හිරගෙදර පාතාලය ඉවර කිරීම
කාලයකට ඉහතදී නම් හිරගෙදර නම ඇසුණත් තිගැස්සෙන අපරාධකාරයෝ මෙරට සිටියහ. එහෙත් අද වනවිට එම තත්ත්වය සහමුලින්ම වෙනස්ව ගොසිනි. අද දවසේ මෙරට ඇතැම් දරුණු ගණයේ සංවිධානාත්මක අපරාධකාරයන්ට සිරගෙදර යනු ක්ෂේමභූමියකි. සියලු සැපදෙන කප්රුකකි. මේ කප්රුකේ පහළ අතුවල එල්ලී සිටිමින් එම සැප සම්පත්වලින් කොටසක් ඩැහැගන්නා නරුම බන්ධනාගාර නිලධාරීන් පිරිසක්ද සිටින බව සඳහන් නොවුණොත් එය ලොකු අඩුපාඩුවකි.
අපරාධකරුවන්ට හිරගෙදර ක්ෂේම භූමියක් වී රජයේ වියදමින් සියලු සැපදෙන සුපිරි බෝඩිමක් බවට පත්ව ඇති බව රාජ්‍ය පාලනයේ ඉහළම මට්ටමින් පසුගියදා ප්‍රකාශ විය. ඒ බන්ධනාගාරවල අභ්‍යන්තර කටයුතු පිළිබඳ විමර්ශනය කිරීම සඳහා ජනාධිපති ගෝඨාභය රාජපක්ෂ මහතා විසින් ජනාධිපති කාර්යාලයේදී පැවැත්වූ සාකච්ඡාවකදීය. එහිදී ජනාධිපතිවරයා ප්‍රකාශ කර තිබුණේ රටේ බොහෝ අපරාධ සහ මත්ද්‍රව්‍ය ජාවාරම් බන්ධනාගාරවල සිට මෙහෙයවන බවට නිශ්චිත තොරතුරු ලැබී තිබෙන බවය. බන්ධනාගාර තුළ ජංගම දුරකථන භාවිතය සම්පූර්ණයෙන්ම තුරන් කළ යුතු බවද ජනාධිපතිවරයා ප්‍රකාශ කර තිබිණි. ජනාධිපතිවරයා මේ සියලු ප්‍රකාශ සිදුකළේ බන්ධනාගාර ප්‍රධානීන් ඉදිරිපිටදී වීමද කැපී පෙනෙයි. බොහොමයක් නායකයන් බන්ධනාගාර නිලධාරීන්ගේ මුහුණටම පැවසිය යුතු දේ කියන්නේ කොහේ හෝ දේශපාලන වේදිකාවක් මතදී හෝ මාධ්‍ය සාකච්ඡාවලදීය. ඒවා හුදු මාධ්‍ය සංදර්ශනයකට පමණක් සීමා විය. එහෙත් වත්මන් ජනාධිපතිවරයා බන්ධනාගාර නිලධාරීන්ගේ දූෂිත ක්‍රියා පිළිබඳව චෝදනා නගන්නේ නිශ්චිත තොරතුරු තමන් සතුව තබාගෙන ඔවුන්ගේ මුහුණටමය. එය හරියටම නිලය අල්ලා පහරදීමකි.
පාතාලයන් හිරගෙවල් ඇතුළේ සිට කුඩු සහ මිනීමැරුම් ඇතුළු අපරාධ සංවිධානය කොට මෙහෙයවන බව මෙරට දෙකේ පන්තියේ ළමයි පවා දැන සිටිති. එය නොදන්නවා නම් ඒ බන්ධනාගාරයේ රාජකාරි කරමින් අපරාධකරුවන්ගේ අල්ලේ නැටවෙන දූෂිත නිලධාරීන් පමණි. ඒ ඔවුන් කිසිවක් නොදන්නා නිසා නොවේ. තොත්ත බබාලා සේ හැසිරෙන බැවිනි. එසේ සියලු නොපනත්කම් හමුවේ තොත්ත බබාලා වී සිටින විට ඔවුන්ගේ “කල්ල මරේ”ය. ඔවුහු හිටිගමන් පොහොසත්තු වෙති. යාන වාහන ගනිති. සුපිරි ගෙවල් ඉදිකරති. ඒ තොත්ත බබා චරිතයේ ආනිසංස වලින් කිහිපයක් පමණි.
ඇතැම් පාතාල අපරාධකරුවන් හිරගෙවල් ඇතුළේ සිට අපරාධ මෙහෙයවීමට දක්වන්නේ බලවත් කැමැත්තකි. එයට එක් ප්‍රධාන හේතුවක් වන්නේ පිටතදී නොලැබෙන ආරක්ෂාව හිරගෙදර ඇතුළේදී රජයේ වියදමින්ම ලැබෙන බැවිනි. රජයේ රැකවරණය යටතේ රැඳෙමින් ඔවුන් සිරගෙවල් ඇතුළේ සිට මහා පරිමාණයෙන් කුඩු ගෙන්වන්නේත් විරුද්ධවාදීන් මරා දමන්නේත් වෙනත් අපරාධ සංවිධාන කරන්නේත් සැකබියකින් තොරවය. සිරකරුවන් වීම නිසා තමන්ට ලැබෙන ආරක්ෂාවේ මහිමයෙන් නිසි ප්‍රයෝජන ගැනීමට ඔවුහු නොපැකිලෙති.
විරැද්ධවාදීන්ගේ තර්ජනවලින් තොරව එළියේ සිටින තම ගෝලබාලයන් හරහා විවිධ අපරාධ සිදුකිරීමට ඔවුන්ට පිහිට වන්නේ නවීන තාක්ෂණයෙන් යුත් ජංගම දුරකථනයයි. ඉතා වටිනා ස්මාට් දුරකතනයක් තිබීම පමණක් මේ අපරාධකාරයන්ට ප්‍රමාණවත්ය. ඒවා ඔවුන් අතට පහළ වන්නේ ඍද්ධියෙන් නොවේ. බන්ධනාගාර නිලධාරීන් නම් මනුස්ස පුත්‍රයන් හරහාමය. නැතහොත් උසාවියට ගෙනගිය අවස්ථාවලදී එහි සිටින දූෂිත පොලිස් නිලධාරීන්ගේ සහාය ඇතිවය. එසේත් නොමැති නම් මේ දෙපිරිසම කිසිවක් නොදන්නා සේ අහක බලාගෙන සිටින විට අපරාධකරුවන් හෝ ඔවුන්ගේ ගෝලයකු අතට මේවා පත්කරන හිතවතකුගෙන් හෝ ඥාතියකුගේ මාර්ගයෙනි.
මේ දුරකතන කෙසේ ලැබුණත් ඒවා හිරගෙදර තුළට අතේ ගෙන යා නොහැකිය. ඒවා “බංකරයේ” ගසාගෙන හෝ වෙනත් ආකාරයකින් හෝ සිරගෙදර ඇතුළට පාත්කර ගන්නා ක්‍රම සහ විධි අපරාධකාරයෝ දැන සිටිති. මේ සමස්ත ක්‍රියාවලියට සම්බන්ධ සියලු බන්ධනාගාර නිලධාරීන්ට මදිය නොකියන්න දොළ පිදේනි ලැබෙන බවත් ඒවාට වහ වැටී රාජකාරිය අමතක කරන මෙම දූෂිත නිලධාරීන් පිරිස රාජකාරිය හරිහැටි ඉටුකරන දක්ෂ අවංක නිලධාරීන්ට පවා කැළලක් වන බවත් පෙන්වා දිය යුතුය. මේ කෙසේ සිදුවුවත් ඒ සියල්ල ඉතාම සංවිධානාත්මක ජාලයක් හරහා සිදුවන බැවින් හිරගෙදර ඇතුළේ සිට මෙහෙයවනු ලබන අපරාධ නැති කිරීමට නම් දුරකථන ඇතුළට යවන ජාලය කඩා බිඳ දැමිය යුතුය. ජනාධිපති ගෝඨාභය රාජපක්ෂ මහතා අත තබා ඇත්තේ එම ඉතාම අපහසු කාර්යයටයි. ඒ සඳහා බන්ධනාගාර නිලධාරීන්ගේ සහාය ලැබීම අත්‍යවශ්‍යය.
මෙය ඉතා අපහසු ඉලක්කයක් සේ අප දකින්නේ ඇතැම් සංවිධානාත්මක අපරාධකරුවන් ඇතැම් ප්‍රබල දේශපාලනඥයන් සමඟ සමීප සම්බන්ධතා තිබෙන බව අප සියලුදෙනා දන්නා බැවිනි. හිරගෙවල් ඇතුළේ සිටින අපරාධකරැවන්ට සියලු සැප ලබාදීමට ඇතැම් දේශපාලනඥයෝ අත දිගහැර වියදම් කරති. හිරගෙදර ඇතුළේ සිට සිදුකෙරෙන අපරාධ නැවැත්වීමට මීට පෙර සිටි නායකයන්ද උත්සාහ ගත්තමුත් ඒ සියල්ල වැළකී ගියේ මේ කියන දේශපාලන සම්බන්ධතා හේතුවෙනි. ඒවා වළක්වා ගැනීමට අවශ්‍ය දේශපාලන ධෛර්යය සහ හැකියාව වත්මන් ජනාධිපතිවරයාට තිබෙන බව අපට නම් සහතිකය.
