පොහොට්ටුවේ පිරිසකුත් අපි එක්කයි
රංජිත් මද්දුමබණ්ඩාර - පාර්ලිමේන්තු මන්ත්‍රී, මහ ලේකම් (සමගි ජන බලවේගය)
- මේ බදු ගැහිල්ලෙන් ආණ්ඩුව ඉවරයි
- හොරුත් එක්ක රට හදන්න පුළුවන්ද
- නියම වෙලාවට සන්ධානය හදනවා
Q ඔබලා අලුත් දේශපාලන සන්ධානයක් සම්බන්ධයෙන් පහුගිය කාලයේ සාකච්ඡා කළා. ඒ සන්ධානය ගැන සද්දයක් නෑ. ඇත්තටම ඒක දැන් මොකද වෙන්නේ?
අපි නියම වෙලාවට සන්ධානය පක්ෂ ටික එකතු කරලා හදනවා. කොහොමත් ඊළඟ මැතිවරණයේදී අපි ඉදිරිපත් වෙන්නේ අලුත් සන්ධානයකින්. ඒ නිසා නියමිත වෙලාවට අපි සන්ධානය බිහිකරනවා.
Q සන්ධානයක් හදනවා නම් විශේෂයෙන් සැලකියයුතු පක්ෂ කීපයක් එකතු වෙන්න එපැයි. මේ වෙලාවේ බලය හිමි පොහොට්ටුවේ පිරිසගේ සහාය මොන වගේද?
මෙහෙමයි පොහොට්ටුවේ සැලකිය යුතු පිරිසක් අපි එකතු කරගන්නවා. විශේෂයෙන් හොරකම් වංචා නැති ජනතාව පිළිගන්න පිරිස තමයි අපි මෙතැනදී එකතු කරගන්නේ. පොහොට්ටුවේ විශාල පිරිසක් අපිට කැමැත්ත පලකරලා තියෙනවා. ඒත් අපිට මේවා බලල කරලා තමයි ගන්න වෙන්නේ. ඉතිං හොඳම කණ්ඩායම අපි එකතු කරගන්නවා.
Q කීයක් වගේ ඉන්නවද?
අපිට 20ක් වගේ පිරිසක් මේකට සහාය දක්වන්න කැමැත්ත පලකරලා තියෙනවා.
Q එක්සත් ජාතික පක්ෂයත් ඔබලත් නැවත එකතු වෙයි කියලා බොහෝදෙනා හිතනවා. ඒත් තවම එකතු වෙන පාටක් නෑ. මොකද වැඩේ කල් යනවද?
මේ රට බංකලොත් කරපු, ඒ බංකලොත් කළ බව අධිකරණය විසින් තහවුරු කරපු පිරිස එක්ක තමයි එක්සත් ජාතික පක්ෂ නායකයා තවම වැඩකරන්නේ. ඉතිං එහෙම පිරිසක් එක්ක අපි කොහොමද වැඩ කරන්නේ එකතුවෙලා. ජනතාව විසින් එලවපු පිරිසක් නේ ඉන්නේ. අනික එක්සත් ජාතික පක්ෂය පහුගිය මැතිවරණයේදී ප්‍රතික්ෂේප කළා. ඉතිං කොහොමද අපි ජනතාව එපා කිව්ව පක්ෂයක් එක්ක එකතු වෙන්නේ?
Q රටේ අවුලත් එක්ක වර්තමාන ජනාධිපතිවරයා බිහිවුණා. දැන් ඔහු නැවත බලය ඡන්දයකින් ගන්න උත්සාහ කරනවා. ඒකට පොහොට්ටුවේ අයත් සහාය දක්වනවා. යැයි කියනවා. මම අහන්නේ ඒක සජිත් ප්‍රේමදාසට හෝ ඔබලාගේ පක්ෂයට අභියෝගයක් නෙමේද?
අපිට එතුමාව 2020දී අභියෝගයක් වුණෙත් නෑ. ඉදිරියේ වෙන්නෙත් නෑ. ඇත්තටම එතුමාගේ ආර්ථික සැලැස්ම පිළිවෙළක් නෑ. ජීවන බර වැඩිවෙලා, ලයිට් බිල් වතුර බිල් වැඩිවෙලා, බදු එහෙන් ගහලා. ඉතිං මිනිස්සු තවත් ඔහුව තෝරාගනීද? අනික එතුමා මැතිවරණ කීපයක් මෙහෙය වූ කෙනෙක්. එකක්වත් දිනන්න බැරිවෙලා තියෙනවා. ඉස්සරහටත් එහෙමයි. කොහොම වුණත් මිනිස්සු ඉන්නේ අපි එක්ක. ඒ නිසා ඊළඟ තෝරා ගැනීම අපි.
Q වර්තමාන ආණ්ඩුවේ ආර්ථික ක්‍රමය ගැන අවුලක් ඔබලාට තියෙනවනේ. මම අහන්නේ ඔබලා බලය ගත්තොත් මිනිස්සුන්ට දැනෙන ආර්ථික පරිවර්තනයක් කරන්න හැකියාවක් තියෙනවද? වචනයට සීමා වෙන්නේ නැතිව?
අපිට තියෙනවා ආර්ථික ප්‍රතිපත්තියක්. ඒ වගේම හොරකම දූෂණය නවත්තන්න ඕන. අපි දන්නවා පහුගිය කාලයේ හොරකම දූෂණය රට බංකලොත් වෙලාවෙදිත් සිද්ධ වුණා. බෙහෙත් ටිකෙන්, ගල් අඟුරුවලින් පවා හොරකම් කළා. ඉතිං එතුමා හොරුත් එක්ක ඉන්න ගමන් රටක් හදන්න බෑ. එතුමා කියනවා 2048 වෙනකල් ඉන්න කියලා. එතකල් කාටවත් ඉන්න ලැබෙන්නේ නෑ. ඒත් අපිට තියෙනවා වැඩ පිළිවෙළක්.
Q මේක බලන කෙනෙක්ට හිතෙන්න පුළුවන් සමගි ජන බලවේගයට තියෙන ආර්ථික සැලැස්ම මොකක්ද කියලා. මම අහන්නේ ඔබලට තියෙනවද මේක ගොඩගන්න පුළුවන් ආර්ථික සැලැස්මක්?
අනිවාර්යෙන්ම. අපි මේ ගැන දේශන මාලාවක් කරගෙන යනවා. ඒ සඳහා නිශ්පාදනය වැඩිකරන්න වෙනවා. නීතිය හා සාමය ඇති කරන්න ඕන. වංචාව දූෂණය නවත්තන්න වෙනවා. ඒ වගේම හොරකම් කරපු මුදල් නැවත ගෙන්න ගන්න වෙනවා. අන්න ඒකත් එක්කයි අපිට මේ ආර්ථිකය ගොඩනගන්න වෙන්නේ.
Q මේ රටේ පාර්ලිමේන්තුව ගැන මිනිස්සුන්ට ගෞරවයක් නෑ. හේතුව ඇතුළේ හැසිරීම් සම්බන්ධයෙන් බොහෝදෙනා විවේචනය කරමින් ඉන්නේ. මොකද මේ වෙලා තියෙන්නේ. කවද්ද මේවා හැදෙන්නේ?
ඔබ දකින්න ඇති විපක්ෂ නායකවරයා පසුගියදා රටේ ප්‍රශ්න ගැන කතා කරද්දී ආණ්ඩුවේ මන්ත්‍රීවරු ඇවිල්ලා වාචිකව උත්තර දෙන එක වෙනුවට අතේ තියෙන කොළ උදුරගෙන ගැටුමකට එන්න ගියා. තර්ජනය කළා. මේකට යම් යම් දැඩි දඬුවම් දෙන්න වෙනවා. අජිත් මාන්නප්පෙරුම මන්ත්‍රීවරයා සෙංකෝලයට අත තිබ්බා කියලා මාසයක් දඬුවම් දෙනකොට, විපක්ෂ නායකගේ කොළේ උදුරගෙන ගිය අයට සති දෙකයි දඬුවම් දුන්නේ. කථානායකවරයා මේක හදන්න ඕන. ඒකට මුලසුන සාධාරණ වෙන්න ඕන, ස්වාධීන වෙන්න ඕන. අපි කතනායකවරු කීපදෙනෙක් එක්ක වැඩකරලා තියෙනවා. මෙතුමා ඒක හදාගත්තොත් පාර්ලිමේන්තුව හොඳ වෙයි.
Q මේ වෙද්දී මාළිමාව රටපුරාම ජනතාව හමුවෙමින් යනවා. ඔවුන් කියන දෙයක් තමා උනුත් එකයි මුනුත් එකයි අපි හොඳයි කියලා. ජනතාවට ඒක පොඩි ඇත්තක් යන කාරණයක්. මම අහන්නේ ඒක අභියෝගයක් නෙමේද?
අපි දන්නවනේ පහුගිය කාලෙත් එයාලා ඡන්ද රුස්වීම් කළා. මැයි රුලි පවා තිබ්බා. ඡන්දයක් තිබ්බම 3%යි තිබ්බේ. අනික එයාලා අවුරුදු 72ක කතාවක් කිව්වට එයාලා මේ රටේ ආණ්ඩු එක්ක ළඟින් වැඩකරලා තියෙනවා. චන්ද්‍රිකා නෝනා, මහින්ද මහත්තයා, මෛත්‍රීපාල-රනිල් වික්‍රමසිංහ යහපාලන ආණ්ඩුව. ඒ වගේම සරත් ෆොන්සේකා මහත්තයත් එක්කත් වැඩකළා. ඒ නිසා එයාලට ඇඟ බේරගන්න බෑ. එයාලත් වගකියන්න ඕන මේ විනාශයට.
I ගයාන් ගාල්ලගේ
