රට විනාශ කරපු පක්ෂ එක්ක සජබ එකතු වෙන්නෙ නෑ
නලින් බණ්ඩාර (පාර්ලිමේන්තු මන්ත්‍රී - සමගි ජනබලවේගය)
- ජවිපෙ ඉන්දියාවට ගියේ රෙදි ගලවාගෙන
- සභාපති ධූරයේ ඉඳගෙන පක්ෂ නායකයා විවේචනය කරනව නම් ඒක බරපතළ අවුලක්
- අපේ ඡන්දවලින් පාර්ලිමේන්තු ආපු බව චම්පික මහත්තයාට දැන් අමතක වෙලා
Q දැන් සමගි ජන බලවේගයේ ලොකුම ප්‍රශ්නය සරත් ෆොන්සේකා මහත්තයා. ඔහුත් ඔබලට ගහනවා, ඔබලත් ඔහුට ගහනවා, රණ්ඩු ගොඩයි. මෙහෙම පක්ෂයේ ප්‍රධානින් එක්ක වැඩ කරන්න පුළුවන්ද?
අපි පක්ෂය හදද්දි එතුමා ගැන ලොකු විශ්වාසයක් ගෞරවයක් තියාගෙන මේ තනතුර දෙන්න තීරණය කළා. අපි හිතුවා පක්ෂය එකතු කරගෙන ගමනක් යන්න පුළුවන් වෙයි කියලා. ඒ මොන දේ තිබුණත් පහුගිය කාලයේ එතුමගේ ක්‍රියා කලාපය සම්බන්ධයෙන් අපිට ප්‍රශ්නයක් තිබුණා. ඒක නිසා මම හිතන්නේ එතුමගේ ශක්තිය පක්ෂය ප්‍රචාරය කිරීම සඳහා යොදාගන්න එක තමයි වැදගත් වෙන්නේ. ඒත් එතුමා කළේ මාධ්‍ය ඉස්සරහට ඇවිල්ලා පක්ෂයේ ඉහළ අය විවේචනය කළ එක. අපි සාකච්ඡා කරමින් යනවා. එතුමා හරියට වැඩේ කරමින් යනවා නම් හොඳයි ඉතින්.
Q එතුමා අධිකරණයට ගිහින් ඉල්ලීමක් කළා එතුමව පක්ෂයේ සභාපති පුටුවෙන් එළවන්න යනවා කියලා. වාරණයකුත් ගත්තා. එහෙම අදහසක් තිබුණද පක්ෂයට?
එහෙම දෙයක් කරනවා නම් ඒ ගැන සාකච්ඡා කරන්න අපේ මණ්ඩල කිහිපයක් තියෙනවා. පක්ෂයේ කෘත්‍යාධිකාරි මණ්ඩලය, කළමනාකරණ මණ්ඩලය, ඔය දෙකම නියෝජනය කරන කෙනෙක් මම. හැබැයි ඒ කිසි තැනක ඒ වගේ දෙයක් කතා වුණේ නෑ. මම දන්නේ නෑ එතුමා මොන වගේ අරමුණකින් මේ වගේ තීරණයක් ගත්තද කියලා.
Q ඔබලා කිව්වා ඔබලා බලයට ආවොත් එතුමව ආරක්ෂක ඇමැති කරනවා කියලා. ඒ තීරණයේ තවම ඉන්නවද?
එතුමා පක්ෂය වෙනුවෙන් හරි විදිහට කටයුතු කරනවා නම් ආරක්ෂක ඇමැතිකම නෙමෙයි ඊට වඩා දෙයක් වුණත් දෙන්න පුළුවන්. නායකත්වය ශක්තිමත් කරමින් එතුමගේ කාර්යභාරය ඉෂ්ඨ කරන්න ඕනෑ. එහෙම නැතුව සභාපතිත්වයේ ඉඳලා පක්ෂ නායකයා විවේචනය කරනවා නම් එතැන බරපතළ අවුලක් තියෙනවා. ඒක අවබෝධ කරගත්තොත් ප්‍රශ්නයක් නෑ.
Q විපක්ෂය නියෝජනය කරන අය ඔබේ පක්ෂයට චෝදනා කරනවා විපක්ෂයේ සංවිධායකවරයා විසින් ඔවුන්ගේ පාර්ලිමේන්තු කතා කප්පාදු කරනවා කියලා. ඇයි එහෙම කරන්නේ?
පාඨලී චම්පික රණවක මහත්තයා පත්වුණේ අපේ පක්ෂයේ අපේ ඡන්ද වලින්. ඒත් කාලයත් එක්ක එතුමලට ඒක අමතක වෙලා වෙනත් වෙනත් පාරවල්වල යනකොට මොකද වෙන්නේ. අපේ පක්ෂයෙන් ඈත්වෙලා කටයුතු කරනකොට අපේ අයටත් කාලය දෙන්න වුණාම ඒක කළමනාකරණය කරගන්න අපහසුයි. හැබැයි ඒ අයට නොදී ඉඳලා නෑ. එයාලට තියෙන්නේ කාලය ලබා නොදීම නෙමෙයි වැඩිපුර කාලයක් ලබා නොදීම. අපිටත් එහෙම හම්බවෙන්නෙ නෑ. හැබැයි ඒ අය තමයි අවස්ථාව නැති කරගෙන තියෙන්නේ ඒ අයගේ වැඩවලින්. ඒ නිසා ප්‍රශ්න ඇතිවෙනවා.
Q ජාතික ජනබලවේගයේ නායකයා ඉන්දියාවේ සංචාරයේ ගියා. ඒත් ඔබේ නායකයා ගියේ නෑ. ඒ නිසා ගොඩක් අය කිව්වා මේ ගමන ඔවුන්ගේ ජයග්‍රහණය ගැන කියන කතාවක් කියලා. මොකක්ද ඒක ගැන දරන අදහස?
ඇත්තටම ඒක ආරාධනාවක් නෙමෙයි. මාස හයක් තිස්සේ ඉල්ලීමක් කරලා, ඒ ඉල්ලීමෙන් ලැබුණු අවස්ථාවක් තමයි ඒක. ඒක පැහැදිලිවම අපි දන්න දෙයක්. ඒක ආරාධනාවක් නෙමෙයි. ඒත් එයාලා මාධ්‍ය තුළින් උලුප්පන්න හදනවා ඔවුන්ව ආරාධනා කරලා ගෙන්නුවා කියලා. ඒත් ඇත්තටම මාස හයකට කලින් කරපු ඇවටිල්ලකට අනුවයි මේ අවස්ථාව ලැබිලා තියෙන්නේ. මේක ජවිපෙ සළු පිළි උනා යාමක්. මොකද ඉන්දියන් විරෝධය හමුවේ මෙහෙම වුණේ කියලා.
Q ඔබගේ පක්ෂයේ අය කියන්නේ ජනාධිපතිවරණයකට කලින් මහ මැතිවරණයක් තියයි කියලා. මොකක්ද ඒ කතාව?
අපි තවදුරටත් විශ්වාස කරනවා මහ මැතිවරණය කලින් තියයි කියලා. ඒකට හේතුව සමීක්ෂණ වාර්තා අනුව ඒක තහවුරු වෙලා තියෙන්නෙ. පොහොට්ටුව ආණ්ඩුව එකතුවෙලා ඉල්ලුවත් 20෴ ට වැඩිය නෑ. ඉතින් ඒ නිසා ජනාධිපතිවරණයකට ගිහින් රෙදි උනාගන්නේ නැතුව පාර්ලිමේන්තු මැතිවරණයකට ගිහින් උප්පරවැට්ටියක් දාලා බලය ලබාගන්න ඒ අය උත්සාහ කරනවා.
Q ඔබලගෙ කණ්ඩායමක් ඉන්නවද එකතු වෙන්න ආණ්ඩුවට?
ඕක ඉතින් අවුරුදු ගාණක ඉඳලා කියන දෙයක්නේ. නමුත් එකතුවෙන කෙනෙක් නෑ.
Q ජාතික ජනබලවේගය කියන්නේ ඔබලා කට්ටියම අන්තිම මොහොතේ එකට එකතුවෙලා ඔවුන්ව පරාජය කරන්න යනවා කියලා. ඒක ඇත්තද?
ඒක මම හිතන්නෙ ඒ අය ගොඩනගන පට්ටපල් බොරුවක්. අපි එක්ක ඔය රට විනාශ කරපු පක්ෂ හෝ කණ්ඩායම් එකතු වෙන්නේ නෑ. ඒ අය එක්ක කොහොමද ආණ්ඩු කරන්නේ. ඒක නිසා මේවා බොරු කතා. එහෙම එකක් වෙන්නෙම නෑ.
I ගයාන් ගාල්ලගේ