ඇඟට නොදැනෙන සහන කුමටද?
ආණ්ඩුව රටේ ආර්ථිකය හරි මගට ගැනීම හේතුවෙන් රුපියල ශක්තිමත් වී සංචිතය වර්ධනය වී ආර්ථිකයේ පුනරුදයක් ඇතිවී තිබෙන බවට කෙරෙන ප්‍රකාශ ඉවරයක් නැත. මේ හේතුවෙන් ජනතාවගේ අතේ මිටේ මුදල් ගැවසෙන බවද ජයට අලුත් අවුරුදු සැමරෑ බවද කියති. රටේ ආර්ථිකයේ කිසියම් වෙනසක් ඇතිවී තිබෙන බව පැවසීම මුසාවක් නොවේ. නමුත් අප වරින් වර පෙන්වා දී තිබෙන්නේ ආණ්ඩුව කියන මේ ආර්ථික වර්ධනය රටේ ජනතාවගේ ඇඟට තවමත් නොදැනෙන බවය. වෙනත් ලෙසකින් කිව්වොත් පොදු මහජනතාවගේ එදිනෙදා ජීවිතයට බලපෑම් කරන ආර්ථික අසීරුතා ඉවත් කිරීමට ප්‍රමාණවත් පියවර ආණ්ඩුව නොගන්නා බවය.
එවැනි ජනතාවට දැනෙන එක් පියවරක් පිළිබඳව අපගේ දේශය පුවත්පතේ මුල් පිටුවේ ප්‍රවෘත්තියකින් හෙළි කර තිබේ. එයින් පැවසෙන්නේ විදුලි බිල ජනතාවට දැනෙන ප්‍රමාණයකින් අඩුකිරීමට පියවර ගන්නා බවකි. අදාළ යෝජනාව මහජන උපයෝගිතා කොමිසමට මේ වනවිට ඉදිරිපත් කර ඇති බවත් ඒ යෝජනාවට ඔවුන්ගේ එකඟත්වය ලැබීමෙන් පසුව ජනතාවට විදුලි බිල සහනය ලබාදෙන බවත් විදුලිබල හා බලශක්ති රාජ්‍ය අමාත්‍ය ඉන්දික අනුරුද්ධ මහතා ප්‍රකාශ කර තිබේ. මෙය කියන ආකාරයටම සිදුවෙයි නම් එය ආණ්ඩුව මගින් ගන්නා යහපත් පියවරක් බව කිව යුතුය. දැඩි ජීවන බරකින් මිරිකෙන ජනතාවට එය මහත් සහනයක් වනු ඇත.
එහෙත් එසේ සිදුවීමට නම් විදුලි බිලේ අඩු කිරීම ජනතාවට දැනෙන ප්‍රමාණයේ එකක් වීම අවශ්‍යය. මීට පෙරද විශාල ප්‍රතිශතයකින් විදුලි බිල පහත හෙළන බවට විදුලිබල අමාත්‍යවරයා කළ ප්‍රකාශයක් කෙරෙහි ජනතාව මහත් බලාපොරොත්තු රඳවාගෙන සිටියත් අඩු වූ ප්‍රතිශතය ප්‍රමාණවත් නොවූ බව වැඩි දෙනකුගේ මතය විය. පසුගිය කාලයේ අනුකම්පා විරහිත ලෙස ඉහළ දැමූ විදුලිය බිල හේතුවෙන් මෙරට ලක්ෂ සංඛ්‍යාත පිරිසකට බිල් ගෙවාගත නොහැකිව විදුලිය විසන්ධි කිරීම්වලට ලක්වීමටද සිදුව තිබිණි. මෙවර හෝ එසේ බලාපොරොත්තු කඩවීමක් සිදු නොවනු ඇතැයිද ලැබෙන සහනය ඇඟට දැනෙන එකක් වනු ඇතැයිද අපේක්ෂා කරමු.
පසුගිය දින කිහිපය තුළදී ඉන්ධන මිලද අඩු කෙරෙනු ඇති බවට කතා බොහොමයක් විය. ඊට පෙර මාසයේදී තෙල් මිල අඩුවනු ඇති බවට තිබූ බලාපොරොත්තු කඩ වී තිබූ හෙයින් මේ මාසයේ සිදුකෙරෙන මිල අඩුකිරීම ජනතාවට දැනෙන එකක් වනු ඇති බවට බොහෝ දෙනා තුළ විශ්වාසයක් තිබිණි. මිල සූත්‍රය පාරිභෝගිකයාට වාසිදායක වන අයුරින් වෙනස් කර ඇති බවටද ආරංචි පැතිරිණි. නමුත් අවසානයේ සිදුවී තිබුණේ කන්දක් විළිලා මී පැටියකු වැදීම පමණි. රටේ අති බහුතරය භාවිත කරන ඔක්ටේන් 92 පෙට්රල් අඩු කෙරුණේ රුපියල් 03 කිනි. මැති ඇමැතින් ඇතුළු ඇති-හැකි අය භාවිත කරන ඔක්ටේන් 95 නම් රුපියල් 20 කින්ම අඩු විය. ඩීසල් මිල රුපියල් 20 කින් අඩු කෙරුණත් බස් ගාස්තු හෝ පාසල් වෑන් ගාස්තු හෝ අඩු නොකෙරෙන බව ප්‍රකාශ වී තිබීම හේතුවෙන් එම මිල අඩු කිරීමේ වාසියද ජනතාවට ලැබෙන්නේ නැත. එහෙම මිල අඩුකිරීම්වලින් පොදු මහජනතාවට අත්වන සහනයක්ද නැත.
මේ අතර පාර්ලිමේන්තු මන්ත්‍රී එක්සත් ජනරජ පෙරමුණේ නායක පාඨලී චම්පික රණවක මහතා ප්‍රකාශ කරන්නේ පසුගිය වසර තුළදී ඛනිජ තෙල් සංස්ථාව රුපියල් බිලියන 120ක්ද විදුලිබල මණ්ඩලය රුපියල් බිලියන 56ක්ද ලාබ ලබා ඇති බවය. එසේ නම් ජනතාවට දැනෙන ආකාරයට තෙල් මිල සහ විදුලි බිල අඩු නොකරන්නේ ඇයිද යන්න ප්‍රහේළිකාවකි. වැට් ඇතුළු විවිධ බදු අධික ලෙස ගෙවීමට ජනතාවට බල කෙරෙන තත්ත්වයක් තුළ මෙසේ සිදුවීම බලවත් අසාධාරණයක් බව පෙන්වා දිය යුතුය.
විශේෂයෙන් කිව යුත්තේ විදුලිබල මණ්ඩලයත් තෙල් සංස්ථාවත් මීට පෙරදී අධික ලෙස පාඩු ලැබුවේ රටේ ජනතාවගේ වැරුද්දකින් නොවන බවය. එහෙත් රටේ උද්ගත වූ ප්‍රබල ආර්ථික අර්බුදය අවස්ථාවේ රටේ සියලු ජනතාව සියලු බර උසුලා ගනිමින් රාජ්‍ය ආයතන කඩා වැටීම වැළැක්වීමට ආණ්ඩුව සිදුකළ සියලු මිල ඉහළ දැමීම්, ගාස්තු වැඩි කිරීම් සහ අධික ලෙස බදු වැඩි කිරීම්වලට මුහුණ දුන්හ. එසේ නම් ආණ්ඩුව පවසන පරිදි රටේ ආර්ථිකය දැන් හරි මගට වැටී තිබීමේ ප්‍රතිලාභ විශාල පීඩනයක් දරාගෙන විවිධ දුෂ්කරතාවලට මුහුණ දුන් ජනතාවට ලබා දිය යුතු යැයි අපි සිතමු. එම ප්‍රතිලාභ ජනතාවගේ ඇඟට දැනෙන තරමට සිදුවිය යුතු බවද පෙන්වා දීමට කැමැත්තෙමු.