අපේ සන්ධානෙට අලුත් පක්ෂයක් අලුත් ලකුණක් එන්න පුළුවන්
තිස්ස අත්තනායක - පාර්ලිමේන්තු මන්ත්‍රී සමගි ජන බලවේගය
- මහින්ද මහත්තයා දැන් හදන්නේ ඇඟ බේරාගන්න
- නම වෙනස් කළාට ජවිපෙ ගහන්නේ පරණ තැටියමයි
- දැන් රටේ ඉන්නේ පොහොට්ටුවේ ජනාධිපති කෙනෙක්
Q සමගි ජන බලවේගයේ සන්ධානය පිහිටුවන්න යනවා කියලා ලොකු කතාබහක් තියෙනවා. ඒක ජනවාරියේ පිහිටුවනවද?
සමගි ජන බලවේගය සමඟ සන්ධානගත වෙන්න ගොඩක් පක්ෂ සහ සංවිධාන බලාගෙන ඉන්නවා. ඒ සම්බන්ධයෙන් අපි පාර්ලිමේන්තුවේදී අදහස් හුවමාරු කරගෙන තියෙනවා. ඉතින් අපි ඒ සියලු දේවල් එක්ක ජනවාරිය මැද වෙද්දි සමගි බල සන්ධානය ගොඩනගනවා. ඒක මේ වෙලාවේ අත්‍යවශ්‍ය දෙයක් කියලා අපි හිතනවා. මොකද ඊළඟ ජයග්‍රණය ලබාගැනීම සඳහා ආණ්ඩු විරෝධී කණ්ඩායම එකතු වෙන්න ඕනෑ. දැනටමත් ආණ්ඩුවේ ඉන්න අය ගණනාවක් මේකට එකඟත්වය පළ කරලා තියෙනවා. ඒ නිසා සන්ධානය ගොඩනගන දවසට වැඩි දවසක් නෑ. ඉක්මනින්ම පිහිටුවනවා.
Q මේ සන්ධානයේ නායකයා සජිත් ප්‍රේමදාසද? ඒ වගේම වෙනම ලාංඡනයක් ඉදිරිපත් වෙනවද?
අපි දැනට තීරණය කරලා තියෙන්නේ මේ සන්ධානයේ නායකයා සජිත් ප්‍රේමදාස මහත්තයා පමණයි. වෙන නායකයෝ පත්වෙන්නේ නෑ. ඒ වගේම ඇතුළේ ක්‍රියාකාරිත්වය හදන්න විවිධ යෝජනා ඇවිත් තියෙනවා. ඒ කියන්නේ නායකත්ව මණ්ඩල වගේ දේවල් යෝජනා කරලා තියෙනවා. ඒ වගේම අලුත් ව්‍යවස්ථාවක්, කට්‍ටිය එක්ක කොහොමද වැඩ කරන්නේ කියලා, ඒ වගේම අභ්‍යන්තර එකඟතාවයකුත් ඇතිකර ගනී. කොහොම වුණත් වෙනසක් බලාපොරොත්තු වෙනවා. ඒ නිසා අලුත් පක්ෂයකුත් අලුත් ලාංඡනයකුත් එන්න පුළුවන්. ඒත් මොන දේ වුණත් තවම නිශ්චිත තීරණයක් අරගෙන නෑ.
Q ඊළඟට එන්නේ ජනාධිපතිවරණයක්ද? මහ මැතිවරණයක්ද?
දන්නේ නෑ.
Q ඒ මොන දේ ආවත් ප්‍රධාන අපේක්ෂකයා සජිත් ප්‍රේමදාස මහත්තයද?
ඉස්සරහට එන මැතිවරණය අනුවයි ඒක තීරණය වෙන්නේ. කොහොම වුණත් කඩිනමින් එන්න පුළුවන් මැතිවරණයක් තමයි ජනාධිපතිවරණය. ලබන වසරේ සැප්තැම්බර් 17 න් පස්සේ නීතිමය වශයෙන් මැතිවරණය තියන්නම වෙනවා. ඉතින් පක්ෂයක් හැටියට අපේ කෘත්‍යාධිකාරී මණ්ඩලය විසින් තීන්දු කරලා ප්‍රකාශ කරලා තියෙනවා ජනාධිපති අපේක්ෂකයා සජිත් ප්‍රේමදාස මහත්තයා කියලා. ඒ වගේම ඊට කලින් මහ මැතිවරණයක් ආවොත් ඒකට අපි සන්ධානයක් හැටියට මුහුණ දෙන්නේ. අන්න ඒකෙත් අගමැති අපේක්ෂකයා හැටියට සජිත් ප්‍රේමදාස මහත්තයා නම් කරලා තියෙනවා. ඒ නිසා අපි හිතනවා බොහෝ වෙලාවට ජනාධිපතිවරණයක් එයි කියලා. නමුත් රටේ තත්ත්වය එක්ක පාර්ලිමේන්තු මැතිවරණයකට වුණත් යාමේ හැකියාව තියෙනවා. මොකද පොහොට්ටුවේ බෙදීමක් දකිනවා. ඒ වගේම පක්ෂයේ නායක මහින්ද රාජපක්ෂ මහත්තයා දාපු නිවේදනය දැක්කම පේනවා, ඔහුත් ආණ්ඩුවේ වැඩවලින් ඈත්වෙන්න හදනවා කියලා. ඒ හදන්නේ බදු බර පටවන්නේ අපි නෙමෙයි කියලා ඇඟ බේරගන්න.
Q එක්සත් ජාතික පක්ෂය ඔබලගේ පක්ෂය. ගොඩක් අය බලාපොරොත්තු වෙනවා ඔබලා එකතු වෙයි කියලා. ඒක වෙන්නේ නැද්ද?
වර්තමාන ජනාධිපතිවරයා මේ වෙලාවේ හිටගෙන ඉන්නේ පොහොට්ටුව එක්ක. පොහොට්ටුවේ අය තමයි ඔහුව ජනාධිපති කළේ. ඔහු වැඩ කරන්නේ පොහොට්ටුවේ අය කියන විදිහට. ඒ නිසා වර්තමාන ජනාධිපතිවරයා පොහොට්ටුවේ ජනාධිපති කෙනෙක් මිසක් නිර්පාක්ෂික ජනාධිපතිවරයෙක් නෙවෙයි. කොහොම වුණත් අපි එජාප පාක්ෂිකයන් එකතු කරගෙන යනවා. ඒක දිගින් දිගටම කරනවා. මේක ප්‍රසිද්ධ කරලා කතා නොකළත් අපි බිම් මට්ටමින් එකතු කරමින් යන්නේ ජනතාව. එජාප ඡන්ද දායකයොත්, අපේ ඡන්ද දායකයොත් එකතුවෙලා ඉන්නේ. ඒ නිසා රනිල් වික්‍රමසිංහ සමඟ එකතු වෙන්න වුවමනා නෑ.
Q දැන් ජාතික ජන බලවේගය කියන්නේ ඔබලට ආණ්ඩු කරන්න බෑ කියලා. ඒ නිසා බලය එයාලට දෙන්න කියලා?
ජවිපෙ නම වෙනස් කරලා ආවට මොකක්ද වෙනස් වෙලා තියෙන්නේ. පරණ කට්ටියමයි ඉන්නේ. මේ අය තමයි ජවිපෙ ආසාර්ථක වීමේ කාලය තුළ හිටියේ. අනික මේ අය චන්ද්‍රිකා බණ්ඩාරනායක මැතිණියගේ ආණ්ඩුවේ ඇමැතිකම් කරපු අය. අට දෙනෙක් හිටියා ආණ්ඩුවේ. එහෙම ඉඳලත් ආණ්ඩුව ඍණ අගයකට ගියා. දැන් කෝ අලුත් ප්‍රතිපත්ති. ඒ අයට රට ගොඩගන්න තියෙන ප්‍රතිපත්තිය මොකක්ද? ඒ අය හැමෝටම බැණ බැණ ඉන්නවා. වෙන කරන්න දෙයක් නෑ. ඒ නිසා එහෙම කණ්ඩායමක් අවශ්‍ය නෑ. අපි ඒ ගැන හොඳ අවබෝධයක ඉන්නේ. අපිට වැඩපිළිවෙළක් තියෙනවා. අනික ජවිපෙ සමඟ දැන් එකතුවෙලා ඉන්නේ ගෝඨාභය රාජපක්ෂ සමඟ ගිය අසාර්ථක කණ්ඩායම. වියත් මඟේ හිටිය අය. රටේ ජනතාව ගොනාට අන්දපු අය. එයාලා ප්‍රදර්ශනාත්මක ක්‍රියාවේ ඉන්නේ.
Q දැන් වර්තමාන ජනාධිපතිවරයා පොහොට්ටුව සමඟ එකතුවෙලා ජනාධිපති අපේක්ෂකයා හැටියට ආවොත්?
ඒක නම් අභියෝගයක් නෙවෙයි. පොහොට්ටුව කියන්නේ ජනතාව ප්‍රතික්ෂේප කරපු කණ්ඩායමක්. මේ රට බංකොළොත් කරපු අය. අද මේ රට මේ තැනට වැටුණේ පොහොට්ටුව නිසා. ජන අරගලයක් බිහිවුණේ පොහොට්ටු ආණ්ඩුවට විරුද්ධව. ඒ නිසා ආයේ එකතු වෙන්න මේ දෙගොල්ලන්ට ඕනෑ නෑ. ඒ අය දැනටමත් එකතුවෙලා ඉන්නේ. ඒ නිසා කිසිම අභියෝගයක් නෙවෙයි මේ අය පරාජය කරන එක.
I ගයාන් ගාල්ලගේ