රටේ වැටිල්ලට ජවිපෙත් වගකියන්න ඕනෑ
මධුර විතානගේ (පාර්ලිමේන්තු මන්ත්‍රී - ශ්‍රී ලංකා පොදුජන පෙරමුණ)
- ජනතාව පොහොට්ටුව ගැන ලොකු විශ්වාසයකින් ඉන්නවා
- වත්මන් ජනපතිගේ ප්‍රතිව්‍යුහකරණය ඉතාම සාර්ථක වැඩපිළිවෙළක්
- පක්ෂය ගන්න තීන්දුත් එක්කයි අපි වැඩ කරන්නේ
Q මේ වෙනකොට මැතිවරණ කාලයක් තමයි ඉස්සරහට එන්න තියෙන්නෙ. ඔබ හිතන්නෙ මොකද්ද ඉස්සරහට එන්න තියෙන මැතිවරණය?
දැනට තියෙන තත්ත්වය අනුව නම් ජනාධිපතිවරණයක් තමයි තියන්න තියෙන්නෙ. මොකද නීතිය අනුව තියෙන්නෙ ජනාධිපතිවරණය. හැබැයි අපි දන්නෙ නෑ ජනාධිපතිතුමා මොන වගේ මැතිවරණයකට යයිද කියලා.
Q දැන් අපේක්ෂකයො ගොඩාක් ඉදිරිපත් වෙන්න බලාගෙන ඉන්නෙ. ඔබ පාර්ලිමේන්තු මන්ත්‍රීවරයෙක් හැටියට මොන වගේ ප්‍රතිපත්තියක් තියෙන කෙනෙක් එක්කද වැඩ කරන්න කැමැති?
මෙහෙමයි. දැනට අපිට කියලා නෑ පක්ෂයෙන් අපේක්ෂකයා කවුද කියලා. පක්ෂයෙන් කිව්වට පස්සෙ තමයි අපි තීරණයකට එන්නෙ. අපි අපේ අදහස ඒ වෙලාවට ඉදිරිපත් කරනවා.
Q ඒ කියන්නෙ වර්තමාන ජනාධිපතිතුමා සමඟ ගනුදෙනු කරන්න කැමැති නෑ?
2019 අපි බලයට ඇවිල්ලා ඇතිවුණු භීෂණයත් එක්ක අද මේ රට මේ තැනට ගෙනාවෙ වර්තමාන ජනාධිපතිතුමා. විදේශිකයො එන තැනටත්, අයි.එම්.එෆ්. සහ ජාත්‍යන්තර ණය ආධාරත් ඇතුළුව රට මූල්‍යමය වශයෙන් යම්කිසි ස්ථාවරයකට ගේන්න වර්තමාන ජනාධිපතිතුමාට හැකිවුණා. ඒ නිසා ඒ ගෞරවය ජනාධිපතිතුමාට දෙන්න ඕනෑ. ඒත් වර්තමාන කතාබහක් ඇතිවෙලා තියෙනවා අද තියෙන ආර්ථික තත්ත්වයත් එක්ක ඇතිවෙලා තියෙන පීඩනය. ඒක පසුගිය වසර එකහමාර තුළ ඇතිවුණු ප්‍රශ්නයක්. කොහොම වුණත් අපේක්ෂයො ගැන කතා කරද්දි පක්ෂයෙන් ගන්න තීන්දුවත් එක්ක තමයි අපි ඒ තීන්දුව ගන්නෙ. අද වෙනකම් අපේ පක්ෂයෙන් තාම කවුද කියලා නිල වශයෙන් කියලා නෑ.
Q ඒ කියන්නෙ මධුර විතානගේට එහෙම ස්වාධීන අදහසක් නෑ?
නෑ අපි පක්ෂයකට බද්ධ වෙලානෙ ඉන්නෙ. පක්ෂය ගන්න තීන්දුවත් එක්ක තමයි අපි වැඩ කටයුතු කරන්නෙ.
Q ඔබලා 2019 වසරේ බලයට එනකොට රැගෙන ආ ප්‍රතිපත්ති එක්ක සම්පූර්ණයෙන්ම වෙනත් මුහුණුවරක තමයි අද වෙද්දි රට පාලනය වෙන්නෙ. මේක සම්පූර්ණයෙන් විරුද්ධ ප්‍රතිපත්තියක්. එහෙම තියාගෙන ඔබලට ඔබලාගෙ පාක්ෂිකයන්ගෙන් ඡන්දය ඉල්ලන්න යන්න පුළුවන්ද?
අපි ගන්නකොට රටේ තිබුණු තත්ත්වය සහ පසුව ඇතිවුණු ගෝලීය තත්ත්වයත් එක්ක ලෝකයේ පවතින ආර්ථික ක්‍රමය අපේ රට හා සමාන වෙලා තියෙනවා. ඒකට හේතුව ලෝකයේ ඇතිවෙලා තියෙන ආර්ථික අවුල. එහෙම මොහොතක අපි සූදානම් කරපු ප්‍රතිපත්ති අනුගමනය කරන්න බැහැ. ඒකට අනුගත වෙන ප්‍රතිපත්තියක් අපි අනුගමනය කරන්න ඕනෑ. ඒ නිසා ජනාධිපතිතුමාගේ යම් යම් ප්‍රතිපත්ති එක්ක මගේ සහයෝගය ලබාදීම සිදු කරනවා. ඒ වගේම සමහර කාරණා සම්බන්ධයෙන් අපිට විවේචනයක් තියෙනවා. විශේෂයෙන් මම පොදු ව්‍යාපාරික කාරක සභාවේ ඉන්න නිසා මම දන්නවා වසර හතළිහක් පුරාවටම රාජ්‍ය විසින් පාලනය කරපු ව්‍යාපාර ඉතාම අසාර්ථකයි කියලා. ඒ නිසා බදු ගෙවන ජනතාවගේ බදුවලින් පාලනය වන සුදු අලියන් බවට පත්වෙලා තියෙනවා. ඒ නිසා මම හිතනවා මේ ප්‍රතිව්‍යුහකරණය ඉතාම සාර්ථක වැඩපිළිවෙළක් කියලා.
Q මම අහන්නෙ ඔබලා විශ්වාස කරපු ජනතාවට මේකෙන් කලකිරීමක් ඇතිවෙනවා නේද?
සමාජය තුළ රාජ්‍ය සේවයේ කාර්යක්ෂමතාවය සම්බන්ධයෙන් ජනතාව යම් ප්‍රශ්නකාරී තැනකට ඇවිල්ලා තියෙනවා. ඒ නිසා මම හිතන්නෙ නෑ ජනතාව විරුද්ධ වෙයි කියලා. හැබැයි සමහර රාජ්‍ය ආයතන තියෙනවා, ඉතාම සංවේදී රාජ්‍ය ආයතන. ඒවා පෞද්ගලීකරණය කරන්න බැහැ. ඒ නිසා ඒවා තියාගෙන අත්‍යවශ්‍ය නොවන දේවල් පෞද්ගලීකරණය කළාට මගේ නම් කිසිම විරුද්ධත්වයක් නැහැ. මොකද අද වෙද්දී රාජ්‍ය සේවය දැඩි අකාර්යක්ෂම තැනකට පත්වෙලා තියෙනවා.
Q ඡන්ද දායකයො කෙසේ වෙතත් පොහොට්ටුව මේ වෙද්දී විසිරිලා ඉවරයි. ඡන්දයකට ගිහිල්ලා දිනන්න පුළුවන්ද?
ජනතාව තවමත් ශ්‍රී ලංකා පොදුජන පෙරමුණ සම්බන්ධව ලොකු විශ්වාසයකින් ඉන්නෙ. ඒ නිසා අපි ඉදිරියේදී පුළුල් ජාතික ව්‍යාපාරයක් ගොඩනගනවා.
Q ජාතික ජනබලවේගය චෝදනා කරන්නෙ ඔබලා තමයි මේ රට විනාශ කළේ කියලා?
ඒ අය අපිට චෝදනා කළාට ඇත්තටම අද රට මේ තියෙන තැනට රටේ සියලුම පක්ෂ අඩු වැඩි වශයෙන් වගකියන්න ඕනෑ. එකක් තමයි සමහර ආණ්ඩු විසින් ගනු ලැබූ ඇතැම් තීන්දු. අනෙක් එක ජනතා විමුක්ති පෙරමුණ වගේ පක්ෂ විසින් සිදුකරපු කඩාකප්පල්කාරී ක්‍රියා. ඒ නිසා අඩු වැඩි වශයෙන් මේ හැමෝම වගකියන්න ඕනෑ. විශේෂයෙන් ජනතා විමුක්ති පෙරමුණ.
I ගයාන් ගාල්ලගේ