මන්ත්‍රී පිරිසක් ගියාට ජනතාව ඉන්නේ අපි එක්කයි
සාගර කාරියවසම් - පාර්ලිමේන්තු මන්ත්‍රී, මහලේකම් ශ්‍රී ලංකා පොදුජන පෙරමුණ
- රනිල් මහත්තයාගේ ඇතැම් තීරණ එක්ක එකඟ වෙන්න බෑ
- යළි අරගලයක් ආවොත් පක්ෂයක් හැටියට මුහුණ දෙන හැටි අපි දන්නවා
- මහින්ද මහත්තයා මේ පක්ෂය හැදුවේ රටට ආදරේ කරන මිනිස්සු වෙනුවෙන්
Q ඔබලා හදිසියේ පක්ෂයක් හැදුවා, හදිසියේම බලය ලැබුණා, හදිසියේම බලය අත්අරින්න වුණා. අන්තිමේ මේ වෙද්දි වෙන කෙනෙක් ජනාධිපති කරලා. දැන් මොකක්ද මේ වෙන්නේ?
ඔබගේ ප්‍රශ්නයට මම කොටස් තුනකින් උත්තර දෙන්නම්. ඔබ කිව්වා හදිසියේ පක්ෂයක් හදලා හදිසියේ බලයක් ගත්තා කියලා. අන්න ඒකට පසුබිම් වෙච්ච දෙයක් තියෙනවා. ඒ තමයි මේ රටේ ඉන්නේ ප්‍රගතිශීලී, ජාතිකත්වය අගය කරන මිනිස්සු. එහෙම මිනිස්සුන්ට තිබුණේ ශ්‍රී ලංකා නිදහස් පක්ෂය. ඒත් ශ්‍රී ලංකා නිදහස් පක්ෂය ඒකෙන් ඉවත් වුණා. ඒ වෙලාවේ ඒ මිනිස්සුන්ට හිටිය එකම විකල්පය තමයි මහින්ද රාජපක්ෂ කියන සාධකය. කොහොම වුණත් අනික් පක්ෂ පස්සෙන් යනවා බලය ගන්න ජනතාවගේ පස්සේ. ඒත් අපේ පක්ෂයට වුණේ ජනතාව ඇවිත් කිව්වා මහින්ද රාජපක්ෂ මහත්තයට පක්ෂයක් හදන්න කියලා. මේ රටට ආදරේ කරන මිනිස්සු වෙනුවෙන් පක්ෂයක් හදන්න කියලා. ඒකයි ජනතාව ඉල්ලුවේ.
Q ඒ මොනවා තිබුණත් බලය දාලා යන්න වුණානේ?
ඔව් අපිට ලැබුණු බලය රැකගන්න බැරි වුණා. අපිට පක්ෂයක් හැටියට ඒ ගැන ස්වයං විවේචනයක් තියෙන්න ඕනෑ. ගෝඨාභය රාජපක්ෂ මහත්තයා ජනාධිපති හැටියට පත් කළාට එතුමට දේශපාලන දැනුමක් නෑ. එතුමට තිබුණේ හොඳ පරිපාලකයකු සතු පරිණතභාවයක් මිසක්, දේශපාලනඥයකු සතු පරිණතභාවයක් නෙවෙයි. සාමාන්‍ය තත්ත්වය යටතේ එතුමාට හොඳ ජනාධිපති කෙනෙක් වෙන්න තිබුණා. නමුත් එතුමා ජනාධිපති වෙලා මාස 4න් කොවිඩ් රෝගය ව්‍යාප්ත වුණා. ඒ නිසා ජනතාව බේරගන්න රට වහන්න වුණා. සංවේදී නායකයෙක් හැටියට එතුමා ආර්ථිකයට වඩා ජනතාව රුකගන්න කටයුතු කළා. විවෘත කරන්න ගිය අවස්ථාවේ විරුද්ධ වුණා. හැබැයි බලන්න එහෙම ක්‍රියා කරපු හැම රාජ්‍ය නායකයටම යන්න වුණා. නවසීලන්තය, ඔස්ට්‍රේලියාව වගේ නායකයෝ පවා ගෙදර ගියා. කොහොම වුණත් ඒ මොහොතේ ගෙනාපු කාබනික පොහොර සංකල්පයත් අපි හිතනවා වැරදියි කියලා. ඒත් ඒක ජනතාවදී තීරණයක්. ඒත් වෙලාව හරි නෑ.
Q දැන් ඔබේ කඳවුර ගැන කිව්වම යුද්ධය දින්නා කියන කාරණය එනවා. හැබැයි පහුගිය අරගලය දවස්වල ඔබලගේ ඡන්ද දායකයා විතරක් නෙවෙයි, අගමැතිවරයට පවා ආරක්ෂාවක් නැතිව ගියා. ඇත්තටම ඡන්ද දායකයා ඔබලව විශ්වාස කරන්නේ කොහොමද?
අපේ පක්ෂය පහුගිය කාලේ පසුබෑමකට හේතු වුණෙත් මේකම තමයි. මේ රටේ ශිෂ්ට මැතිවරණ ක්‍රමයක් හැදුවේ මහින්ද මහත්තයා. විරුද්ධවාදින්ට ගහන එක නතර කළේ එතුමා. ඒත් විරුද්ධ මතයක් දැරුව පාර්ලිමේන්තු මන්ත්‍රීවරු 76කගේ නිවාස ගිනිබත් කළා. පළාත් පාලන මන්ත්‍රීවරු 630කට එහා ගිනිබත් කළා. මේ දැඩි ප්‍රචණ්ඩත්වයක් මුදා හැරියේ තමන්ට ප්‍රජාතන්ත්‍රවාදී විදිහට බලය ගන්න බැරි කණ්ඩායම්. කොහොම වුණත් ගෝඨාභය මහත්තයා අසාර්ථක වුණා ඒක මැඩලන්න. ඒත් ජනතාව අපිව අත්ඇරියේ නෑ. කොහොම වුණත් 3 කණ්ඩායම බයක් ඇති කරලා තියෙන්නේ.
Q මින් ඉදිරියටත් එහෙම වුණොත්?
ජවිපෙ කැරුල්ල කාලේ ජේ.ආර්. ජයවර්ධන කිව්වා තමන්ගේ ආරක්ෂාව තමන් සලසාගත යුතුයි කියලා. අපි හැමදෙනාම දැන් දැනුවත් කරලා තියෙන්නේ. අපි දන්නවා මින් ඉදිරියට එහෙම දෙයක් ආවොත් පක්ෂයක් හැටියට මුහුණ දෙන්න.
Q ඔබලා දේශීයත්වය, ප්‍රගතිශීලි අදහස් දරන කණ්ඩායමක් වමට බර. ඒත් අන්ත දක්ෂිණාංශික රනිල් වික්‍රමසිංහ මහත්තයා එක්ක ආණ්ඩු කරනවා. ඡන්ද දායකයාට හිතාගන්න බැරිව ඇති කොහෙද ඉන්නේ කියලා?
පහුගිය කාලේ අපේ පාක්ෂිකයට කුතුහලයක් සැකයක් තිබුණා. ඒත් දැන් හරි ඇති. මොකද අපි දැනුවත් කළ නිසා. ඒ වගේම ඔබ කිව්වා වගේ රනිල් වික්‍රමසිංහ මහත්තයගේ ඇතැම් තීන්දු තීරණ එක්ක අපි එකඟ නෑ. මතක තියාගන්න නිදහසෙන් පස්සේ කුමන්ත්‍රණවලින් ආණ්ඩු ලබා නොගත්තේ රටවල් දෙකයි, ඒ ඉන්දියාව සහ අපි. ඒත් අපි කුමන්ත්‍රණයක එළිපත්තේ හිටියේ. හමුදා කුමන්ත්‍රණයක් ඇතිවෙයිද කියලත් සහ වෙනත් කණ්ඩායමක් බලය අල්ලයිද කියලත් ප්‍රශ්නයක් තිබුණා. එහෙම වුණා නම් රට කඩා වැටෙනවා. ඒක ලොකු කඩා වැටීමක්. අන්න ඒ නිසා තමයි නීතිය හා සාමය රකින්න කියලා හොඳම නායකයා හැටියට රනිල් වික්‍රමසිංහ මහත්තයා එක්ක එකඟ වුණේ ප්‍රජාතන්ත්‍රවාදය රකීවි කියලා. ඒ කිව්ව දේ හරියටම එතුමා කළා. ඒ වගේම දෙකට බලාපොරොත්තු වුණා විදේශ විනිමය එකතු කර ගැනීමක් සිද්ධ කරයි කියලා. ඒත් ඒ බලාපොරොත්තු වුණු දේ පක්ෂයක් හැටියට අපි සෑහීමකට පත්වීමක් නෑ. මීට වඩා ශීඝ්‍රගාමී වැඩපිළිවෙළකට යොමු විය යුතුයි කියන මතයේ ඉන්නවා. එහෙම නැතුව අපේ දේවල් විකුණලා අපිට කන්න ඕනෑ නෑ. එහෙම වුණාම ආයේ කඩා වැටෙනවා මේ රට.
Q පක්ෂයකට තියෙන ලොකුම අවුල තමයි පක්ෂයේ ඉන්න අය පක්ෂයට විරුද්ධ වීම. මේ අය එක්ක මේක විසඳගන්න ලෑස්ති නැද්ද?
මේකට දෙයාකාරයකින් උත්තර දෙන්න ඕනෑ. මේ රටේ දිශානතිය වෙනස් වුණා පහුගිය අරගලය කාලේ. 69 ලක්ෂයක් ඡන්දය දුන්නේ රනිල් වික්‍රමසිංහ මහත්තයට ජනාධිපතිකම් කරන්න නෙවෙයි. ඒ නිසා ඒ තත්ත්වයේදී යම් යම් තීරණ ගැන අප සංවේදීව බැලිය යුතුයි. දෙක අපේ පක්ෂය අත්ඇරලා ගියේ සමාජය තුළ වෙනම ප්‍රතිරෝධයක් ඇති කරලා. ඒක දරාගන්න බැරි කොටසක් අපෙන් ඉවත් වුණා. හැබැයි ඔවුන් අපිව දාලා ගියාට අපේ බිමේ ජනතාව අපිව දාලා ගියේ නෑ. ඔවුන් තවත් මන්ත්‍රීවරු පිරිසක් විතරයි. ඔවුන්ට කිසිම බලයක් නෑ. ඔවුන් දැනටම හුදෙකලා වෙලා ඉවරයි. ජනතාව ඉන්නේ මහින්ද රාජපෂ මහත්තයා නිර්මාණය කළ දර්ශනයට කැමැත්තෙන්. හැබැයි අපි ඔවුන්ට නැවත සමාව දෙන්න ලෑස්තියි අපේ ප්‍රතිපත්ති පිළිගෙන එනවා නම්.
Q දැන් 15 මහ සමුළුව. මොකක්ද එතැන වෙන්නේ?
අපේ දෙවැනි මහ සමුළුව. අපේ සංශෝධිත ව්‍යවස්ථාවට අනුමැතිය ලැබිලා තියෙනවා. ඉදිරියට වඩා ශක්තිමත්ව කටයුතු කළ හැකි නිලධාරී මඩුල්ලක් එක්ක, අලුතෙන් අපි මේ පක්ෂය පුළුල් කරනවා. ජනතාව බලාපොරොත්තු වුණු ශක්තිමත් පක්ෂය එදාට ගොඩනගනවා.
I ගයාන් ගාල්ලගේ
