කතා සාප්පුව වහමු වැඩට බසිමු
අග්‍රාමාත්‍යවරයා ඇතුළු කැබිනට් මණ්ඩලය දිව්රුම් දී අවසන්ය. නව පාර්ලිමේන්තුව ලබන 20 වැනිදා රැස්වීමට සූදානම්ය. ඇමැතිවරුන් වැඩිදෙනකු මේ වනවිට තම අමාත්‍යංශවල රාජකාරි කටයුතු ආරම්භ කර තිබේ. මේ සියල්ල කඩිමුඩියේ සිදු කෙරුණු බව පෙනී ගියත් මහමැතිවරණය පවත්වා මේ වනවිට දින 09ක් ගෙවී ගොසිනි. රටට ආණ්ඩුවක් නැතිව ගත වූ කාලය දින 160ක් ඉක්මවා ගොස් තිබේ. නව රජය තම රාජකාරි අරඹන තුරැ රටම බලාගෙන සිටින්නේ මහත් නොඉවසිල්ලකිනි.
එම නොඉවසිල්ලට හේතු ගණනාවක් තිබේ. යහපාලන ආණ්ඩුව සමයේදී රටේ ආර්ථිකය බරපතළ ලෙස කඩාවැටුණු බවට දැන් බලයට පැමිණ සිටින පොහොට්ටු නායකයෝ දිගින් දිගටම ජනතාව හමුවේ චෝදනා කළහ. රටේ සම්පත් විකුණන බවටද චෝදනා නැගූහ. ජාතික ආරක්ෂාව බින්දුවට බැස තිබූ බව උදාහරණ සහිතව පැහැදිලි කළහ. සිංහල ජාතියත් සම්බුද්ධ ශාසනයත් බරපතළ අනතුරකට මුහුණ පා සිටින බවට කරුණු කාරණා පෙන්වූහ. වත්මන් ශ්‍රී ලංකා පොදුජන පෙරමුණු ආණ්ඩුවට ඉතාම ශක්තිමත් ජනවරමක් ලබා ගැනීමට එම කරුණු මත පදනම් වෙමින් කාලයක් තිස්සේ ගෙනගිය ප්‍රබල ප්‍රචාරක ව්‍යාපාරය සාර්ථක වූ බව ප්‍රථිඵල මගින් පෙන්නුම් කර තිබේ. ජනතාව ආණ්ඩුව ඉල්ලා සිටි පරිදිම තුනෙන් දෙකක බලයක් ලබා දී තිබේ. දැන් සුබ මොහොත එළඹ තිබේ. වේදිකාව සකස් වී ඇත්තේ ජනතාව හමුවේ ලබාදුන් පොරොන්දු ඉටුකිරීමේ වාරය සඳහාය. එය හැකි ඉක්මනින් ආරම්භ වූ දැකීම ජනතාවගේ සැබෑ උවමනාව බව නව ආණ්ඩුවේ නව ඇමැතිවරුන් දැනසිටීම යහපත්ය.
නව ආණ්ඩුවට රට සංවර්ධනය කිරීම සඳහා යහපත් දැක්මක් සහ හැකියාවක් ඇති බවට රටේ අති විශාල බහුතරය දැඩි විශ්වාසයක් තබා තිබේ. එවැනි විශ්වාසයක් ඔවුන් තුළ නොතිබුණා නම් ආණ්ඩුවට මේ තරම් සුවිශාල ජයග්‍රහණයක් ලැබෙන්නේ නැත. මේ නිසා ආණ්ඩුව පෙන්වා දුන් සංවර්ධන ඉලක්ක කරා ළඟා වීමට මුල් අඩිතාලම හැකි ඉක්මනින් දැමීම ආණ්ඩුවේ ආසන්නම වගකීම වෙයි. තමන් ඉදිරියේ පවතින බැරෑරුම් අභියෝග පිළිබඳව සැලකිලිමත් වෙමින් රටේ මහජනතාව ඉක්මනින් බලාපොරොත්තු වන සහන ලබාදීම ආණ්ඩුවට පහසු කටයුත්තක් නොවන බවට සැකයක් නැත. එම තත්ත්වය තවදුරටත් බරපතළ තත්ත්වයට ඇද දමා තිබෙන්නේ කොවිඩ් 19 විසින් ඇතිකරන ලද ව්‍යසනයයි. එම ව්‍යසනය හමුවේද නොසැලී තම ඡන්දය භාවිත කිරීමට ඡන්ද පොළවලට පැමිණි ජනතාව තුළ ගොඩනැගී ඇත්තේ අසීමිත බලාපොරොත්තු රාශියක් බව ආණ්ඩුව තේරැම් ගත යුතුය. ඉක්මනින් රජය වැඩට බැසිය යුතු වන්නේ එබැවිනි.
පසුගිය යහපාලන ආණ්ඩුවට එරෙහිව ජනතාව නැගූ බරපතළ චෝදනාවක් වූයේ ජාතික ආණ්ඩු නාමයට මුවා වී අති විශාල කැබිනට්ටුවක් ද විශාල සංඛ්‍යාවක් රාජ්‍ය ඇමැතීන් සහ නියෝජ්‍ය ඇමැතීන් ද පත්කර ගනිමින් විශාල වශයෙන් මහජනතාවගේ බදු මුදල් කබාසිනියා කර දැමූ බවය. ඇමැති පදවි මහා සම්පත් ලබාදෙන ඇලඩින්ගේ පුදුම පහන බවට පත්කර ගනිමින් ඔවුන් කටයුතු කළ ආකාරය ජනතාවගේ විරෝධයට හේතු විය. වත්මන් ආණ්ඩුව ආරම්භයේදීම සාධනීය පියවරක් තබමින් කැබිනට් ඇමැති ධූර සංඛ්‍යාව 26කට සීමා කර තිබේ. රාජ්‍ය ඇමැතිවරු 39ක් පමණි. මෙය ජනතාවගේ සතුටට හේතුවන යහපත් පියවරකි. ඉතා පහසුවෙන් ජාතික ආණ්ඩුවකට ගොස් ඇමැති ධූර සංඛ්‍යාව 45 දක්වා වැඩිකර ගෙන අසංඛ්‍යාත්මක රාජ්‍ය සහ නියෝජ්‍ය ඇමැති පිරිසක් ද පත්කර ගැනීමට වත්මන් රජයට හැකියාව තිබුණද එවැනි පියවරකට රජය ගියේ නැත. එයට ජනතාවගේ ප්‍රශංසාව හිමි වන බව සඳහන් කරනු කැමැත්තෙමු.
එසේ වුවද ඇතැම් කැබිනට් ඇමැතිවරුන්ගේ පත්වීම් සම්බන්ධයෙන් ජනතාව තුළ එතරම් පැහැදීමක් නැති බවද ඒ සමඟ පෙන්වා දිය යුතුය. නව පාර්ලිමේන්තුවේ අලුත් මුහුණු සෑහෙන ප්‍රමාණයකින් වැඩි වී පරණ මුහුණු ගණනාවකට ගෙදර යාමට සිදුවී ඇත්තේ ඇයිද යන්න පිළිබඳ රජය තුළ අවබෝධයක් තිබීම අවශ්‍යය. මේ ඇතැම් පරණ මුහුණුවල කෙරුවාව පිළිබඳ රටේ ජනතාවට අමුතුවෙන් කියා දිය යුතු නැත. ඒ ඇතැම් අයගේ අසමද්ජාති වැඩ 2015දී එජනිස ආණ්ඩුවට ගෙදර යාමට මූලික හේතුවක් විය. එවැනි අයට යළිත් වැදගත් ඇමැති වගකීම් පැවරීම පිළිබඳ ජනතාව කතා කරන්නේ ප්‍රසාදයකින් නොවේ. ජනාධිපති සහ අගමැති දෙදෙනා තමන්ගේ ඉතිරි පාලන කාලය තුළදී අමාත්‍යවරැන්ගේ ක්‍රියා කලාපය පිළිබඳව විමසිලිමත්ව කටයුතු කරන්නේ නම් ඇමැතිවරුන් අතින් පරණ වැරදි යළිත් සිදු වීම වළක්වා ගැනීම අමාරු නොවනු ඇත.
ආරම්භයේදීම රජය අත ගසා ඇත්තේ 19 වැනි ආණ්ඩු ක්‍රම ව්‍යවස්ථාව අහෝසි කිරීම සඳහා 20 වැනි නව සංශෝධනයක් ගෙන ඒමට බව අපගේ ප්‍රධාන පුවතකින් හෙළි කර තිබේ. ව්‍යවස්ථා සංශෝධනයක් සිදු කරන බවට රජය විසින් ජනතාව දිගටම දැනුම්වත් කර තිබීම හේතුවෙන් එය අහම්බයක් නොවන බව පැහැදිලිය. සම්පූර්ණ ව්‍යවස්ථාව සංශෝධනය කරන තුරු සිදු කෙරන මෙම තාවකාලික පියවර තමන්ගේ අයිතිවාසිකම් රැකදෙමින් සිදු කෙරෙනු ඇතැයි ජනතාව බලාපොරොත්තු වන බව ද කිව යුතුය. ජනාධිපති, අගමැති සහ ඇමැති මණ්ඩලය එක්ව කටයුතු කරමින් ශ්‍රී ලංකාව සංවර්ධනය කරා යොමු කරන මාවතේ ගමන් කරනු දැකීම ආණ්ඩුවට විජයග්‍රහණයක් ලබා දුන් ජනතාවගේ ලොකුම අභිලාෂයයි.