රට ගොඩගන්න හොඳම කණ්ඩායම ඉන්නේ සජබ එක්ක
- සමගි ජන බලවේගය පාර්ලිමේන්තු මන්ත්‍රී කාවින්ද ජයවර්ධන
- සමාජ මාධ්‍යයට මර්දනයක් නොව යම් පාලනයක් ඕනෑ
- යහපාලනය කඩා වැටු‍ණේ සමහරුන් ඇතිකළ ප්‍රශ්න නිසා
- මම කලකිරිලා නෑ: ක්‍රියාකාරීව පක්ෂයට වැඩ කරනවා
Q ඔබ කාලයක් ඉතාම ක්‍රියාකාරීව වැඩ කටයුතු කළේ. දැන් පේන්න නෑ. මොකද කලකිරීමෙන්ද ඉන්නෙ?
අනේ නෑ. ගිය වර පාර්ලිමේන්තු සැසිවාරයේදී මම කතා කළා. මම කතා කළේ සමාජ මාධ්‍ය වාරණය ගැන. එතැනදි මම කියපු දේ තමයි සමාජ මාධ්‍යයට යම් වාරණයක් අවශ්‍යයි කියන එක. ඒක මර්දනයක් නෙවෙයි. හැබැයි පාලනයක් අධීක්ෂණයක් සමාජ මාධ්‍යයට අවශ්‍යයි. ඒ වගේම මම කලින් සතියේ අපරාධ පරීක්ෂණ දෙපාර්තමේන්තුවට ගිහිල්ලා බෙහෙත් වංචාව සම්බන්ධව තියෙන ප්‍රගතිය සහ යම් තොරතුරු ප්‍රමාණයක් ලබා දුන්නා.
Q මේ බෙහෙත් වංචාව සම්බන්ධයෙන් මොකක්ද ඔබලගෙ ඊළඟ වැඩපිළිවෙළ?
ඇත්තටම මේ බෙහෙත් වංචාව සම්බන්ධව කෙහෙළිය රඹුක්වැල්ල මහත්මයට නැවත විශ්වාසභංගයක් ගේන්න අපි සාකච්ඡා කළා, විපක්ෂ නායකතුමාගේ පූර්ණ ආශිර්වාදය යටතේ.
Q ඒ කියන්නෙ කාවින්ද ජයවර්ධන ක්‍රියාකාරී දේශපාලනයේ ඉන්නවා?
ඔව් ඔව්.. මම කලකිරීමක නෑ. මම ක්‍රියාකාරීව වැඩ කටයුතු කරනවා.
Q මීළඟට එන්නෙ ජනාධිපතිවරණයක්. විශේෂයෙන් ජනාධිපතිවරණයේදී තරුණ මන්ත්‍රීවරයෙක් හැටියට ඔබට විපක්ෂ නායකවරයාගේ ඇතැම් වගකීම් පැවරිලා ඇති. මොනවද ඒ වගකීම්?
මට පක්ෂය ප්‍රධාන වශයෙන් දීලා තියෙන්නෙ මානව හිමිකම් ලේකම්වරයා සහ තරුණ කටයුතු සම්බන්ධයෙන් වගකීම. ඒ අනුව ලංකාවෙ ආසන 165ක තරුණයන් බලමුළු ගන්වන්න අපි කටයුතු කරලා තියෙනවා. ඒ වගේම මානව හිමිකම් උල්ලංඝනය කිරීම සම්බන්ධවත් පෙනී ඉන්න කටයුතු කරනවා.
Q ඔබේ පියා මේ රටේ මානව හිමිකම් සම්බන්ධව කටයුතු කරපු කෙනෙක්. ඔබට ඒ තත්ත්වයට එන්න පුළුවන් වුණාද?
අපි 2022 දී මානව හිමිකම් සැසියට සහභාගි වුණා. ඒ පාස්කු ප්‍රහාරය සම්බන්ධයෙන් යුක්තිය ඉටු නොවීම සම්බන්ධයෙන්. ඒ වගේම මේ රටේ ආර්ථික අවුලට හේතුව රාජපක්ෂ රෙජිමය විසින් ගත් තීන්දු තීරණ තමයි කියන එක අපි පැහැදිලි කළා. ඒ වගේම 46/1 කියන වාර්තාව අනුව අපේ රටේ ආර්ථික ඝාතන සිද්ධ වුණා කියන එක ප්‍රකාශයට පත් කළේ මේ හරහා. ඒ වගේම රටට බාල බෙහෙත් ගෙන්වීම සම්බන්ධයෙනුත් අපි මානව හිමිකම් කොමිසම සමඟ කටයුතු කරලා තියෙනවා. ඒ නිසා තමයි ජනවාරි 22 වැනිදා මානව හිමිකම් වාර්තාව හරහා බාල ඖෂධ මාෆියාව සම්බන්ධයෙන් තීන්දුවක් ආවෙ.
Q අපි දන්නවා ගොඩක් සජබ මන්ත්‍රීවරුන්ට ජනාධිපතිවරයා ආරාධනා කළා ආණ්ඩුවට එකතු වෙන්න කියලා. කාවින්දට එහෙම ආරාධනා කළේ නැද්ද?
නෑ මට එහෙම ආරාධනා කළේ නෑ.
Q අපි දන්නවා ඊළඟ ජනාධිපතිවරණය සඳහා හැම පක්ෂයටම ජනාධිපතිවරණය දිනන්න තියෙන මූලික වැඩපිළිවෙළ තමයි ආර්ථික සැලැස්මක් ඉදිරිපත් කිරීම. ඔබ හිතන්නෙ එහෙම ආර්ථික සැලැස්මක් තියෙන්නෙ කාටද?
මෙහෙමයි. රට ගොඩගන්නවා කියන්නෙ තනි පුද්ගලයෙක්ට කරන්න පුළුවන් දෙයක් නෙවෙයි. රටක් ගොඩගන්නවා තියා රටක් පාලනය කරන්නවත් තනි පුද්ගලයෙක්ට බෑ. ඒ සඳහා හොඳ කණ්ඩායමක් අවශ්‍යයි. අපි බලන්න ඕනෑ හොඳම කණ්ඩායම කොතැනද ඉන්නෙ කියලා. අද ජනාධිපතිතුමා ගාව ඉන්නෙ එදා පොහොට්ටුවෙ වැඩ කරපු කණ්ඩායම. මාලිමාව ගත්තොත් එතැන පේන්න කණ්ඩායමක් නෑ. එහෙම බලද්දි හොඳම කණ්ඩායම සමගි ජන බලවේගය. දැන් බලන්න හර්ෂ ද සිල්වා, කබීර් හෂීම්, එරාන් වික්‍රමරත්න, මේ අය හොඳ පළපුරුදු කට්ටිය. ඒ වගේම ආරක්ෂාව පැත්තෙන් ගත්තොත් ෆීල්ඩ් මාර්ෂල් සරත් ෆොන්සේකා, ඒ වගේම මහත්මා දේශපාලනයක් කරපු රන්ජිත් මද්දුමබණ්ඩාර මැතිතුමා, මේ අය තමයි අපේ කණ්ඩායමේ ඉන්න නායකයො. අධ්‍යාපනය පැත්තෙන් ගත්තොත් රෝහිණී කවිරත්න මැතිනිය, ඒ වගේ විශේෂ කණ්ඩායමක් අපිට ඉන්නවා.
Q කොහොමද ජනතාව විශ්වාස කරන්නෙ යහපාලනය හරියට කරගන්න බැරුව ආණ්ඩුවක් කරයි කියලා?
මතක තියාගන්න යහපාලන කාලයේ තමයි හොඳට පාලනය කළේ. ජනතාව ඇත්තටම සහන ලබා දුන්නා. පඩි වැඩි කළා. හැබැයි ඇතැම් අයගේ ප්‍රශ්න නිසා යහපාලනය කඩා වැටුණා. ඒ වුණාට හොඳ පාලනයක් තිබුණෙ අපිට. ඒ නිසා අපේ කණ්ඩායම එක්ක බලද්දි රට පාලනය කිරීම අභියෝගයක් නෙවෙයි.
I ගයාන් ගාල්ලගේ
