රටේ ආර්ථික සැලැස්ම අප දැනටමත් හදලා ඉවරයි
හර්ෂණ රාජකරුණා - පාර්ලිමේන්තු මන්ත්‍රී සමගි ජන බලවේගය
- අපි ගොඩනගන්නේ මේ රටේ පුළුල්ම සන්ධානයයි
- රට ගොඩද නැද්ද කියලා රටවැසියකුගෙන් ඇහුවා නම් බලාගන්න පුළුවන්
- ප්‍රතිපත්තියක් නැති ආණ්ඩුවක් එක්ක මිනිස්සු ඉන්නෙ නෑ
Q අපි දන්නවා ඊළඟ වසර කියන්නේ ඉතාම තීරණාත්මක වසරක්. ඒ වර්ෂය ඔබ දකින්නේ කොහොමද?
ඔව් ඔබ කිව්වා වගේ ලබන වසර තීරණාත්මක අවුරුද්දක්. මොකද ජාතික මැතිවරණ එකක් හෝ දෙකක් තියෙන්න පුළුවන්. මීළඟ අවුරුදු පහ හෝ දහය තීරණය කරන අවුරුද්ද තමයි 2024 කියන්නේ. ඒ නිසා මේ රටේ හැම පුරවැසියෙක්ටම බලපාන තීරණාත්මක වසරක් ලබන වසර.
Q ආණ්ඩුවකට නම් ඔවුන්ගේ ප්‍රතිපත්ති ක්‍රියාත්මක කරන්න බලාපොරොත්තු තියෙන්න පුළුවන්. විපක්ෂයක් හැටියට ඔවුන්ටත් අරමුණු ඇති. ඇත්තටම විපක්ෂයේ අරමුණ මොකක්ද?
විපක්ෂයේ ඉන්න අපිට තියෙන ලොකුම අරමුණ තමයි මැතිවරණ ජයග්‍රහණය කරලා විපක්ෂයෙන් ආණ්ඩු පක්ෂයට එන එක. කොහොම වුණත් විපක්ෂයේ කාර්යභාරය පුළුල් වෙනවා ලබන වසරේ. මේ නිසා විපක්ෂය ජනතාව එක්ක ඉතාම තීරණාත්මක මෙහෙයුමක ඉන්නවා. ඒ නිසා අපි හොඳ වැඩපිළිවෙළක් ලබන වසරේ ක්‍රියාත්මක කරනවා.
Q වර්තමාන ආණ්ඩුව කියන දෙයක් තමයි ඔවුන් තමයි රට අගාධයට යන මොහොතේ ගොඩගත්තේ කියලා. ඒ නිසා රට ගොඩගන්න නම් ඔවුන් දිගටම බලයේ ඉන්න ඕනෑ කියලා. මොකද ඒ ගැන අදහස?
රටේ පුරවැසියෙක්ගෙන් ඇහුවා නම් කියයි මේ රට ගොඩ අරන්ද නැද්ද කියන එක. ලබන වර්ෂය මේ අවුරුද්දට වඩා ගොඩක් අමාරුයි. වැට් බද්ද නිසා සමස්තයක් හැටියට හැම භාණ්ඩයක්ම 10෴ ක විතර වැඩිවීමක් සිද්ධ වෙනවා. ඒ නිසා ජනතාවට ජීවත්වීම හිතාගන්න බැරි තරම් අපහසු වෙනවා. ඒ නිසා මම හිතන්නේ නෑ මිනිස්සුන්ට තිබුණු තත්ත්වයෙන් ගොඩ ඒමක් සිද්ධ කරගන්න පුළුවන් වෙයි කියලා. ඒ නිසා වර්තමාන ආණ්ඩුව මොන දේ කිව්වත් අපි දන්නවා ලබන වසර ඉතාම අමාරුයි කියලා. ඒ නිසා ප්‍රතිපත්තියක් නැති ආණ්ඩුවක් ගැන ලබන වසරේ බලාපොරොත්තු තියාගෙන ඉන්නත් බෑ. මිනිස්සු එහෙම ඉන්නෙත් නෑ.
Q ලබන ජනාධිපතිවරණය සඳහා අපි දන්නවා විශාල අපේක්ෂකයෝ සංඛ්‍යාවක් ඉදිරිපත් වෙන්න බලන් ඉන්නවා. ඒ අතර දේශපාලනඥයෝ වගේම ව්‍යාපාරිකයොත් ඉන්නවා. ජනතාව කොහොමද හරි නායකයා තෝරගන්නේ?
ඕනෑ කෙනෙක්ට ජනාධිපතිවරණය සඳහා ඉදිරිපත් වෙන්න අයිතියක් තියෙනවා. ඒක ප්‍රජාතන්ත්‍රවාදී අයිතිය. ඒත් මහ පොළොවේ යථාර්ථයක් තියෙනවා. ඒ මහ පොළොවේ යථාර්ථය තමයි ජනතාවගේ අන්තිම විශ්වාසය තියෙන්නේ සමගි ජන බලවේගයට‍යි, විපක්ෂ නායක සජිත් ප්‍රේමදාස මහත්තයටයි. අද වෙද්දි පාසලක අඩුපාඩුවක් තියෙනවා නම් මතක් වෙන්නේ අධ්‍යාපන ඇමැති නෙවෙයි, අද වෙද්දි සෞඛ්‍ය ක්ෂේත්‍රයේ අඩුපාඩුවක් තියෙනවා නම් මතක් වෙන්නේ සෞඛ්‍ය ඇමැති නෙවෙයි, විපක්ෂ නායක සජිත් ප්‍රේමදාස මහත්තයව. මේ රටේ මොන අඩුපාඩුව තිබුණත් ජනතාවට දැන් මතක් වෙන්නේ විපක්ෂ නායකවරයා. මොකද එතුමට කිව්වොත් මොකක් හෝ විසඳුමක් දෙන නිසා. ඒ නිසා ජනතාවගේ එකම විශ්වාසය සමගි ජන බලවේගය. ඒ නිසා ඉදිරි මැතිවරණ සඳහා කවුරු ඉදිරිපත් වුණත් අපිට විශ්වාසයි දිනන්නේ සජිත් ප්‍රේමදාස මැතිතුමා.
Q ඊළඟට බලයට එන කණ්ඩායමේ ලොකුම වැඩපිළිවෙළ වෙන්න ඕනෑ රටේ ආර්ථික සැලැස්ම. ඒක ඉතාම පුළුල් වෙන්න ඕනෑ. විපක්ෂයට ඒ සම්බන්ධයෙන් මොන වගේ වැඩපිළිවෙළක්ද තියෙන්නේ?
දක්ෂ කණ්ඩායමක් ඉන්නවා. ඒ වගේම අවංක නායකයෙක් ඉන්නවා. ඒ අවංක නායකයා එක්ක දක්ෂ කණ්ඩායම දැනටමත් ආර්ථික සැලැස්ම හදලා ඉවරයි. විශේෂයෙන් ආර්ථිකය කළමනාකරණය කරන්න පුළුවන් ආර්ථික කමිටුවක් අපිට තියෙනවා. ඒ වගේම ඉතාම දක්ෂ ආර්ථික විශේෂඥයෝ තුන්දෙනෙක් ඉන්නවා. හර්ෂ ද සිල්වා, ඉරාන් වික්‍රමරත්න සහ කබීර් හෂීම් යන මහත්වරු ඉන්නවා. ඒ නිසා මේ ආර්ථිකය හදාගෙන ඉදිරියට යන්න පුළුවන් එකම දක්ෂ කණ්ඩායම මේ අය කියලා අපි විශ්වාස කරනවා. මොකද ඔවුන් ආර්ථිකය පිළිබඳ විශේෂඥයෝ. ඒ අයට මේ සම්බන්ධයෙන් අවබෝධයක් තියෙනවා. මම හිතනවා මේ රටේ කිසිම පක්ෂයක එහෙම අය නෑ.
Q කාලයක් තිස්සේ කතා වුණු දෙයක් තමයි අලුත් සන්ධානය. ඇත්තටම ඒක මේ වසරේ පළමු වැඩේ හැටියට දාගෙන ඉන්නවා කියන්නේ ඇත්තද?
ඔව්. මේ රටේ අති දැවැන්ත පුළුල් සන්ධානය අපි ගොඩනගනවා. ඒ හරහා ඉදිරි මැතිවරණය ජයග්‍රහණයකට එහා ගිහින් විජයග්‍රහණයක් දක්වා පුළුල් කරගන්න බලාපොරොත්තු වෙනවා.
Q කොහොමද ඒ අලුත් සන්ධානයට ඉල්ලුම?
ඉතාම ඉහළයි. අපිට දැන් තියෙන ලොකුම ප්‍රශ්නය ඒ සඳහා පුද්ගලයන් තෝරා බේරාගන්න එක. ඒ නිසා හැමෝම බලාපොරොත්තු වෙනවා අපේ සන්ධානයට එකතු වෙන්න. අපි උත්සාහ කරන්නේ හොඳම කණ්ඩායම හදාගන්න එක. ඉදිරියට අපි බලමු මොකද වෙන්නේ කියලා.
I ගයාන් ගාල්ලගේ