හදිසි අනතුරු පිපිරීම්

සිකුරු යුරේනස් යුද්ධයක

2018 මාර්තු 29 වන ගුරු දින උදේ 6.18 සිකුරු හා යුරේනස් අතර යුද සංග්‍රාමයක් සිදුවනු ඇත. ඒ අඟහරැට අයත් මේෂ රාශියෙහි කේතුට අයට අස්විද නැකතේ ප්‍රථම පාදයෙහිය. සිකුරු හා යුරේනස් එකම අංශකයක ගමන් කිරීම හේතුවෙන් සිදුවන මෙම ග්‍රහ සංග්‍රාමය තුළින් සිකුරුගේත් යුරේනස්ගේත් අයහපත් වූ ග්‍රහ කිරණ පෘථිවිය වෙත එල්ල වනු ඇත. 

ඉදිරි දින 90ක් තුළ අප රට කෙරෙහි යොමු කිරීමේදී බලාපොරොත්තු රහිත ක්ෂණික කරදරයක් හේතුවෙන් යම් යම් වූ අපහසුතාවයන්ට රජය පත්වන බව පෙනේ. මහජනයා අතර විවිධ කට කථා පැතිරයනු ඇත. භාණ්ඩ ගබඩා ස්ථානයක් ගිනිගැනීමකට ලක්වනු ඇත. යාත්‍රා අනතුරක් පිපිරීමක්/ ගිනි ගැනීමක් සිදුවන අතර හදිසියේ ගොඩනැගිලි කඩාවැටීමක් ද වාර්තා වනු ඇත. ප්‍රවීණ සාහිත්‍යවේදියකුට මාරකයක් යෙදෙනු ඇත. රටේ දික්කසාද වීම් වැඩි වන වකවානුවක් වන අතර දුම්රිය අනතුරක් ද දුම්රිය දෙපාර්තමේන්තුව ආශ්‍රිතව අපරාධ ක්‍රියාවක්ද වාර්තා වනු ඇත.

විදේශීය වශයෙන් විමසා බැලීමේදී ඊජිප්තුව, බුරුමය, ආජන්ටිනාව, චීනය, ඕස්ටියාව ආශ්‍රිතව සාගත තත්ත්වයක් ඇතිවනු ඇත. රංගන ක්ෂේත්‍රයේ ප්‍රසිද්ධ කෙනෙකුට මාරකය. රාජ්‍යයන්ට එරෙහි විප්ලවකාරි ක්‍රියා කැරලි වැඩවර්ජන ක්‍රියාත්මක වන්නාවූත් කාල වකවානුවකි.

මීළඟට ඔබට

මේෂ - සෞඛ්‍ය පිරිහේ

ඔබගේ ශරීර සෞඛ්‍යයට යම් යම් බාධා ඇති වනු ඇත. පවුල් දිවියේ ද ප්‍රශ්න මතුවේ. හවුල් කටයුතුවලදී පරිස්සම් වීම වැදගත්ය. හෘදය අශ්‍රිත පීඩාවක් මතු වනු ඇත.

වෘෂභ - නීතිමය ප්‍රශ්න

ඔබගේ යම් යම් කටයුතු සඳහා විවිධ පාර්ශවවලින් බාධා ඇතිකරනු ඇත. දුරගමන් යාමේ බලාපොරොත්තු මගහැරී යනු ඇත. නීතිමය ප්‍රශ්නයකට මැදිවිය හැකි බැවින් සෑම කටයුත්තකදීම කල්පනාකාරී වන්න.

මිථුන - සිත් අමනාප

තම මිතුරන් සමඟ සිත් අමනාපකම් ඇති වනු ඇත. දේශපාලන කටයුතුවල නිරත අයට අයහපත් ඵල අත්වන වකවානුවක් වන අතර ධනය ලැබීමේ මාර්ගවලට බාධා ඇතිවනු ඇත.

කටක - වාහන ලාභයක්

ඔබගේ කටයුතුවලට විවිධ අයගෙන් බාධා ඇති කරනු ඇත. සිතේ සහනය අඩු වකවානුවක් වනු ඇත. හදිසි ශරීර පීඩාවලින් පරිස්සම්වන්න. නව දේපලක් හෝ වාහනයක් මිලදී ගැනීමට මුදල් යොදවයි.

සිංහ - අලුත් නිර්මාණයක්

ඔබට එතරම් බලපෑමක් ඇති නොවනු ඇත. නමුත් අධ්‍යාපන කටයුතුවල නිරත වී සිටින අයට යම් යම් බාධාවීම් ඇතිවන අතර අලුත් දෙයක්/ නිර්මාණයක් සිදුකිරීමට උත්සහ දරන වකවානුවක් වනු ඇත.

කන්‍යා - පවුල් ප්‍රශ්න

ඔබගේ කටයුතුවලට විවිධ බාධා ඇති වනු ඇත. හදිසි ශරීර පීඩා ඇතිවන බැවින් පරිස්සම්වන්න. ඉතිරි කර ගැනීමටද බාධා ගෙනදේ. ලේඛන කටයුතුවල නිරත අයට අයහපත් වන අතර පවුල් දිවියේ ද ප්‍රශ්න මතුවේ.

තුලා - හවුලට හොඳ නැහැ

ව්‍යාපාරික කටයුතුවල නිරත වී සිටින අයට අයහපත් වන අතර හවුල් කටයුතුවලද මෙම වකවානුව තුළ නිරත වීම අවධානම් සහිත වේ. අවිවාහක අයට මංගල යෝජනා තවදුරටත් ප්‍රමාද වනු ඇත.

වෘෂ්චික - සතුරු කරදර

ඔබගේ කටයුතුවලට විවිධ බාධා ඇතිවනු ඇත. සැඟවුණු සතුරු කරදරවලට ලක්වනු ඇත. ඔබගේ කාලත්‍රයාට හදිසි ශරීර පීඩාවක් ගෙනදෙයි. ඔබටද සෙම් ආශ්‍රිත ආබාධයක් ඇතිවනු ඇත.

ධනු - කලාවට හොඳ නැහැ

ඔබගේ හිතවතුන් සමඟ සිත් අමනාපකම් ඇතිවන වකවානුවක් වේ. කලා කටයුතුවල නිරත වී සිටින අයට අයහපත් ඵල අත්වනු ඇත. විරුද්ධ ලිංගික බැඳීම්වලට යම් යම් බාධා ගෙනදේ.

මකර - වැඩ වැඩිවේ

අලුත් දේපලක් වාහනයක් මිලදී ගැනීමට යෝග්‍ය නොවන වකවානුවක් වේ. සේවා ස්ථානය ආශ්‍රිතව යම් යම් ගැටලු පැනනගිනු ඇත. වැඩ අධික වීම නිසා සිතට වෙහෙසක් දැනෙන එපාවීම්වලට පත්වන වකවානුවක් වනු ඇත.

කුම්භ - ලාභ අඩුවේ

ලේඛන කටයුතුවල නිරත අයට අයහත් බලපෑම් ඇතිවන අතර පවුල් දිවියේ ද යම් යම් ප්‍රශ්න ඇතිවනු ඇත. ව්‍යාපාරික ක්ෂේත්‍රයේ නිරත අයට ලාබ අඩු වකවානුවක් වනු ඇත.

මීන - පවුල් ආරවුල්

තැන්පත් ධනය වියදම් යන වකවානුවකි. සැගවුණු සතුරැ කරදරයකට ලක්විය හැකි බැවින් ප්‍රවේසම්වන්න. ඔබගේ කාලාත්‍රයාට ද අයහපත් බලපෑම් ඇතිවන අතර දෙදෙනා අතර ආරවුල් ඇතිවිය හැකි නිසා ඉවසීමෙන් කටයුතු කරන්න.

ජ්‍යොතිෂ නන්දන
ප්‍රවීණ ජ්‍යොතිෂවේදි ජ්‍යොතිෂාචාර්ය
රේණුක වික්‍රමසිංහ
සුවණැන ජ්‍යොතිෂ පර්යේෂණායතනය
ඔලබොඩුව, ගෝනපල