්නෙ විපක්ෂයට විශාල කාර්යභාරයක් මේ රටේ තියෙනවා. ඒත් විපක්ෂය තමන්ගේ භූමිකාව මේ වෙනකොට තේරුම් අරගෙන නෑ. දැන් බලන්න මේ සමෘද්ධි සිද්ධියත්, භාණ්ඩ ඉහළ යාමේ සිද්ධියත් ගත්තාම ඒ වෙනුවෙන් විපක්ෂයේ මැදිහත් වීම මට නම් පේන්නෙ නෑ. නමුත් විපක්ෂය ක්‍රිකට් අල්ලගෙන, වෙන මොකක් හරි අල්ලගෙන ඒ පස්සෙ දුවනවා. ජනතාවගේ ප්‍රශ්න අමතකයි. ඊළඟ මැතිවරණය ඉතාම අවිනිශ්චිතයි. ඒක හරියට තේරුම් නොගත්තොත් මම හිතන්නෙ නෑ විපක්ෂයට ජනතාවගේ කැමැත්ත ලැබෙයි කියලා.
Q ඊළඟ ජනාධිපතිවරයා මොන වගේ කෙනෙක් වෙයිද?
මම හිතන්නෙ නෑ විශාල බලයක් සහිත ජනාධිපතිවරයෙක් බිහිවෙයි කියලා. 50෴ ගන්නත් අමාරුයි. මහ මැතිවරණය පවා විශාල බලයක් ගන්න පුළුවන් වෙන්නෙ නෑ.
I ගයාන් ගාල්ලගේ