තනතුරු අතහැරීම රඟපෑමක්
මංගල ඇමැති දකුණේ ජනතාව අවුස්සනවා
ආවාට ගියාට ආණ්ඩුව පෙරළන්නෙ නෑ
මහින්ද මහත්තයා කියන කෙනා තමයි නායකයා
එජාපය දැනටම පරාජය පිළිඅරන්
ගෝඨාභය ගේන්න අමුතුවෙන් යෝජනා ඕනෑ නෑ
විපක්ෂයට බැණලා ආණ්ඩුවට ගැලවෙන්න බෑ
ත්‍රස්ත ප්‍රහාරයේ වැරදිකරුවන්ට දඬුවම් කළ යුතුයි
- එජනිස පාර්ලිමේන්තු මන්ත්‍රී චන්දිම වීරක්කොඩි
♦ පසුගියදා ත්‍රස්තවාදී ප්‍රහාරයත් එක්ක අපි දැක්කා දේශපාලනඥයෝ එහාට මෙහාට වගකීම්වලින් මිදිලා එක එක අය වගකිවයුතුයි කියලා චෝදනා කරනවා. ඇත්තටම වග කියන්න ඕන කවුද?
ඉතාම පැහැදිලිව රජයයි පොලිසියයි මේකේ වගකීම බාරගන්න ඕන. රජයක් හැටියට ඒගොල්ලෝ ක්‍රියාත්මක නොවීම ගැන කිසි කෙනෙක් ඒ විවේචනය වැරැදියි කියලා පිළිගන්නේ නැහැ.
♦ අගමැතිවරයා ඇතුළු කණ්ඩායම ගේන චෝදනාව තමයි ඔබලා කරපු හදිසි ආණ්ඩු මාරුවෙන් පස්සේ ආණ්ඩුවට සම්බන්ධ කිසිදු අයෙක් ආරක්ෂක මණ්ඩලයට ගෙනාපු නෑය කියන කාරණය. ඒක බරපතළ තත්ත්වයක් නේද?
රජය කියන්නේ ජනාධිපතිතුමයි, අගමැතිතුමයි, කැබිනට් මණ්ඩලයයි, ආණ්ඩු පක්ෂයයි. අපි විපක්ෂය. විපක්ෂයකට රටේ ආරක්ෂාව ගැන කරන්න පුළුවන් දේවල් ඉතාම සීමිතයි. එනිසා ඔය චෝදනාව අපිට අදාළ නැහැ. ඕවා කිව්වා කියලා ඒ චෝදනාවලින් ගැලවෙන්නත් බෑ ඒ අයට.
♦ ආණ්ඩු පක්ෂයෙන් කියන විදිහට විපක්ෂයේ අය එහෙනම් කොහොමද ආරක්ෂක මණ්ඩලයේ වාඩිවුණේ?
අපේ නම් කිසි කෙනෙක් එහෙම වාඩිවෙලා නැහැ. කොහොම වුණත් ආරක්ෂක මණ්ඩලයට නිල වශයෙන් වාඩිවෙන කණ්ඩායමම සම්පූර්ණයෙන් මේකට වගකියන්න ඕන. දැන් අග්‍රාමාත්‍යවරයා එයාව කැඳෙව්වේ නෑ කියලා කියනවා. ඒක දැන් කියලා වැඩක් නැහැ. ඒකෙන් එක දෙයයි පේන්නේ. රටේ ජනතාව එයාට දුන්න ජනවරම අනුව ඒ ජනතාව ආරක්ෂා කිරීමේ වගකීම ඔවුන් සතුව නෑ කියන කාරණය.
♦ විශේෂයෙන් දේශපාලනඥයන් විසින් ප්‍රකාශ කළ තොරතුරු සහ ඔවුන්ගේ චෝදනා නිසා මේ වෙනකොට ආගම් අතර සැක උපදවන තැනකට තල්ලු වෙලා තිබෙනවා. ඇයි මේ දේශපාලනඥයන් එහෙම දේවල් කරන්නේ?
මෙහෙමයි, සමහර පුද්ගලයෝ වගකීම් රහිතව කතා කරන අවස්ථා අපි දැකලා තිබෙනවා. මම දකින්නේ මෙච්චරයි මේ ප්‍රශ්නය නිම කරන්න නම් මේ රටේ සියලුදෙනාටම පොදුවෙච්ච එක නීතියක් තියෙන්න ඕන. ඔය උඩරට නීතිය, තේසවලාමේ නීතිය වශයෙන් බෙදීමක් නොකළ යුතුයි. මේ නිසා වෙන්නේ අවස්ථානුකූලව ඒ අය ඒ ඒ නීතියෙන් ප්‍රයෝජන ගන්නවා. ඒ වගේම තමයි පාට පක්ෂ කුල වශයෙන් බෙදුණු පක්ෂ මේ රටේ තහනම් කළ යුතුයි. මේ නීති රජයක් හැටියට පාර්ලිමේන්තුවක් හැටියට සංශෝධනය කළ යුතුයි.
♦ ගොඩක් දෙනෙක් චෝදනා කරන්නේ රාජපක්ෂ යුගය තමයි මේ සියලු නැගිටීම් සිදුවුණේ කියලා. කාත්තන්කුඩියේ ශරියා විශ්වවිද්‍යාලය පවා හැදුවේ ඒ කාලේ කියලයි ආරංචිය?
ඒ චෝදනා පදනම් විරහිත චෝදනා. ඒ ආරම්භ කළේ තාක්ෂණික විශ්වවිද්‍යාලයක් හැටියට. වෘත්තීය පුහුණු මධ්‍යස්ථානයක් හැටියට තමයි එදා ඒකට අවසර දුන්නේ. හැබැයි උසස් අධ්‍යාපන අමාත්‍යංශයට පවරලා ඒ හරහා මෙය පවත්වාගෙන යන්න පිඹුරැපත් හැදුවේ මේ ආණ්ඩුව.
♦ විශේෂයෙන් කාත්තන්කුඩි ප්‍රදේශය අරාබිකරණය වීම ආරම්භ කළේ ඔබලාගේ රාජපක්ෂ පාලන යුගයේ බව බොහෝ දෙනෙක් චෝදනා කරනවා. ඇයි ඒ දේවල් නවත්වන්න කටයුතු නොකළේ?
අවුරුදු 4 ඉඳන් රාජපක්ෂවරු නෙමෙයි රට පාලනය කරන්නේ. ඔය කියන ආණ්ඩුව. ඒ වගේම රාජපක්ෂවරු පාලනය කරපු කාලයේ මෙවැනි තත්ත්වයක් උද්ගත වුණෙත් නැහැනේ. ඔබත් ඔහොම චෝදනා කරනවා නම් දැන් මේ වෙනකොට හෙළිවෙලා තිබෙනවා සහරාන් වැඩකරලා තියෙන්නේ එක්සත් ජාතික පක්ෂයට කියලා. ඒ වගේම ජනාධිපතිවරණයේදී මහින්ද රාජපක්ෂ මහත්තයාට විරුද්ධව වැඩකළා කියලා ඔප්පුවෙලා තිබෙනවා. එතකොට මේ අන්තවාදය ක්‍රියාත්මක වුණේ කවුරැත් එක්කද කියලා පැහැදිලිවම තේරෙනවා.
♦ රතන හාමුදුරුවෝ උපවාසයට පෙර විවිධ චෝදනා නැගුවා මුස්ලිම් සමහර ඇමැතිවරුන්ට විරුද්ධව. ඒ චෝදනා ලබපු පිරිසත් එක්කම ආණ්ඩුවේ ඉන්න මුස්ලිම් ඇමැතිවරුත් තමන්ගේ තනතුරු අත්හැරියා. එහෙම අත්හැරියාම නැවත කියනවා ඔවුන්ට තනතුරු බාරගන්න කියලා. මොකක්ද මේ වැඩේ?
මේක රඟපෑමක්නේ. ඇඟිල්ල දික්වුණේ වෙනත් කට්ටියකට. ඒ පිරිසට තිබුණා අවශ්‍ය පරීක්ෂණවලට තමන්ගේ සහයෝගය දීලා ඒ කටයුතු නිවැරදි කරගෙන තමනුත් නිවැරදි වෙන්න. නමුත් ඔවුන් කළේ කණ්ඩායමක් වශයෙන් ඉවත් වීම. ඒක ජාතිවාදය ඇවිලෙන ප්‍රශ්නයක්. දැන් හිතන්න ඉවත් වුණු සමහර ඇමැතිවරු දැක්කහම ඔවුන් ගැන පුදුමයක් ඇතිවෙනවානේ. උදාහරණයක් හැටියට කබීර් හෂීම් ඇමැතිතුමා. ඔහුට එවැනි කිසිම චෝදනාවක් තිබුණේ නැහැ. නමුත් ඔහුත් ඉවත් වුණා. ඔහුට ඡන්දය දෙන්නේ සිංහල ජනතාව. මේකෙන් වුණේ ඔහුත් වරද්ද ගත්ත එක. මේ අන්තවාදී මාෆියාව නිසා ගත්ත තීරණයෙන් අවාසි සහගත තත්ත්වයක් උදාවෙනවා. ඉතිහාසයේ මුස්ලිම් ඇමැතිවරුන්ට විරුද්ධව විශ්වාසභංග ආවා. ඒ වෙලාවේ පක්ෂයක් හැටියට ඊට මුහුණ දුන්නා මිසක් ජාතියක් හැටියට ඔවුන් ඊට මුහුණ දුන්නේ නැහැ.
♦ ඔවුන් කියන්නේ මෙතැන ඇතිවෙමින් තිබෙන ජාතිවාදී ප්‍රශ්නය සහ ඒ ප්‍රශ්නය විසඳන්න රජයක් හැටියට සහයෝගය ලබා නොදීම ගැන අවුලෙන් ඉවත්වෙලා අදාළ පරීක්ෂණවලට සහයෝගය දුන්නා කියලා?
ඔවුන්ගෙන් කොච්චර ප්‍රමාණයකටද අසාධාරණය වුණේ. ඒ ප්‍රශ්නය එනකොටම ඒ ප්‍රශ්නය විසඳන්න නැගී සිටිය ජනතාව ඔවුන් නෙමෙයි. ඔවුන් කියන කතාව ඇත්ත. ආණ්ඩුව අසමත් කියන කාරණය. හැබැයි ජනතාව ආරක්ෂා කළා. ඒ අය කියනවා නම් ආණ්ඩුවට මේ ප්‍රශ්නය විසඳාගන්න හැකියාවක් නැතිවුණා කියලා පැහැදිලිවම කියන්න තියෙන්නේ ඒ අය විතරක් නෙමෙයි මුළු ආණ්ඩුවම කරැණාකරලා ඉවත්වෙලා යන්න කියලා.
♦ මේ සියලු දේ මැද්දේ මංගල සමරවීර මහත්තයා මහනායක හිමිවරුත් කාදිනල් හිමියනුත් විවේචනය කළා කියලා කතාබහක් ඇතිවෙලා. ඔබ දකින්නේ මොකක්ද මේ සිද්ධිය ගැන?
එතුමා දේශපාලන අරමුණු ඇතිව කරපු ප්‍රකාශ. විශේෂයෙන් ජනාධිපතිවරණයේ සුළු ජාතික ඡන්ද ලබාගැනීමේ අරමුණ ඇතිව ජාතීන් අතර බේද ඇති කිරීමේ අරමුණින් තමයි මේ ප්‍රකාශ දෙන්නේ. මේ හරහා ඔහු උත්සාහ කරන්නේ දකුණේ සිටින ජනතාව උසිගන්වන එක. මංගල සමරවීර මහත්තයා දකුණේ ජනතාවගේ මතවාදය දන්නවා. දකුණේ ප්‍රධාන පක්ෂ දෙකම නියෝජනය කළ මන්ත්‍රීවරයෙක්. නමුත් ඔහුගේ සටකපටකම නිසා නොයෙක් ප්‍රකාශ සිදුකරනවා. රනිල් වික්‍රමසිංහ මහත්තයාගේ දේශපාලන ජීවිතය අඳුරු කළෙත් එතුමා තමයි.
♦ අනපේක්ෂිත ත්‍රස්ත ප්‍රහාරය සම්බන්ධව රටේ ජනතාව ඇත්ත දැනගත යුතුයි. ඒ ඇත්ත විශේෂ කාරක සභාවේ මේ වනවිට හෙළිවෙමින් යනවා. ඒත් ඔබලා මේක නවත්වන්න කියලා ආණ්ඩුවට බලපෑම් කරනවා. ඇයි ඒ?
මේ සියල්ල විහිලුනේ. දැන් කළයුතු වන්නේ අනාගතයේ මෙවැනි දෙයක් සිදුවීම වළකාලීම. මෙයට ආණ්ඩුවත් ආරක්ෂක ප්‍රධානීනුත් වගකිවයුතුයි කියලා මේ වනවිට අනාවරණය වෙලා ඉවරයි. එසේ වැරුදි කරපු අයට අනිවාර්යයෙන්ම දඬුවම් දිය යුතුයි. ඒ දඬුවම් දීමේ හැකියාව තිබෙන්නේ මේ රටේ නීතිපති දෙපාර්තමේන්තුවට. එහෙම නැතිව පාර්ලිමේන්තු කාරක සභාවකටවත්, ජනාධිපති කොමිසමකටවත් කරන්න පුළුවන් දෙයක් නැහැ. ඒක රඟපෑමක් විතරයි. විශේෂයෙන් පොලිස්පතිවරයාගේ කිසිදු බරක් පතලක් නැති හැසිරීම සම්බන්ධයෙන් නීතිය ක්‍රියාත්මක විය යුතුමයි.
♦ ආණ්ඩුවෙන් කියන්නේ ඔබලා මේ ප්‍රහාරයෙන් දේශපාලන වාසි අරගෙන ආණ්ඩු පෙරළන්න හදනවා කියලා?
අපි කියන්නෙත් ආණ්ඩුව පෙරළිය යුතුයි. ඒක දේශපාලන වාසි අරගෙන කරන දෙයක් නෙමෙයි. ආණ්ඩුවේ නොහැකියාව පිළිඅරගෙන ජනතා ඡන්දයකට ගිහිල්ලා එතැනින් ලැබෙන ජනවරමත් එක්ක අපි ආණ්ඩුව පිහිටුවන්න ඕන. එහෙම නැතිව අපිට වුවමනාවක් නැහැ මිනිස්සුන්ගේ දුක අස්සෙන් මේ දේවල් සිදුකරන්න. හැබැයි ජනතාව බලන් ඉන්නවා ඡන්දයක් දෙනකම්.
♦ ඒකට යම්කිසි ආරම්භයක් හැටියට ජනතා විමුක්ති පෙරමුණෙන් විශ්වාසභංග යෝජනාවක් ගෙනැල්ලා තිබෙනවා. ඒ ගැන ඔබලාගේ ස්ථාවරය මොකක්ද?
අපිට කොහොමත් රජය ගැන විශ්වාසයක් නැහැ. අපි සියලු දෙනා ඒකට සහයෝගය ලබාදෙනවා. ඒකෙන් ආණ්ඩුවක් පෙරළෙන්නේ නැහැ. එහෙම පෙරළන්න බලාපොරොත්තුවකුත් නැහැ.
♦ දැන් මේ වෙනකොට ජනාධිපතිවරණයක් සඳහා උණුසුම ඇතිවෙලා තිබෙන්නේ. ඔබ හිතන්නේ මේ තිබෙන තත්ත්වයත් එක්ක රටට සුදුසු නායකත්වය මොන වගේ විය යුතුයි කියලාද?
මේ රටට අවශ්‍ය වන්නේ මහින්ද රාජපක්ෂ මහත්තයා කියන එතුමාගේ සහාය ලැබෙන නායකයෙක්. අගෝස්තු මාසයේ පොදුජන පක්ෂයේ සමුළුව තිබෙනවා. අන්න එදාට අපේ අපේක්ෂකයා කවුද කියලා අපි රටටම හෙළි කරනවා.
♦ ඇයි මේ රාජපක්ෂවරු විතරමද හරියන්නේ රටේ පාලනයට?
මම කියන්නේ රාජපක්ෂ කෙනෙක් නෙමෙයි. මහින්ද රාජපක්ෂ මහත්තයා කියන කෙනෙක් තමයි නායකයා වෙන්න ඕන කියන එක. මොකද එතුමා ත්‍රස්තවාදයෙන් මේ රට බේරාගත් නායකයා. ගොඩක් අය බලාපොරොත්තු වන්නේ එතුමා නැවත බලයට එයි කියලා. නමුත් ඒකට නීතිමය හැකියාවක් නැති නිසා එතුමා සහයෝගය ලබාදෙන අපේක්ෂකයාට රටේ ජනතාවගේ සහයෝගය ලබාදෙන්න බලාගෙන ඉන්නේ.
♦ ඔබ නොකිව්වාට ගොඩක් දෙනෙකුගේ කටේ තිබෙන්නේ ඊළඟ නායකයා ගෝඨාභය රාජපක්ෂ විය යුතුයි කියලා. ඔබත් ඔබගේ සගයෝ වගේ ඒ අදහසේ නොවේද ඉන්නේ?
එතුමා ශක්තිමත් නායකයෙක්. මේ රටට දෙයක් කරපු කෙනෙක්. ජනතා විශ්වාසය තිබෙන කෙනෙක්. එතුමා වගේ කෙනෙකුට මේ රට ඉස්සරහට ගෙනයන්න පුළුවන් කියලා ගොඩක් දෙනෙක් විශ්වාස කරනවා.
♦ එතුමාව යෝජනා කළ යුතුයි කියන අදහසේ ඔබ නැද්ද ඒ කියන්නේ?
ඒක අමුතුවෙන් යෝජනා කරන්න දෙයක් නැහැ. රටේ ජනතාව තීන්දු කරලා ඉවරයි එතුමා මේ රටට ඕන කියලා. කොහොම වුණත් මහින්ද රාජපක්ෂ මහත්තයාගේ සහයෝගයෙන් අවශ්‍ය වෙලාවට අපේක්ෂකයා ඉදිරිපත් කරනවා.
♦ ගොඩක් දෙනෙක් චෝදනා කරනවා ගෝඨාභය රාජපක්ෂ ආවොත් මේ රට හමුදාකරණයට ලක්වේවි කියලා?
එහෙම වෙන්නේ නැහැ. එතුමා රටේ නායකයා වුණාට ඒ සමගම ශක්තිමත් ආණ්ඩුවක් මහින්ද රාජපක්ෂ මහත්තයා ප්‍රමුඛත්වයෙන් පාර්ලිමේන්තුවේ හැදෙනවා. ඒ නිසා ප්‍රජාතන්ත්‍රවාදයෙන් යුක්ත ශක්තිමත් ආණ්ඩුවක් ඉදිරි අනාගතයේදී අපි බිහිකරනවාමයි.
♦ ඒත් මේ වෙනකොට ශ්‍රී ලංකා නිදහස් පක්ෂයේ අපේක්ෂකයා ලෙස වර්තමාන ජනාධිපතිවරයාට ඉදිරිපත් වෙන්න කියලා පක්ෂයේ අයම යෝජනා කරනවා. එහෙම වුණොත් තරගය වැඩියි නේද?
ඒ සියලුදෙනාම ජනාධිපතිවරයාට ආදරයක් තිබෙනවා නම් බිම් මට්ටමේ තත්ත්වය පැහැදිලි කර දිය යුතුයි. ඒ වගේම ජාතික බුද්ධි සේවය, රාජ්‍ය බුද්ධි ඒකකය තිබෙන්නෙත් එතුමා යටතේ. මේ වගේ අපි උත්සුක වෙන්න ඕන රටේ ජනතාවගේ තත්ත්වය මොකක්ද කියලා බලන්න. එහෙම නැතිව අපිට එතුමා සමග පෞද්ගලික තරහක් නැහැ. මම හිතන්නේ අපි දෙගොල්ලෝම තීරණය කරන්න ඕන ජයග්‍රහණය කළ හැකි අපේක්ෂකයෙක් ඊළඟ මැතිවරණය සඳහා ඉදිරිපත් කරන්න.
♦ ජනාධිපතිවරයා කිව්වා ඊළඟ ජනාධිපතිවරණයේ තුන්කොන් සටනක් නැහැ කියලා. මේ ප්‍රකාශයෙන් තේරෙන්නේ එතුමා විතරයි 2020 ඉන්නේ කියලා නේද?
මට හිතෙන්නෙත් එතුමා ප්‍රවීන දේශපාලනඥයෙක් හැටියට බිම් මට්ටමේ තත්ත්වය තේරුම් අරගෙන එක්සත් ජාතික පක්ෂ විරෝධී ආණ්ඩුවක් හදන්න අනාගතයේදී ගෞරවනීය තීන්දුවක් අරගෙන එක තීන්දුවකට එයි කියලා.
♦ මේ දෙගොල්ලො එකතු වුණේ නැත්නම් ඔබලාට ජයග්‍රහණය කියන එකත් තරමක අපහසු දෙයක් නේද?
අපි තේරුම් ගන්න ඕන එක දෙයක් තමයි මේ කොතැන ඉන්නෙත් ශ්‍රී ලංකා නිදහස් පක්ෂ පාක්ෂිකයෝ. ඔවුන් සියලු දෙනා ඉන්නේ පක්ෂයේ බෝඩ් එක එක්ක නෙමෙයි. ප්‍රතිපත්තිත් සමග. ඒ නිසා අවශ්‍ය වෙලාවට ඒ සියලු ජනතාව එක්සත් ජාතික පක්ෂ විරෝධී කණ්ඩායම ඉදිරියේ සිට ගන්නවා. ඔවුන් ඇද බැඳ ගන්නත් අපි ගෙනෙන නායකත්වය කටයුතු කරයි කියලා අපිට විශ්වාසයි.
♦ එක්සත් ජාතික පක්ෂය කියන ආකාරයට ඔවුන්ගේ අපේක්ෂකයාත් කවුරැත් හිතන්නේ නැති ජයග්‍රාහී අපේක්ෂකයෙක් කියලයි ඔවුන් කියන්නේ?
අපිට නම් එහෙම කිසිම අභියෝගයක් නැහැ. එජාපය මේ වනවිට පරාජය පිළිඅරගෙන ඉන්නේ. දැන් බලන්න පසුගියදා පනතක් ගේන්න හැදුවා. මොකටද? තමන් තමන්ට පෞද්ගලිකව දේපොළ රැස්කරගෙන කදමලු බැඳගෙන යන්න. දැන් පේනවානේ විදුලිය ගන්න ගාලු වරායටයි ත්‍රිකුණාමල වරායටයි නැව් දෙකක් ඇවිත් තිබෙනවා. හැබැයි නැව් නවත්වන්න තැනක් නැහැ. හේතුව මිතුරුකමට ටෙන්ඩර් අත්සන් කරලා කිසිම සෙවීමක් නැතිව. දැන් පේනවානේ සමෘද්ධි දෙන්නේ එක්සත් ජාතික පක්ෂ අයට විතරයි. දරුවෝ මන්දපෝෂණය හැදිලා මැරෙනවා. ඒත් සමෘද්ධිය නෑ.
♦ ඔබලා කොහොමද ඉස්සර තිබුණ ආණ්ඩුවේ දූෂණ වංචා නැතිකරගෙන යහපත් ආණ්ඩුවක් හදන බවට ජනතාවට පොරොන්දු දීලා ඒ ඡන්දය ගන්නේ. ඒක ලේසි වෙයිද?
අපි ප්‍රතිපත්ති මාලාව මේ වනවිට හදාගෙන යනවා. සියලු විද්වතුන්ගෙන් එකමුතුව ප්‍රතිපත්ති සම්පාදන කමිටු 26ක් මේ වනවිට ක්‍රියාත්මක වෙනවා. මොකද මිනිස්සු දන්නවා මෙතෙක් ප්‍රතිපත්තියක් ඉදිරිපත් කරලා ප්‍රතිපත්ති ක්‍රියාත්මක කරපු එකම රජය මහින්ද රාජපක්ෂ ආණ්ඩුව කියලා. ඒ මහින්ද චින්තන වැඩපිළිවෙළ.
► ගයාන් ගාල්ලගේ