අපි ආවොත් මාස තුනෙන් සහන දෙනව
බිමල් රත්නායක - ජාතික ජනබලවේගය
- මේක අයි.එම්.එෆ්. අයවැයක්
- බදු වැඩි නොකර ඉන්න ආණ්ඩුවට පුළුවනි
- රාජපක්ෂලටවත් රනිල්ටවත් රට හදන්න බැහැ
Q ආණ්ඩුව මේ වෙද්දී අයවැය ඉදිරිපත් කරලා තියෙන්නේ. ඔබ පුරවැසියෙක් හැටියට මේ අය වැය දකින්නේ කොහොමද?
මේ ආණ්ඩුව අයි.එම්.එෆ්. එකේ උවමනාකම් මත වැට් බද්දයි, උපයනවිට බද්දයි වැඩි කරලා තියෙනවා. ඒකෙන් ජනතාවගේ කරපිටට බදු පැටවිලා තියෙනවා. මතක තියාගන්න බදු වැඩිකරලා ආණ්ඩුව බලාපොරොත්තු වෙන ගාන ගන්න බෑ. මේකෙන් බඩුමිල ඉහළ ගිහිල්ලා මිනිස්සුන්ට බඩු ගන්න සල්ලි නැති වෙනවා. ඉතිං මේ ආණ්ඩුව අයවැය කියලා පෙන්නන්නේ බොරු ඉලක්කම් ටිකක්. රනිල් වික්‍රමසිංහ ඔය මිල වැඩිකරන ප්‍රමාණයට ආදායම් වැඩිවෙන්නේ නෑ මිනිස්සුන්ගේ. ඒකෙන් වෙන්නේ මිනිස්සු බඩු ගන්නේ නෑ. ඒ නිසා ආදායම නෑ. අන්තිමේ වෙන්නේ මිල වැඩි කරපු එකයි, ආර්ථිකය අස්ථාවර වෙන එකයි විතරයි.
Q ආණ්ඩුව කියන්නේ සහන අයවැයක් දෙන්න බෑ කියලා. මම අහන්නේ ඔබලා බලයට ආවොත් මීට වඩා දෙයක් කරන්න පුළුවන් වෙයිද?
අනිවාර්යයෙන් කරන්න පුළුවන්. දැන් මේ අයවැයෙන් රනිල් වික්‍රමසිංහගෙයි, දිනේෂ් ගුණවර්ධනගෙයි ආදායම් වැඩිකරලා තියෙන්නේ මොකටද? ආරක්ෂක අංශවලටයි පොලීසියටයි වැඩිකරලා තියෙන්නේ මොකටද? ඒවා අඩුකළා නම් ප්‍රශ්නයක් නෑ. එතකොට මිනිස්සුන්ට සහන දෙන්න පුළුවන්. ඇත්තටම සහන දෙනවට වඩා වෙලා තියෙන්නේ මිනිස්සුන්ගේ ඇඟට බර පැටවීමක්. 15%ක තිබ්බ වැට් බද්ද එහෙම තිබ්බා නම් ඉවරයි. ඒක 18%ක් කළාම මොකද වෙන්නේ. සහන නෙමේ ඇත්තටම බදු වැඩි නොකර ඉන්න පුළුවන්. මම හිතනවා ඒක කරන්න පුළුවන් ඕනම ආණ්ඩුවකට.
Q ආණ්ඩුවේ අය කියන්නේ රට කඩා වැටුණ වෙලාවේ රට බාරගන්න ගොඩක් අය පස්ස ගහපු නිසා රනිල් වික්‍රමසිංහ මහත්තයට නැවත වතාවක් බලය දෙන්න ඕන කියලා. ඒක ගැන මොකද හිතන්නෙ?
ඒක ලොකු බොරුවක් සමාජ ගත කරන. කවුද මේ බොරුව පිළිගන්නේ. පිළිගන්නේ රනිල් සහ රනිල්ගේ ඇම්බැට්ටයෝ විතරයි. මැයි 9 මහින්ද රාජපක්ෂ බලය අත්ඇරලා ගියාම අපි 11 වෙනිදා ඉදිරිපත් කළා කරුණු හයක් යටතේ රටේ බලය ගන්න අපි ලෑස්තියි ගෝඨාභය රාජපක්ෂ කෙටිකලකින් ඉවත් වෙන්න කියලා කිව්වා. මැයි 12 වර්තමාන විපක්ෂනායක සජිත් ප්‍රේමදාස ඔහුත් ඉදිරිපත් කළා වැඩපිළිවෙළක්. ඒත් මැයි 13 හවස මොකද වුණේ. වැඩපිළිවෙළක් තියා එස්.එම්.එස්. එකක්වත් යවපු නැති රනිල් වික්‍රමසිංහ අගමැති වුණා. රාජපක්ෂලා අගමැතිකම දුන්නා. ඇත්තටම හොරුයි, රාජපක්ෂ පවුලයි ආරක්ෂා කරන්න තමයි ඔහුව පත් කළේ. එහෙම නැතුව රනිල් මේ අමුතුවෙන් රට බාරගන්න ගියේ නෑ. වසර හැත්තෑවක දේශපාලන රටේ, 44 අවුරුද්දක් රනිල් වික්‍රමසිංහ දේශපාලනේ ඉඳලා තියෙනවා. එයාටවත්, රාජපක්ෂලටවත් රට හදන්න බෑ. ලෝකේ රටවල් හදලා තියෙන්නේ පරණ දේශපාලන ව්‍යාපාර නෙමේ අලුත් දේශපාලන ව්‍යාපාර. අපිට තමයි රට හදන්න පුළුවන්.
Q විපක්ෂයේ අය කියන්නේ ඔබලාගේ ආර්ථික ප්‍රතිපත්තිය සමාජවාදීය කියලා. රටට අවශ්‍ය ලිබරල් ආර්ථික ක්‍රමයක් නිසා ඔබලාගේ ආර්ථික ක්‍රමයෙන් රට තවත් අමාරුවේ වැටෙයි කියලයි කියන්නේ?
ලෝකයේ තියෙන ආර්ථික ප්‍රතිපත්ති මොනවද කියලා තර්ක විතර්ක කරලා වැඩක් නෑ. දැන් සමාජවාදී ආර්ථික ප්‍රතිපත්තියක් කියන්නේ මොකක්ද? නොමිලේ අධ්‍යාපනය, සෞඛ්‍ය වගේ දේවල් දෙන එක, කම්කරුවගේ අයිතිය රකින එක, කර්මාන්ත දියුණු කරන එක. ලෝකයේ ලොකුම ආර්ථික ක්‍රමය තියෙන්නේ චීනයට. අපේ වගේ රටක් වුණ වියට්නාමය දැන් වේගයෙන් දුවන්නේ. සමාජවාදී ආර්ථිකයක් කියන්නේ ආර්ථිකය ඉහළට ගෙනියන එක. බොරුවට ලිබරල් කිව්වට එකේ ලිබරල් නෑනේ. ප්‍රජාතන්ත්‍රවාදයවත් නෑ. ඒකෙන් හොරුයි මංකොල්ලකාරයොයි රජ වෙනවා. අපිට උවමනා නෑ එහෙම ආර්ථිකයක් හදන්න.
Q ප්‍රධාන පක්ෂවලට තියෙන ඡන්ද ප්‍රමාණය එක්ක බලද්දී මාළිමාවට එවැනි ඡන්ද සංඛ්‍යාවක් ගන්න එක අසීරුයි කියලා විපක්ෂය අය කියනවා. මොකද ඒ ගැන හිතන්නේ?
ඔබ ඔය කියනදේ ඉතිහාසයක්. ඔය කතා කියන්නේ සුළු පිරිසකුත් සහ උඩ ඉන්න රටකාපු පිරිස. ප්‍රධාන පක්ෂ කෝ? අද ප්‍රධාන පක්ෂ නෑ. එජාපය ප්‍රධානද? එක්කෙනයි ඉන්නේ. පොහොට්ටුව ප්‍රධාන පක්ෂයක්ද? ගමට යන්න බෑ. ඒවා ඉතිහාස කතා. ඒ නිසා මම කියනවා ඔබලාට ඒ ශබ්ද කෝෂය වෙනස් කරන්න. ඔබ දැකලා ඇතිනේ සමීක්ෂණ වාර්තාවල අපේ ජයග්‍රහණය කියනවා. ඒ නිසා අපි කියන්නේ ඡන්දය තියන්න කියලා. ඒක තිබ්බහම අපි කරලා පෙන්වන්නම්. අනික මේ ප්‍රතිෂේප කරපු කණ්ඩායම් කියන දේවල් අපිට වැඩක් නෑ.
Q වර්තමාන ආණ්ඩුව අයි.එම්.එෆ්. එකෙන් ණය ගන්නවා. රාජ්‍ය ආයතන විකුණනවා. බදු ගහනවා. මම අහන්නේ ඔබලාගේ ආණ්ඩුවකදී මේවා වෙනස් වෙයිද?
ඔව්. අපි අනිවාර්යෙන් වෙනස් කරනවා. නැත්නම් අපි එන එකේ තේරුමක් නෑනේ. අංක එකටම අපි රාජ්‍ය දේපළ විකුණන එක නතර කරනවා. ජනතාව මත බදු පටවන අයි.එම්.එෆ්. නීති වෙනස් කරනවා. මේ වැට් ගහන්න ගහන්න ආර්ථිකය හැකිලෙනවා. ඒ නිසා ඒවා වෙනස් කරන්නම වෙනවා. මේ ආර්ථික දත්ත ගොඩක් බොරු. මේවා හදපුවා. රටේ දැන් තියෙන තැන ගැනත් අපිට ප්‍රශ්නයක් තියෙනවා. ඒ නිසා අපි ඇත්ත කියනවා ඉස්සෙල්ලම. අපි කොහොමහරි ජනතාවට පොඩි හෝ සහනයක් ලබාදෙනවා. අපි පළවෙනි මාස තුනෙන්ම දෙනවා සහන. ඊට පස්සේ අපි කලමනාකරණය කරගෙන යනවා.
I ගයාන් ගාල්ලගේ
