හොරකම් කළ හැම සතේම ආපහු අපි ගන්නවා
අශෝක අබේසිංහ (පාර්ලිමේන්තු මන්ත්‍රී - සමගි ජන බලවේගය)
- ඊළඟට බලයට එන ආණ්ඩුව සජබයි
- කස්ටම් එකෙන් සුරා බදු එකෙන් එන්න තියෙන බිලියන 63ක් කෝ
- ජනතාව ණය ගෙවනවා: හැබැයි ආණ්ඩුව තාම ගෙවන්නෙ නෑ
Q මේ වෙද්දි මැතිවරණ වසරක් හැටියටයි මේ වසර නම් කරලා තියෙන්නෙ. කොහොමද සමගි ජන බලවේගය මේ මැතිවරණ සටන වෙනුවෙන් සූදානම් වෙන්නෙ?
ව්‍යවස්ථානුකූලව වසර පහකට සැරයක් ජනාධිපතිවරණයත් මහ මැතිවරණයත් පවත්වන්න ඕනෑ. මේ වෙද්දි ව්‍යවස්ථානුකූලව ජනාධිපතිවරයාට මහ මැතිවරණයක් පැවැත්වීමේ හැකියාවක් තියෙනවා. ඒ වගේම ව්‍යවස්ථානුකූලව නොවැම්බර් 17 ට කලින් ජනාධිපතිවරණය පැවැත්වෙන්නත් ඕනෑ. ඒ කියන්නෙ ඔක්තෝබර් 17 වෙනකොට මේ රටේ ජනාධිපති පත්වෙලා ඉන්න ඕනෑ. සමගි ජන බලවේගය කියන්නෙ මේ රටේ ප්‍රධාන විපක්ෂය. ප්‍රධාන විපක්ෂය කියන්නෙ ඊළඟ බලයට එන ආණ්ඩුව. විපක්ෂ නායක කියන්නෙ ඊළඟ රටේ නායකයා. ඒ වගේම රටේ පවතින මැතිවරණ කොට්ඨාස 160 ක නායකයො මැතිවරණ මෙහෙයුම් ආරම්භ කරලා ඉවරයි. ඒ වගේම විපක්ෂ නායකතුමා විශාල වැඩ කොටසක් ජනතාව වෙනුවෙන් ඉෂ්ඨ කරනවා. බස් රථ ලබා දෙනවා. බෙහෙත් ලබා දෙනවා. හැමදේම ඉෂ්ඨ කරනවා.
Q ඔබ කිව්වා විපක්ෂ නායකතුමා බස් ලබා දෙනවා, බෙහෙත් ලබා දෙනවා කියලා ජනතාව වෙනුවෙන්. හැබැයි මේ වෙද්දි රට පාලනය කරනවා කියන්නෙ ඒක නෙවෙයි කියලා හැමෝම දන්නවා. මොකක්ද සමගි ජන බලවේගයට රට පාලනය කරන්න තියෙන හැකියාව?
මෙහෙමයි. මේ අපි කිව්වෙ විපක්ෂයක් හැටියට අපි කරපුවා. මම පිළිගන්නවා රටක් පාලනය කරන්න ඊට වඩා සැලසුමක් තියෙන්න ඕනෑ. අපේ ආර්ථික වැඩපිළිවෙළ මේ වෙද්දි රටට හෙළි කරලා තියෙනවා. ඒක අපි හිල්ටන් හෝටලේදි පසුගිය වසරේ එළිදැක්වුවා. ඒ වෙලාවෙ ආපු අය කිව්වා මාලිමාවේ ආර්ථික සැලසුමට වඩා අපේ ආර්ථික සැලසුම තමයි වඩාත් ප්‍රායෝගික කියලා. මේ රටේ ප්‍රධාන ව්‍යාපාරිකයො කිව්වෙ. අපේ ආර්ථික සැලැස්ම ගැන මේ වෙද්දි ජනතාව දැනුවත් කරමින් යනවා.
Q බදු ලබාගෙන ආර්ථිකය සැලසුම් කරන ක්‍රමයක් තමයි එන රජයට කරන්න වෙන්නෙ. එහෙම නේද?
ආණ්ඩුව විසින් ලබාගන්නා බදු මුදල් ජනතාව අතර බෙදිලා යන්න ඕනෑ. දැන් තියෙන්නෙ රටේ ජාතික ආදායමෙන් රටේ ඉහළම ඉන්න 20% ක ප්‍රමාණය 70% විතර ඒ බදු පාරිභෝජනය කිරීම හා පහළම ඉන්න අය 4% ක් විතර තමයි බදු මුදල් පාරිභෝජනය කරන්නෙ. ඒක ලොකු විෂමතාවයක්. මතක තියාගන්න අපි ණය ගෙවන්නෙ නැති රටක්. ලබන අවුරුද්දෙ ඉඳන් ඩොලර් බිලියන පහ ගාණෙ ණය ගෙවන්න වෙනවා. එතකොට මේක තවත් ප්‍රශ්නයක් වෙනවා.
Q ඔබලා බලයට ආවොත් ඔය කියන විදිහට තියෙන ප්‍රශ්නත් එක්ක ජනතාවට කඩිනම් විසඳුමක් ලබා දෙන්න පුළුවන්ද?
කඩිනම් විසඳුමකට යන්නම වෙනවා. දැන් ජනතාව ඉන්නෙ විශාල ජීවන බරක. දැන් බලන්න ජනතාව ණය ගෙවනවා. හැබැයි ආණ්ඩුව තාම ණය ගෙවන්නෙ නෑ. හැබැයි ණය ගෙවන්න පටන් ගත්තාම මේක තව දෙගුණ වෙනවා. එතකොට ආදායම වැඩිවීමක් වෙන්නෙත් නෑ. අපි දන්නවා මේ වෙද්දි ජනාධිපතිවරයා කියලා තියෙනවා මැතිවරණයක් ළං වෙනකොට සියලු දේවල් අඩු කරනවා කියලා. ඒ කොච්චර අඩු වුණත් ආදායම වැඩිවීමක් වෙන්නෙ නෑනෙ.
Q දැන් රාජ්‍ය සේවකයන්ට දහදාහකින් වැටුප් වැඩි වෙනවා නේද?
ඔව් කිව්වා. දැන් බලන්න වැට් එකෙන් රාජ්‍ය ආදායම රුපියල් බිලියන අටසිය හැටක් බලාපොරොත්තු වෙනවා. ලංකාවෙ පවුල් තියෙන්නෙ පනස් හත් ලක්ෂයයි. ඔය ආදායම පවුල් ගාණෙන් බෙදුවාම එක පවුලක් පහළොස් දහස් තුන්සීයක් වැඩිපුර ගෙවන්න ඕනෑ 2023 ට වැඩිය. දැන් බලන්න ආණ්ඩුවෙන් දහදාහක් දීලා පහළොස් දහස් තුන්සීයක් ලබාගන්නවා. එතකොට විශ්‍රාමිකයන්ගෙනුත් දෙදාස් පන්සීයක් වැඩි කරලා පහළොස්දාස් තුන්සීයක් වක්‍ර බදු හැටියට ගන්නවා. මම ඔය කියන්නෙ වැට් බද්ද ගැන විතරයි. මම ඉන්නවා ආදායම් බදු ක්‍රම සහ විධි කාරක සභාවෙ. ඒකෙ තියෙනවා ආදායම් බදු දෙපාර්තමේන්තුවෙ හිඟ බදු ප්‍රමාණය බිලියන නවසිය හතළිස් තුනක් එකතු වෙන්න තියෙනවා. ඒකෙන් පහුගිය අවුරුදු පහ තුළ කෝටි හැටපන්දාහක් එකතු වෙන්න ඕනෑ. ඒක එකතු කළා නම් ඔය ආදායම එනවා. කස්ටම් එකෙන් විතරක් බිලියන පනස් හතක් එකතු වෙන්න තියෙනවා. සුරාබදු එකෙන් බිලියන හයක් තියෙනවා එකතු වෙන්න. ඉතින් මම අහන්නෙ ඒවා කෝ?
Q ඉතින් ඔය කියන බදු ලබාගැනීම යහපාලනය කාලෙවත් හරියට කළේ නෑනෙ. ඉතින් කොහොමද ඔයාලව විශ්වාස කරන්නෙ?
එහෙම නොකරපු නිසානෙ අපි ඒ ආණ්ඩුවෙන් අයින් වුණේ. ජනතාවට සාධාරණයක් ඉෂ්ඨ වුණේ නෑ. අන්න ඒ නිසයි අපි වෙනම පිරිසුදු කණ්ඩායමක් හැටියට යන්නෙ. මතක තියාගන්න ඒ හොරකම් කරපු හැමෝගෙන්ම හැම සතේම ආපහු අපි ලබාගන්නවා.
I ගයාන් ගාල්ලගේ