අලුත් වෙනස ඇතිකරන්න සජිත්ට පුළුවන්

සාම්ප්‍රදායික ඡන්දවලින් මේ පාර දිනන්න බෑ.

හිරේ ඉන්නකොට සැබෑ යාළුවෝ ඥාතියෝ අඳුරගත්තා.

රනිල් මහත්තයා කිහිප වතාවක්ම මට එන්න කිව්වා.

පරණ දේවල් හෝද හෝදා මඩේ දාලා වැඩක් නෑ.

ඊළඟ මහ මැතිවරණයට මම තරග කරනවා.

දේශපාලනයේ ක්‍රියාකාරීව ඉන්න කියා මහින්ද මහත්තයා මට කිව්වා.

මම කවදත් ගෝඨාභයගේ දස්කම් අගය කළා.

- තිස්ස අත්තනායක (එජාපයේ හිටපු මහ ලේකම්)

 

ඔබ ශ්‍රී ලංකාද එජාපය ද නැත්නම් වෙන මොකක්හරි පක්ෂයකද?

ඇත්තටම මම එජාපයේ සාමාජිකයෙක් මිස වෙන කිසිම පක්ෂයක සාමාජිකයෙක් නෙවෙයි. සමහර අය මේක විවිධ විදිහට අර්ථකථනය කරනවා. නමුත් මගේ සාමාජිකත්වය වෙනුවෙන් ශ්‍රේෂ්ඨාධිකරණයට ගිහිල්ලා ජයගත්ත කෙනෙක්. මම කිසිම පක්ෂයකට සම්බන්ධ වුණේ නෑ. ක්‍රියාකාරී දේශපාලනයට පහුගිය අවුරුදු 4 2/1 මම සම්බන්ධ වුණා. නමුත් මේ වෙනවිට සජිත් ප්‍රේමදාස මහත්මයගේ මැතිවරණ ව්‍යාපාරය මෙහෙයවන්න සම්බන්ධ වෙලා ඉන්නවා. ඒක එක්සත් ජාතික පක්ෂය හැටියට නෙවෙයි එක්සත් ජාතික පෙරමුණේ කටයුත්තක් හැටියටයි සිදුවන්නේ.

එහෙනම් ඇයි පහුගිය කාලේ පක්ෂයක් හදාගෙන කට්ටිය එකතු කරමින් වෙනම ගමනක් යන්න හැදුවේ?

ඒකත් පක්ෂයක් නෙවෙයි. ඒ දේත් වැරදි විදිහට සමහර අය අර්ථකථනය කළා. අපි පරමාදර්ශී දේශපාලනයක් හදන්න රටේ පොදු මතයක් එක තැනකට ගෙනාවා. මාදුළුවාවේ සෝභිත හාමුදුරුවෝ ගෙන ගිය ව්‍යාපාරය වගේ ජනතාව දැනුවත් කරන වැඩපිළිවෙළක් තමයි හදන්න හැදුවේ. අපි එතැනදී කිව්වේ රටට ගැලපෙන හොඳ නායකයෙක් තෝරමු කියලා. ඒකෙ සාර්ථක ප්‍රතිඵල තියෙනවා.

ඔබ එජාපයේ හිටපු මහලේකම්. ඔබ පහුගිය කාලේ පැත්තකට වෙලා හිටියේ එජාපයේ නායකත්වයත් එක්ක තිබුණු ප්‍රශ්නයක් නිසාද?

ඒකට මූලික කාරණා දෙකක් තිබුණා. එකක් තමයි පසුගිය ජනාධිපතිවරණයේදී එජාප සාමාජිකයකු තරග කළ යුතුයි කියලා මා සිටියේ දැඩි ස්ථාවරයක. ඒ නිසා පක්ෂ අභ්‍යන්තරයේ ගැටුමක් නිර්මාණය වුණා. ඒ නිසා මම ප්‍රසිද්ධියේම කියනවා වෙන කෙනෙක් දැම්මොත් එජාප පාක්ෂිකයන්ට අසාධාරණයක් වෙනවා කියලා. ඒ ගැන දැඩි කළකිරීමක් තිබුණා. ඒ වගේම තමයි සජිත් ප්‍රේමදාස මහත්මයා නියෝජ්‍ය නායකයා හැටියට පත්කිරීමේදී මම ස්ථාවරේක හිටියා ඔහුට හොඳ තැනක් ලබාදෙනවා කියලා. ඒකටත් පක්ෂයේ පිරිසක් සමඟ මතගැටුමක් ඇතිවුණා. ඒ ගැටුම්වල ප්‍රතිඵලයක් නිසා තමයි මම සියලු තනතුරැවලින් ඉවත් වුණේ.

අපි දැකලා තියෙනවා සජිත් ප්‍රේමදාස මහත්මයාට උදව් කළ ඉම්තියාස් බාකීර්, දයාසිරි ජයසේකර, මෛත්‍රී ගුණරත්න ඒ වගේම ඔබ නැවතුණේ පක්ෂයෙන් ඈත් වෙලා. ඒත් සජිත් ඒ අය ගැන බැලුවෙ නෑ කියලා චෝදනාවක් තියෙනවා. ඒක ඇත්තද?

සමහරු ඔය විදිහට කියනවා. එහෙම චෝදනා තිබුණා කියලා මම පිළිගන්නවා. හැබැයි එතුමට ඒ අය රුකගන්න පක්ෂය ඇතුළේ ලොකු බලයක් තිබ්බෙ නෑ කියලත් මම පිළිගන්නවා. ඒ නිසා ඔහුට ඒ ගැන තීරණයක් ගන්න බැරි වුණා කියලා මම හිතනවා. හැබැයි එතුමට දැන් අවස්ථාවක් ලැබිලා තියෙනවා තමන් වෙනුවෙන් පෙනී සිටි අය ආරක්ෂා කරන්න, ඒ අයගෙන් යම් වැඩ කොටසක් කරගන්න.

ඇත්තටම ඔබට සජිත් ප්‍රේමදාස කතා කළාද? නැත්නම් වෙන අයද කතා කළේ?

මට වෙන අයගේ ඇරයුම් අවශ්‍ය නෑ. මම සජිත් ප්‍රේමදාස මහත්මයා සමඟ පුළුල් සම්බන්ධයක් තිබ්බා. ඒ අනුව තමයි මම සම්බන්ධ වුණේ. ඔහු දිගටම මගේ වැඩකටයුතුවලට සම්බන්ධ වෙලා හිටියා. එතුමා කිව්වා බිම් මට්ටම නැගිට්ටවන්න මගේ සහාය උවමනයි කියලා. ඒක මම පිළිගන්නවා. පහුගිය අවුරුදු 4 2/1 කඩාවැටුණා. පළවෙනි කාරණේ තමයි පක්ෂය සමඟ බිම් මට්ටම ඈත් වුණා. දෙක බලයට එන්න උදව් කළ අය අමතක කළා. ඒ නිසා බරපතළ කළකිරීමක ඔහු හිටියේ.

ඔබ රනිල් වික්‍රමසිංහ මහත්මයා සමඟ බොහොම ළඟින් ඇසුරු කළා. ඔහුගෙන් ආරාධනාවක් තිබුණෙ නැද්ද ඔබට?

රනිල් වික්‍රමසිංහ මහත්මයා මට කිහිපවතාවක්ම කතා කරලා කිව්වා එකතු වෙලා ගමනක් යමු කියලා. අවස්ථා තුනහතරකදිම හමුවීම්වලදී මට කිව්වා. සියලු දේවල් අමතක කරලා එකතු වෙලා වැඩ කරන්න කිව්වා. නමුත් මට ඕන වුණේ පක්ෂයේ අලුත් වෙනසක් සමඟ එකතු වෙන්න. ඒ නිසයි සජිත් සමඟ එකතු වුණේ.

ඔබ 2015 මැතිවරණයේදී ඉවත් වුණේ නොගැලපීම් නිසා. දැන් සජිත් එක්ක තියෙන ගැලපීම මොකද්ද?

ඒකට හේතු ගණනාවක් තියෙනවා. මම මුලින්ම දේශපාලනයට ආවේ එතුමගේ පියා රණසිංහ ප්‍රේමදාස මහත්මයත් එක්ක. මම පාර්ලිමේන්තුවට තේරී පත් වුණේ එතුමගේ පියා ජනාධිපතිවරයා වී සිටි සමයේ. ඒ කාලයේ ඉඳන්ම සජිත් ප්‍රේමදාස මහත්මයා සමඟ ළඟ ඇසුරක් තිබුණා. අනිත් කාරණය වර්තමානය වනවිට පක්ෂයේ වෙනසක් අවශ්‍ය මොහොතක් වෙලා තියෙනවා. අවුරුදු 25ක් එකම ක්‍රමේට ඇවිල්ලා නව ගමනක් යන්න සජිත් ප්‍රේමදාස මහත්මයා අවශ්‍යයි කියලා බිම් මට්ටමේ අදහසක් තිබුණා. ඒක මටත් තේරැණා. ඒ නිසා දැනට සජිත් ප්‍රේමදාස මහත්මයා විතරයි ඉන්නේ. ඒ නිසයි ඔහු සමඟ මේ ගමන යන්න තීන්දු කළේ.

2015 ඉවත් වෙලා ඔබ පැමිණියේ මහින්ද කඳවුරට. මහින්ද රාජපක්ෂ මහත්මයාගේ ආරාධනාවක් තිබ්බෙ නැද්ද එකතු වෙන්න?

එතුමා කීපවතාවක්ම මට කතා කළා. මමයි නිශ්ශබ්දව හිටියේ. මම කිසිම පක්ෂයකට සම්බන්ධ වුණේ නෑ. මම මහින්ද රාජපක්ෂ මහත්මයට එකතු වුණේ මෛත්‍රීපාල මහත්මයා නිසා. ඒවා දේශපාලනයේ සිදුවුණ දේවල්. මම එතුමට ගරු කරනවා. මහින්ද මහත්මයට හොඳ මානුෂීය ගතිගුණ තියෙනවා. එතුමා මට කිව්වේ ක්‍රියාකාරී දේශපාලනයේ සිටින්න කියලා. හැබැයි කිසිම වෙලාවක බල කළේ නෑ ඔහු සමඟ සිටිය යුතුයි කියලා. ඔහු සමඟ නැත්නම් වෙන දේශපාලන පක්ෂයකින් හරි ඉන්න කියලා මට දැනුම් දුන්නා. ඒක මම අගය කරන කාරණයක්.

ඔබ ගෝඨාභය රාජපක්ෂ සම්බන්ධයෙන් හොඳ කියලා තිබ්බා. ඇයි ඔහු අත්හැරලා සජිත් ප්‍රේමදාසව තෝරගත්තේ?

මම හැමදාම විවෘත මනුස්සයෙක්. මම ගෝඨාභය රාජපක්ෂ මහත්මයාගේ දක්ෂකම් අගේ කළ මනුස්සයෙක්. මම දේශපාලන ව්‍යාපාරයක් හැටියට ඔහුට එකඟ නොවුණත් මට ඔහු ගැන පැහැදීමක් තියෙනවා. ඔහු නිලධාරියෙක් හැටියට කරපු ක්‍රියාදාමයන් මම පිළිගන්නවා. ඔහු අවංක නිලධාරියෙක්. මෙතන තියෙන්නේ රටට ඉදිරි නායකත්වය දීමේ ප්‍රශ්නයක්. මොකද සමාජය දැන් කියනවා සාම්ප්‍රදායික දේශපාලනයෙන් ඉවත් විය යුතුයි කියලා. විශ්වාස නෑ. ඒ නිසාම සාම්ප්‍රදායික දේශපාලනඥයන් සමඟ වෛරයක් තියෙනවා. ඒ නිසා ඒ අලුත් දේශපාලන වෙනස ඇති කරන්න සජිත් ප්‍රේමදාසට පුළුවන්. ඔහුගේ ජවය, කැපකිරීම, වැඩ කිරීම, උනන්දුව අනිත් අයට වඩා තියෙනවා. ඔහු තාම මැදි වයසේ ඉන්නේ. ඔහුට තව අවුරුදු 20ක් වැඩ කරන්න පුළුවන්.

ඔබ විශාල ප්‍රශ්න රැසකට පහුගිය කාලේ මුහුණ දුන්නා. ඒ අවස්ථාවලදී සමහර යාළුවෝ ඉන්න ඇති නැතිවෙන්න ඇති. දැන් එයා ඉන්නවද?

ඒක ඉතාමත් හොඳ ප්‍රශ්නයක්. දේශපාලනඥයන් මුහුණ දෙන අමිහිරි අත්දැකීම්වලට මම මුහුණ දුන්නා. ඒකෙදී මට යාළු මිත්‍රයෝ අඳුරගන්න පුළුවන් වුණා. මට කනගාටුම දේ තමයි වැලිකඩ බන්ධනාගාරේ රඳවා සිටීමේදී මාව බලන්න ආවේ අතලොස්සක් වගේ ප්‍රමාණයක් වීම. ඒ හිතවත්කම නැතිකමක් නෙවේ. දේශපාලන වශයෙන් තියෙන බය. ඔවුන් කැපෙයි කියන බය. හැබැයි මෙවැනි සිද්ධියකින් පස්සෙ තමයි යාළු මිත්‍රයෝ, ඥාතීන් හොයාගන්න පුළුවන් වෙන්නේ. දැන්නම් හැමෝම කතා කරනවා. විශාල දුරකථන පණිවිඩ ප්‍රමාණයක් එනවා. මම හැමෝත් එක්කම ඉස්සර වගේ එකතු වෙලා වැඩ කරනවා.

ඒ අත්දැකීම් බෙදාගන්න කැමති නැද්ද?

ඇත්තටම මම මේ ගැන පොතක් ලියනවා. ඒක ඉදිරි සතියේ ජනගත වෙනවා.

ඔබ එක්සත් ජාතික පක්ෂයට ද සහභාගී වෙන්නේ නැත්නම් එක්සත් ජාතික පෙරමුණටද?

මම එක්සත් ජාතික පාක්ෂිකයෙක්. මම මෙතන හිටගෙන ඉන්නේ සජිත් ප්‍රේමදාස මහත්මයා වෙනුවෙන්. ඒක එක්සත් ජාතික පෙරමුණ එක්ක යන්නේ. හැබැයි මම ඒ ගැන හිතන්නෙ නෑ.

සජිත් ප්‍රේමදාසගේ වේදිකාවේ තිස්ස අත්තනායකගේ භූමිකාව මොකද්ද?

මැතිවරණ මෙහෙයුම් කටයුතුවල සියලුම මෙහෙයවීම් කටයුතු මට සහ ඉම්තියාස් බාකිර් මාකාර් මහත්මයාට බාර දීලා තියෙන්නේ. එතන බරපතළ කාරණා ගොඩක් තියෙනවා. අපි දැනටමත් මූලික සැලසුම් ටික සකස් කරලා ඉවරයි. දැනි තියෙන්නේ ඒවා ක්‍රියාත්මක කිරීම විතරයි. අපි කණ්ඩායමක් හැටියට වැඩ කරන්නේ.

ඉතිහාසයේ කවදාවත් නැතුව එජාපය බලයේ ඉන්නකොටම රටේ නායකයාගේ විශාල චෝදනාවකට ලක්වුණා. මේවා ගමේ ජනතාව දන්නවා. හිතනවද මිනිස්සු ඡන්දෙ දෙයි කියලා?

මේ වෙනසත් එක්ක ඒක ගොඩනගාගන්න අපහසු නෑ. මම පිළිගන්නවා 94 සිට මේ වෙනකල් එකම නායකත්වයක් සිටීම නිසා මිනිස්සු යම් කළකිරීමකින් හිටියා. ඒක ස්වභාවික දෙයක්. අපි වාහනයක් ගත්තමත් එහෙමයි. යම් යම් අඩුපාඩු වුණා. හැබැයි දැන් ඒවා අවසන්. දැන් පරණ දේවල් හෝද හෝද මඩේ දාලා තේරුමක් නෑ. දැන් අපිට තියෙන එකම අරමුණ සජිත් ප්‍රේමදාස මහත්මයා ජනාධිපති කරවීම.

දැන් මේ විධායකය අහෝසි කරන්න ඕන කියලා කියනවා. ඔබ පිළිගන්නවද සජිත් ප්‍රේමදාස ජනාධිපති වූ වහාම විධායකය අහෝසි කළ යුතුයි කියලා?

ඒ ගැන විවිධ කතා තියෙනවා. 1994 ඉඳන්ම ජනාධිපතිවරු තුන්දෙනෙක් විධායකය අහෝසි කරනවා කියලා පොරොන්දු දුන්නා. ඒත් පොරොන්දු වුණේ නෑ. හැබැයි දැන් මට තේරෙනවා මිනිස්සු ප්‍රධාන වශයෙන් අවධානය යොමු කරන්නේ විධායකය අහෝසි කරනවා කියන කාරණයට නෙවෙයි. ඒ වගේම අලුත් ව්‍යවස්ථාවක් නෙවෙයි. මිනිස්සුන්ට ඕනේ කඩාවැටිච්ච රට ගොඩනැගීමට නායකත්වයක්. මොකද පහුගිය අවුරුදු 4 තුළ මේ රට කඩා වැටුණා කියලා මම පිළිගන්නවා. නමුත් දැන් ජනතාවට ඕනේ මෙතන ඉඳන් රට ඉස්සරහට ගෙනියන්නේ කොහොමද කියලා. මම හිතනවා විධායකයේ අවුලක් නෙවෙයි මෙතන තියෙන්නේ. දේශපාලන නායකත්වය විසින් ගනු ලැබූ තීන්දු නිසා වෙච්ච පරිහානියක් තියෙන්නේ. ඒ නිසා සජිත් ප්‍රේමදාස මහත්මයා වෙනුවට විධායකය අහෝසි කරන්න කියලා කියනවනම් මම ඒකට එකඟ වෙන්නේ නෑ. මොකද ඒක නැති කරන්න අවස්ථා කිහිපයක් තිබිලත් ඒක නොකර සජිත් එනකොට ඒක කියනවනම් ඒක පිළිගන්නෙ නෑ.

ඔබ නැවතත් පාර්ලිමේන්තු එන්න අදහසක් තියෙනවද?

ඔව්. පැහැදිලිවම ඊළඟ පාර්ලිමේන්තු මැතිවරණයේදී මම පාර්ලිමේන්තු එනවා. මොකද ගිය පාර මැතිවරණයේදී මම ඉල්ලන්න අකමැත්ත පළකළා. මොකද වෙනත් පක්ෂෙකින් හරි ලකුණකින් හරි එන එක මගේ හිතට කහටක් ඇති කළා. මම අවුරුදු 27ක් නොකඩවා පාර්ලිමේන්තුවේ හිටියා.

ඔබ පාර්ලිමේන්තු එන්නේ කොහෙන්ද?

මම ඊළඟ මැතිවරණයේදී මහනුවර දිස්ත්‍රික්කයෙන් තරග කරලා එන්නේ. මහනුවර ජනතාව බලාගෙන ඉන්නේ මම තරග කරනකල්. ඒ නිසා මගේ ජයග්‍රහණය ස්ථිරයි.

මේ වෙනකොට ප්‍රබල අපේක්ෂකයෝ දෙන්නෙක් දැන් කරට කර ඇවිල්ලා ඉන්නේ. ඔබ හිතනවද ගෝඨාභය පරාජය කරලා සජිත්ට දිනන්න පුළුවන් වෙයි කියලා?

මට පැහැදිලි විශ්වාසයක් තියෙනවා සජිත් ප්‍රේමදාස මහත්මයා මේ ජනාධිපතිවරණය ජයග්‍රහණය කරනවා කියලා. ඒකට හේතු ගණනාවක් තියෙනවා. මොකද එතුමට ගම් මට්ටමේ පහළ ජනතාව විශාල සැලකුමක්, විශ්වාසයක් තියෙනවා. ඔහු පෙන්නලා දීලා තියෙනවා මහජනතාවට වැඩ කිරීමේ වැඩපිළිවෙල. විශේෂයෙන් දිවා රාත්‍රී මහන්සි වෙලා එතුමා වැඩ කරලා තියෙනවා. එතුමා රාජ්‍ය දේපළ අවභාවිත කළ කෙනෙක් නෙවෙයි. කොටින්ම එතුමට දෙන රාජකාරි යාන වාහන, නිවාස පවා ලබා නොගත්ත කෙනෙක්. අනික රණසිංහ ප්‍රේමදාස මහත්මයාගේ පුතා හැටියට ඔහු ගැන ලොකු විශ්වාසයක් තියෙනවා. මේ පාර සාම්ප්‍රදායික ඡන්දවලින් ජයග්‍රහණය කරන්න බෑ. තීරණාත්මක ඡන්දවලින් අලුත් තරැණ ඡන්ද. විශේෂයෙන් පාවෙන ඡන්ද හා අලුත් ඡන්ද මට හිතෙනවා මිලියන 4ක් විතර තියෙනවා. මේ ගොඩේ විශ්වාසය දිනාගන්න පුළුවන් පුද්ගලයා තමයි ජනාධිපති වෙන්නේ. මට ඒ නිසා විශ්වාසයි ඔහු මේ අයගේ විශ්වාසය දිනාගන්නවා. ඔහු රට වෙනුවෙන් වටිනාකමක් දීලා තියෙන ඇමැතිවරයෙක්.

► ගයාන් ගාල්ලගේ