මීට පස්සෙ බොරු කියලා රට පාලනය කරන්න බෑ
අනුර ප්‍රියදර්ශන යාපා - පාර්ලිමේන්තු මන්ත්‍රී
- ඊළඟ ඡන්දවලදී උඩු රැවුලෙන් වැඩක් නෑ
- හරි වැඩපිළිවෙළක් එක්ක එන ඕනෑම කෙනකුට මම උදව් කරනවා
- අද රටට ගැළපෙන්නේ අලුත් ආර්ථික ක්‍රමවේදයක්
Q ලබන වර්ෂය ගැන බොහෝදෙනා විවිධ අදහස් පල කරනවා. ඔබ පක්ෂ ජ්‍යෙෂ්ඨයෙක් හැටියට ලබන වසර ඇත්තටම දේශපාලන වශයෙන් තීරණාත්මක වසරක්ද?
ඔව්. ලබන වසර දේශපාලනමය වශයෙන් තීරණාත්මක වසරක් තමයි. හැබැයි ලබන වසර විතරක් තීරණාත්මක වසරක් හැටියට මම දකින්නේ නෑ. හේතුව පවතින ආර්ථික ගැටලු විසඳගන්නේ නැතුව ඉස්සරහට යන්න බෑ. අන්න ඒ ආර්ථික ගැටලුව විසඳගන්න දිශාව හොයාගන්නේ නැතුව, ඒකට විසඳුම් සහ සැලසුම් නැතුව ආයේ කිසිම පක්ෂයකට පොරොන්දු දේශපාලනය කරන්න බෑ. අදටත් පක්ෂ කියන්නේ දූෂණය නවත්තනවා, වංචාව නවත්තනවා කියලා. ඒකෙන් විතරක් රටක් හදන්න බෑ. ඒක නවත්තන්න ඕන. ඒත් රට කරවන විදිහ ගැන ඒ පක්ෂ ජනතාව දැනුවත් කරන්න ඕන. එහෙම නැතුව දූෂණය වංචාව නවත්තනවා කියන එකෙන් රටක් කරන්න බෑ. රටක ආර්ථිකය පෙළගැසෙන ආකාරයත් අනෙක් කාරණා වගේම මූලික වෙන්න ඕන. හැබැයි මම කිසි විටෙක හිතන්නේ ආර්ථිකයේ විශාල වෙනසක් වෙයි කියලා. මොකද ප්‍රතිපත්තිමය වෙනසක් අවශ්‍යයි.
Q මේ වෙද්දී විශාල චරිත සංඛ්‍යාවක් ඊළඟ වසරේ සිට රට බාරගන්න පොරකනවා. ඔබ හිතන්නේ ඒ අතරින් කාවද විශ්වාස කරන්න පුළුවන්?
අපි මෙතුවක් කල් විශ්වාසය තියාගත්තේ චරිත මත පදනම් වෙලා. අහවලාගේ ප්‍රතිපත්ති, අහවලාගේ වැඩපිළිවෙළ කියලා. මම හිතන්නේ නෑ ඒක තවදුරටත් ජනතාව විශ්වාස කරයි කියලා. පුද්ගලයාට වඩා පොදු ප්‍රතිපත්තිය තමයි වැදගත්. එන පුද්ගලයාගේ පෙනුම නිසාවත්, උඩු රැවුලක් තියෙන නිසාවත් චරිතවලට කැමති වුණාට වැදගත් නෑ. වැදගත් වෙන්නේ ප්‍රතිපත්ති විතරයි. විශේෂයෙන් එන පුද්ගලයා අවංකද? අවංක කණ්ඩායමක් ඉන්නවද කියලා බලන්න ඕනෑ. ඒ අයට හොඳ ආර්ථික සැලසුමක් තියෙනවද කියලා බලන්න ඕන. එහෙම නැතුව පුද්ගල නාම අවශ්‍ය නෑ. ඔය පුද්ගල නාම නිසානේ අපි විනාශයකට වැටුණේ.
Q අපි දන්නවා කාලෙන් කාලයට බලයට එන්න එක එක පොරොන්දු දෙනවා. මේ පාර දෙන්න පුළුවන් ලොකුම පොරොන්දුව තමා ආර්ථිකය හදනවා කියන එක. කොහොමද හොඳම ආර්ථිකය සැලසුම හදන කෙනා හොයාගන්නේ ජනතාව?
ඉස්සෙල්ලා අපි පහුගිය කාලේ යොදාගත්ත ආර්ථික සැලසුම් හරි නෑ කියන එක තේරුම් ගන්න ඕන. එකක් තමයි අපි ආයෝජනය මේ බී.ඕ.අයි. එකට බාර දීලා තියෙන එක. ඒ නිසා මේ ආයෝජන ක්‍රියාවලියේ කොයිතරම් අඩුපාඩු තියෙනවද? ඒක අපි පිළිගත්තේ නෑනේ. කොයිතරම් ආයෝජකයෝ හැරිලා ගියාද? දැන් දේශිය නිෂ්පාදනය බලන්න. කොයිතරම් අඩුලුහුඬුකම් තියෙනවද? ඒවාවලට තාක්ෂණය නෑ. ඒවා ජාත්‍යන්තර වෙළඳපොළට යවා ගන්න විදිහක් නෑ. ඒවාට මොනවාද ගන්න ක්‍රියාමාර්ග. ඒ වගේම තරුණ පරපුර, අධ්‍යාපනය කොයිතරම් දුර්වලද? අධ්‍යාපනය ප්‍රතිසංස්කරණය කළ යුතුයි. මේ වගේ තීන්දු තමයි ඊළඟ ආණ්ඩුවක් ක්‍රියාත්මක කළයුතු වෙන්නේ. සහනාධාර ප්‍රතිපත්තිය ගන්නකෝ. ඒකත් හරි විදිහට ක්‍රියාත්මක කරන්න ඕන. රුකියා උත්පාදනය ගැන හිතන්න ඕන. ඉතිං ඒක ගැන හිතන ආණ්ඩුවක් තමා එන්න ඕනෑ ඊළඟට. දැන් රටට අවශ්‍ය පැරණි ආර්ථික ක්‍රමවේදයක් ක්‍රියාත්මක කරන එක නෙමේ අලුත් ආර්ථික ප්‍රතිපත්ති ක්‍රියාත්මක කරන එක.
Q ඊළඟ පාලකයා හෝ ආණ්ඩුව ආර්ථිකය ගොඩදාන කණ්ඩායමක් ලෙස ක්‍රියාත්මක කළ යුතුයි. සමහර විට ජනතාවට හිතෙන්න පුළුවන් ඒ සඳහා හොඳම ව්‍යාපාරිකයෙක් කියලා?
ඕවා කාලයක් ආවනේ. නිර්පාක්ෂික ජනාධිපතිවරයෙක් පත්වුණා. අන්තිමට ඒක අසාර්ථක වුණා. ඒ නිසා බොරු කියලා රට පාලනය කරන්න බෑ. ඒ නිසා කරන්න බැරි පොරොන්දු දීලා ජනතාව රැවැට්ටුවා. පක්ෂ කඩා වැටෙද්දී නිර්පාක්ෂික කෙනෙක් දාලා ඒක වෙනස් කරන්න හැදුවා. ඒත් හරිගියේ නෑ. මොකද ජනාධිපති කෙනෙක්ට නිර්පාක්ෂික වෙන්න බෑ. අනිවාර්යයෙන්ම එයාට ඕන පක්ෂයක්. ආණ්ඩුවක්. පාර්ලිමේන්තු බලය නැතුව ආණ්ඩුවක් කරන්න බෑනේ. ඒ නිසා දේශපාලනඥයන්ට ව්‍යාපාර කරන්න බෑ. ඒ වගේම ව්‍යාපාරිකයන්ටත් බෑ දේශපාලනය කරන්න. මේක අන්ත දෙකක්. දේශපාලනය කරනවා නම් කවුරු හරි ඔහු පහළ ඉඳලම එන්න ඕන. හුදකලා මිනිහෙක්ට ජනාධිපතිකම් කරන්න බෑ. එහෙම රටවල් තියෙනවා. ඒත් ලංකාවේ බෑ. අපේ සියල්ල මෙහෙයවන්නේ රාජ්‍ය අංශයෙන්. වෙන රටවල පෞද්ගලික අංශයෙන්. ඒක තේරුම් ගන්න ඕන. අපිට තියෙන්නේ කොම්පැණි කීපයයි. අපි ආර්ථිකය දිහා බලලයි දේශපාලනය කරන්න්න ඕන.
Q ප්‍රධාන පක්ෂ දෙකම ආණ්ඩු කළා. ඒ නිසා ජාතික ජන බලවේගයට අවුරුදු පහක් දීලා බලමු කියන තැන ජනතාව ඉන්න පුළුවන්. ඒක ගැන අදහස මොකක්ද?
මහජන තීන්දුවකට මට කතා කරන්න බෑ. මහජනයා තීන්දු ගන්නේ ඒ ඒ පක්ෂ ගේන යෝජනා එක්ක. ඒක මගේ විරෝධතාවයක් නෑ. නමුත් ඕක ඇතුළේ මට ඇහෙනවනේ විප්ලවයක් කරන්න ඕන. ප්‍රතිවිප්ලවයක් කරන්න ඕනෑ කියලා. ප්‍රජාතන්ත්‍රවාදී විදිහට බලය ගත්තම විපල්වයක් ඇති වෙන්නෙත් නෑ. ප්‍රතිවිප්ලවයක් ඇති වෙන්නෙත් නෑ. අපි මේ වචනවලින් කියන ඒවා ගැන අවබෝධයක් තියෙන්න ඕන.
Q කට්ටිය වචන හරඹ දැම්මට මේක ගැන තවම අවබෝධයක් නෑ කියලද හිතන්නේ?
ඔව් පැහැදිලිවම මම හිතන්නේ ඒකයි. මේක නිමේෂයකින් උත්තර හොයන්න පුළුවන් මොහොතක් නෙමේ. කාලය එක්කයි උත්තර හොයන්න පුළුවන් වෙන්නේ. ඒ කාලය කියන්නේ ප්‍රතිපත්තිමය වෙනසක් හදාගන්න. රාජ්‍ය සේවයේ, ඉහළ නිලතල, වෘත්තීය සමිති මේ සියල්ලේ වෙනසක් කරන්න අවශ්‍යයි. රජයේ මුදල් හොයන ආයතනය සම්බන්ධයෙන් වෙනස්කම් කිරීමට අවශ්‍යයි.
Q ඔබේ තීරණය මොන තැනකද තියෙන්නේ?
මම මේ බලන් ඉන්නේ මේ පිල් බෙදෙන අයුරු දිහා. ජනතාවගේ විශාල මතයක් තියෙනවා පහුගිය කාලයේ තැනට රට නොයා යුතුයි කියලා. ඒ නිසා මේ රට වෙනුවෙන් හරි වැඩපිළිවෙළක් එක්ක එන ඕනම කෙනෙක්ට මම කොන්දේසි නැතිව උදව් කරනවා. ඒක අපෙන් ජනතාව බලාපොරොත්තු වෙන දේ.
I ගයාන් ගාල්ලගේ