ජනාධිපතිතුමා අපට එකතු වෙන්න කිව්වට වැඩපිළිවෙළක් නෑ

පාර්ලිමේන්තු මන්ත්‍රී පාඨලී චම්පික රණවක එක්සත් ජනරජ පෙරමුණ - නායක

• පොලිසිය ගිහින් තියෙන්නේ වැරදි අයගේ අතට
• වන් මෑන් ෂෝ නැවතුණේ 1993 දී: ඒක ආයෙත් රඟ දක්වන්න බෑ
• හරියට වැඩ නොකළොත් ඊළඟට යන්න තියෙන්නේ යම ලෝකෙට

Q අපි දැක්කා ඔබේ නව දේශපාලන ප්‍රවේශය. ඇත්තටම මොකක්ද මේකේ අරමුණ සහ මොඩලය?

මේ වෙද්දි ප්‍රධාන අපේක්ෂකයෝ දෙන්නෙක් වුණු සජිත් ප්‍රේමදාස මහත්තයයි, අනුර කුමාර මහත්තයයි දේශපාලනයට එනවා කියලා තියෙනවා. තවම රනිල් වික්‍රමසිංහ මහත්තයා කියලා නෑ. ඒත් එතුමගේ වැඩපිළිවෙළක් ක්‍රියාත්මක වෙමින් යනවා. ඒ නිසා අපි බැලුවා අපි එක්ක එකතු වෙන්න කියනවට වඩා රටට ඔබින සන්ධානයක් සඳහා ප්‍රායෝගික වැඩපිළිවෙළක් රටට ඉදිරිපත් කරන්න. ඒක තමයි අපි කරලා තියෙන්නේ. බදු අය නොකරගෙන ආදායම් වැඩි කරන හැටි, විදුලි බිල, තෙල් මිල අඩු කරන හැටි, ඖෂධ ප්‍රශ්න වගේ හැමදේකටම අපි උත්තර දීලා තියෙනවා. මේ වැඩපිළිවෙළ දීර්ඝ කාලීන හරි මධ්‍යකාලීන හරි වැඩපිළිවෙළක් නෙවෙයි. අවුරුදු තුනකින් මේ රටේ ණය ගෙවන්න පුළුවන් විදිහට හදාගන්න ක්‍රමයක් තමයි අපි ඉදිරිපත් කරලා තියෙන්නේ.

Q ඔබ මෙවැනි වැඩපිළිවෙළක් ඉදිරිපත් කරද්දි එහෙම බලාපොරොත්තු තියාගත හැකි නායකයෙක් මේ භූමිය තුළ ඉන්නවද?

අපේ මේ වැඩපිළිවෙළ විවෘතව යන්නේ. මේ වැඩසටහන අංගසම්පූර්ණ වැඩපිළිවෙළක් නෙවෙයි. අවසන් කරන එකකුත් නෙවෙයි. මේක ඉදිරියට අරගෙන යන වැඩපිළිවෙළක් තියෙන්නේ. අපි ආරාධනා කළා හැම පක්ෂයකටම. ජවිපෙ ඇරෙන්න හැම පක්ෂයක්ම ආවා. අපි ඒ අයත් එක්කත් ඉදිරියේ සාකච්ඡා කරනවා. රටට දැන් ඕනෑ සාමූහික නායකත්වයක්. ඒ වගේම තරුණ අයගේ එකතුවක්. තවදුරටත් පවුල් පාලනයක් මේ රටේ මිනිස්සු ඉවසන්නේ නෑ. තනි පක්ෂ ක්‍රමයක පාලනයක් රටට ඔරොත්තු දෙන්නෙත් නෑ.

Q මේ ප්‍රජාතන්ත්‍රවාදී වැඩපිළිවෙළ මැතිවරණයට බලපෑමක් කරනවද? තීරණයක් ඒ වෙනුවෙන් අරගෙනද තියෙන්නේ?

ඔව් ඇත්තටම. ප්‍රජාතන්ත්‍රවාදී වැඩපිළිවෙළ යටතේ අපි මහ මැතිවරණය සඳහා අපේක්ෂක ලැයිස්තුවකුත්, ඒ වගේම ජනාධිපතිවරණය සඳහා සුදුසු අපේක්ෂකයකුත් ඉදිරිපත් කරන්න ඉන්නේ. හැබැයි අපි තවම ඒ කවුද කියලා තීරණය කරලා නෑ.

Q මීළඟ අපේක්ෂකයගේ අරමුණ වෙන්නේ ආර්ථික යුද්ධය ජය ගන්න එක. එහෙම වැඩපිළිවෙළක් තියෙන, රට කරවන්න පුළුවන් අපේක්ෂකයෙක් ඔබට පේනවද?

ආර්ථික යුද්ධය කියන එකේදි බලාපොරොත්තු වෙන්නේ හැමදෙනාගෙම කෙරුවාව ගැන. මම එනවා මම එනවා කියන අය රාජ්‍ය අංශයේ මොනවද කරල තියෙන්නේ කියලා බලන්න ඕනෑ. අමාත්‍යංශවල මොනවද කෙරිලා තියෙන්නේ කියලා බලන්න ඕනෑ. ඒවා මූල්‍යමය අතින් ශක්තිමත් කළාද, බංකොලොත් කළාද කියලා බලන්න ඕනෑ. රටේ බලවත් විදේශ අයෝජන ක්‍රියාත්මක කළාද, නැද්ද කියලා බලන්න ඕනෑ. කතා පවත්වන්න පුළුවන් ඕනෑ මිනිහෙක්ට. කතා අපි අහලා තියෙනවා අවුරුදු 75ක්. ඒ නිසා වැඩ කළ හැකි, අවංක, දූෂණයෙන් තොර පිරිසක් එක්ක වැඩ කරන එක තමයි අපේ බලාපොරොත්තුව. නායකයා හොඳ නම් වැඩේ හරි. නීතිය ක්‍රියාත්මක වෙන්න ඕනෑ. මේ රටේ නීතියක් නෑ. මේ රටේ ත්‍රාඩ පොලිසියක් ක්‍රියාත්මක වෙන්නේ. ඒ පොලිසිය වැරදි අයගේ අතට ගිහින් තියෙන නිසා.

Q දැන් ඔබටත් හොඳටම පේන දෙයක් ඔබේ වැඩපිළිවෙළ පක්ෂ සමඟ පෑහෙන්නේ නෑ කියලා. ඒකනේ ඔබ ස්වාධීනව ගමනක් යන්නේ. එහෙම තත්ත්වයක් මත එකතුවෙලා වැඩ කරන්න පුළුවන්ද?

ඔය මහා පක්ෂවල අද ප්‍රතිපත්ති නෑ. අද ඒ පක්ෂ ක්‍රියාත්මක වෙන්නේ නායකයන්ගේ අදහස් උදහස් මැද්දේ. මේ වෙද්දි රටේ ආදායම් වැඩිකර ගන්නේ කොහොමද කියන ප්‍රශ්නය තියෙන්නේ. ඒ සඳහා අත්දැකීම් සහිත කණ්ඩායමක් එක්ක වැඩ කරන එක වැදගත්. ඒක තමයි අපේ අරමුණ. ඒ වගේම කියන්න ඕනෑ අපි වැඩ කරලා පෙන්වපු අය. ගොඩක් ප්‍රශ්න විසඳුවේ අපි. බලශක්ති අර්බුදය, හදන්න බෑ කිව්ව කොළඹ මහ නගර ව්‍යාපෘතිය, කුණු ප්‍රශ්නය මේ සියල්ල අපි විසඳුවා.

Q එහෙම වැඩ කරන්න පුළුවන් පිරිසක් ඉන්නවද?

ඔව්. එහෙම වැඩ කරන්න පුළුවන් අලුත් පිරිසක් ඉන්නවා. අපි ඒ අය එක්ක තමයි මේ එකතුවෙලා ගමන යන්න හදන්නේ. එහෙම නැතුව 225ම හොරු, අපි විතරයි සුදනෝ කියන තැනක නෙවෙයි අපි ඉන්නේ. ගෝඨාභය මහත්තයා දෙවැනි ලෝකයේ තිබුණු රට තුන්වැනි ලෝකයට ගෙනාවා. මෙතැනින් එහා යම ලෝකෙට යන්න වෙනවා විධිමත් වැඩපිළිවෙළකට ගියේ නැත්නම්.

Q දැන් ඔබට ජනාධිපතිවරයා ආරාධනා කළා වැඩ කරන්න එන්න. ඉතින් මේ වැඩපිළිවෙළත් අරගෙන ඔහු එක්ක වැඩ කරන්න බැරිද?

ජනාධිපතිතුමාට ආරාධනා කරන්න කලින් පාර්ලිමේන්තුවේ පක්ෂ එකතුවෙලා පොදු වැඩපිළිවෙළක් ඉදිරිපත් කළා. එතුමා ඒ වෙනුවට අපිට කිසිම දැනුම් දීමකින් තොරව මූල්‍ය අරමුදලත් එක්ක වෙන එකඟතාවලට ගියා. වැට් බද්ද ගහපු එකට කරන්න තිබුණු දේවල් තිබුණා. ඒ කිසිම දෙයක් කළේ නෑ. සුරා බදු, රේගුව ඇතුළු ආයතනවලින් එකතු නොකළ බදු ප්‍රමාණය කෝටි ලක්ෂයක්. මේ වැට් බද්දෙන් එකතු කරන්න හදන ආදායම කෝටි 60000 ක්. එතකොට අරක එකතු කරන්නේ නැතුව ජනතාවට බදු පැටෙව්වා. ඒවට අපිට එකඟ වෙන්න බෑ. බැංකු පද්ධතිය කඩා වැටෙනවා කියලා කෝටි 42000ක් පාර්ලිමේන්තුවෙන් අනුමත කරල ගත්තා ජනතාවගෙන් බදු ගහලා ගන්න. හැබැයි ‍රජයේ බැංකුවලට පොලු තිබ්බ ප්‍රමාණය කෝටි 65000 ක්. ඒක අය කරගන්න විදිහක් නෑ. අඩුම ගාණේ ඒ ලැයිස්තුව මොකක්ද කියලා කියන්න තරම්වත් විවෘතභාවයක් නෑ. ඒ වගේමයි දූෂණ. 2021 දී වගේම 2023 දිත් සීනි බදු වංචාවක් වුණා. 2023 දී පාන් පිටි වංචාවකුත් වුණා. ඒවා නැවතිලා නෑ. ඒ නිසා එකතු වෙන්න කිව්වට වැඩපිළිවෙළක් නෑ.

Q පහුගිය දවසක අපි දැක්කා ඔබට පහුගිය ටිකේ සමගි ජන බලවේගයෙන් කැපිල්ලක් වුණා. කතා පවා කැපුවා. ඉතින් ඔබ බලාපොරොත්තු වෙන දේවල් කරන්න පුළුවන්ද?

ඒ සමගි ජන බලවේගයේ අය නෙවෙයි. මේවා කරන්නේ ඒ පක්ෂය පාලනය කරන පවුලකුත්, ඒ අයගේ සමීපතමයො සහ ආණ්ඩුවේ ඇමැති කෙනකුත් එකතුවෙලා. ඒ අය මේ ප්‍රජාතන්ත්‍රවාදී ව්‍යාපාරය හසුරුවන්න හදනවා. නායකයෝ කියන්නේ කතා කරලා ප්‍රශ්න විසඳන අය. වන් මෑන් ෂෝ මේ රටේ නැවතුණේ 1993 දී. ඒක ආයේ රඟ දක්වන්න යනවා නම් ඒක ආයේ කෙරෙන්නේ නෑ. සමගි ජන බලවේගයට හොඳ අනාගතයක් තියෙනවා ප්‍රජාතන්ත්‍රවාදී විදිහට තීන්දු තීරණ ගත්තොත්. එහෙම නැතුව කල්ලිවලට අනුව තීරණ ගත්තොත් ඒකේ අනාගතය ඉවරයි. කට්ටියක් පන්නලා, කට්ටියක් ඇතුළට අරගෙන දේශපාලනය කරන්න යන්න බෑ. 2022 ආණ්ඩුවට ගහලා පැන්නුවේ.

Q ඇයි පාර්ලිමේන්තු කමිටුවලින් අයින් කළේ?

වංචනික සුරා බදු වැඩපිළිවෙළ හෙළිදරව් කළ නිසා, සීනි හොරාගේ බදු ගන්න කියලා බල කරපු නිසා. වෙන දේවල් නිසා නෙවෙයි. වංචනිකයෝ ටික එකතුවෙලයි මේවා කළේ. ඒ නිසා මිනිස්සු දැනගන්න ඕනෑ ආණ්ඩුවේ විතරක් නෙවෙයි, විපක්ෂයේ ඇතැම් නායකයෝ සහ පවුලේ අය පිටිපස්සෙත් දූෂිත නායකයෝ ඉන්නවා කියලා. ඒවට අපි බය වෙන්නේ නෑ.

I ගයාන් ගාල්ලගේ