ආණ්ඩුව ඉක්මණින් ගෙදර යවන්නයි ජනතාවට ඕනෑ

නලින් බණ්ඩාර - පාර්ලිමේන්තු මන්ත්‍රී (සමගි ජනබලවේගය)

• මිතුරන්ගෙන් බදු අය කරන්න මේ ආණ්ඩුව බයයි
• ජනවාරි ඉඳල මිනිස්සුන්ට ජීවත් වෙන්නත් බැරිවෙනව
• අපි තමයි දූෂණය වංචාව නැති පිරිසිදුම කණ්ඩායම

Q කොහොමද මේ පාර අයවැය විපක්ෂය හැටියට දකින්නේ?

ඇත්තටම මේ පාර අයවැයේ හොඳම හරිය වුණේ අයවැය අතරතුර. ඒ තමයි රජය වැඩිකරපු 18% වැට් එක අනුමත කරගත්තා. මේ මුලු අයවැයම වැට් එක මතයි පදනම් වෙලා තියෙන්නේ. ආදායම සම්පුර්ණයෙන් වක්‍ර බදු මත පදනම් වෙච්චි දෙයක්. මේ ගෙනාවේ අයවැයේ පරතරය පියවා ගන්න ජනතාවගෙන් අය කරගන්න එක. භාණ්ඩ කාණ්ඩ 97කට බදු ගහලා තියෙනවා. තිබ්බ වැට් එකත් 3%කින් වැඩි කළා. මේක තනිකරම පොඩි මිනිහගෙන් බදු අයකරන අයවැයක්. අපේ රටේ බදු අයකිරීම තිබ්බේ වක්‍රව 80%යි. ඍජු බදු 20%යි හැටියට. ඔය 80%ව හැටට ගේනවා කිව්ව ආණ්ඩුව මේ වෙද්දී ඒක 85%දක්වා ගෙනැල්ලා තියෙනවා. විස්ස පහළොව වෙනකල් අඩු කරලා. ඒ නිසා ජනවාරි පළමු වැනිදායින් පස්සේ ජනතාවට ජීවත් වෙන්න බැරිවෙනවා. ජීවත් වෙන එක සැකයක් වෙනවා. මිනිස්සුන්ට ජීවිතේ නැතිකරගන්න වෙන කාලයක් උදාවෙන්න යන්නේ.

Q ඔබලාගේ ආණ්ඩුවක් කළොත් මේ බදු අඩු කරනවද? නැති කරනවද?

බදු අවශ්‍යයි. බදු නැතුව බෑ. අපි කියන්නේ ඍජු බදු වැඩිකරන්න කියලා. මිනිස්සු ප්‍රශ්නවලින් මිරිකිලා ඉන්න මොහොතක මෙහෙම බදු සාමාන්‍ය මනුස්සයා ගාවට දාන එක වැරදියි. මේ දුප්පත් මිනිහගෙන් බදු ගන්නේ. රජයට මේ තමයි පහසු ක්‍රමය. රජයට අමාරුයි ඍජු බදු ගන්න. මොකද ඒ බදු ගන්නේ එයාලගේ ගජමිතුරු පන්තියෙන්නේ. ඒ නිසා බයයි. පහසුවෙන් ගන්න පුළුවන් දේ නේ වක්‍ර බදු. ආණ්ඩුව ඒක ගන්නවා.

Q දැන් ඔබලත් එක්ක ඉන්නවා පොහොට්ටුවේ මන්ත්‍රීවරු පිරිසක්. ඒ අය එක්ක මේ බදු සහ ජීවන බරට විරුද්ධව සටනක් ගෙනියන්නේ නැද්ද විපක්ෂය හැටියට?

ඒ අය විතරක් නෙමෙයි ආණ්ඩුවේ අයත් දැන් මේ ආණ්ඩුවට විරුද්ධයි. ඒකෙන් තේරෙන්නේ මේ ආණ්ඩුවේ ආයු කාලය අඩුවෙමින් යනවා කියන එක. කොහොම වුණත් 2024 වෙද්දී මේ ආණ්ඩුව ගෙදර යවන්න එකාවන්ව අපි එක්ක හැමෝම එකතුවෙයි කියලා හිතනවා.

Q අපි දන්නවා ඔබලා ලොකු සන්ධානයක් හදන්න ගියා. ඒකට මොකද වුණේ. කරන්න බැරි වෙලාද ඒක?

ඔව්. ජනවාරි මාසයේදී අපේ ඒ සන්ධාන වැඩකටයුතු අවසන් කරනවා. අපි ජනවාරි මාසයෙන් පස්සේ සන්ධානය පිහිටුවනවා. ඒක පුළුල් සන්ධාන‍යක් වෙයි.

Q ඔබලට මොන වගේ ප්‍රතිචාරයක්ද බිම් මට්ටමෙන් තියෙන්නේ?

ඇත්තටම අපිට ලොකූ ප්‍රතිචාරයක් තියෙනවා. මොකද ජනතාවගේ එකම බලාපොරොත්තුව අපි වෙලා ඉවරයි. අපිට විතරයි රට ගොඩගන්න පුළුවන් කියලා ජනතාව දන්නවා. මතක තියාගන්න හොඳම ශක්තිමත් යාන්ත්‍රණයක් තියෙන එකම පක්ෂය අපි.

Q මිනිස්සුන්ට මේ රටේ ක්‍රමවේදය එක්ක සහ පාලකයන්ගේ වැඩ එක්ක දේශපාලනය තිත්ත වෙලා තියෙන්නේ. එහෙම තියෙද්දී බිම් මට්ටමේ සහායක් තියෙනවද?

ඇත්ත. මිනිස්සුන්ට දේශපාලනය එපා වුණාට, දැන් මිනිස්සුන්ට දේශපාලනය ඕන වෙලා තියෙන්නේ. මේ ආණ්ඩුව කරන දේවල් එක්ක, මේ ආණ්ඩුව ගෙදර යවන්නයි මිනිස්සුන්ට ඕන. මොකද මිනිස්සු දන්නවා මේ ආණ්ඩුව තියාගත්තා කියලා තේරුමක් නෑ තව තවත් මේ රට වලට යනවා කියලා.

Q ජාතික ජනබලවේගය ගේන චෝදනාවක් තමයි, ඔබලාට මේ රට හදන්න බෑ ඔබලත් මේ රට කාලයක් කළ අය තමයි කියලා. ඒකේ ඇත්තක් තියෙනවා නේද?

ජාතික ජන බලවේගයේ අය තමයි මේ රටේ දේශපාලන සිතියම වෙනත් දිසාවකට යොමු කළේ. මේ රට බංකලොත් කරපු රාජපක්ෂලව බලයට ගේන්න වැඩිම මෙහෙවරක් කළේ ඒ අය. ඒ අය තමයි මහින්ද රාජපක්ෂ බලයට ගේන්න බැල මෙහෙවර කළේ. ඉතිං ඒ අය කොහොමද කියන්නේ අපිට බෑ කියලා. අපි නෙමෙයි මහින්ද රාජපක්ෂ මහත්තයා ගේන්න වැඩ කළේ. ඒ නිසා ඒ අය කියන දේ නෙමේ අපිට පුළුවන් මේ රට හදන්න ඒ අයට වඩා. අපි ගාව ඉන්නවා හොඳ දක්ෂ කණ්ඩායමක්. අපිට තියෙනවා පැහැදිලි ආර්ථික සැලැස්මක්. ඒක අපි ජනතාවට කියලා තියෙනවා.

Q මීළඟට මැතිවරණ සමයක් එන්නේ. ජනාධිපතිවරණයක් හරි මහ මැතිවරණයක් හරි තමයි හැමෝම කියන්නේ. ඉතිං ඒ මැතිවරණයෙදී ඔබලාට ජනතා කැමැත්ත මොන වගේ වේවිද?

පැහැදිලිවම අපි තමයි ජනතාවගේ විශ්වාසවන්ත එකම කණ්ඩායම. දූෂණය, වංචාව නැති පිරිසිදු කණ්ඩායමක් ඉන්නේ. අපිට තියෙනවා පැහැදිලි සැලැස්මක්. ඒක කෙටිකාලීන සහ දිගුකාලීන වශයෙන්. ඉතිං අද ඔය බලය කරන, බලය ඉල්ලන කාටවත් බෑ මේ රට හදන්න. ඒ නිසා ජනතාවගේ කැමැත්ත එන්නේ අපිට.

Q ඔබලා බලයට ආවොත් මේ ආණ්ඩුව ගෙනියන වැඩපිළිවෙළට වඩා වෙනස් වැඩපිළිවෙළක් අරන් යනවද?

ඔව්. අපි කිසිම වෙලාවක අයි.එම්.එෆ්. එක්ක තියෙන ගනුදෙනුව කඩා ගන්නේ නෑ. අපි ඒ අය එක්ක නිසි කළමනාකරණයෙන් වැඩ කරනවා. හැබැයි මේ ආණ්ඩුව වගේ නෙමෙයි අනවශ්‍ය දේවලට කරන විය හියදම් කපා හරිනවා. තවමත් හොරකම් වංචා සිද්ධ වෙනවා. ඒවා නවත්තලා සාර්ථක පාලනයක් ගෙනියනවා. විශේෂයෙන් ජනතාව මත පටවන බදු අපි අඩු කරනවා. 

I ගයාන් ගාල්ලගේ