මහ මැතිවරණය මඩේ දාන්න එපා
මහ මැතිවරණ උණුසුම ඇරඹීමට නියමිත වූයේ මාර්තු මාසයේදීය. එහෙත් ඒ වනතුරු මාස දෙක තුනක් තිස්සේ චීනය ඇතුළු රටවල් කිහිපයක හොල්මං කරමින් තිබූ කොවිඩ්-19 වසංගතය අපේ රටට ද කඩාවැදීම හේතුවෙන් එය වැළකිණි. ඒ ජරමරය අස්සේම පාර්ලිමේන්තුව විසුරැවා හැර නාමයෝජනා ද කැඳවා අප්‍රේල් 25දාට මහ මැතිවරණය පැවැත්වීමට ගැසට් පත්‍රය නිකුත් වූ නමුත් කොවිඩ්-19 වසංගතය මුළු ලොවම අකර්මණ්‍ය කරද්දී අපේ රටට පමණක් එයින් මිදීමට හැකියාවක් තිබුණේ නැත. ලොවේ බොහොමයක් රටවල්වල සාමාන්‍ය වැඩකටයුතුවලට අගුලු වැටෙද්දී අපේ රටේ මහ මැතිවරණය පැවැත්වෙන දිනයට ද අගුලු වැටුණි. පසුගිය බදාදා (10) වනතුරැම මේ දිනය පැවතියේ අවිනිශ්චිතවය.
අගෝස්තු 05 වැනිදාට මහ මැතිවරණය පැවැත්වෙන බව මැතිවරණ කොමිසමේ සභාපතිවරයා විසින් මාධ්‍ය හමුවක් තබා ප්‍රකාශ කළේ එසේ අවිනිශ්චිතව ගතවූ මාස තුනකට ආසන්න කාලයකට පසුවය. මේ නිසා නිරෝධායන පනතට අනුව සෞඛ්‍ය අධ්‍යක්ෂ ජනරාල්වරයා විසින් නිකුත් කර ඇති සෞඛ්‍යාරක්ෂක පියවර අනුගමනය කිරීම මෙවර මහ මැතිවරණයේ අත්‍යාවශ්‍ය කොන්දේසිය වී තිබේ. සෞඛ්‍ය නීති කඩකිරීම ඡන්ද නීති කැඩීම තරම්ම බරපතළ වරදකි. ඒ බව සිත්හි තබාගෙන කටයුතු කිරීම සෑම ඡන්ද අපේක්ෂකයකුගේම වගකීම වෙයි. එම වගකීම අමතක කර කටයුතු කිරීම රටේ මහත් විනාශයක් වීමට ඉඩ තිබෙන බව ඔවුන් මතක තබාගත යුතුය. ඡන්ද නීති කැඩීමේදී තමන්ගේ නායකයකු හෝ පොලීසියේ ලොකු මහත්මයකු හෝ අල්ලාගෙන ගොඩ යා හැකිය. නැතහොත් නීතිඥයකුගේ වුවද සහාය ලබාගත හැක. එහෙත් සෞඛ්‍ය නීති කඩා වැඩේ වරද්දා ගතහොත් අල්ලාගත හැකි නීතිඥයකු හෝ නායකයකු හෝ පොලිස් ලොක්කකු හෝ නැති වග ඔවුන් සහතික වශයෙන්ම දැන සිටිය යුතුය.
මහ මැතිවරණ දිනය ප්‍රකාශයට පත් කිරීම මේ තරමට කල් ගියේ දින 10 ක් තිස්සේ උසාවිය හමුවේ විභාග වූ පෙත්සම් 10 ක් හේතුවෙනි. එහි තීන්දුව රටටම පෙන්වා දුන්නේ උසාවියට ඉදිරිපත් කරන ලද පෙත්සම්වලින් සිදුවූයේ බොහෝ දුරට කාලය කා දැමීමක් පමණක් බවය. ඒ අතර මැතිවරණ කොමිසමට ද දැඩි ලෙස චෝදනා එල්ල වූයේ ඔවුන් සිතාමතා මහ මැතිවරණය කල් දැමීමට කටයුතු කරන බවටය. එහිදී ආණ්ඩු පක්ෂය වන පොහොට්ටුවේ අපේක්ෂකයන් වෙතින් දැඩි විවේචන එල්ලවීම බලාපොරොත්තු විය යුතුය. හැකි ඉක්මනින් ඡන්දය පවත්වා ආණ්ඩුවක් බිහිකර ගැනීමේ ඔවුන්ගේ අරමුණට මැතිවරණ කොමිසම හරස් වන බවට අදහසක් ඔවුන් තුළ තිබිණි. එය ප්‍රතික්ෂේප වන අන්දමින් ක්‍රියා කිරීමට කොමිසම සමත් වූයේ නැත. එම කොමිසමේ සාමාජිකයන් අතර ඒකමිතික බවක් නොතිබීම ද රාජන් හූල් මහතාගේ මතභේදකාරී ක්‍රියාකාරකම්ද එයට හේතුවක් වූ බවත් පෙනෙන්නට තිබිණි. එහෙත් දැන් සියලු ගැටලු නිරාකරණය වී තිබීම හේතුවෙන් සියලු දෙනාම අරමුණු කරගත යුත්තේ මහ මැතිවරණය මඩ වළක් බවට පත්කර ගැනීමෙන් වැළකී කටයුතු කිරීමය. මේ බව වඩාත් සිතට ගත යුත්තේ ආණ්ඩු පක්ෂය නියෝජනය කරන අපේක්ෂකයන් බවද සඳහන් කරනු කැමැත්තෙමු.
මහ මැතිවරණය සිතාමතා කල් දැමූ බවට ආණ්ඩු පක්ෂ මන්ත්‍රීන් කොතරම් ගෝරි දැම්මත් කොවිඩ්-19 මාරාන්තික වසංගතයේ බලපෑම් ද ඊට හේතු වූ බවද සඳහන් කළ යුතුය. සෑම ප්‍රශ්නයක් දෙසම දේශපාලන කෝණයෙන් පමණක් බැලීම එවැනි ගෝරාණාඩුවලට හේතුවෙයි. ශ්‍රී ලංකාවේ මෙවර පැවැත්වෙන මහ මැතිවරණය ඓතිහාසික එකක් බවට පත්වන්නේ ද ගෝලීය මාරාන්තික වසංගතයක් මැද පවත්වන ලද ඡන්ද විමසීමක් වශයෙනි. එහිදී වෙනත් මැතිවරණවලට වඩා මෙවර පවතින වෙනස්කම් පිළිබඳව ද ඡන්දදායකයා තුළ සේම ඡන්දාපේක්ෂකයා තුළ ද අවබෝධයක් තිබීම අවශ්‍යය.
මැතිවරණ ප්‍රචාරක ව්‍යාපාරය සඳහා දේශපාලන පක්ෂවලට සති 06කට ආසන්න කාලයක් ද ලැබී තිබේ. මේ කාලය තුළදී සමාජ දුරස්ථභාවය රඳවා ගනිමින්, මුවවැසුම් පැළඳගෙන සෙසු සෞඛ්‍යාරක්ෂක නීතිරීති ද අනුගමනය කරමින් ඡන්දය කරන හැටි හෝ එවැනි තත්ත්වයක් නොමැති සෞඛ්‍ය නීති තඹේකට මායිම් නොකරන මැතිවරණ ව්‍යාපාරයක් සිදු කරයි ද යන්න රටට බලාගත හැකිවනු ඇත.
ගෝඨාභය රාජපක්ෂ මහතා ජනාධිපතිවරණයෙන් ලද ප්‍රබල ජයග්‍රහණයේ බලපෑම ශ්‍රී ලංකා පොදුජන පෙරමුණේ (පොහොට්ටුවේ) වාසියට තිබෙන බව පැහැදිලි කරැණකි. එහෙත් එම ජයග්‍රහණය සමඟ රට තුළ ඇතිවූ අලුත් වෙනසක් පිළිබඳ ජනතාව තුළ තිබූ බලාපොරොත්තුව, තරග වැදීමට නම් කරනු ලැබ සිටින හිටපු මැති ඇමැතිවරැන්ගේ නම් ලැයිස්තුව මගින් තරමක් දුරකට ව්‍යාකූල කර තිබේ. විවිධ ක්ෂේත්‍ර නියෝජනය කරන, නැවුම් අදහස් ඇති විද්වතුන් පිරිසක් ද අපේක්ෂකයන් වශයෙන් මෙවර නම් කරනු ඇතැයි බලාපොරොත්තු වුවද එය සිදුව ඇත්තේ මඳ වශයෙනි. මේ ඇතැම් පරණ මැති ඇමැතිලාගේ කියුම් කෙරැම් ගැන රටේ මහජනතාවට හොඳ වැටහීමක් තිබේ. එජාපය සහ එයින් කැඩීගිය සජබ ගැන ද කිව යුත්තේ එයමය.
මේ පරණ මුහුණුම සමඟ “සෞභාග්‍යයේ දැක්ම” කරා අලුත් ගමනක් යාමට අලුත් පාර්ලිමේන්තුවක් බිහිකරන්නේ කෙසේද යන්න නම් විසඳාගත නොහැකි ගැටලුවකි. මහජනතාවට ඇති එකම විකල්පය මේ අපේක්ෂකයන් අතුරින් පෙර වැරදි නැති හොඳම පිරිස තෝරා පාර්ලිමේන්තුවට තෝරා යැවීමය. එම වගකීම හෝ ඔවුන් අතින් ඉටුවෙයි නම් අඩුම තරමින් හොඳ ආණ්ඩුවක් හෝ බිහිකර ගැනීම අමාරු නැත.