සමහරු වැඩ කළේ සජිත් පරද්දන්න

ඡන්දෙකට යන්න මොකටද හදිස්සි වෙන්නේ?
එජාපයට මෙහෙම ගිහින් ඡන්ද දිනන්න බෑ
රජය ගන්න හොඳ තීන්දුවලට සහාය දෙනවා
රනිල් මහත්තයා දැන් නායකත්වයෙන් යන්න ඕනෑ
මේ ප්‍රතිඵලය අපේ ආණ්ඩුව කළ වැරදිවලට උත්තරයක්
සජිත් - මර්වින් වේදිකාවට පැමිණීම සාමාන්‍ය දෙයක්

- එක්සත් ජාතික පක්ෂ පාර්ලිමේන්තු මන්ත්‍රී රංජිත් මද්දුමබණ්ඩාර

එජාපය ඇතුළු සියලු දෙනා විශාල ජයග්‍රහණයක් බලාපොරොත්තුවෙන් තමයි සජිත් ප්‍රේමදාස මහත්මයව ජනාධිපති අපේක්ෂකයා හැටියට ජනතාව ඉදිරියට ගෙනාවේ. ඒත් හිතුව තරම් ජයග්‍රහණයක් ලබන්න බැරි වුණා නේද? මොකද්ද ඒකට හේතුව?
ඒක මම දකින්නේ 56 මැතිවරණය වගේ ජාතිවාදය පදනම් වෙච්ච මැතිවරණයක් වීම කියලයි. මෙම මැතිවරණයේදී මම දැක්කා ආගමික නායකයන් ඒ සඳහා මැදිහත් වෙලා සිටිනවා. අපේ යම් ක්‍රියාකාරකම්වලට විරුද්ධවයි මේ මැතිවරණය ක්‍රියාත්මක වුණේ.

ජාතිවාදය හරි ආගමික නායකයන්ගේ මැදිහත්වීම හරි ඔබලට විරුද්ධව සිටගත්තේ එක්සත් ජාතික පක්ෂය ප්‍රමුඛ එම සන්ධානයෙන් බලාපොරොත්තු නොවුණු යම් යම් දේවල් රටට සිදුවෙන්න පටන්ගත්ත නිසා කියලා ඔබට හිතෙන්නෙ නැද්ද?
අපේ යම් යම් අයගේ ප්‍රකාශ බුද්ධ ශාසනයට විරුද්ධව අපහාස වන ආකාරයට සිදුවුණා කියලා මගෙත් අදහසක් තියෙනවා. ඒ නිසා තමයි මෙවැනි තත්ත්වයකට අපිට මුහුණ දෙන්න සිද්ධ වුණේ. එහෙම නැතුව සංවර්ධනයවත් ප්‍රජාතන්ත්‍රවාදයවත්, සාධාරණ සමාජයක් ගැනවත් සැකයෙන් නෙවෙයි මිනිස්සු ඡන්දෙ දුන්නේ. මේ ජනතාව දුන්නේ අවුරුදු 4ක් තිස්සේ අපේ රජය කරපු වැරදිවලට උත්තරේ.

එක්සත් ජාතික පක්ෂයේ මන්ත්‍රීවරු මේ වනවිට ප්‍රසිද්ධියේ කියනවා මේ පරාජයට එජාපයේම තුන්හතර දෙනෙක් වගකියන්න ඕන කියලා. ඇත්තටම එහෙම දෙයක්ද මේ සිද්ධ වුණේ? නැත්නම් ආණ්ඩුව ද වගකියන්න ඕනේ?
මෙහෙමයි. ආණ්ඩුවක් හැටියට මේ පරාජයේ වගකීම පොදුවේ ගන්න වෙනවා. හැබැයි අපේ යම් යම් කීපදෙනෙක් කරපු දේවලුත් මේ පරාජයට වගකියන්න ඕන. අන්න ඒ ගැන කල්පනා කරලා ඒකට අවශ්‍ය පියවර ගන්න වෙනවා.

සමහර අය කියනවා පක්ෂයට අලුතින් එකතු වෙච්ච අය තමයි මේ පරාජයට හේතු කාරණා වුණේ කියලා. විශේෂයෙන් ඒ අය යම් අරමුණක් හිතේ තබාගෙන මේ මැතිවරණය මෙහෙයුම සිදුකළා කියලා චෝදනා තිබෙනවා. 
අලුත් පරණ කියලා දෙයක් නෑ. යම් කෙනෙක් වැරදි කළානම් ඒ වැරැද්ද සමස්ත මැතිවරණ ව්‍යාපාරයටම බලපානවා. මම කියන්නෙත් හැමෝම වැරදි කළා. හැබැයි මෙහෙම දේවල් වෙන්න අපේ ප්‍රතිපත්තිවල යම් වරදක් තියෙනවා කියලා අපි පිළිගන්නවා. ඒ වරද අපි බාරගන්නම වෙනවා.

සජිත් ප්‍රේමදාස මහත්මයට වැඩිම ජයග්‍රහණය ලැබුණේ උතුරු නැගෙනහිර ජනතාවගේ ඡන්දයෙන්. ජයග්‍රහණය කරපු අය කියන චෝදනාවක් තමයි දෙමළ සන්ධානය සමඟ ඇති කරගත් ගිවිසුමේ ප්‍රතිඵලයක් හේතුවෙන් මෙලෙස ඡන්ද ලැබුණු බව. ඇත්තටම එහෙම එකඟතාවයකට ගියාද?
එවැනි ගිවිසුමක් ඇත්තටම නෑ. නමුත් පොදු ජන පෙරමුණට වඩා එක්සත් ජාතික පක්ෂය කෙරෙහි සුළු ජාතීන්ගේ විශ්වාසයක් තියෙනවා. ඔවුන් පිළිගන්න දෙයක් තමයි මේ රටේ ඔවුන්ට හොඳම ආරක්ෂාව ලැබෙන්නේ එක්සත් ජාතික පක්ෂයෙන් බවට. මේ ඡන්දයට විශාලම හේතුව ජාතිවාදය. ඒ ජාතිවාදය ඇති කළේ පොදු ජන පෙරමුණ. ඒක ජනාධිපතිතුමා තමන්ගේ පළවෙනි ජාතිය ඇමතීමේදිත් කිව්වා “මට සුළු ජාතීන්ගේ ඡන්ද හම්බුණේ නෑ. මට උදව් කළේ හාමුදුරුවරු. මම දිනුවේ සිංහල ඡන්දවලින්” කියලා. අපි කියන්නේ එහෙම බෙදීමකින් රට ඉදිරියට කරගෙන යායුතු නෑ. අපි ඉතිහාසයෙන් පාඩම් ඉගෙනගෙන තියෙනවා.

පසුගිය අප්‍රේල් 21 වැනිදා සිදුවුණු පාස්කු ප්‍රහාරයෙන් පස්සේ ජාතික ආරක්ෂාව කෙරෙහි රජය තුළ වගකීම අඩු බවට තහවුරු වීමක් ජනතාව අතරට ගියා. ඒ බව නිසා නෙවෙයිද මේ පරාජයට හේතුවක් වෙන්න ඇත්තේ.
ජාතික ආරක්ෂාව පිළිබඳ වගකීම රජයක් හැටියට සාමූහිකව අප බාරගත යුතුයි. ඒ වගේම ආරක්ෂක අමාත්‍යවරයාත් නීතිය හා සාමය භාර අමාත්‍යවරයාත් එහි සියලුම වගකීම බාරගතයුතුයි. ඒ තනතුරු දෙකම කළේ එක්සත් ජාතික පක්ෂය නෙවෙයි. ඒකෙ වැඩ කළේ හිටපු ජනාධිපතිතුමා. එතුමා ඒ වගකීම බාරගන්න ඕන. එවක හිටිය නිලධාරීන් දෙදෙනා දැන් රිමාන්ඩ් එකේ. හැබැයි ඒකෙ සියලු වන්දිය ගෙවන්න වුණේ එක්සත් ජාතික පක්ෂයට. ඊටපස්සෙ නම් කිසිම සිද්ධියක් මේ රටේ ඇති වුණේ නැහැ. මේ ප්‍රහාර අපේ රටේ විතරක් නෙවෙයි ලෝකයේ හැම රටකටම එල්ල වෙලා තියෙන බලපෑමක්. හැබැයි ඒ විරැද්ධ පාර්ශ්වය මේ ප්‍රහාරය යොදාගත්තා එක්සත් ජාතික පක්ෂයට විරුද්ධව ගොඩනැගිය හැකි චෝදනාවක් හැටියට.

අපේක්ෂකයා වුණු සජිත් ප්‍රේමදාස මහත්මයා එජාපයේ නියෝජ්‍ය නායකකමිනුත් ඉවත් වෙලා දේශපාලනයෙන් මදක් ඈත් වෙන්න තීරණය කරලා තියෙනවා කියලා ආරංචි තියෙන්නේ. මේ තීරණය අරගත්තෙ ඔහුගේ කැමැත්ත මතද නැත්නම් ඔබලත් එක්ක සාකච්ඡා කරලද?
එතුමා පරාජයෙන් පස්සේ නියෝජ්‍ය නායකකමින් ඉවත් වුණා. හැබැයි ඔහු දේශපාලනයෙන් සමුගන්න තීරණය කළේ නෑ. ඒ වගේම එතුමා දේශපාලනයෙන් ඈත්වීමකුත් නෑ. එතුමා අවංක නිහතමානී නායකයෙක්. පරාජයේ වේදනාව මිස එතුමා දේශපාලනයෙන් ඉවත් වෙන්නෙ නෑ. එතුමා එක්සත් ජාතික පක්ෂයේ ජනප්‍රියම නායකයා.

සජිත් ප්‍රේමදාස මහත්මයා නැවත ආගමනය කරන්න යන්නේ මොන ආකාරයටද ඔබ හිතන්නේ?
එතුමා ඇතුළු අපේ කණ්ඩායමම නව මුහුණුවරකින්, අලුත් වෙනසකින් ජනතාව ඉදිරියට එනවා.

ඒ කියන්නේ අලුත් පක්ෂෙකින්ද එන්න යන්නේ?
නෑ. මම කියන්නේ එක්සත් ජාතික පක්ෂයේ ව්‍යූහයත් එක්සත් ජාතික පක්ෂයේ මුහුණුත් හැකි ඉක්මණින් වෙනස් වෙනවා.

මුහුණු වෙනස් වුණාම විතරක් ඇද්ද?
අනිවාර්යයෙන්ම එක්සත් ජාතික පක්ෂය තුළ වෙනසක් සිදුවිය යුතුයි. ඒ වෙනසත් එක්ක එක්සත් ජාතික පක්ෂය අලුත් මුහුණුවරකින් පටන්ගන්න ඕන.

එක්සත් ජාතික පක්ෂයේ පරාජය වෙච්ච හැම මැතිවරණයක් තුළදීම හැමදාම කියන්නේ ඔය කතා ටිකම තමයි. හැබැයි කිසිම වෙනසක් සිද්ධ වෙන්නේ නෑ. මේකත් එවැනිම ප්‍රකාශයක් නේද?
රනිල් වික්‍රමසිංහ මහත්මයා අවුරුදු 25ක් 30ක් මේ පක්ෂයේ නායකත්වය දරණවා. එතුමා දැන් මේ පක්ෂය තරුණ පරපුරට බාරදෙන්න ඕන කාලේ. ඒක එතුමත් හොඳට කල්පනා කරන්න ඕන දෙයක්. එජාපය ඒ වෙනස නොවුණු නිසයි දිගින් දිගටම අපි මෙලෙස පරාජය වුණේ. ඒ නිසා ඉක්මණින් මේ වෙනස සිදුවෙන්න ඕන. ඒක ජනතාව පවා බලන් ඉන්න දෙයක්.

ඔබ කියන මේ වෙනස ඇතුළත සජිත් ප්‍රේමදාස මහත්මයට මොන වගේ ස්ථානයක්ද හිමිවිය යුත්තේ?
පාක්ෂිකයො නම් කියන්නේ සජිත් ප්‍රේමදාස මහත්මයගේ නායකත්වයෙන් ඊළඟ මැතිවරණයට එන්න ඕන කියලා. ඒක සිදුවිය යුතු දෙයක්. 
රනිල් වික්‍රමසිංහ මහත්මයා අගමැතිකමෙන් යනකොට කිව්වා තමන් පක්ෂ නායක වගේම නැවත විපක්ෂ නායකයා හැටියටත් එනවා කියලා.

දැන් එතකොට විපක්ෂ නායක රනිල් වික්‍රමසිංහ මහත්මයද?
මම හිතන්නේ එතුමා පස් සැරයක් ඇගමැතිවරයා හැටියට කටයුතු කරලා තියෙනවා. ඒ තරම් ප්‍රමාණයකුත් විපක්ෂනායක හැටියටත් කටයුතු කරලා තියෙනවා. මේ වගේම තීරණයක් ගත්තා ඩඩ්ලි සේනානායක මහත්මයා 1973දී. ඒ වගේ මෙතුමත් තීරණයක් අරන් අලුත් පරපුරකට පක්ෂෙ බාරදීලා ඉවත් වෙන එක හොඳයි. එතුමා යටතේ ජයග්‍රහණය කරන්න බෑ කියලා ජනතාව දැන් තේරැම් අරන් ඉවරයි.

අකිල විරාජ් කාරියවසම් මහත්මයා නලින් බණ්ඩාර මන්ත්‍රීවරයාගේ ප්‍රකාශයකට පිළිතුරු ලබාදෙමින් කියා තිබුණා මැතිවරණ ප්‍රචාරණ කටයුතු වොක්ෂෝල් වීදියේ කළ බවත් එතන තිස්ස අත්තනායක මහතා කටයුතු කළ බවත්, පරාජයට ඒ අය වගකිව යුතු බවත්. ඒක ඇත්තද?
මැතිවරණ ව්‍යාපාරය පිළිබඳව යම් යම් ප්‍රශ්න දැන් ගොඩනැගිලා තියෙනවා. සමහර අය මැතිවරණ ව්‍යාපාරයට සහභාගී වුණේ නෑ කියලත් දැන් දැන් කරැණු ලැබිලා තියෙනවා. මමනම් කියන්නේ හැමදෙනාම එකතු වෙලා මේ මැතිවරණ ව්‍යාපාරය කළානම් අපට ජයග්‍රහණය කරන්න ඉඩ තිබුණා.

ඔබ කියන්නේ නලින් බණ්ඩාර මන්ත්‍රීවරයා කිව්වා සේ මැතිවරණ ව්‍යාපාරයේදී කකුලෙන් ඇදපු පිරිසකුත් හිටියද?
හුඟක් අයනම් කියනවා එහෙම දේවල් සිද්ධ වුණා කියලා. දැන් එහෙම වෙලා තියෙන බවට සාක්ෂි ලැබෙමින් පවතිනවා.

රාජපක්ෂ පසුගිය ආණ්ඩුවේ හිටපු සචින් වාස්, මර්වින් සිල්වා වැනි අය ඔබලගේ වේදිකාවල දකින්න ලැබුණා. ගොඩක් අය ඒ සම්බන්ධයෙන් විවේචන කර තිබුණා. ඒ දේවල් මේ පරාජයට බලපෑවා කියලා හිතන්නෙ නැද්ද?
ඒ අය කිව්වේ රාජපක්ෂ ආණ්ඩුවේ තිබ්බ ක්‍රියාකාරකම් ගැන. අපිට වඩා ඒ අය රාජපක්ෂ ආණ්ඩුවේ අඩුලුහුඬුකම් වංචා දූෂණ ගැන දන්නවා. මම දන්නෙ නෑ ඒ අය වේදිකාවට නැග්ග එක ගැන තියෙන වරද මොකද්ද කියලා. ඒ අය යම් යම් ප්‍රකාශ කළා. ඕවා සාමාන්‍යයෙන් වේදිකාවල වෙන දේවල්. මේවා දේශපාලනයේ සාමාන්‍ය දේවල්.

දැන් රාජපක්ෂවරු නැවතත් බලයට පත්වෙලා තියෙන්නේ. මේ බලය නැවත අල්ලන එක ලේසි නෑ. මොකද්ද ඊළඟ සැලසුම මේ බලය අල්ලන්න?
මම ඉස්සෙල්ලා කිව්වා වගේ ප්‍රථමයෙන්ම එක්සත් ජාතික පක්ෂය වෙන මුහුණුවරකින් එන්න ඕන. අලුත් ප්‍රතිපත්ති මාලාවක් ගේන්න ඕන. සියලු ජාතීන්ට එකතු වෙන්න පුළුවන් පක්ෂයක් වෙන්න ඕන. සිංහල ජාතියට වැඩි ගෞරවයක් දෙන තැනක් වෙන්න ඕන. අපිට අහිමි වුණේ සිංහල බෞද්ධ ඡන්ද. ඒවා ලබාගන්න වැඩපිළිවෙළක් සකස් කරන්න ඕන. මොකද දැන් තියෙන මුහුණුවර සිංහල බෞද්ධ විරෝධී මුහුණුවරක් තියෙන්නේ. ඒක වෙනස් වෙන්න ඕනේ.

බහුතරයක් දෙනා කියන්නේ ඉක්මන් මහ මැතිවරණයකට යා යුතුයි කියලා. එක්සත් ජාතික පක්ෂෙ හිතන්නේ මොකද්ද හොඳම දේ?
එක්සත් ජාතික පක්ෂයේ මතය වගේම මගේ මතය වන්නේ හදිසි මහමැතිවරණයකට යාම සුදුසු නැති බවයි. ව්‍යවස්ථාව අනුව අපිට බලය තියෙනවා පාර්ලිමේන්තුවේ බහුතරය ඉන්නවා. ඒ වගේම අධිකරණ තීන්දුවකුත් දීලා තියෙනවා. ඇයි අපි එහෙමනම් මෙච්චර හදිස්සි වෙන්නේ?

ඔබලගේ සමහර අය කියනවනේ මැතිවරණයකට යායුතුයි කියලා.
ඇයි අපි එහෙම මැතිවරණයකට යන්නේ? ඔය එහෙම කියන අය රාජපක්ෂලා එක්ක යටින් ඩීල් දාගත්ත කට්ටිය. ජනතාව දන්නවා ඒ අය කවුද කියලා. යම් යම් දේවල්වලට ඒ අය සම්බන්ධයි. කොහොමත් මහ මැතිවරණය මම ප්‍රතික්ෂේප කරනවා. එන වෙලාවට, හරි වෙලාවට අපි යමු මැතිවරණයකට.

බහුතරය ඉන්නේ එජාපය තුළ. මේ පත්වෙන්නේ සුළුතර ආණ්ඩුවක්. ඔබලට ඕනෙනම් පුළුවන් ආණ්ඩුවෙන් ගේන වැඩ අල කරන්න. මේ ඒ වැඩේ නේද කරන්න හදන්නේ?
රජය හොඳ තීන්දු ගන්නවනම් අපි ඒකට සහයෝගය ලබා දෙනවා. හැබැයි වැරදි තීන්දු ගත්තොත් අපි ඒකට විරුද්ධව කටයුතු කරනවා. ඒකයි ප්‍රජාතන්ත්‍රවාදය. හැබැයි අපිට බහුතර බලය තියෙනවා කියලත් ජනතාවට සුභවාදී තීන්දුවලට එරෙහිව කටයුතු කරන්න යන්නෙ නෑ.

ඔබලා බලාපොරොත්තු වෙන්නේ පක්ෂයේ වෙනසක්. හැබැයි මේ වෙනකොට විපක්ෂ නායකකමත් එහෙම්මම තියෙනවා. දැන් කාටද විපක්ෂ නායකකම දෙන්න ඕනේ?
පක්ෂ නායකකමයි විපක්ෂ නායකකමයි දෙන්නෙක්ට දෙන්න බෑ. දෙනවනම් දෙකම එක්කෙනෙක්ට දෙන්න ඕනේ. එහෙම දීලයි පක්ෂෙ ඉස්සරහට ගන්න ඕනේ.

වර්තමාන ජනාධිපතිවරයා පත්වෙලා දැන් දවස් කීපයක් ගතවෙලා. ඔබ හිතන්නේ මොකද්ද ඔහුගේ වැඩපිළිවෙළ ගැන?
වේලාසන වැඩියි මම හිතන්නේ ඒ ගැන කතා කරන්න. අපි ඉස්සරහට වෙන දේවල් එක්ක බලමු.

මම දැකලා තියෙනවා මැතිවරණ පරාජයකින් පස්සේ එක්සත් ජාතික පක්ෂයේ තීන්දු තීරණ ගන්නේ පක්ෂෙ කෘත්‍යාධිකාරී මණ්ඩලය මගින්. ගොඩක් අය කියනවා කෘත්‍යාධිකාරී මණ්ඩලය පක්ෂග්‍රාහී කියලා. දැන් ඔබලා හිතන පතන දේ කරගන්න පුළුවන් වෙයිද?
ජනතාවගේ ඡන්දයෙන් තේරී පත්වෙලා ඉන්නෙ අපි. ජනතාවගේ බහුතර කැමැත්ත තියෙන්නේ අපිට. හැබැයි කාත්‍යාධිකාරී මණ්ඩලය පත් කරන්නේ නායකයා. මම හිතන්නේ කෘත්‍යාධිකාරී මණ්ඩලයට වඩා ජනතා නායකයන්ගෙන් තමයි තීන්දු තීරණ ගන්න ඕන. හැබැයි කෘත්‍යාධිකාරී මණ්ඩලයත් අවශ්‍යයි. නමුත් පක්ෂයේ සම්පූර්ණ තීන්දු තීරණ කෘත්‍යාධිකාරී මණ්ඩලයට ගන්න දෙන්න බෑ. විශේෂයෙන් නායකතුමාගේ එහෙයියන්ටනම් අපේ පක්ෂයේ තීන්දු තීරණ ගන්න දෙන්න බෑ.

අවසාන වශයෙන් ඔබෙන් අහන්නේ ඔය හිතන ආකාරයේ වෙනසක් පක්ෂය ඇතුළේ කරන්න බැරි වුණොත් මොකද කරන්නේ?
සිදුවිය යුතුයි. එසේ නොවී තිබෙන්න බෑ. ඒක නොවී මේ තියෙන තත්ත්වයෙන් ගිහිල්ලනම් ඡන්දයක් දිනන්න බෑ.

මොන දේ කළත් පක්ෂ නායකතුමා කැමති වෙන්න එපැයි. එතුමගේ අදහස මොකද්ද?
අපි තාම එතුමා එක්ක කතා කළේ නෑ. අපි එතුමා එක්ක කතා කරලා යම් තීරණයක් ගන්නවා. 

► ගයාන් ගාල්ලගේ