ඉන්දීය ධීවර බෝට්ටු නවත්වාගන්න බැරිව කොහොමද රතු මුහුද ආරක්ෂා කරන්නේ? - උතුරේ ධීවරයෝ අසති
හවුති කැරළිකරුවන් සමඟ සටන් කිරීමට රතු මුහුදට ශ්‍රී ලංකා නාවික හමුදාවේ නැවක් යැවීමට ආණ්ඩුව මගින් පසුගියදා ගනු ලැබූ තීරණය මෙරට පමණක් නොව එතෙරද බොහෝ දෙනකුගේ විමතියටත් ප්‍රශ්න කිරීම්වලටත් ලක්විය. මේ සම්බන්ධයෙන් දේශපාලන වේදිකාවේ බොහෝ විවේචන එල්ල වෙද්දී උතුරේ ධීවර සංගම් එකතුවේ අවධානය මේ සිද්ධියට යොමුව තිබිණි. ඔවුන් ඉන්දීය ධීවරයන් විසින් සිදුකරන නීති විරෝධී මසුන් ඇල්ලීමේ කටයුතුවලින් දිගටම බැටකමින් සිටින්නේ නාවික හමුදාවේ යාත්‍රා උතුරු මුහුදේ විශාල වශයෙන් මුරකාවල් යොදවා තිබෙන පසුබිමක් යටතේය.
ඉන්දීය ධීවරයන් විසින් සිදුකරන නීති විරෝධී ක්‍රියාවක් වන ''බොටම් ට්‍රෝලිං'' හේතුවෙන් උතුරේ ධීවරයන්ට අහිමිවන්නේ මත්ස්‍ය සම්පත පමණක් නොවේ. ඔවුන්ගේ බෝට්ටු සහ දැල් ආම්පන්නද ඒ ක්‍රියාව හේතුවෙන් විනාශයට පත්වෙයි. උතුරු මුහුදේ මසුන් ඇල්ලීමට තෝරාගත් දිනවලදී මුහුදු යාමේ ක්‍රමයද ඔවුන්ට නවතා දැමීමට සිදුවී ඇත්තේ විනාශකාරී ''බොටම් ට්‍රෝලිං'' ශ්‍රී ලංකා මුහුදු සීමාවට දිගටම කඩාවදින බැවිනි. උතුරේ ධීවරයන්ට මුහුදු යාමට ලබාදී ඇති දිනවලද ඔවුහු මේ ක්‍රියාවේ නිරත වෙති.
පසුගිය දිනෙක උක්ත කරුණ සම්බන්ධයෙන් පැවැත්වූ මාධ්‍ය සාකච්ඡාවකදී උතුරේ ධීවර සංගම් නායකයකු මෙසේ කියා තිබිණි.
''අපේ මුහුදු සීමාවට කඩාවදින ඉන්දීය ධීවර බෝට්ටු පැය ගණනක් තිස්සේ මාළු අල්ලාගෙන කිසිම අවහිරයකින් බාධාවකින් තොරව ආපසු යාම වළක්වන්න බැරි නාවික හමුදාව කොහොමද රතු මුහුදේ නැව් ගමන් මාර්ගයට ආරක්ෂාවක් දෙන්නේ?
ගාසා තීරයට ලංකාවෙන් පාසලක්!
මේ අතර රතු මුහුදට ශ්‍රී ලංකා නාවික හමුදාවේ නැවක් යැවීමට ගනු ලැබූ තීරණය බටහිර ආසියානු රටල දැඩි අවධානයට ලක්විය. එම රටවල් දිගින් දිගටම ශ්‍රී ලංකාවේ ආර්ථික සහ වාණිජ කටයුතුවලට සහාය දක්වන රටවල් වන අතර ඊශ්‍රායලය විසින් ගාසා තීරයේ සිදුකරන පලස්තීන ජනසංහාරය සම්බන්ධයෙන් දැඩිව විරෝධය පළකරයි.
මේ හේතුවෙන් ජනාධිපතිවරයා පසුගියදා ශ්‍රී ලංකාවේ බටහිර ආසියානු තානාපතිවරුන් කැඳවා ඔවුන් සමඟ සාකච්ඡාවක් පැවැත්වීය. එම සාකච්ඡාව ජාත්‍යන්තරයේ බොහෝ දෙනාගේ අවධානයට ලක්ව තිබිණි. එහිදී ජනාධිපතිවරයා එම තානාපති දූත පිරිස හමුවේ ප්‍රකාශ කර තිබුණේ එම යුද්ධය අවසන් වී ප්‍රතිසංස්කරණ කටයුතු ආරම්භ කිරීමෙන් පසුව ශ්‍රී ලංකාව ගාසා තීරයේ පාසලක් ඉදිකර දීමට කටයුතු කරන බවය. රතු මුහුදේ හවුති කැරලිකරුවන්ට එරෙහිව ශ්‍රී ලංකාවේ නාවික හමුදා නැවක් යෙදවීමට ගනු ලැබූ තීරණය හේතුවෙන් අරාබි සහ ඉස්ලාම් රටවල තානාපති ප්‍රජාව තුළ ඇතිවූ ව්‍යාකූල තත්ත්වය සමනය කිරීම සඳහා ලබාදුන් පොරොන්දුවක් වශයෙන් හැඳින්වෙයි.
එම සාකච්ඡාවේදී ජනාධිපතිවරයා පලස්තීන ගැටලුවේදී ශ්‍රී ලංකාවේ සහාය පලස්තීනයට ලැබෙන බවට සහතික විය. ද්වි - රාජ්‍ය විසඳුමකට තමන්ගේ පාලනය සහාය දක්වන බවද ජනාධිපතිවරයා එහිදී පෙන්වා දී තිබිණි.
''හමාස්'' සංවිධානය ඔක්තෝබර් 07 වැනිදා සිදුකළ ප්‍රහාරයත් සමඟ ඇරඹුණු ඊශ්‍රායල් යුද්ධය සම්බන්ධයෙන් නැගුණු ප්‍රශ්නයකදී හමාස්වරුන් ඉවත් කිරීමට පෙර බටහිර ඉවුරේ පලස්තීන ඉඩම්වලින් ඊශ්‍රායල් පදිංචිකරුවන් ඉවත් කළ යුතු යැයි ජනාධිපතිවරයා පැවසූ බව තානාපති ආරංචි මාර්ග ප්‍රකාශ කරයි. රතු මුහුදට ශ්‍රී ලංකාවේ නාවික හමුදා නැවක් යැවීමේ තීන්දුව ශ්‍රී ලංකාවේ ආර්ථිකය සලකා බලා ගනු ලැබූ තීන්දුවක් යැයි ජනාධිපතිවරයා ප්‍රකාශ කර ඇතැයිද සඳහන් වෙයි. නමුත් එම තීන්දුව තවමත් සලකා බලමින් සිටින බවද ප්‍රකාශ වී තිබේ.
එහෙත් මෙරට සිටින පලස්තීන හිතවාදීන් ප්‍රකාශ කරන්නේ ජනාධිපතිවරයා ගත් පියවර ඊශ්‍රායලයට සහාය දැක්වීමක් යැයි පෙන්නුම් කරන බවය. හවුති කැරළිකරුවන් ඉලක්ක කරන්නේ ඊශ්‍රායලයට සබඳතා ඇති නැව් පමණක් බවත් එය සිදුකරන්නේ ගාසා තීරයේ සිදුකෙරෙන ජන සංහාරය අවසන් කිරීමේ අරමුණින් බවත් ඔවුහු ප්‍රකාශ කරති.
කෙසේ වුවද ජනාධිපතිවරයා රතු මුහුදට ශ්‍රී ලංකා නාවික හමුදා නැව යැවීම පිළිබඳ තීන්දුව ක්‍රියාත්මක කරනු ඇතිදැයි තවම පැහැදිලි නැත. රතු මුහුද කලාපය ආශ්‍රිතව ගැටුම් තත්ත්වය බැරූරුම් අතකට හැරී තිබෙන අතර අමෙරිකාවත් බ්‍රිතාන්‍යයත් යේමනයේ කැරළිකරුවන් සිටින ප්‍රදේශවලට බෝම්බ හෙළමින් සිටී. ඊට පළිගන්නා බවට හවුති කැරළිකරුවෝ දිව්රති. කැරළිකරුවන් ප්‍රකාශ කරන්නේ තමන් පහර දෙන්නේ ඊශ්‍රායලය බලා යන නැව්වලට සහ ඊශ්‍රායලය සමඟ සබඳතා පවත්වන නැව්වලට පමණක් බවයි.
- සන්ඩේ ටයිම්ස්
අමාත්‍යංශ ලේකම්වරුන් අලුතෙන් පත් කිරීම:
ජ්‍යෙෂ්ඨයෝ කනස්සල්ලෙන්
ජනාධිපතිවරයා විසින් පසුගියදා සිදුකළ අමාත්‍යංශ ලේකම්වරුන් දස දෙනෙකු පත්කිරීම ඇතැම් ජ්‍යෙෂ්ඨ නිලධාරීන්ගේ උදහසට හේතු වී ඇතැයි සඳහන් වෙයි. එහිදී සිදුකෙරුණු උසස්වීම් ලබාදීමේදී රාජ්‍ය සේවයේ ජ්‍යෙෂ්ඨත්වයෙන් වැඩි ලැයිස්තුවේ සිටින තමන් පිළිබඳ නොසලකා හැර ඇතැයි ඔවුන්ගේ ප්‍රධානම දුක්ගැනවිල්ල වී තිබේ.
අමාත්‍යංශ ලේකම්වරුන් වශයෙන් රාජ්‍ය සේවයේ කනිෂ්ඨ නිලධාරීන් ගණනාවකට පත්වීම් ලබාදීම පිළිබඳව එම ජ්‍යෙෂ්ඨයන්ගේ බලවත් අමනාපය පළවෙමින් තිබේ. එම ජ්‍යෙෂ්ඨයන් අතරේ අමාත්‍යංශවල අතිරේක ලේකම්වරුන් මෙන්ම දිසාලේකම්වරුද වෙති. ඔවුන්ගේ අවධානය යොමු වී ඇත්තේ රාජ්‍ය සේවයේ ඉහළම තනතුරක් වන අමාත්‍යංශ ලේකම් ධුරයකට පත්වීමට අවස්ථාව නොලබාම සේවයෙන් විශ්‍රාම යාමට තිබෙන ඉඩකඩ සම්බන්ධයෙනි. මේ ආකාරයට කටයුතු සිදුවන්නේ නම් රාජ්‍ය සේවයේ ජ්‍යෙෂ්ඨ නිලධාරීන්ගේ ලැයිස්තුවක් තවදුරටත් පවත්වාගෙන යාමේ තේරුමක් තිබේදැයි ඔවුහු ප්‍රසිද්ධියේම ප්‍රශ්න කරමින් සිටිති.
මේ සම්බන්ධයෙන් ජනාධිපති කාර්යාලයේ ජ්‍යෙෂ්ඨ නිලධාරියකුගෙන් කළ විමසීමේදී ඔහු ප්‍රකාශ කළේ මෑතකදී සිදුකළ එම පත්වීම් සම්බන්ධයෙන් සමහර ජ්‍යෙෂ්ඨයන් උදහසට පත් වී සිටින බව තමන්ද දැන සිටින බවය. එහෙත් අමාත්‍යංශ ලේකම්වරුන් පත් කිරීමේ පරමාධිකාරය පැවරී තිබෙන්නේ ජනාධිපතිවරයාට බවද ඔහු පෙන්වා දුන්නේය. ජනාධිපතිවරයා කනිෂ්ඨ නිලධාරීන් කිහිප දෙනකු සහ සේවා දීර්ඝ ලබා සිටින ඇතැම් ජ්‍යෙෂ්ඨයන් ලේකම් ධූරවලට පත්කළේ ඔවුන්ගේ කාර්යසාධනය සැලකිල්ලට ගැනීමෙන් පසුව බවද ඔහු කීය.
''මේ නිලධාරීන් එම ධුරවලට දැනට පත්කර තිබෙන්නේ වසරක කාලයක් සඳහායි. ඔවුන්ට නිශ්චිත ඉලක්ක ලබාදී තිබෙනවා. එම ඉලක්ක ජය ගැනීමට අසමත් වුවහොත් සේවා දීර්ඝ ලබා සිටින නිලධාරීන්ට විශ්‍රාම යාමට සිදුවෙනවා. අනෙක් නිලධාරීන් දරණ තනතුරෙන් පහ කිරීමට පියවර ගන්නවා.'' ඔහු තවදුරටත් අවධාරණය කළේ ජ්‍යෙෂ්ඨ නිලධාරීන් මේ පත්කිරීම් සම්බන්ධයෙන් උදහසට පත් නොවිය යුතු බවයි. ''ඔවුන් කළ යුත්තේ තමන්ට ලබාදී ඇති තනතුරට අදාළ රාජකාරි නිසි ලෙස ඉටු කිරීමයි. ඔවුන් ඉහළ කාර්යසාධනයක් පෙන්වා දී ඇත්නම් කනගාටු වීමට දෙයක් නැහැ'' ඔහු කීය.
- සන්ඩේ ටයිම්ස්