කට්ටිය ගැලවි ගැලවී අපි ළඟට එනකොට සජබ කොහොමද දිනන්නේ?
පාලිත රංගේ බණ්ඩාර (මහ ලේකම් - එක්සත් ජාතික පක්ෂය)
- ඉස්සර වගේ බොරු කියලා දැන් මැතිවරණ දිනන්න බෑ
- අසීරුම තැනක ඉඳන් අපි ඉදිරියට ආවා: දැන් ජනතාවත් එකතු වෙනවා
- ඡන්දෙට මුහුණ දෙන්න ජනාධිපතිතුමා ඉන්නේ උපරිම සූදානමකින්
Q අපි දන්නවා මේ වසර මැතිවරණ වසරක්. සියලුම පක්ෂ මැතිවරණ සඳහා සූදානමකින් ඉන්නෙ. එක්සත් ජාතික පක්ෂයේ මොන වගේ සූදානමක්ද මේ මැතිවරණ සඳහා තියෙන්නෙ?
අපි සියලුම මැතිවරණ කොට්ඨාසවල මේ වෙනකොට එක්සත් ජාතික පක්ෂය වෙනුවෙන් නායකත්වය දරන්න පුළුවන් අය පත් කරලා ඉවරයි. ඒ වගේම දිස්ත්‍රික්ක වශයෙන් අපි දිස්ත්‍රික් රුස්වීම් මාලාවක් මේ වෙනකොට ආරම්භ කරලා ඉවරයි. ඒ නිසා බිම් මට්ටමේ සියලු වැඩ කටයුතු මේ වෙද්දි ආරම්භ කරලා ඉවරයි.
Q ඔබලා ආණ්ඩුව නියෝජනය කරන මැති ඇමැතිවරු. දැන් නිතර ජනතාව හම්බවෙනවා ඇති. කොහොමද ජනතා ප්‍රතිචාර?
අපිට අයහපත් තත්ත්වයක් නෑ. අපි හිටියෙ ඉතාම අසීරු තැනක. දේශපාලන පක්ෂයක් වශයෙන් ඉතාම අසීරු ප්‍රශ්නවලට මුහුණ දුන්නා. නමුත් අපි මේ වෙද්දි ඉදිරියට ඇවිල්ලා ඉන්නෙ. අපි දිස්ත්‍රික්ක පහක ප්‍රධාන රුස්වීම් පහක් පවත්වන්න මේ වෙනකොට කටයුතු කරලා තියෙනවා. විශේෂයෙන් ජනතාව මේ වෙලාවෙ අපිත් එක්ක එකතුවෙලා අපිට උදව් කරමින් ඉන්නවා. ජනතාව මේ වෙනකොට කියමින් ඉන්න දෙයක් තමයි මේ රට ගොඩගන්න පුළුවන් එකම නායකයා රනිල් වික්‍රමසිංහ මහත්තයා කියලා. ඒ නිසා ජනතාව කැමැත්තෙන් ඉන්නෙ එතුමව නැවත පත්කර ගන්න.
Q ජනාධිපතිවරයා මේ වෙද්දි මැතිවරණය සඳහා සූදානම් වෙමින් ඇති. එතුමාගේ ප්‍රතිචාර මොන වගේද?
එතුමා ඉතාම පැහැදිලිව දේශපාලන කටයුතුත් රටේ කටයුතුත් ඉතාම සමබරව සිදු කරගෙන යනවා. එතුමා ඉතාම සාර්ථකව මැතිවරණය සඳහා මුහුණ දෙන්න සූදානමින් ඉන්නවා.
Q අපි දන්නවා ජනවාරි 27 ජාඇල ප්‍රදේශයෙන් ආරම්භ වෙනවා පොහොට්ටුවෙ එක්තරා කණ්ඩායමක ජනාධිපතිවරයා සඳහා සහාය ලබා දීමේ රුස්වීමක්. ඒ වගේ කණ්ඩායම් කීයක් ඉන්නවද දැනට වර්තමාන ජනාධිපතිවරයා ජයග්‍රහණය කරවන්න?
විශාල කණ්ඩායම් ප්‍රමාණයක් ඉන්නවා. දේශපාලන පක්ෂ, වෘත්තීය සමිති, සිවිල් සංවිධාන ඇතුළු කණ්ඩායම් අසූවකට වඩා අපිත් එක්ක ඉන්නවා. ඒ වගේම දිනපතාම විවිධ කණ්ඩායම්, විවිධ සංවිධාන අපිත් එක්ක එකතු වෙමින් පවතිනවා.
Q සමගි ජන බලවේගය නම් පවසන්නෙ මේ පාර හිතන තරම් ජයග්‍රහණය සුන්දර නෑ කියලා. මේ පාර ජයග්‍රහණය තියෙන්නෙ ඔවුන්ට කියලා. ඇත්තටම විපක්ෂය තීරණාත්මක අභියෝගයක් නේද?
ඔව්. හිතන තරම් සුන්දර නැහැ ජයග්‍රහණය. වැඩිම සහයෝගය ලබා දෙන කණ්ඩායම් ඉන්න පුද්ගලයා තමයි ජයග්‍රහණය කරන්නෙ. හැබැයි ප්‍රශ්නෙ තියෙන්නෙ ඒ අයත් එක්ක එකතුවෙන කණ්ඩායම කවුද කියලා. මොකද හැමෝම අපිත් එක්ක එක්කාසු වෙමින් ඉන්නකොට ඒගොල්ලො එහෙම ජයග්‍රහණයක් කරන්නෙ කොහොමද කියලා ප්‍රශ්නයක් තියෙනවා.
Q ඒ කියන්නෙ ඒ කණ්ඩායමේ අයත් ඉන්නවද ඔබලත් එක්ක එකතු වෙන්න?
ඒ අයගෙ පාර්ලිමේන්තු නියෝජනය කරන කණ්ඩායම වගේම පාර්ලිමේන්තු නියෝජනය නොකරන කණ්ඩායම්, සංවිධායකවරු අපිත් එක්ක මේ වෙද්දි සාකච්ඡා කරමින් යනවා. විශේෂයෙන්ම පළාත් සභා, පළාත් පාලනවල නියෝජිතයො අපිත් එක්ක එකතු වෙමින් ඉන්නෙ. ඒ අයගෙ කණ්ඩායමුත් එහෙම ගැලවි ගැලවි එනකොට ඉතින් කොහොමද ජයග්‍රහණය කරනවා කියන්නෙ.
Q දේශපාලනඥයො තීන්දු තීරණ ගන්නෙ තමන්ගෙ දේශපාලන වාසිය තකා. ආණ්ඩුව පහුගිය කාලෙ ගත්ත තීන්දු තීරණ එක්ක ජනතාව ගොඩක් කලකිරීමෙන් ඉන්නෙ. ඉතින් කොහොමද මැතිවරණයක් කරන්නෙ?
ජනතාව මේ වෙනකොට බහුතරයක් යථාර්ථය අවබෝධ කරගෙන ඉන්නෙ. අවබෝධ නොකරගත්ත කණ්ඩායමකුත් ඉන්නවා. මිනිස්සු අතීතයෙ ඉඳලම වංචාව ප්‍රෝඪාවට අහුවුණා. මොනව හරි දෙනවා කිව්වොත් තමයි ඡන්දය දෙන්නෙ. ඒ විදිහට කරපු දේවල් නිසා තමයි අද අපි මේ වගේ දේවල් භුක්ති විඳින්නෙ. මේ රට මේ තත්ත්වයෙන් බේරගන්න පුළුවන් වුණේ 2022 අපි ඇත්ත කිව්ව නිසා. මැතිවරණ ජයග්‍රහණය කරන්න කියලා මිනිස්සුන්ට බොරු කියන්න බෑ. අපි ඇත්ත කියන්න ඕනෑ. රනිල් වික්‍රමසිංහ මහත්තයා කියන්නෙ එදත් බොරු නොකිව්ව අදත් බොරු නොකියන හෙටත් බොරු නොකියන නායකයෙක්.
I ගයාන් ගාල්ලගේ