2020 පෙබරවාරි 01 වන සෙනසුරාදා
හැමෝම ඡන්දෙට එන්නේ පොහොට්ටුවෙන්
2020 පෙබරවාරි 01 වන සෙනසුරාදා, ප.ව. 12:30 89
► පාස්කු ප්‍රහාරයේ වැරදිකරුවන්ට දඬුවම් දිය යුතුයි
► රන්ජන්ගේ වැඩෙන් රටට වුණේ බරපතළ හානියක්
► ගෝඨාභය මහත්තයාට ඡන්දෙ දුන්නේ අනුන්ගේ කුණු හෝදන්න නොවේ
► බැඳුම්කර වාර්තාව එළියට නොදැම්මොත් ජනතාව කලකිරේවි
► මහනුවර අධිවේගේ අවුරුදු හතරහමාරක් අත ගගා හිටියා වැට්
► අඩු කිරීමේ වාසිය දැනෙන්න ටිකක් කල් යයි
► අපි මොකටද නඩු යට ගහන්නේ?
► රන්ජන්ගේ වැඩෙන් රටට වුණේ බරපතළ හානියක්
► ගෝඨාභය මහත්තයාට ඡන්දෙ දුන්නේ අනුන්ගේ කුණු හෝදන්න නොවේ
► බැඳුම්කර වාර්තාව එළියට නොදැම්මොත් ජනතාව කලකිරේවි
► මහනුවර අධිවේගේ අවුරුදු හතරහමාරක් අත ගගා හිටියා වැට්
► අඩු කිරීමේ වාසිය දැනෙන්න ටිකක් කල් යයි
► අපි මොකටද නඩු යට ගහන්නේ?
- තොරතුරු හා සන්නිවේදන රාජ්‍ය අමාත්‍ය ලක්ෂ්මන් යාපා අබේවර්ධන
ආණ්ඩුව භාරඅරගෙන මාස තුනකටත් ආසන්නයි. ඒත් මිනිස්සුන්ට දැනෙන දෙයක් තාම පේන්න නෑනේ.
ප්‍රශ්නෙ මේකයි. අපි වැටිලා හිටියේ විශාල වළක. ඒ නිසා එකපාර ඒ ව‍ළෙන් ගොඩ එන්න පුළුවන්කමක් අපිට නෑ. ගොඩ ආවොත් තමයි දැනෙන්නේ. එකපාර ඒ මනුස්සයා ගොඩට ආවොත් තමයි ඒ මිනිස්සුන්ට සතුටු. නමුත් දැන් වෙලා තියෙන්නේ ඉනිමග තියලා ටික ටික උඩට ගන්න වෙලා තියෙන්නේ. ඒ තමා පළවෙනි කාරණය. මේ රටේ ආර්ථිකය සීයට එකයි දශම ගාණකට වැටිලා තියෙන වෙලාවක බෝම්බ පිපිරිලා සංචාරකයෝ නොඑන වෙලාවක රටේ විනයක් නැති වෙලාවක ව්‍යවස්ථාදායකය සහ විධායකය අතර ගැටුම් ඇතිවෙලා තියෙන වෙලාවක තමයි ගෝඨාභය රාජපක්ෂ මහත්මයට වැඩ බාරගන්න සිද්ධ වුණේ. එතකොට එතුමට තියෙනවා මේ කාරණා තුන හතරම විසඳගන්න. මිනිස්සුන්ට දැනෙන්නනම් අපි ගන්න තීරණ ක්‍රියාත්මක වෙන්න කාලයක් යනවා.
ඔබලා මොනවද ක්‍රියාත්මක කරලා තියෙන්නේ මිනිස්සුන්ට දැනෙන දෙයක් හැටියට?
පහුගිය කාලේ ව්‍යාපාරිකයෝ ණය අරගෙන ඒවා ගෙවාගන්න බැරුව ක්‍රිබ් එකට ගිහිල්ලා තිබුණේ. අපි දැන් බැංකුවලට දැනුම්දීලා තියෙනවා ඒ ව්‍යාපාරය නැවත ගොඩනගලා කෙළින් වෙනකල් එයට සහනයක් දෙන්න කියලා. ඒ වගේම භාණ්ඩ පන්දාස් පන්සිය පනස්පහක වැට් බද්ද අඩු කළා කියලා පාරිභෝගික අධිකාරියට දැනුම්දීලා තියෙනවා අදාළ ආයතන මගින්. දැන් එතකොට පාරිභෝගික අධිකාරියේ වගකීම තමයි ඒ දේවල් මොනිටර් කරන එක. අන්න ඒ සහන හරියට මොනිටර් කරලා දුන්නොත් තමයි මිනිස්සුන්ට දැනෙන්නේ. ඒ යන්ත්‍ර හරියට ක්‍රියාත්මක වෙලා මිනිස්සුන්ට දැනෙන්න ටිකක් කල් යයි.
සාමාන්‍යයෙන් ආණ්ඩුවක ප්‍රතිපත්තිය පෙන්නන්නේ අයවැයෙන්. ඔබලා කිව්වා අතුරු සම්මත අයවැයක් හරි ඉදිරිපත් කරනවා කියලා. නමුත් තාම එහෙම කිසිම දෙයක් පේනතෙක් මානයක නෑ.
අතුරු සම්මත අයවැයක් එනවා. දැනට මේ වෙනකොට අගමැතිතුමාගේ ප්‍රධානත්වයෙන් මුදල් අමාත්‍යංශය රැස් වෙලා අයවැය සකසමින් යනවා. එහෙම නැතිවුණොත් අරන් යන්න අමාරුයි. ඒක ඉක්මනින් පාර්ලිමේන්තුවට ඉදිරිපත් කරයි.
බොහෝදෙනෙක් ගේන තර්කයක් තමයි ආණ්ඩුවට සල්ලි නෑ කියන එක.
ඇත්තටම සල්ලි නෑ. ඇත්තටම සල්ලි නැති වෙන්න හේතුව තමයි අපි මේ වෙනකොට ඩොලර් මිලියන 480ක ණයක් ගෙවන්න ඕන. ඒක ලබන ජූලි, අගෝස්තු, සැප්තැම්බර්, ඔක්තෝබර් වෙනකල් ගෙවන්න ඕන. සල්ලි නෑ කියන්නේ මේ ණය ගෙවන්න අපි මුදල් කළමනාකරණය කරගන්නවා. මොකද ඒක ගෙව්වෙ නැත්නම් අපි ෆේල් වෙච්ච රටක් බවට පත්වෙනවා.
විපක්ෂයෙන් ගේන චෝදනාවක් තියෙනවා ඔබලා මේ ගෙනියන්නේ ඔවුන් විසින් ක්‍රියාත්මක කරපු ඒවගේම ක්‍රියාත්මක කරගෙන යන්න සූදානම් කරපු වැඩපිළිවෙළ තමයි කියලා. ඇයි එහෙම විපක්ෂෙ දේවල් කොපි කරන්නේ?
මට එකක් කියන්න. ඒ අය විසින් කරගෙන ගිය වැඩපිළිවෙළක් අපි කොපි කරලා තියෙනවද කියලා? ඒ අය තමයි අපි 2015 යනකොට කරගෙන ගිය වැඩපිළිවෙළක් එක එක නම්වලින් ඉස්සරහට අරගෙන ගියේ. දැන් එතකොට කවුද කොපි කළේ? අපි ගමට එක වැඩක් කියලා දෙයක් කළා. ඊටපස්සේ ඒක ඒ අය වෙන නමකින් කරගෙන ගියා. දැන් අපි ආයෙ කරනවා. ලක්ෂ 20ක් අපි ගමට දෙනවා. අපි ඉදිරියේදී කිලෝ මීටර් 10000ක් ඉදිකරන්න සූදානම් කරලා තියෙනවා. ඒවා ක්‍රියාත්මක වෙමින් යනවා. දැන් මට තේරෙන්නෙ නැත්තේ එයාලා කරපු දේවල් කියලා මොනවද අපි කරන්නේ කියලා. ඒ අය කරපු දෙයක් නෑනේ. දැන් ඒ අය කියන විදිහට කරගෙන ගියානම් රට ඉස්සරහට යන්න එපැයි.
ඒ අය කියන්නේ ඒ අය කරගෙන ගිය ව්‍යාපෘති දැන් ඔබලගේ වගේ කරගෙන යනවා කියලා.
උදාහරණයක් හැටියට මහනුවර අධිවේගී මාර්ගය ගන්න. ඒක අවුරුදු හතරහමාරක් යනකල් ඉවරකරගන්න බැරි වුණා. අඩුම තරමේ තුනෙන් දෙකක්වත්.. ඒත් නෑ. අඩුම තරමේ ටෙන්ඩර් කැඳවීමක්වත් කරලා නෑ. දැන් බලන්න අපි දක්ෂිණ අධිවේගී මාර්ගය ඉතාම පිළිවෙළට කළානේ. පළවෙනි අදියර ඉවරවෙනකොට දෙවැනි අදියර පටන්අරන් ඉවරයි. ඒනිසා අපි පටන්ගත්ත ව්‍යාපෘති ඒ අය මග නවත්තපුවා නැවත පටන්ගන්නවා.
හැබැයි ආණ්ඩුව එනකොට කියපු බොහෝ දේවල් රංජන්ගේ හඬපටත් එක්ක හෙමිහිට යටකරලා දැමීම නේද? ඒක ආණ්ඩුවේ ප්ලෑනක්ද?
අපිද රංජන්ගේ ප්‍රශ්නේ ගත්තේ? ඒ ප්‍රශ්නෙ ගත්තේ මාධ්‍ය. මාධ්‍ය තමයි රංජන්ගේ හඬපට සම්බන්ධයෙන් ප්‍රශ්න කළේ. ඔබ කොයි වෙලාවකවත් දැකලා තියෙනවද රංජන්ගේ හඬපට පිළිබඳ රටේ ජනාධිපති වචනයක් කතා කරනවා? ඒ නිසා රංජන්ගේ හඬපට පිළිබඳ මතය හැදුණේ රට ඇතුළේ. අපි කරපු දෙයක් නෙවෙයි. මිනිස්සු තමයි ප්‍රශ්න කළේ. දේශපාලනඥයෝ වශයෙන් මාධ්‍ය අපෙන් ඇහුවොත් උත්තර දෙනවා. ඇත්තම කතාව ගෝඨාභය රාජපක්ෂ මහත්මයට ඡන්දෙ දුන්නේ අනුන්ගේ කුණු හෝදන්න නෙවෙයි. කුණු හොයන්නත් නෙවෙයි. එතුමට විශාල කාර්යභාරයක් පවරලා තියෙන්නේ.
රංජන්ගේ හඬපට අස්සේ ඔහු චෝදනා කරනවා ආණ්ඩුවේ අයගෙත් හඬපට ඔහු ගාව තියෙනවා කියලා. ඒක බරපතළ චෝදනාවක්. අනික ඒවා එළියට එන්නෙත් නෑ. කවුද එහෙම කතා කරපු අය?
එහෙම කතා කරලා තියෙනවනම් කරුණාකරලා එයාට එළියට දාන්න කියන්න. ඒක එයාගේ යුතුකමක්.
ඔබට කතා කරලා තියෙනවද රංජන් රාමනායක?
මට කියන්න පුළුවන් මං ගැන. ජීවිතයේ කිසිම දවසක රංජන් රාමනායකත් එක්ක මම දුරකථනයෙන් කතා කරලා නැහැ. ආණ්ඩුවේ ඇමැතිවරු කිව්වම ගොඩක් ඉන්නවා ඉතින්. අපි කියන්නේ ඒ අය මෙන්න මේ අය කියලා හෙළිකරන්න කියලා රංජන්ට.
රංජන්ගේ හඬපට සම්බන්ධයෙන් ජනාධිපති කොමිසමක් පත් කරන්න යනවා කියලා ආරංචියක් තියෙනවා. දැන් ඇත්තටම මේ රටේ කොමිසමක් දාලා හොයන්න ඕන ලොකුම ප්‍රශ්නේ රංජන්ගේ හඬපටද?
දේශපාලනඥයෙක් තව පුද්ගලයෙක් එක්ක තුන්වැනි පාර්ශ්වයක් අමාරුවේ දාන්න මෙහෙම සාකච්ඡාවක් තියෙනවනම් ඒකට පරීක්ෂණයක් කළ යුතුයි. රංජන් රාමනායකට වුවමනා වෙලා තිබුණා අධිකරණය පැත්ත අවුල් සහගතයි කියලා පෙන්නන්න. හේතුව ඔහුට විරුද්ධව අධිකරණයට අපහාස කිරීමේ චෝදනා යටතේ නඩුවක් තිබුණ නිසා. දැන් රංජන් රාමනායක ඔප්පු කරලා තියෙනවා අධිකරණයත් ස්වාධීන නෑ කියලා. එයාට ඕන වුණේ ඒක කරන්න. නමුත් ඒක එයාගේ පෞද්ගලික දෙයක්. හැබැයි ඒක රටට බරපතළ හානියක්. ඒ නිසා මේ ගැන කොමිසමක් දාලා සෙවිය යුතුයි. මේකෙන් රටේ පද්ධති තුනක් කඩාවැටෙනවා.
කොහොමද මේකෙන් රටේ පද්ධති තුනක් කඩාවැටෙන්නේ?
දැන් බලන්න ජනාධිපතිගේ බලතල අඩු කරලා දුර්වල කරලා තියෙන්නේ. 20 වැනි සංශෝධනය ගෙනල්ලා ව්‍යවස්ථාදායකයට බලතල පවරා දීමකුත් නෑ. එසේ නොකළේ 19 ශක්තිමත් කරන්න. ඊටපස්සේ බලන්න ව්‍යවස්ථාදායකය. ඒ කතා කරපු දේවල් එක්ක රටේ මිනිස්සු 225ටම බණිනවා හැමෝම මේ වගේ කියලා. එතනින් ව්‍යවස්ථාදායකය අඩාල වෙනවා. අපිට අන්තිමට යන්න තිබ්බේ අධිකරණයට. දැන් මොකද වෙලා තියෙන්නේ. දැන් අධිකරණයේ විශ්වාසය නැති වෙලා. මෙහෙම තියාගෙන රටක් ගෙනියන්නේ කොහොමද? ඒ නිසා මේ කුණු ඔක්කොම සුද්ධ කරන්න ඕන. හැමෝම මේ වැරදි කරලා නෑ. දෙන්නෙක් තුන්දෙනෙක් කරපු දේවල්වලට හැමෝම පලි නෑ.
ඔබට හිතෙන්නෙ නැද්ද රන්ජන් රාමනායක කළේ ඇතුළාන්තයේ තිබ්බ පිළිකාවක් එළියට ඇදලා දැම්මා කියලා?
හිතෙනවා. ඒ වගේම ඒ ගැන කනගාටුත් වෙනවා. මට මං ගැන කනගාටුවක් තියෙනවා පාර්ලිමේන්තු මන්ත්‍රීවරු ඇයි මෙහෙම හැසිරෙන්නේ කියලා. ඉස්සර මිනිස්සු ඔය දේවල් කතා කළේ උපහාසයෙන්, කවියකින්, ව්‍යංගාර්ථයෙන්. ඒත් අද බලන්න.
ඔබලට අමතක වෙලා තියෙනවා ජනතාව තමයි ඔබලව ඒ තැනට අරන් යන්නෙ කියලා.
ඇත්ත. දෙකෝටි විසිපන් ලක්ෂයක් නියෝජනය කරලා තමයි මේ අය ඇතුළට යන්නේ. ඒ නිසා ඒ අය දැනගන්න ඕන ඡන්දදායකයන්ගේ ගෞරවය ආරක්ෂා කරගන්න. මම කිසිම වෘත්තියකට අපහාස කරන්නෙ නෑ. ඒත් දේශපාලනය කියන්නේ ඊට වඩා වෙනස් දෙයක්. ඒ නිසා ජනතාවගෙන් මම ඉල්ලන්නේ බොහෝම ප්‍රවේශමෙන් ඡන්දය පාවිච්චි කරන්න. හොඳම මිනිස්සු තෝරන්න ඡන්ද අයිතිය දීලා තියෙනකොට ඒකත් හරියට පාවිච්චි කරන්නෙ නැත්නම් මොකද කරන්නේ? අපි හැමදේම ගන්නකොට හොඳම දේ ගන්නවා. හැබැයි මේ ඡන්දෙ දෙනකොට හොඳම කෙනෙක් තෝරගන්න බෑ. ඒක පිළිගන්න බෑනේ. ඒ කියන්නේ මොකකට හරි වශී වෙලා ඇති.
රන්ජන් මන්ත්‍රීවරයා කිව්වා ඔහු මේ දේවල් කළේ හොරැ අල්ලන්න කියලා. එතකොට ඒකෙන් පේනවා කොතන හරි වැරුද්දක් තියෙනවා නේද යාන්ත්‍රණයේ?
ඉතින් ඔහුගේ ආණ්ඩුව කාලේ ඒක කරලා ඉවරකරන්න තිබුණනේ. ආණ්ඩුව කාලේ කතා කර කර ඉන්නෙ නැතුව ඔය ටික කළානම් ඉවරයිනේ. ඒ එකක්වත් කළේ නෑනේ. ජනප්‍රියත්වයට කරන දේවල්වලට හොරු අල්ලනවා කියලා කියන්න බෑ. මට පේන්නේ ඔහුට මොකක් හෝ අඩුපාඩුවක් තිබුණා.
ජනාධිපතිවරණයේදී ඔබලගේ වේදිකාවේ ඇසුණේ පාස්කු ප්‍රහාරයට වගකිව යුත්තෝ හොයනවා, බැඳුම්කර හොරැන්ට දඬුවම් දෙනවා කියලා. ඒත් තවම එහෙම පේන්නෙ නෑනේ?
පාස්කු ප්‍රහාරය ගැන බලමු අලුත්ම කොමිෂන් වාර්තාව එළියට ආවට පස්සේ. මමත් කියනවා ඒ අයට දඬුවම් දිය යුතුයි කියලා. දෙවැනි කාරණය ගැන බලමු සිංගප්පූරුවේ නීති ලේකම් කාර්යාලයේ තීන්දුවක් ආවට පස්සේ. අර්ජුන මහේන්ද්‍ර ගැනත් තීන්දුවක් ගන්නවා. මොකද ඔහු විදේශිකයෙක්. ඒ හැර අපි මොනවද කරන්නේ?
විපක්ෂයෙන් කියනවා ඒ අයගෙන් බැඳුම්කරයට සිදුවෙච්ච පාඩුව කෝටි හයසිය ගාණයි කියලා. ඒත් රාජපක්ෂ ආණ්ඩුව කෝටි එක්දහස් ගාණක්ම වංචාකරලා කියලා.
ඒක දැනගන්න පුළුවන් වෝහාරික වාර්තාව ආවට පස්සේ.
ඇයි ඔබලට මේ වාර්තාව පාර්ලිමේන්තු මන්ත්‍රීවරු හැටියට කතානායකවරයගෙන් ඉල්ලීමක් කරලා එළියට දාන්න බැරි? ඒක ජනතා සේවකයකුගේ වගකීමක් නේද?
අපි ඉල්ලුවා. ඒක කතානායකතුමාගේ කාර්යභාරයක්. මන්ත්‍රීවරු හැටියට අපි කීපවතාවක්ම ඉල්ලුවා.
හැබැයි නීතිපතිවරයා විසින් නියෝගයක් දීලා තියෙනවා මේක එළියට දාන්න එපා කියලා.
ඒකට අපිට කරන්න දෙයක් නෑනේ. මහජනතාවට අයිතියක් තියෙනවා මේක දැනගන්න. ඒකෙ වගකීම තියෙන්නේ කතානායකවරයාට. මහජනතාවට අයිතියක් නැද්ද හැම සිද්ධියම දැනගන්න? ඒකෙන් නඩුවකට හානියක් වෙන්නෙ නෑ. මේක ඒකට දැම්මොත් තව ගොඩක් රහස් එළිවෙයි.
මේ දේවල් අතරතුර විපක්ෂයේ අය ආණ්ඩුවේ අය එකට ඉන්න ඡායාරූපත් පත්තරවල යනවා. එතකොට මිනිස්සුන්ට හිතෙන්න පුළුවන් නේද මේ දේවල් කවදාවත් වෙන්නෙ නෑ කියලා?
මිනිස්සුන්ට සැකයක් එන්න පුළුවන්. හැබැයි ඒක අපි අනිවාර්යයෙන් එළියට දැමිය යුතුයි. මම හිතනවා ඒක කරයි කියලා. එහෙම නොකළොත් සමස්ත දේශපාලනයම මිනිස්සුන්ට එපා වෙයි. මොකද අපි වරද්දගත්තොත් ආයෙ හදන්න බෑ.
ජනාධිපතිවරයා මොකද්ද කියන්නේ මේ ගැන?
එතුමා කියන්නේ කාරණා දෙකක්. නීතිය ක්‍රියාත්මක කරන වැඩකටයුතු ඒ අයතනය විසින් කරන් යයි. ඒවා මට අයිති නෑ. මට භාරදුන්න රාජකාරිය ජනතාවට මම ඉෂ්ට කරනවා. නීතිය හරි හැටි ක්‍රියාත්මක වෙන එකට එතුමා මැදිහත් වෙනවා. හැබැයි ඒක මෙහෙයවන්නේ එයා නෙවෙයි.
දේශපාලන පලිගැනීම් සම්බන්ධව සොයාබලන්න ජනාධිපති කොමිසමක් පත්කළා. එතනින් නියෝගයක් දෙනවා එක්තරා නඩුවක් විභාග වෙන එක නවත්වන්න කියලා නීතිපතිවරයට. එහෙම කොහොමද කොමිසමකට බලය එන්නේ?
කොමිසමක් දානකොට දාන්න ඕන විශේෂ ජනාධිපති කොමිසමක්. එතකොට ඒ දේවල්වලට බලතල තියෙනවා. එහෙම නැතුව බෑ.
මේ හදන්නේ නඩුව යට ගහන්නද?
මොකටද අපි නඩුව යටගහන්නේ? මම දන්නවා කිසිම වෙලාවක ආණ්ඩුව පුද්ගලයන් රකින්න යන්නෙ නෑ.
ඔබලා මේ හදන්නේ දේශපාලන පලිගැනීම් කරන්න කියලා චෝදනා තියෙනවා.
ඒක මම පිළිගන්නෙ නෑ. ජනාධිපති හරි අගමැති හරි කාර්යාලවලින් කිසිම දෙයක් මෙහෙයවන්නෙ නෑ ඉස්සර වගේ. පොලිස්පතිට හරි වෙන කිසිම කෙනකුට හරි බලපෑම් කරලා නෑ. එහෙනම් කොහෙද දේශපාලන පලිගැනීමක්?
ඔබලා එම්. සී. සී. සී. ගිවිසුම අත්සන් කරනවා කියලා චෝදනාවක් තියෙනවා. දැන් ඒකට ලෑස්තිද?
ඒ ගිවිසුම අත්සන් කරන්න කිසිම අවශ්‍යතාවයක් නෑ. අපි හදලා තියෙනවා මහජනතාවට මේ නොදන්නා ගිවිසුම සම්බන්ධයෙන් දැනගන්න වගේම ඒ ගැන අධ්‍යයනය කරන්න. අපි ඒකට කමිටුවකුත් දැම්මා. එතකොට මහජනතාවට තේරැම්ගන්න පුළුවන් මේකෙන් ආපදාවක් තියෙනවද නැද්ද කියලා. කොහොමත් මේ ගිවිසුම ලංකාවේ ක්‍රියාත්මක වෙන්නෙ නෑ. මේක ජනතාවට ලබාදුන්නේ ඔවුන්ට අධ්‍යයනය කරන්න.
ලෝකයේ පැතිරිලා තියෙන කොරෝනා වෛරසය ගැන ආණ්ඩුවේ සූදානම වෛද්‍ය සංගමය විසින් විවේචනය කළා. ඇත්තටම ආණ්ඩුව ඒකට සූදානම් නැද්ද? පහසුකම් නැද්ද?
ආණ්ඩුවක් හැටියට සියලු දේ සූදානම් කරලා තියෙනවා ජනාධිපතිතුමා විසින්. එයට කමිටුවකුත් පත්කරලා තියෙනවා. වළක්වාගැනීම සඳහා වැඩකටයුතු හදලා තියෙනවා. අපේ සෞඛ්‍ය අංශ ඉතා ඉහළ මට්ටමක තියෙනවා. අපේ ආර්ථිකයත් එක්ක යම් යම් ප්‍රශ්න තියෙන කතාව ඇත්ත. නමුත් අපේ ශ්‍රී ලාංකිකයන් ගෙන්නගන්න තැනේ ඉඳලා සියලු වැඩකටයුතු සිද්ධ කරලා තියෙනවා.
අවසාන වශයෙන් ඔබගෙන් අහන්නේ බොහෝදෙනකුට ප්‍රශ්නයක් තියෙනවා පොහොට්ටුවයි අතයි මහ මැතිවරණයේදී එන්නේ මොන සලකුණෙන්ද කියලා. දැන් තීන්දු කරලා ඉවරද?
විවිධ අදහස් තියෙනවා. හැබැයි අවසානයේ හැමෝම එන්නේ පොහොට්ටු ලකුණෙන්.
► ගයාන් ගාල්ලගේ