පක්ෂයේ හැමෝම පරාජයට වගකිවයුතුයි

මේ ආණ්ඩුවේ පරණ පුරුදු දැන් පෙන්වනවා
ලසන්ත - තාජුඩීන් ඝාතන ගැන පරීක්ෂණ කිරීම වැරදිද?
නායකතුමා යන්න හදනවා: සමහරු වළක්වනවා
සීඅයිඩීයේ හිටපු දක්ෂම නිලධාරීන් අද ඉවත් කරලා
ආණ්ඩුව ආපු අලුත වැඩ කරන්න ඉඩදෙන්න ඕනෑ
උතුරට දකුණට කියා වෙන වෙනම නායකයෝ නෑ
විපක්ෂ නායකකම සජිත්ට ලැබීම ඉතා වැදගත්

- එක්සත් ජාතික පක්ෂ පාර්ලිමේන්තු මන්ත්‍රී අජිත් පී. පෙරේරා

මෙච්චර කල් තිබ්බ ප්‍රශ්නයක් පසුගිය දවසක විසඳගත්තා. ඒ සජිත් ප්‍රේමදාස මහත්මයව විපක්ෂ නායකයා හැටියට පත්කිරීමත් එක්ක. දැන් ප්‍රශ්න ඉවරද?
විපක්ෂ නායක ධූරය කියන්නේ එක්සත් ජාතික පක්ෂයම විතරක් නෙවෙයි. රටේ විපක්ෂය වෙනුවෙන් පෙනී ඉන්න ඒ වගේම රටේ මුළුමහත් ජනතාව වෙනුවෙන් පෙනී ඉන්න තනතුරක් තමයි විපක්ෂ නායක ධූරය කියන්නේ. එවැනි තනතුරක් ලැබීම ඉතාම වැදගත් දෙයක්. විශේෂයෙන් පක්ෂය ඇතුළේ බෙදීමක් ඇති නොවී ගැටලුවක් ඇති නොකරගෙන මේ ප්‍රශ්න විසඳගන්න පුළුවන් වෙච්ච එක ඇත්තටම හොඳ දෙයක්. විශේෂයෙන් ඒකමතිකවගත් මේ තීන්දුව විශාල ජයග්‍රහණයක්.

එතකොට එක්සත් ජාතික පක්ෂයේ නායකත්වය දැන් අවශ්‍ය නැද්ද?
එක්සත් ජාතික පක්ෂයේ නායකත්වයත් සජිත් ප්‍රේමදාස මහත්මයට අනිවාර්යයෙන් ලැබිය යුතුයි. ඒ ගැන පුළුල් එකඟතාවයක් තියෙනවා. අපි මේ වෙනකොට තීන්දු කරලා තියෙනවා නත්තල වෙනකොට මේ සියලු ප්‍රශ්න විසඳලා ඉවර කරන්න. පක්ෂය ප්‍රජාතන්ත්‍රවාදී කරලා සමස්ත ව්‍යූහයම වෙනස් කරන්න අපි තීන්දු කරලා තියෙනවා.

අපි දැක්කා සමාජ මාධ්‍යවල කියලා තියෙනවා පක්ෂ නායකකම තවදුරටත් රනිල් වික්‍රමසිංහ මහත්මයා ළඟ තියාගන්නවා කියලා?
ඒක සත්‍යයක් නෙවෙයි. ගරු නායකතුමා පක්ෂය අලුත් නායකත්වයට බාර දීලා ඉවත් වෙන්න සූදානම් වෙලා ඉන්නේ. ඒක අපි අගය කරන දෙයක්. එතුමා රට වෙනුවෙන් සහ පක්ෂය වෙනුවෙන් විශාල සේවයක් කරපු නායකයෙක්. මගේ මතය සහ අපි කතා වුණු දේවල් එක්ක එතුමා විශ්‍රාම යන්න සූදානමින් ඉන්නේ.

රනිල් වික්‍රමසිංහ මහත්මයාට මෙතනින් පස්සේ එක්සත් ජාතික පක්ෂය තුළ තියෙන තැන මොකද්ද?
අවුරුදු 25ක් එතුමා අපේ පක්ෂයේ අද්විතීය නායකයා වෙලා ඉඳලා තියෙනවා. අපේ ගෞරවය එතුමට හිමිවෙනවා. අපේ සහ පාක්ෂිකයන්ගේ ගෞරව සම්මාන තරම් එතුමට වෙනත් සම්මානයක් නෑ.

විපක්ෂ නායකකම කියන්නේ භාරදූර තනතුරක්. පසුගිය කාලේ විපක්ෂය කළ ඔබලා වගේම දෙමළ ජාතික සන්ධානයටත් චෝදනා තිබ්බා ආණ්ඩුවත් එක්ක ඩීල් කරනවා කියලා. මේ පාරත් එහෙමද වෙන්නේ?
සජිත් ප්‍රේමදාස කවදත් රාජපක්ෂලා එක්ක ඩීල් දාපු නායකයෙක් නොවෙයි. අපි කවදාවත් රාජපක්ෂලත් එක්ක ඩීල් දාලා නෑ. අපි හැමදාම රාජපක්ෂලගේ දේශපාලනයත් එක්ක සටන් කරපු මිනිස්සු. ඒ නිසා අපි හොඳට විපක්ෂයේ භූමිකාව ඉටු කරනවා. ඒ මේ මාස තුනට. ඊළඟ පාර්ලිමේන්තු මැතිවරණයේදී නැවත අපි බලය ලබාගන්නවා.

අපි දැක්ක දෙයක් තමයි ඡන්දයෙන් පස්සේ එක්සත් ජාතික පක්ෂය එකපාරටම නිහඬ වුණා. ඇයි මේ එකපාරටම නිහඬ වුණේ?
අලුත් ජනාධිපති කෙනෙක් පත්වෙලා තියෙනවා. අපි ඒ වගේම ආණ්ඩුවෙන් ඉවත් වෙලා ජනාධිපතිතුමාට කැමති ආණ්ඩුවක් එක්ක කරගෙන යන්න ඉඩ ලබාදීලා තියෙනවා. ඒ නිසා සුළු කාලයක් ඒ වැඩකටයුතු කරගෙන යන්න ඉඩ දෙන්න ඕන. ඒක තමයි ප්‍රජාතන්ත්‍රවාදීකම. හැබැයි නැවත වරක් සුදු වෑන් පැමිණීම ගැන, මාධ්‍යවේදීන්ගෙන් ප්‍රශ්න කරපු එක ගැනත් ඒ වගේ දේවල් ගැන අපි විරෝධතාවය දක්වලා තියෙනවා. ඒ නිසා සුළු ඉඩකඩක් ලබාදෙන්න ඕන ඔවුන්ගේ වැඩකටයුතු කරගෙන යන්න.

ආණ්ඩුව දීලා විපක්ෂයට යන්න තීන්දු කළේ ඔබලා එකතු වෙලා ගත්ත තීරණයක්ද? නැත්නම් නායකතුමාගේ තීන්දුවක්ද?
අපි ඒ ගැන ප්‍රතිපත්තිමය තීරණයක සිටියා. යම් ආකාරයකින් ජනාධිපතිවරණය පරාජය වුවහොත් දිනන අපේක්ෂකයට ආණ්ඩුවක් කරගෙන යන්න ඉඩ ලබා දෙනවා කියලා අපි තීරණය කරලා තිබ්බේ. සමහරු පසුව ඉල්ලා අස් වුණා. අපි ඊට කලින් ඉල්ලා අස්වුණා. ඒ ඉල්ලා අස්වීම් ගැන පක්ෂය ඇතුළේ ගැටලුවක් තිබ්බෙ නෑ.

මේ අතර ඇතැම් අය කිව්වා ඉක්මනින් පාර්ලිමේන්තු මැතිවරණයකට යා යුතුයි කියලා. ඇයි ඔබලා ඊට එකඟ නොවුණේ?
එහෙම කිව්වේ හිටපු එක ඇමැතිවරයෙක් විතරයි. ඒක ඔහුගේ පෞද්ගලික අදහසක්. බහුතර කැමැත්ත වුණේ අප්‍රේල් මාසේ හරි මැයි මාසෙ හරි පාර්ලිමේන්තු මැතිවරණයකට යායුතුයි කියලා. විශේෂයෙන් පරාජය වුණ කණ්ඩායමට යම් ඉඩකඩක් අවශ්‍යයි හුස්ම අරගෙන යළි ඊළඟ මැතිවරණයට පැමිණෙන්න.

ඔබට හිතෙන විදිහට ඇත්තටම මේ පරාජයට හේතුව කුමක්ද?
මම හිතන්නේ ආණ්ඩුවේ නායකයන් රාජ්‍ය පාලනයේදී දක්වපු අදක්ෂකම් ප්‍රධාන වශයෙන් බලපෑවා. ඒ වගේම ආණ්ඩුව කරපු හොඳ දේවල් ජනතාව අතරට සන්නිවේදනය කර ගැනීමට නොහැකි වීම තවත් හේතුවක්. ඒ වගේම පක්ෂෙ තුළ හිටපු තරුණ උගත් අයට තැනක් හම්බුණේ නෑ. මේ සියල්ල හේතු වෙලා තමයි මේක වුණේ. නැවත එවැනි තත්ත්වයක් ඇති නොවෙන්න අපි කටයුතු කරනවා.

අපි දැක්කා සමහර අවස්ථාවල මේ පරාජයට එක් එක් පුද්ගලයන්ගේ නම් සඳහන් කරනවා. ඔවුන් තමයි මේ පරාජයට හේතු කියලා. එහෙම අය ඉන්නවද පරාජයට හේතු වුණ?
මම හිතන්නේ රජයේ හිටිය සියලු දෙනාම එක එක මට්ටම්වලින් මේකට වගකියන්න ඕන.

රනිල් වික්‍රමසිංහ මහත්මයා මැතිවරණ පරාජයෙන් පස්සේ ප්‍රකාශයක් සිදු කළා එතුමා සිදු කළේ උතුර නැගෙනහිර ඡන්ද මෙහෙයුම. එතුමා ගත්ත දේ දිනවලා දුන්නා කියලා. එතකොට දකුණේ පරාජයට ඔබලා වගකියන්න ඕන නේද?
එතුමගේ ප්‍රකාශය කරුණු අනුව වැරදියි. වෙනම උතුරට නායකයා, දකුණට නායකයා කියලා නායකයො නෑ. උතුරු නැගෙනහිර විතරක් නෙවෙයි මධ්‍යම කඳුකරෙත් ජයග්‍රහණය කළා. බස්නාහිර පළාතෙත් මුස්ලිම් හා දෙමළ ජනතාව ඉන්න ප්‍රදේශ අපි ජයග්‍රහණය කළා. ඒ නිසා මේ රටේ සුළු ජාතිකයන් අපිට ඡන්දෙ දුන්නා. අපිට තිබ්බෙ බෞද්ධ ජනතාවගේ ඡන්දවල ප්‍රශ්නේ. කතෝලික ජනතාවත් අපිට ඡන්දෙ දුන්නා. ඒ නිසා කරුණක් වශයෙන් මේ ප්‍රකාශය වැරදියි. ඒ නිසා එතුමා විශ්‍රාම යන්න ඉන්න නිසා අපිට ඒ ගැන තර්ක කරන්න අවශ්‍ය නෑ. 

ඔබ විශ්‍රාම යන්න සූදානම් කියලා කිව්වට ඔබේ නායකයා තාම ඒ පිළිබඳ ප්‍රකාශයක් කරලා නෑ. මේක ඔබලා බලෙන් යවන්න හදන විශ්‍රාම ගමනක්ද?
මගේ විනිශ්චය, ලැබෙන තොරතුරු සහ කරුණු අනුව එතුමා විශ්‍රාම යන්න ලෑස්ති වෙලා ඉන්නේ. හැබැයි එතුමා විශ්‍රාම යන එක නවත්තන්න කීපදෙනෙක් උත්සාහ කරනවා. 

මහින්ද රාජපක්ෂ මහත්මයා කිව්වා පසුගිය දවසක අරලියගහ මන්දිරයේ ෆයිල් වගයක් දාලා ගිහිල්ලා තියෙනවා කියලා. ඒ ෆයිල් කොහෙන්ද එතනද ආවේ? මේක අමාරුවෙ වැටෙන දෙයක් වෙන්න පුළුවන් නේද?
මට ඒකට උත්තර දෙන්න අමාරුයි. රනිල් වික්‍රමසිංහ මැතිතුමා කිව්වා එහෙම ෆයිල් වගයක් තිබුණෙ නෑ කියලා. අපිට නම් ඒ වගේ තොරතුරු ලැබිලා නෑ. මහින්ද රාජපක්ෂ මහත්මයගේ පැත්තෙන් එන තොරතුරුනේ මේවා. ඇත්ත වෙන්නත් පුළුවන් බොරු වෙන්නත් පුළුවන්.

ඔබලා කිව්වා ඡන්ද පරාජයට හේතුව සිංහල බෞද්ධ ඡන්ද අඩුවීම කියලා. ඇත්තටම සිංහල බෞද්ධ ඡන්ද අඩුවෙන්න හේතුව මොකද්ද?
හේතු ගණනාවක් තියෙනවා. විශේෂයෙන් පක්ෂෙ නායකයන් බෞද්ධ ජනතාවගේ අයිතිවාසිකම් වෙනුවෙන් පෙනී ඉන්නෙ නෑ කියලා මතයක් හැදිලා තිබුණා සමාජය තුළ. විශේෂයෙන් සුළු ජාතිකයන් අපේ පක්ෂෙ වටා ගොනු වෙනකොට සිංහල බෞද්ධ ජනතාව අපෙන් ඈත් වුණා කියලා හිතන්නත් පුළුවන්. හැබැයි අපේ සිංහල කතෝලික මිනිස්සු ඡන්දෙ දුන්නා. කොහොම වුණත් මේකට එක හේතුවක් කියලා කියන්න බෑ. ඒත් සමහරක් විට ආර්ථික හේතුත් බලපාන්න පුළුවන්. ඒ නිසා මේක ගැඹුරින් විග්‍රහ කරලා බලන්න ඕන ප්‍රශ්නයක්.

ආණ්ඩුවෙන් ඔබලා කරපු දේවල් සම්බන්ධව හොයන්න කොමිසමක් දාන්න හදනවයි කියලා කතාවක් තියෙනවා. ඒක මොන ආකාරයකට බලපායිද ඔබ දකින විදිහට?
කොහොමත් අපි බලයේ ඉන්නකොටත් මෛත්‍රීපාල මහත්මයා කොමිසමක් දැම්මනේ. ලෝක ඉතිහාසයේ පළවෙනි වතාවට එහෙම කළේ. ඒක වරදක් නෙවෙයි. කිසිම දේශපාලන අරමුණක් නැතුව කොමිසම් සභාවක් පත්කරනවනම් හොයලා බලන්න කිසිම ප්‍රශ්නයක් න. ඒක හොඳ දෙයක්. විශේෂයෙන් 2005 – 2015 කාලය අතර සිදුවුණ වංචා සම්බන්ධවත් කොමිසමක් දාලා තියෙනවා. අපි කියන්නේ ඒ ගැනත් හොයලා බලලා ඒ වැඩවලට හවුල් අයටත් දඬුවම් කරන්න කියලා.

මේ වෙනකොට රහස් පොලීසියේ නිලධාරීන්ට චෝදනා එල්ල වෙලා තියෙනවා පසුගිය ආණ්ඩුවේ දේශපාලන නියෝග මත පරීක්ෂණ කළා කියලා. හැබැයි ඔබලා මේ නිලධාරීන් වෙනුවෙන් හරි පෙනීසිටීමක් නෑ. 
අපි කතා කරලා තියෙනවා ඒ ගැන. ප්‍රසිද්ධියේ ප්‍රකාශ දුන්නා. අපි තමයි එක්සත් ජාතික පක්ෂය. අපි ඔවුන්ගේ අයිතිවාසිකම් වෙනුවෙන් දිගටම පෙනී ඉන්නවා.

ආණ්ඩුවේ කොයියම් කෙනකු එක්ක හරි මේ නිලධාරීන් ගනුදෙනු කරලා මේ පරීක්ෂණ කළාද?
කිසිම ගනුදෙනුවක් අපිත් එක්ක තිබ්බේ නෑ. ඔය නිලධාරීන් අපේ මන්ත්‍රීන්ටත් විරුද්ධව කටයුතු කරලා තියෙනවා. නම් කියන්න අවශ්‍ය නෑ රටම දන්නවා. නඩුත් දාලා තියෙනවා අපිට. අපරාධ පරීක්ෂණ දෙපාර්තමේන්තුවේ තමයි දක්ෂම නිලධාරීන් ඉන්නේ. අද ඒ දක්ෂ නිලධාරීන් ඉවත් කරලා තියෙන්නේ. සමහර අය පීඩාවට පත්කරලා තියෙනවා. මේ නිසා සමහර නිලධාරීන්ට රටෙන් යන්න සිද්ධ වුණා. 

ඔවුන් ගේන චෝදනා තමයි ඔබලා මේ රටේ බුද්ධි අංශ අඩපණ කළා කියලා රහස් පොලීසියත් එක්ක එකතු වෙලා.
බුද්ධි අංශ නිලධාරීන් දසදහසකට වඩා ඉන්නවා. ඒ නිලධාරීන්ගෙනුත් 28ක් වගේ පිරිසක් වගේ තමයි මේ චෝදනාවට ලක්වුණේ. ඒ චෝදනාවට ලක්වුණෙත් යුද්ධය සම්බන්ධ කාරණා නිසා නෙවෙයි පෞද්ගලිකා යුද්ධයෙන් පරිබාහිර කාරණා සිදුකිරීම නිසා. දරුවන් 11 දෙනකු පැහැරගෙන ගිහිල්ලා කප්පන් ඉල්ලලා කප්පන් නොදීම නිසා ඝාතනය කිරීමේ චෝදනාව. ඒවා පරීක්ෂණ කරන්න අවශ්‍යයි නේද? ලසන්ත වික්‍රමතුංග ඝාතනය, තාජුඩීන් ඝාතනය සහ ප්‍රගීත් එක්නැලිගොඩ පැහැරගෙන ගොස් අතුරැදහන් කිරීම සම්බන්ධව තමයි මේ පිරිස අත්අඩංගුවට ගතයුත්තේ. එතකොට මේ පරීක්ෂණ කටයුතු කරන්න එපා කියලද කියන්නේ? මේවා පෞද්ගලික උවමනාවන් වෙනුවෙන් සිදු කරපු අපරාධ. හැබැයි මේ තර්ජන නිසා කිසිම පොලිස් නිලධාරියෙක් මේ පරීක්ෂණ සිදුකරන්නේ නෑ මින් ඉදිරියට.

ස්විට්සර්ලන්ත තානාපති කාර්යාලයේ නිලධාරිනියක් පැහැරගැනීම සම්බන්ධයෙන් මේ වෙනකොට කතාබහක් ඇතිවෙලා තියෙනවා. ආණ්ඩුවේ ඇතැම් අය විශ්වාස කරන්නේ මේ කතාව පිටිපස්සේ යහපාලනයේ අය ඉන්නවා කියලා.
එහෙම සම්බන්ධයකුත් නෑ. එහෙම දේවල් කරන්න මේ අවස්ථාවේ උවමනාවකුත් නෑ. ඒ වගේ දෙයක් හිතන්නවත් හැකියාවක් නෑ අපිට. ඊට වඩා අපි පක්ෂ අභ්‍යන්තරයේ දේශපාලන අරගලයක නිරත වෙලා ඉන්නේ. ස්විට්සර්ලන්තය කියන්නේ ස්වාධීන රාජ්‍යයක්. කිසිම කඳවුරකට යටත් නෑ. එවැනි රටක තානාපති කාර්යාලයක් අල්ලගෙන මේ දේවල් කරන්න අපිට කිසිම උවමනාවක් නෑ. හැබැයි මේවා පරණ පුරැදු තමයි පෙන්නන්නේ. තරාතිරම නොබලා ඕන කෙනෙක් පැහැරගෙන යන්න පුළුවන් කියන තර්ජනය තමයි මේ පෙන්නන්නේ. ඒ විතරක් නෙවේ. මාධ්‍යවලින් කීදෙනෙක් අල්ලගෙන ගිහින් ප්‍රශ්න කළාද? ඒ සියල්ල ලැබූ බලයෙන් උන්මාදවීමක් තියෙන්නේ.
► ගයාන් ගාල්ලගේ