පන්සලේ ඡායාරූපය පසුපස දේශපාලනය!
රජයේ ජ්‍යෙෂ්ඨ නිලධාරියෙක් පසුගියදා දේශපාලනයට බර පන්සලක ප්‍රකට හිමිනමක් බැහැදැකීමට ගියේය. මේ හිමියන් පසුගිය ජනපතිවරණයේදී ගෝඨාභය රාජපක්ෂ මහතා ජනාධිපති කරවීමට විශාල පරිශ්‍රමයක් දැරූවෙකි.
මේ හිමියෝ වත්මන් ආණ්ඩුවත් ජනාධිපති රනිල් වික්‍රමසිංහ මහතාත් සම්බන්ධයෙන් පසුගිය කාලයේ දැඩි ලෙස විවේචනය කරමින් සිටියහ. තමන් වැනි ජ්‍යෙෂ්ඨත්වයෙන් ඉහළ හිමිනමකට ලැබිය යුතු නිසි ගෞරවය ලබා නොදීම සම්බන්ධයෙන් මේ විවේචනය සිදුවිය.
උන්වහන්සේ සමඟ සතුටු සාමීචියක යෙදෙමින් සිටි නිලධාරියාගේ අවධානය පසෙක තිබූ විශාල ඡායාරූපයක් දෙසට යොමු විය. එහි වූයේ තමන්ට පෙර මේ තනතුර දැරූ නිලධාරියාගේ ඡායාරූපයයි. එහිදී මේ නිලධාරියා උන්වහන්සේගෙන් විමසුවේ හිටපු නිලධාරියාගේ ඡායාරූපයක් පන්සලේ මෙලෙස තබාගෙන ඉන්නේ ඇයිද කියාය.
''එයා මේ තනතුර දරද්දී අපට බොහෝ උදව් පදව් කළා. අපේ බලාපොරොත්තුව ඒ මහත්මයා ආපහු ඒ තනතුරට පත්වෙලා එදා කළ විදියටම අපට ආපහු උදව් කරයි කියලයි.'' උන්වහන්සේ පැවසූහ.
ඒ වෙලාවේ මේ නිලධාරියා උන්වහ්සේගෙන් විහිළුවට මෙන් විමසුවේ ''ඒකේ අදහස මගේ පින්තූරෙ නම් කවදාවත් හාමුදුරුවන්ගෙ පන්සලේදී දකින්න හම්බවෙන්නෙ නැහැ කියන එකද'' කියාය. හාමුදුරුවන්ට එයට පිළිතුරක් නොවීය.
I සන්ඩේ ටයිම්ස්
පක්ෂ සමුළුවට උතුර උණුසුම්
උතුරේ දමිළ දේශපාලන පක්ෂවලට ලබන 27 සහ 28 දෙදින ඉතා තීරණාත්මක වී තිබේ. ද්‍රවිඩ ජාතික සන්ධානයේ (ටී.එන්.ඒ.) ප්‍රධාන පක්ෂය වන ඉලංකෙයි තමිල් අරසු පක්ෂයේ ජාතික සමුළුව එයට හේතු වී තිබේ.
එම පක්ෂය සඳහා නායකයකු තෝරා ගැනීම එදිනට යෙදී තිබීමෙන් තත්ත්වය උණුසුම් වෙමින් තිබේ. මේ තනතුර සඳහා මෑතකදී නාමයෝජනා කැඳවා තිබිණි. දැනට පක්ෂයේ නායකයා වශයෙන් කටයුතු කරන්නේ හිටපු පාර්ලිමේන්තු මන්ත්‍රි මාවයි සේනාධිරාජාය. දැනට අසූ වියද ඉක්මවා සිටින ආර්. සම්පන්දන් පාර්ලිමේන්තුවේ පක්ෂ නායකයා වශයෙන් කටයුතු කරයි.
පක්ෂයේ ප්‍රධාන තනතුර වන නායක ධුරය සඳහා මේ වනවිට පාර්ලිමේන්තු මන්ත්‍රීවරුන් වන එම්.ඒ. සුමන්තිරන් සහ එස්. ශ්‍රීධරන් අතරේ උග්‍ර සටනක් නිර්මාණය වෙමින් තිබේ. පසුගිය සතියේ ශ්‍රීධරන් ත්‍රි^මලේ බිම් මට්ටමේ සාමාජිකයන් හමුවී ප්‍රචාරක ව්‍යාපාරයක නිරත වී තිබේ. දෙදින පක්ෂ සමුළුව පැවැත්වීමට නියමිතව ඇත්තේ ත්‍රි^මලේ බීච් රෙසෝට් හෝටලයකදීය.
I සන්ඩේ ටයිම්ස්