මේ ඝාතන නවත්වන්න බැරිද?
දකුණේ පසුගිය 11 වැනිදා එල්ල වූ වෙඩි ප්‍රහාර හේතුවෙන් සිවු දෙනකු මියගොස් තවත් හය දෙනකු තුවාල ලැබූ පුවතින් මුළු රටම තිගැස්සිණි. පැය කිහිපයක් තුළදී සිදුවූ වෙඩි තැබීම් පාතාලයේ තුවක්කු ක්‍රියාත්මක වීම නිසා සිදුවූ බවද වාර්තා විය. එහෙත් පත්තු වුණේ පාතාලයේ තුවක්කු වුවද එයට ගොදුරු වී ජීවිතය අහිමි කරගත් සිවු දෙනාගෙන් තුන් දෙනකු සහ තුවාල ලැබූ සියලු දෙනාම පාතාලයට තබා කිසිදු නීති විරෝධී කටයුත්තකට හවුල් නැති අහිංසකයන් පිරිසක් බවට තොරතුරු ලැබී ඇතැයි පොලිසියේ ප්‍රකාශයකින් හෙළි කෙරිණි. පාතාලයේ අපරාධකරුවන් එක් ප්‍රතිවාදියකු මරා දැමීමට මෙතරම් විශාල පිරිසකට වෙඩි වරුසාවක් එල්ල කළ පළමු අවස්ථාව ද මෙය විය හැකිය.
විවිධ උවමනා මත වෙළෙඳසලකට පැමිණෙන පාරිභෝගිකයන් පාතාලයේ තුවක්කුකරුවන්ගේ උණ්ඩවල ගොදුරු බවට පත්වීම මොන කරුමයක්ද කියා නොසිතෙන කිසිවකුත් නැත. එහෙත් එය කරුමයට බාර දී නිහඬ වීමට බලධාරීන්ට හැකියාවක් නැත. මෙවැනි වෙඩි තැබීම් රටේ නීතියේ ආධිපත්‍යයට එල්ල කරන ප්‍රබලම අභියෝගයක් වශයෙන් සැලකිය යුතුය. මේ මිනීමැරීම් පාතාලයේ කෙරුම්කාරයන් විසින් කුලී මිනීමරුවන් යොදාගෙන සිදු කරන අපරාධ වශයෙන් හඳුනාගෙන තිබේ. එහෙත් මිනීමරුවා කුලියට කළත් වෛරයක් පිරිමැසීමට කළත් නැතිවෙන්නේ මිනිස් ජීවිතයකි. දකුණේදී සිදුවූවාක් මෙන් පාතාලයේ අපරාධකරුවන් සේම අහිංසකයෝ ද මේ වෙඩි තැබීම්වලින් මරු වැළඳ ගනිති. මේ මිනීමැරුම් සිදු කිරීම හැකි හැම උපක්‍රමයක්ම යොදවාගෙන වැළැක්වීමට කුමන හෝ වැඩපිළිවෙළක් යෙදීම පොලිසියේ ලොකුම වගකීමකි.
කෙසේ වුවද එදිනම වාර්තා වූ තවත් ඝාතනයක් වූයේ පසුගිය දිනක සිදුවූ මල්වතු හිරිපිටිය හිමිනම ඝාතනයේ සැකකරු පොලිස් අත්අඩංගුවේ සිටියදී වෙඩි පහරට ගොදුරු වී මරුමුවට පත් වීමයි. කුමන අපරාධකරුවකු වුවද පොලිසියේ අත්අඩංගුවේ සිටියදී පොලිස් වෙඩි පහරවලින් මිය යාමද පාතාලයේ ඝාතන වැල වැළැක්වීමට කිසිදු ආකාරයකින් හේතුවක් වන්නේ නැත. සැඟවූ ආයුධ පෙන්වා දීමට යාමේදී පොලිස් අත්අඩංගුවෙන් මිදී පැන යාමට උත්සාහ දැරීමේදී වෙඩි කා මිය යන සැකකරුවන් පිළිබඳ කතා මීට පෙර බොහෝ අවස්ථාවලදී වාර්තා වී තිබේ. මෙවැනි ආකාරයේ නීතියට පටහැණි ඝාතන සිදුවීම තමන් අනුමත නොකරන බව ශ්‍රී ලංකා නීතිඥවරුන්ගේ සංගමය පසුගියදා නිකුත් කළ නිවේදනයේ සඳහන් විය. එහි සභාපති නීතිඥ කෞෂල්‍ය නවරත්න මහතාගේ අත්සනින් නිකුත් කළ එම නිවේදනය මගින් පොලිසියේ එම ක්‍රියා කලාපයට විරෝධය දක්වා තිබිණි. අපට කිව හැක්කේ එවැනි ක්‍රියා මේ රටේ අපරාධ තුරන් කිරීමට කිසිදු ආකාරයකින් සහායක් නොදෙන බව පමණි.
2024 වර්ෂයේ ගෙවී ගිය මුල් මාස දෙකහමාර තුළදී සිදුවූ වෙඩි තැබීම් සිද්ධීන් 30 කින් 21 දෙනකු මිය ගොස් තවත් 14 දෙනකු තුවාල ලබා ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව මහතා ප්‍රකාශ කර තිබිණි. ඔහු පෙන්වා දී තිබුණේ සංවිධානාත්මක අපරාධ කල්ලි මෙම වෙඩි තැබීම්වලින් 17 කට වගකිව යුතු බවය. ඉතිරි සිදුවීම් 13 පෞද්ගලික ආරවුල් හේතුවෙන් සිදුව ඇති බවත් ඔහුගේ ප්‍රකාශයේ සඳහන් විය. මේ සිදුවීම් පසුගිය මාස දෙකහමාරට පමණක් අදාළ ඒවා බැවින් පසුගිය වසර කිහිපය තුළම ඔඩුදුවමින් පවතින පාතාල ලෝකයේ ගැටුම්වලින් විශාල පිරිසක් මියගොස් තවත් පිරිසක් තුවාල ලබා සිටින බවත් සඳහන් කළ හැකිය.
මේ ආකාරයට සිදුවන පාතාලයේ ගැටුම් රටේ නීතිගරුක පොදු මහජනතාවගේ ආරක්ෂාවට බලවත් තර්ජනයක් එල්ල කර තිබේ. ලොකුම ගැටලුව මේ අපරාධ කල්ලිවල කුලී ඝාතකයන් මිනිස් ජීවිත සම්බන්ධයෙන් අබමල් රේණුවක හෝ තැකීමක් නොකිරීමයි. ආණ්ඩුක්‍රම ව්‍යවස්ථාවෙන් පවා සහතික කර ඇති ජනතාවගේ ආරක්ෂාව රුක දීමට පොලිසිය මේ අවස්ථාවේදී ඉතාම කාර්යක්ෂමව කටයුතු කිරීම අවශ්‍ය බව පෙන්වා දීමට කැමැත්තෙමු. සෑම පාරකටම මුරපොළවල් පිහිටුවීමටත් හැම වාහනයක්ම පරීක්ෂා කිරීමටත් පොලිසියට හැකියාවක් නැති බවද අපි දනිමු. එහෙත් කාර්යක්ෂමව පවත්වා ගන්නා ඔත්තු සේවා මගින් පොලිසියට පාතාල කල්ලි ගැටුම් පිළිබඳ තොරතුරු කල් තබා දැන ගැනීමට හැකියාවක් තිබිය යුතුය. මරාගන්නා පාතාල කල්ලි ඇතුළේ කුඩු ජාවාරම් සහ කප්පම් ගැනීම් හේතුවෙන් කෝටි ගණන් මුදල් හුවමාරු වන බවද ප්‍රකට රහසකි. පොලිසියේ ඇතැමුන්ද මේ මුදල්වල බලපෑම්වලට හසුව සිටිනවාදැයි අපි නොදනිමු. පාතාල කල්ලි මර්දනය සඳහා තිබිය යුතු පොලිසියේ කැපවීමට එවැනි නිලධාරින්ගෙන් බාධා එල්ලවීම බලාපොරොත්තු විය යුතුය. දේශපාලකයන් ද පොලිසියේ ඉහළම නිලධාරීන්ද කිසිදු බලපෑමකට යට නොවී පාතාලයට එරෙහිව දැඩි ලෙස නීතිය ක්‍රියාවට නැංවීමට කටයුතු නොකරන තුරු මේ ඝාතන වැළැක්වීම අපහසු වනු ඇත.