කිසිම පක්ෂයකට තනියෙන් බලය ගන්න බැහැ

දුමින්ද දිසානායක - පාර්ලිමේන්තු මන්ත්‍රී ශ්‍රී ලංකා නිදහස් පක්ෂය

• අපි ඡන්දෙට සූදානම් වෙනවා
• අරගලයට විරුද්ධව කතා කරන අයට උත්තර ලැබේවි
• පොහොට්ටුව හැදීම හරි තීරණයක් නොවෙයි

Q ශ්‍රී ලංකා නිදහස් පක්ෂය මේ වෙද්දි අලුත් ගමනක් යන්න බලාපොරොත්තුවෙන් කටයුතු කරමින් යන්නේ. මොකද වෙන්නේ අලුත් අවුරුද්දේ?

අපි පක්ෂයේ ප්‍රතිසංවිධාන කටයුතු ආරම්භ කරලා තියෙනවා. 2024 කියන්නේ මැතිවරණ වර්ෂයක්. ඉතින් මැතිවරණය සඳහා අපි අනෙකුත් පක්ෂ සමඟ සාකච්ඡා කරමින් යනවා.

Q අපි දන්නවා ඊළඟ ජනාධිපතිවරණය සඳහා අපේක්ෂකයො ටික ටික කරළියට එනවා. ඔබලා කලින්ම කිව්වා ඔබලගේ අපේක්ෂකයා මෛත්‍රීපාල සිරිසේන කියලා. ඒක තවමත් එහෙමද?

දේශපාලන පක්ෂ හැටියට හැම පක්ෂයක්ම බලාපොරොත්තු වෙන්නේ ජනාධිපතිවරණයක් නම් තමන්ගේ අපේක්ෂකයෙක් ඉදිරිපත් කරන්න. මහ මැතිවරණයක් නම් තමන්ගේ පක්ෂයට බලය ලබාගන්න. ඒ නිසා සියලු පක්ෂ වගේම අපෙත් ප්‍රධාන අරමුණ ශ්‍රී ලංකා නිදහස් පක්ෂය ශක්තිමත් කිරීම සහ අපේ අපේක්ෂකයෙක් ඉදිරිපත් කිරීම. අද තියෙන තත්ත්වය අනුව අපි දන්නවා කිසිම පක්ෂයකට තනියෙන් බලය ගන්න බෑ. ඒ සඳහා සන්ධානගත විය යුතුයි. ඒ නිසා මේ වෙලාවේ අනාවැකි කියන එක සුදුසු නෑ.

Q අපි දන්නවා කාලයක් ශ්‍රීලනිපය කියන්නේ ආණ්ඩු, ජනාධිපතිවරු හදපු පක්ෂය. පස්සේ ඒ පක්ෂය තවත් අයට ආණ්ඩු බිහිකරන්න සාධනීය කොටස්කාරයෙක් වුණා. මම අහන්නේ දැන් ශ්‍රීලනිපයට එහෙම හැකියාවක් තියෙනවද?

ශ්‍රී ලංකා නිදහස් පක්ෂයේ ප්‍රධාන අරමුණ ඒක. ඒ කියන්නේ බලය ගොඩනගන්න ප්‍රධාන සාධකයක් වෙන එක.

Q එහෙම අරමුණක් තියෙනකොට වර්තමාන දේශපාලන මුහුණුවර අතීතයෙන් වෙන්ව හඳුනාගන්න ඕනෑ. ඒක ඔබලා හඳුනාගෙන තියෙනවද?

පැහැදිලිව හඳුනාගෙන තියෙනවා. පහුගිය කාලේ දේශපාලන පක්ෂ හැසිරුණු විදිහට ඉදිරියේදී දේශපාලන පක්ෂවලට හැසිරෙන්න විදිහක් නෑ. ඒ නිසයි කියන්නේ ශ්‍රී ලංකා නිදහස් පක්ෂය හැටියට දැන්ම ඒ ගැන කතා කරන්න කල් වැඩියි. මේ වෙලාවේ දේශපාලනඥයෝ ගැන ජනතාව දරන මතයත් එක්ක, ඒ වගේම පක්ෂවල අභ්‍යන්තර ගැටලු එක්ක බලද්දි දැන්ම අපි මේ ගැන කතා කළ යුතු නෑ. ඒත් මට කියන්න තියෙන්නේ අපේ පක්ෂය එහෙම අවතක්සේරු කළ යුතු පක්ෂයක් නෙවෙයි. ඒක හැමෝම මතක තියාගන්න ඕනෑ.

Q දැන් ශ්‍රීලනිපය හැර දාලා ගියපු ඡන්ද දායකයෝ අසරණවෙලා තියෙනවා. ඒ අයට යන්න තැනක් නැතිවෙලා තියෙනවා. ඒ මිනිස්සුන්ට ශ්‍රීලනිපයේ දොරවල් විවෘත නැද්ද?

අපේ පක්ෂය හැමදාම ප්‍රබල පක්ෂයක්. අපි යහපාලන සමයේ එජාපයත් එක්ක එකතුවෙලා කරන්න ගියේ මේ අරගලය කතා කරපු සිස්ටම් චේන්ජ් එකක්. ඒත් අවාසනාවකට මහින්ද රාජපක්ෂ මහත්තයා ඇතුළු කණ්ඩායම කිව්වා ඒක නොකළ යුතුයි කියලා. මම හිතන්නේ ඒ අය බලය ලබාගැනීමේ අරමුණින් වෙන්න ඇති කියන්න ඇත්තේ. ඒ නිසා ශ්‍රීලනිපයේ හිටිය මහින්ද රාජපක්ෂ මහත්තයා ප්‍රමුඛ පිරිසක් ගිහින් තමයි පොහොට්ටුව නිර්මාණය කරන්නේ. ඒ සියලු දෙනාටම ඒ අය ගියපු ගමන වැරදියි කියලා දැන් තේරිලා තියෙන්නේ. ඒ අයට දැන් සිද්ධවෙලා තියෙනවා එදා රනිල් වික්‍රමසිංහ මහත්තයට විරුද්ධ වුණත් අද රනිල් වික්‍රමසිංහ මහත්තයා එක්ක එකතුවෙලා වැඩ කරන්න. ජනාධිපති කරන්න පවා සිද්ධ වුණා. එදා අපි යහපාලන කාලයේ ගෙනාපු දේවල්වලට විරුද්ධ වුණාට අද වෙද්දි ඒවම ආයේ ගේනකොට රනිල් වික්‍රමසිංහ මහත්තයා එක්ක එකඟ වෙලා ඉන්නේ. සමහර අය එදා කරපු දේම ආයේ කරනවා. ඒ කියන්නේ විරුද්ධ වෙන එක. අපේ අරමුණ තමයි මේ රට හදන එක. ඒ නිසා අපෙන් අයින්වෙලා වෙනම වහළක් යටට ගියපු සියලු දෙනාටම මේ මහ ගෙදර අමුතු තැනක් නෙවෙයි, නොදන්න තැනකුත් නෙවෙයි. ඒ අය ගියේ තරහ වෙලා නෙවෙයි මහින්ද රාජපක්ෂ මහත්තයට කැමැත්තෙන්. අපි ඒ අයට ආරාධනා කරනවා එන්න කියලා.

Q එයිද?

ඔබ දැක්කද දන්නේ නෑ එදා පොහොට්ටුවේ සමුළුවෙදි බැසිල් මහත්තයටත් කියැවෙන්න ගියේ ශ්‍රී ලංකා නිදහස් පක්ෂය කියලා. හැමෝගෙම හදවතේ ඉන්නේ ශ්‍රීලනිපය.

Q ඒ කියන්නේ නැවත බලය අල්ලන්න පොහොට්ටුවයි ඔබලයි එකතුවෙයි නේද?

අපි ඒක බලමු. දැන්ම කියන්න ඕනෑ නෑ. අපි මේ වෙලාවේ සියලු පක්ෂ එක්ක කතා කරනකොට රටේ ඇතිවෙලා තියෙන ප්‍රශ්නයට තමයි උත්තර හොයන්න ඕනෑ. ඒකයි වඩා වැදගත් වෙන්නේ. පහුගිය කාලේ රට හොඳට තියෙනකොට පක්ෂවල බලය ලබාගන්න තමයි හැමදේම කළේ. හැබැයි අද ඉන්නේ අපි එහෙම තැනක නෙවෙයි. අපේ ජයග්‍රහණය වගේම රටේ ජයග්‍රහණයත් වැදගත්. මේ රට මෙහෙම වුණේ ඇයි කියන එකට වඩා රට හිටිය තත්ත්වයට ගේන එක තමයි අපේ අරමුණ. ඒ සඳහා එකඟතා, අවබෝධතා සකසා ගන්න වෙනවා. මොකද කවුරු රට ගත්තත් රට දුවන්න බැරි නම් කවුරු බලය ලබාගත්තත් වැඩක් නෑ. ඉස්සර රට ගැන හිතන්න දෙයක් තිබුණේ නෑ. මොකද සංකීර්ණත්වයක නෑ. අද ඒ නිසා පක්ෂයකට වඩා ඉල්ලන්නේ ප්‍රතිපත්තියක්. අන්න ඒකයි අපි කතා කරන්න ඕනෑ.

Q ඔබ ඔය කිව්වට වේදිකාවල අරගලය කරපු අයට වටෙන් තර්ජන එනවා බලාගන්නම් කියලා. මොකද ඒ වෙලා තියෙන්නේ? තේරුම් අරන් නැද්ද?

ඔබ කියන කතාව ඇත්ත. අපිට අරගලයෙන් පාඩමක් කියා දුන්නා. දැන් මිනිස්සු කැමැත්තෙන් හෝ අකැමැත්තෙන් කැපවීමක් කරනවා. ඒ කැපවීමට අපි වටිනාකමක් දෙන්න ඕනෑ. ඔබ කිව්ව කාරණයට ජනතා විරෝධයක් තියෙනවා. ඉදිරියේදී ඒ අයට උත්තර ලැබෙයි.

Q ඔබගේ නිවෙස පවා අරගලයෙන් විනාශ වුණා. ඒත් ඔබ අරගලය ගැන වෙනම ඇහැකින් බලන්නේ. විවේචන නෑ. මොකද වෙලාව වෙනකල් ඉවසගෙන ඉන්නවද?

නෑ. ඒකට හේතුව දැනුවත්ව හෝ නොදැනුවත්ව මේ වැරදිවලට අපි දායක වෙලා තියෙනවා. ඒකෙන් කියන්නේ අපි 100% ක් නිවැරදි මිනිස්සු නෙවෙයි. අපිට කොච්චර පාඩු වුණත් අපි ඒ කැපවීම කරන්න ඕනෑ. මට වෙච්ච පාඩුව පුද්ගලික පාඩුවක්. මගේ සීයගේ ගෙදර ඒ ගිනි තැබුව අයට ස්වභාවධර්මය ක්‍රියා කරයි. අපි කරන දේ අනුව අපිට ලැබෙනවා.

I ගයාන් ගාල්ලගේ